Ӵошатсконэ сюрон понна ӵошатскон

Ангелина Снигирева
By Ангелина Снигирева Январь 25, 2019 13:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Гурт спортсменъёслэн 25-тӥ тол ӵошатсконъёссы дорозь толэзь гинэ кылемын на. Та вакытэ ӟырдыт нюръяськон мынэ зонаосын командаен шудӥсьёс пӧлын. Гурт шудонъёсы шедёзы 5 кужмо командаос.

Ӵошатконлы дасясько

Гурт спортсменъёслэн ӵошатсконъёслы дасяськемзы сярысь пыр-поч вераз Мугорез кыдатон культурая, спортъя но егитъёсын ужан политикая министерствоысь спортсменъёсты дасянъя центрысь специалист Радик Мамаев.

— Спортсменъёс пӧлын ӟырдыт нюръяськон пуромемын, котькуд ёрослэн кужмо луэмез потэ, — шуэ Радик Мамаев. — Баскетболэн шудӥсь командаос Гурт шудонъёсы путёвкаос декабрь толэзе ик утӥзы ни вал. Январе но арнялы быдэ кыӵе ке ӵошатсконъёс радъясько. Алигес Ува каргуртын шашкиен шудӥзы, Дэбесын — шахматэн. Кылиз на хоккеен шудон. Кылем арня пумын Якшур-Бӧдья черкогуртысь йӧ каток вылын пумиськылӥзы 6 командаос, таяз арняе куноосты пумиталоз Вотка ёросысь Новый каргурт, нош вуоно арняе хоккей луоз Эгра каргуртын.

Ма ватонэз, берло аръёсы командаен шудӥсьёс пӧлы ялан одӥг ёросъёс шедё. Иське, со ёросъёсын ик спортэз азинтон умой радъямын. Баскетболэн шудӥсь командаос пӧлын гинэ куд-ог воштӥськонъёс ортчизы. Кылсярысь, берло дыре Дэри ёросысь нылкышноослэн командазы ас зонаязы ялан кинлы ке 1-2 очко келя вал. Туэ соос но Гурт шудонъёсы мынозы.

Гурт шудонъёс таяз учыре ортчозы Алнашын. Кылем суббота нуналэ отын ёрос ӵошатсконъёссы вал. Куасэн бызьылонъя вожвылъяськонэ ваньмысьтыз сямен муниципал кылдытэтъёсысь 150 пала спортсменъёс люкаськизы. Ӵапак ёрос ӵошатсконзы дыръя ик дунъет сётӥзы выль лэсьтэм куас сюрессылы. Озьы ик пусйыны кулэ, нялмыт интыоссы Алнашын ичи, соин ик ӵошатсконъёслы ӟеч-ӟеч дасяськымтэ адямиосты куас сюрес жуммытыны быгатоз.

Гурт тол шудонъёс Алнашын нырысьсэ 1998-тӥ арын Асан совхоз-техникумын ортчизы. Со вакытэ Гурт шудонъёсты ортчытъязы спортъя дась объектъёсын, куно пумитась ёрослы номыр ӧз пуктылэ. Аръёс ортчыса, югдур воштӥськиз. Алнашъёслэн но калыклэн кадь выль куас базазы, хоккеен шудон интызы мед луоз кадь потӥз, но ваньзэ сое ас кужыменызы пуктыны луонлыкъёссы ӧвӧл, гурт удысын ужасьёссы умой тыршо ке но. Угось спорт объектъёс Элькун бюджет чотын ӝутӥсько.

— Та шудонъёслы луыса черкогуртын куас база пуктӥське, та нуналъёсы хоккей коробкае йӧ кисьтӥськомы, — шуэ ёрос администрациысь физ-
культурая но спортъя ёзэн ки-
валтӥсь Татьяна Карпова. — Куасэн бызьылон вылысь кылдытэмын 3 иськем кузь-
да сюрес, отын ик вань на 1200 но 2500 метръем сюресъёсыз.

Туннэ нуналлы ёрослэсь данзэ утись спортсменъёслэн нимъёссы тодмо ни, шуыны луоз. Куно пумитась ёрос луо бере, ваньмаз командаен шудонъёсы пыриськыны луонлыксы вань. Азьвыл аръёсыз учконо ке, Алнашысь баскетболэн шудӥсь нылъёс призовой интыозь но ӝутскылӥзы. 25-тӥ Гурт тол шудонэ 25-тӥзэ пыриськоз ни Асан совхоз-техникумысь Раиса Григорьевна Алашеева. Кызьы вераз Татьяна Карпова, со ялан куасэн бызьылэ. Со сяна, гужем шудонъёсыз но уг кельты, отын со полиатлонистъёс пӧлын вожвылъяське.

— Ёрослэсь данзэ 65 пала спортсменъёс утёзы, куасэн бызьылонъя командамы тодмо ни, таяз шутэтскон нуналъёсы полиатлонистъёс кужымзэс эскерозы, — шуэ Т. Карпова. — Семьяос ласянь гинэ шугъяськон кылдэмын, кудзэ бырйыны паймиськомы. Висисьёс но вань… Созэ но вератэк кельтэме уг поты: ёросысь спортэз яратӥсьёс та ӵошатсконъёсты туж витё, котькыӵе учыр дыръя юрттӥськыны мылкыд каремзэс верало. Сыӵе адямиосын ужаны но капчи, вормонъёс дорозь но сузьтӥськыны каньыл.

Валентина ЕМЕЛЬЯНОВА

Туспуктӥз Людмила Сурчакова

Ангелина Снигирева
By Ангелина Снигирева Январь 25, 2019 13:01 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<