10 сюрс адями — Шор площадьын

Ангелина Снигирева
By Ангелина Снигирева Январь 10, 2019 17:06

Выль ар праздникъёс Ижын улӥсьёс но куноос понна трос ужрадъёсын тодазы кылёзы. Угось туэ туж трос вылез, паймымонэз дасямын вал.

Дунтэк нискылазы!
Шулдыръяськонъёс кутскизы ни 27-тӥ декабрьысен — соку ӝуатскиз городысь валтӥсь кыз. Нош кыӵе тузӥ пӧрмизы Шор площадьысь йӧ гурезьёс. Вань каникулъёс ӵоже отысь нылпиос ӧз бырылэ — чир! поттыса шудӥзы. Кылем арын сярысь, туэ гурезьёсын нискылан дунтэк вал!
Эшшо ке куазед удалтӥз — кезьытэд исаса кадь гинэ чепыллямъяськиз. Озьы нуналлы быдэ Шор площаде уно калык люкаськылӥз. Эсьма, 31-тӥ декабрьысен 1-тӥ январе потон уе гинэ валтӥсь кыз котыре 10 сюрслэсь ятыр адями вуиз. Ужрадъёс кутскизы ни 20 часысен. Калыкез ӟечкылазы городысь предприятиослэн но огазеяськонъёслэн кивалтӥсьёссы, шулдыртӥзы кырӟась-верась коллективъёс, радъяськизы пӧртэм шудонъёс. Данакез татын ик часлэсь 12 пол шуккемзэ но пумитазы! Нош часъёс шуккизы фейерверк кисьтаськем улсын!
Улӟизы П. Чайковскийлэн геройёсыз
2-тӥ январе 19 часын Правительстволэн быдэс юртэз театрысь сценалы укшаны кутскиз. Лыз-горд-вож тылъёсын кисьтаськиз. Пётр Чайковскийлэн гуръёсыз улсын улӟизы солэн произведениосысьтыз геройёс — Щелкунчик, Лымы ныл, Кукри баба… Шор площадь тыр люкаськем калык синъёссэ вошъятэк учкиз видеошоуэз.
Тылъёсын эшшо одӥг шудон ортчиз 5-тӥ январе. Асьсэлэсь быгатонзэс возьматӥзы тылэн, пиротехникаен шоу лэсьтӥсьёс. Чебер вал! Нош ужрад йылпумъяськиз «Удмуртия заряжает!» эктон флешмобен — отчы 100-лэсь трос адями итӥськиз.
Та нуналэ ик Ижысь Шор площадьын ортчиз на Ижлэн йырызлэн кубокез понна диджейёслэн нырысетӥ фестивальзы. Тужгес усто 6 диджейёс куспын ӟырдыт вожвылъяськон пуромиз. Нош макем золгес соос ӵошатскизы, сокем шулдыргес вал учкисьёслы — эктӥзы, кырӟазы, кӧтсэс кутыса серекъязы…
Ымусьтон
6-тӥ январе ӝыт ортчиз «Ымусьтон азьын уй». Шӧдӥськиз: ӝытлы быдэ шулдыръяськыса но, адямиосты ужрадъёс жадьытӥллямтэ — нош ик трос калык люкаськиз.
Та рад Ижын улӥсьёсты но куноосты возьмазы «Горлица» но «Инвожо» ансамбльёслэн калык кырӟанъёссы, ваче кутскыса берганъёс, конкурсъёс, флешмоб но трос мукетыз. Шулдыръяськонъёсты йылпумъяз «Волга-Волга» группа. Музыкантъёс шудо аспӧртэмлыко стилен, сое асьсэос малпазы — «ска-фолк-рок-бардак». Гуръёсынызы 8 альбом поттӥзы ни.
Ымусьтон шулдыръяськон азинтӥськиз на 7-тӥ январе нуназе шорын. Ижысь Дун-чылкыт Михаиллэн соборез азьын концерт пуктӥз эктонъя «Ижевск» ансамбль.
Задор мылкыдъёс — суредъёсын
Шор площадьын но городысь паркъёсын пӧртэм ужрадъёс ортчон вакытэ ик Ижысь тымет дурын ӵужонэн суредаськиз быдэс странамылы тодмо луэм азбар ӵужись Семён Бухарин. Со котьку шуэ: азьло ик уг тодӥськы, мар суредало — ваньмыз потэ мылкыды бордысь. Мылкыдыз, ваньмызлэн кадь ик, умой вал, шӧдске — суредъёсыз задоресь пӧрмизы.

DCIM\100MEDIA\DJI_0014.JPG

Скульпторъёс ужало ни
Чебер ужрадъёс ӧз йылпумъяське на. Кылсярысь, та нуналъёсы «Удмуртиысь йӧ» но «Ангелъёс но архангелъёс» фестивальёслы кутскон сётэмын.
Отчы, Ижысь сяна, вуэмын Москваысь, Пермьысь, Екатеринбургысь, Уфаысь, Рязаньысь но мукет городъёсысь художникъёс. 13-тӥ январёзь соос йӧлэсь 16 скульптураосты Иж тымет дуре лэсьтозы. Нош йӧлэсь ангелъёс кылдозы Дун-чылкыт Михаиллэн соборез но Шор площадьысь вашкала ву башня дорын. Озьыен, нош ик луоз кытчы ветлыны, мае учкыны! 

Элина Васильева

Ангелина Снигирева
By Ангелина Снигирева Январь 10, 2019 17:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<