Вормизы удмурт нылъёс

Ангелина Снигирева
By Ангелина Снигирева Февраль 15, 2019 15:49

Кылем суббота нуналэ, 9-тӥ феврале, шаерысьтымы ваньмаз городъёсын но ёросъёсын куасэн бызьылонъя ӵошатсконъёс ортчизы. Озьы Удмуртиысь 6 сюрс пала спортэз яратӥсьёс «Россиысь куас сюрес» борды итӥськизы.

Д. Леконцева, С. Иванова но Д. Белослудцева

Выль кабинаос

Кужмоосыз спортсменъёс люкаськылӥзы Г. Кулакова нимо спорткомплексэ. Соослы капчи мылкыд но выль вормонъёс сӥзизы Тӧролэн но Правительстволэн администрациенызы кивалтӥсь Сергей Смирнов, мугорез кыдатон культурая, спортъя но егитъёсын ужан политикая министр Наталья Гольцова, Иж город Думалэн тӧроез Олег Гарин, олимпийской чемпионъёс Галина Кулакова но Тамара Тихонова но мукетъёсыз. Уноез тодазы вайизы Сочиын ортчем тол Олимпиада сярысь. Угось 5 ар талэсь азьло ортчем ужрадэ Удмуртиысь спортсменъёс но пыриськизы.

— Азьло дырысен Россиысь тол амалъя ӵошатсконъёсын кужмо спортсменъёс Удмуртиысь вал, берло дыре но шаерысьтымы куасэн бызьылӥсьёс дуннеысь ӵошатсконъёсы пырисько, — шуиз Сергей Смирнов. — Кылсярысь, алигес Финляндиысь Лахти городын ортчиз дуннеысь егитъёслэн куасэн бызьылонъя чемпионатсы, отын Удмуртиысь 5 пиос ӵошатскизы.

Спортсменъёслы шуныт кылъёс верамзы бере, вылӥ кивалтӥсьёс куас сюрес вылэ потӥзы. Дэмен ӝыны иськем кузьда сюресэз ортчыса, пыриськизы спорткомплексысь вакс-кабинаосты сӥё-дано усьтонэ. Табере Г. Кулаковалэн спорткомплексаз лыктэм спортсменъёс кылиськон-дӥсяськон интылы уз ёрме ни.

— Таӵе вакс-кабинаос спорткомплексэ кемалась пуктыны кулэ ни вал, соостэк Россиысь бадӟым ӵошатсконъёсыз ортчытъяны лэземын ӧвӧл, — шуэ Удмуртиысь нылъёслэн сборной командаенызы кивалтӥсь, олимпийской чемпионка Тамара Тихонова. — Вазенгес соосты огдырлы татчы нуллӥзы биатлонъя А. Демидов нимо спорткомплексысь. Валамон, кабинаосты солань-талань нуллон капчиен ӧз сётӥськы. Соин ик куасэн бызьылӥсьёслы но 25 выль вакс-кабинаос басьтӥзы, азьланяз эшшо 5-сэ вайыны чакламын на.

Россиысь Куасэн бызьылонъя федерацилэсь куронъёссэ Удмуртия быдэсак быдэстӥз ке, шаерамы спортъя ӵошатсконъёс ӵемгес ортчылозы. Нош кытын трос калык но бадӟым вожвылъяськонъёс, отын спортсменъёслэн быгатонлыкъёссэс возьматыны луонлыксы тросгес, спорт удысын коньдон уногес.

Огезлэсь дано мукетыз

«Россиысь куас сюрес» ӵошатскон котьку но котыраз трос калыкез люкалля. Туэ но сое ас доразы ортчытӥзы Удмуртиысь 5 городын но 22 ёросын. Куас вылэ султылӥзы пиналъёс но спортэз яратӥсь семьяос, кивалтӥсьёс но арлыдоос. Берло дыре куасэн бызьылонъя ӵошатсконъёсты мыло-кыдо ортчыто Дэбес ёросын. Кызьы вераз ёрос администрациысь физкультурая но спортъя ёзэн кивалтӥсь Андрей Князев, куасэн бызьылонъя ӵошатсконзы 2 нунал ортчиз, нырысетӥяз — «Россиысь куас сюресъёс», 2-тӥяз — ёросысь гурт шудонъёс. Кыказ ик ужрадэ вань муниципал кылдытэтъёсысь командаос пыриськизы, куасэн бызьылыны мылкыд карисьёс ичизэ 2 иськемез ортчизы. Пӧлазы вал 5 аресъем пиналъёс но.

Нош Г. Кулакова нимо спорткомплексын кужмо спортсменъёс 10 иськемез ортчизы. Тужгес но учкымон вал воргоронъёслэн ӵошатсконзы. Стартэ потӥсьёс пӧлын вал Олимпиадае, дуннеысь студентъёслэн универсиадаязы но дуннеысь егитъёслэн первенствоязы пыриськылэмъёс. Финише вуытозь, тодмо ӧй вал, кин луоз нырысетӥ. Финиш гожез огдыре выжизы, шуыны луоз, куспазы ӝыны метр но виссы ӧй вал, Кез ёросысь Константин Главатских, Ижысь Равиль Валиахметов но Пичи Пурга ёросысь Денис Филимонов. Вормисьёс пӧлы шедемезлы дурыныз шумпотӥз тужгес егитэз — Денис Филимонов.

— Котькуд стартэ капчи мылкыдын потыны тыршисько, быземъя гинэ шӧдӥськод ни аслэсьтыд кужымдэ, — шуэ Денис. — Куасъёсы умой нуизы ке но, кот куазь люкетӥз: пумазгес куасъёсы но «пуксизы», ӟигары но бырыны кутскиз. Алигес мон вуи Финляндиысь ӵошатсконъёсысь. Жаляса верано, дуннеысь егитъёс пӧлын 30-тӥ инты гинэ басьтӥ. Нырысьсэ бадӟым стартъёсы пыриськыса, валай: интыез воштон, куазьлэн аспӧртэмлыкез гинэ но кужым вылын шӧдӥське вылэм. Табере выль стартъёс витё, соослы дасяськоно.

Нылъёс но та нуналэ 10 иськеме бызизы. Кужмоосыз соку ик висъяськизы ӝог быземенызы. Вормисе потӥзы Удмуртилэн сборной командаяз пырись нылъёс, эшъёс: Можга городысь Снежана Иванова, Эгра ёросысь Мазьги гуртысь Дарина Леконцева но Кез ёросысь Александрово черкогуртысь Дарья Белослудцева. Удмурт нылъёс Россиысь пӧртэм вузъёсын дышетско ке но, сборъёсын соос котьку ӵош бызьыло. Матысь дыре, Гурт шудонъёсы пыриськыса, вордскем ёросъёссылэсь данзэс утьыны дасясько.

Валентина Емельянова

Туспуктэмез авторлэн

Ангелина Снигирева
By Ангелина Снигирева Февраль 15, 2019 15:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<