Визьзэс сыназ Флор Васильев

Ангелина Снигирева
By Ангелина Снигирева Февраль 13, 2019 16:10

Ижысь 60 номеро школаын ӟеч сяме пыӵам «Тол шудонъёс» ортчизы. Отчы люкаськизы удмурт кылэз дышетӥсь 7 школаосысь нылпиос.

11-тӥ школаысь визь погъёс

Таӵе ужрадэ городысь удмурт кылэз дышетӥсь пиналъёс 12-тӥ арзэ люкаськылӥзы ни. Шудонъёсты радъяло Ижысь удмурт кылъя но литературая дышетисьёслэн огазеяськонзы но шоркарысь дышетӥсьёслэн центрзы.

— Котькуд ар шудонъёсмес пӧртэм темаослы сизӥськомы. Туэ пумиськонмы Флор Васильев кылбурчилэн 85 ар тырмонэныз герӟаськемын вал, — вераз одӥгез ужрадэз радъясь, 60-тӥ школаысь дышетӥсь Елена Ямщикова. — Азьлапал ик ортчоно шудонлэн пуштросэз, темаез сярысь ивортӥм. Котьку сямен, отчы пыриськыны мылкыд каризы 11, 17, 60, 65 номеро школаос. Туэ нырысьсэ лыктӥзы 69-тӥ школаысь нылпиос. Положениямы 7-тӥ классысен нылпиос пыриськыны быгато шуыса гожтэмын ке но, соос командазэс 6-тӥ классъёслэсь люкаллям. Таос ик паймытӥзы визиткаенызы — сое быдэс спектакль выллем дасяллям. Туж чебересь удмурт дэремъёсын вуиз 17 номеро школаысь команда. Шудонъёсамы кемалась ӧз ветлы вал ини 56 номеро гимназия. Сцена вылысен нылпиос туж чебер но вольыт лыдӟизы Ф. Васильевлэсь чуръёссэ.

«Тол шудонъёс» — нылпиослэсь котыр ласянь тодон-валанзэс эскерон.

— Учкеммы потӥз, тодо-а нылпиосмы, мар луэ асьме шаерамы, Россиын, лыдӟо-а газет-журналъёсты, — азинтэ Е. Ямщикова. — Озьы кылем арлэсь валтӥсь тодметъёссэ тодэ вайимы. Т. Чернова, Л. Кутянова кылбурчиос сярысь юанъёс чузъяськизы — кылем арын кыкназылэн котырес лыдпусъёссы вал. Палэнэ ӧм кельтэ спортэз. Россиын ортчем футболъя чемпионат сярысь юанъёсты кылыса, пиослэн синъёссы ик ӝуатскизы. Ог-огзэс азьпалтыса, валэктон сётъязы.

Асьсэос командаос но Ф. Васильевен герӟаськем юанъёс дасяны кулэ вал. Мур бугыръяськиллям кылбурчилэн биографияз, творчествозэ эскериллям. Кылсярысь, чузъяськизы таӵе юанъёс: кыӵе писпу луэмез потэ вал Ф. Васильевлэн? Кыӵе книга поттэмын вал Ф. Васильевлэн биографиез сярысь но кин солэн авторез? Кыӵе ӟуч поэтэз тужгес гажа вал Ф. Васильев? Шумпотымон, тросэзлы юанъёслы валэктон шедиз.

Шудонын вормизы К. Герд нимо гимназиысь нылпиос, 2-тӥ инты утӥз 56 номеро гимназия, 3-тӥ луизы 60-тӥ школаысь визь погъёс. Вормисьёслы Удмурт театр спектакле вуылыны дунтэк билетъёс висъяз. «Удмурт Кенеш» вань командаослы синпель кузьымъёс сётъяз — яркыт но чебер выло книгаос. Нимысьтыз ческыт кузьым — пицца — дасязы дышетӥсьёс.

Ангелина Снигирёва

Туспуктӥз С. Еремина

Ангелина Снигирева
By Ангелина Снигирева Февраль 13, 2019 16:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<