«Эшъёсын» ӵош тунаським

Ангелина Снигирева
By Ангелина Снигирева 24 января, 2019 15:21

Кылем арняе Ижысь Ф. Васильев нимо библиотекаын нош ик люкаськылӥз газетлэн «Берекет» пукон коркаез.

«Берекет» пукон корка

Таяз радэ вань мылкыд карисьёс быгатӥзы матысьгес тодматскыны кылбурчиен Татьяна Черноваен, Ижысь «Эшъёс» но «Задор мылкыд» ансамбльёсын, тунаськыны. Т. Чернова — туала удмурт кылбурчиос пӧлысь одӥгез тодмоез. Кылем ар пумын со пусйиз 65 арес тырмонзэ.
Татьяна Николаевна вордскиз Эгра ёросысь Зура черкогуртын, но пинал дырыз ортчиз Можга ёросысь Пазял гуртын. Семьяязы 6 пиналъёс вал, Татьяна — кыкетӥез. Нылаш пичи дырысеныз яратӥз лыдӟиськыны. Анаез Пазял гуртын бибилотекарь вал, соин но, дыр, вуоно кылбурчи отчы ӵем вуылэм.

— Библиотекаысь доре быдэс ӟыгыртэт книгаосын бертылӥсько вал, — тодаз вае Татьяна Николаевна. — Нош анае кытчы ке кошкыку, усьтонзэ мыным кельтылӥз, озьы библиотекае кузё чотын кыльылӥ.
Нырысь гуртысьтыз, бӧрысь Бадӟым Учаысь школаосты йылпумъяса, Т. Чернова дышетскыны пыриз Удмурт кун университетысь филологияя факультетэ.

— Университетын дышетскыкум, ветлӥ Д. Яшинлэн кружоказ, С. Самсоновлэн литобъединенияз. С. Самсоновен нырысетӥ пумиськонэ быдэс группаен мынӥм. Семён Александрович паймиз: «Ма, тӥ ваньды гожъяськисьёс-а мар-а?».
Татьяна Николаевна шуэ, гожъяськон сюресэзлэн кутсконаз сое бурдъялляз но юрттылӥз на В. Романов кылбурчи.
Нош дышетсконзэ йылпумъямез бере Т. Чернова ужаны интыяське Пичи Пурга ёросысь Вуж Мӧнья школае. Та гуртысь, пе, вал вал синмаськоно муртэз, механикая институтысь студент. Бызиз, кык нылъёс вордӥзы, но 1990-тӥ аръёсы семья улонзы сӧриськиз.
Настя нылзы улэ Румыниын. Солэн нылъёсыз, палэнын ке но, чылк-чылк удмурт кылын верасько. Кылем гужем соослэсь кырӟамзэс-эктэмзэс но кубызэн, варганэн шудэмзэс адӟыны быгатӥм Ижын ортчем фестивальёсын.
Алёна нылзэс уноез Дарали Лели шуыса тодо, яратыса лыдӟо гожъямъёссэ но, синмасько вурем дэремъёсызлы но, паймо визьмызлы но.
Т. Чернова дыр шедьтылӥз семьяезлы но, творчестволы но. Огез бӧрсьы мукетыз потазы кылбур бичетъёсыз.

«Задор мылкыд» но «Эшъёс»

— Али пинал дыръям гожъям кылбуръёсы шоры серем пыргес учкисько ни, укыр трос романтика, музъем бордысь ишкалскемын, — шуэ Татьяна Николаевна. — Милемыз, нылкышно кылбурчиосыз, сюлэм пушкын бугыръяськеммы понна «жуго» вал, дуннеез, пе, паськыт уд адӟиське. Таӵе дунъетэн мон соглаш ӧвӧл. «Та шундыё дуннеямы» книгаям ик публицистика шӧмыз но вань, музъем но улон шоры сюлэмшуген учкемын.
Татьяна Николаевна лыдӟиз кӧня ке кылбуръёссэ, юанъёслы валэктонъёс сётӥз. Сюлмысь вераськон туж шуныт пӧрмиз.
Пумиськонлэн 2-тӥ люкетаз тодматским «Эшъёс» но «Задор мылкыд» ансамбльёсын. Кыкез но вуизы Ижысь Ленин ёросысь. Азьвыл ваньзы одӥг коллективе пыро вылэм, но трос луэменызы люкиськоно кариллям. Дӥськутъёссы яркытэсь, куараоссы жингресэсь, одӥг гинэ шугъяськонзы — воргоронъёс бордазы итӥськыны уг дырто. «Эшъёсын» чылкак нылкышноос гинэ, «Задор мылкыдын» одӥг коть пиосмуртсы вань.

— Мон 9 ар котыр кырӟаны ветлӥсько ни, — шуэ Михаил Долганов. — Улӥсько библиотекаен артэ. Огпол сузэре укномы ултӥ шонерак библиотекае мынӥз, кырӟаны, пе. Озьы ӵошен кырӟаны кутским. Мыным туж кельше, ансамбльмы одӥг бадӟым семья кадь потэ.
Ӧтем куноос кырӟазы но тунаськизы. Озьы ик куноосмы ортчытӥзы калык тунаськонъёсты но. Кылсярысь, шумпотыса гын сапегысь турлы сӥзёнъёс поттам: кинлы ке кузь сюрес усиз, кинлы ке – семья кылдытон, кинлы ке — дуно дӥськут басьтон. Ваньмыз сӥзёнъёс ӟечесь вал. Армы но озьы ик мед ортчоз — ӟеч мылкыдын но валче.

Елена Рябина

Туспуктӥз Валентина Емельянова

Ангелина Снигирева
By Ангелина Снигирева 24 января, 2019 15:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<