Эктытытӥсь Надежда

Ангелина Снигирева
By Ангелина Снигирева Январь 10, 2019 15:54
Н. Печникова

Синмаськыса учкиськом Кияса ёросысь Уддяди гуртысь шаплы, етӥз, капчи мылкыдо егит дышетӥсьмы Надежда Печникова шоры.
Со ёросысь искусствоосъя нылпи школалэн гуртамы усьтэм филиалэз ужа. Кӧня уддяди нылпиосты чебер эктыны дышетӥз ни, ёросысь одӥгез кужмоез эктонъя дышетӥсь лыдъяське. Дорамы, Кияса кемысь но анай-атайёс нылпиоссэс вайыло.

Надялэн школа вакытысь улонэз туж яркыт ортчиз. Клубын но, школаын но трос ужрадъёс ортчылӥзы, котькудаз Надя эктӥсь вал. Кин выжые мынэм та шуыса учкылӥз со шоры гурт калык. Угось семьяязы эктӥсьёс ӧвӧл кадь. Надя телевизор пыр синмаськыса учкылӥз «Италмас» но «Айкай» ансамбльёсысь артистъёс шоры. Мынам гурт калыкез соос кадь ик чебер эктыны дышетэме потэ, малпалляз. Эктонъя дышетӥсь луо, шуылӥз. Пыриз Ижысь культпросветучилищелэн эктонъя ёзэтаз. Татын крезьгур улсын тэтчаны гинэ уг дышето вылэм. Лумбыт станок вӧзын мугордэ посоно, пыдчиньы вылын ветлоно, кидэ-пыддэ чебер возёно. Сиёнэз гинэ но валаса бырйыны кулэ! Мугор ӝытпал коска, висе. Анай-атаез сюлмасько, нылзы рос-прос ужлы уг дышетскы шуыса. Гуртоос но куспазы верасько: эктыны нимысьтыз дышетскем кулэ шат? Надя таӵе вераськонъёслэсь ӝожомылӥз ке но, льӧль малпанэзлэсь ӧз куштӥськы. Дышетсконзэ йылпумъяса, Киясаысь искусствоосъя нылпи школалэн Уддядиын усьтэм ёзаз ужаны кутскиз. Нырысетӥ ужрад дыръя ик нылаш возьматӥз ужаны усто луэмзэ.
Та бӧрсьы гуртоос но семьяосыз валазы янгыш луэмзэс. Надежда Васильевна котькуд ужрад азьын 4-5 группаосын ужа, котькудӥныз кӧня ке эктон дасяло. Со туж быгатэ пиналъёсын кусып шедьтыны, соослэсь быгатонлыксэс усьтыны — бадӟым классысь пиос гинэ но сцена вылэ курисько. Тапыр экто, туж йӧно, чебер адӟисько. Котькуд ужрадлы Надежда Васильевна рос-прос дасяське. Соин номеръёсыз котьку яркытэсь, аспӧртэмлыкоесь пӧрмо. Удмурт калыклэсь сяна, нылпиос мукет выжы калыкъёслэн эктонъёсынызы тодматско, соосты кияса калыклы возьмато. Туала эктонысь ӧръёсын тодматско. Озьы эктон пыр быдэс историез, калыклэсь сям-йылолзэ возьмато.
Мыло-кыдо нылкышно «Удмурт Кенешлэн» «Удмурт нылкышно кенешлэн» но мукет общественной организациослэн ужазы пыриське. Одӥг гурт ужрадмы но сотэк уг ортчылы. Тани анайлы сӥзем ужрад радъяно вал. Вазиськимы Надежда Васильевналы. Вакчи дыр куспын номер дасямын вал: нылпиосмы «Чагыр, чагыр дыдыке» кырӟанъя ныллэсь улон сюрессэ эктон пыр возьматӥзы.
Уддяди пиналъёс пыриськыло ёрос но элькун фестивальёсы. Нош Алёна Кадрова но Женя Егоров быгатонлыксэс возьматӥзы ни Россиысь сцена вылын — эктӥзы Крымын ортчем одӥгаз фестивальын.
Концертъёс дыръя котькыӵе учыръёс луо. Нылпи висьыны усе ке. Надежда Васильевна ачиз со нылпи интые султэ, ваньмыныз ӵош эктэ.
Вань гурт калыкмы туж данъяське дышетӥсенымы. Соин но клубамы котьку аншлаг — сомында калык бичаське, тыршись адямиослы луыса.
Кыӵе чебересь, йӧноесь, задоресь адӟисько нылпиосмы, концерт пуктыкузы. Туэ Уддяди гуртысьтымы туэ клубмес выльдӥзы, небыт пуконъёсын табере гань-гань концерт адӟиськомы. Но быгатод-а огшоры гинэ пукыны, куке пиед, нылыд сцена вылын сыӵе чебер тапыртэ, берга, эктэ? Котькуд анай-атайлэн сюлмаз бадӟым шумпотон ӧръяське, нылпиезлэсь быгатэмзэ адӟыса. Кӧня нылпи потӥз ини Надежда Васильевналэн киыз пыр. Котькудӥзлы со шедьтэ ӟеч кыл, чурыт куронъёс но пуктыны быгатэ.
Надежда Васильевна Владимир кузпалыныз 4 пинал будэто. Бадӟымез Санкт-Петербургысь вузын тодон-валан люка ини. Мукетъёсыз бордазы на.
Пиналъёсмы понна сюлмысьтыз тыршемзэ адӟыса, гуртомес ӵектӥськомы «Гурт адями» конкурслэн «Ӟеч сюлэм» номинацияз.

Римма Мазитова.
Кияса ёрос, Уддяди гурт

Ангелина Снигирева
By Ангелина Снигирева Январь 10, 2019 15:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<