Усьтоно музей!

Ангелина Снигирева
By Ангелина Снигирева Январь 14, 2019 14:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Related Articles

100 ар талэсь азьло Ува ёросысь Выль Мултан черкогуртын дышетӥсьёсты дасянъя семинария усьтэмын вал. Туж жаль, пыдлось гуртын луэм со быдӟа история туннэ вужере кылемын шуыса.

В. Майер ортчытэ историяя урок. 1943-тӥ ар

Калыкез ӝуткан

Удмурт калыкез югдытон понна дышетӥсьёсты дасянъя семинариос, курсъёс усьтоно шуыса вераськон ӝутэмын вал 1918-тӥ арын Елабугаын ортчем удмурт калыклэн нырысетӥ ӧтчамаз. Та понна удмурт калыклэн дано пиосыз Трофим Борисов но Кузебай Герд гуртъёсы вуылӥзы, дышетӥсьёсты дасян пумысен пумиськонъёс радъяллязы. Озьы Трокай Борисов сюлмаськемъя удмурт семинария усьтӥськиз Елабугаын, берло сое выжтӥзы Можгае.

К. Герд Ува-Тукля но Выль Мултан гуртъёсысь калыкен пумиськылӥз. Адӟиз-шӧдӥз, отын вань интеллигенция но, купечъёс но. Выль Мултан котырысь Иван Лямин, Иван Ирисов купечъёс но Пётр Лекомцев баӵко та палъёсы училище усьтонлы дурбасьтӥзы. Кылсярысь, Иван Ирисов дышетскон юртлы шуыса ӵупем бугрозэ но 25 сюрс манетсэ ӵектӥз. Но семинария усьтыны ар пумын гинэ кылдӥз — сое ӝегатӥз Ижевско-Воткинской восстание.

Кыӵе зол уж нуиз К. Герд Выль Мултанын дышетӥсьёсты дасян семинария усьтон пумысен, тодыны луэ «Гудыри» но «Известия Малмыжского Совета» газетъёслэн бамъёсысьтызы. Ноябрь-декабрь толэзьёсы К. Герд ачиз ялонъёс печатлаз но соосты гурт калык пӧлын вӧлмытъяз, отын ивортылӥз, 28-тӥ декабре Выль Мултанын дышетӥсьёсты дасянъя курсъёс усьтӥсько шуыса.

Курсъёсты усьтэмлэсь азьло дышетӥсьёслы улон сэрег дасян пумысен трос сюлмаськоно луиз. Соин ик со Малмыжысь 25-тӥ декабре вордӥськем гуртаз Покчивукое (Большая Докъяе) бертӥз. Отысь ог 10 муртлэсь дышетскыны мылкыдзэс бурдъяз. Озьы парта сьӧры пуксизы покчиез выныз Андрей, Иван племянникез, гуртоосыз-бускельёсыз Дарья Казакова но Максим Егоров, Покчивукоысь 2 классъем школаын ӵош дышетскем эшъёсыз Даниил Щёткин но Захар Кузьмин. Дышетскыны пырон ласянь валэктон уж нуиз Ува-Тукля гуртын но. Артысь Удмурт-Тукля гуртын со кӧлыны дугдэ Бобровъёслэн семьязы доры. Евдокия Лямина-Боброва дышетӥсез Мултанысь вуоно семинариын дышетыны куре. Нош ар ортчыса, К. Герд Евдокия Бобровалэсь кырӟанъёссэ гожтэ, соос берло нимаз бичетъёсын потозы 1920-тӥ но 1924-тӥ аръёсы.

Дышетӥсьёсты дасясь кебит

26-тӥ-27-тӥ декабре Выль Мултанэ нырысетӥ дышетскисьёс лыктӥзы — Малмыж уездэ пырись матысь гуртъёсысь адямиос. Нош 1919-тӥ арысен татчы дышетскыны лыктэ ни Глазов уездысь калык. Со сярысь тодоно К. Гердлэн гожтэмъёсысьтыз, со Глазов уездысь адямиослэсь кырӟанъёссэс гожтыса кельтэм.

Дышетскон мынэ ни вал, нош Малмыжысь УОНО-лэн решениезъя Мултанысь волостной комитет Выль Мултанын семинария усьтон пумысен постановление гожтӥз ай 1918-тӥ арлэн пумаз гинэ. Солэсь азьвыл К. Гердлэн куронэзлы Вяткаысь Губобнадзор саклык ӧз висъя вал. Кӧня ке дыр ортчыса, К. Герд Максим Прокопьевен валче удмурт калыклэн уездной съездазы пыриськизы, солэн нимыныз Герд РСФСР-ысь просвещениея наркомлы Анатолий Луначарскийлы телеграмма ыстӥз, Мултанын дышетӥсьёсты дасянъя курсъёс усьтоно шуыса. 1919-тӥ арын апреле та юан пумысен ик со ачиз пумиськылӥз Анатолий Луначарскиен но Надежда Крупскаяен. Озьы Мултанысь дышетӥсьёсты дасянъя семинария 1921-тӥ арын удмурт педтехникум луэ, нош 1936-тӥ арысен — педучилище. 1944-тӥ арын сое выжто Ува каргуртэ. Туннэ семинарилэсь ужзэ азьланьто Ижысь дышетӥсьёсты дасянъя колледж но Уваысь профессионально-технической колледж.

К. Герд Малмыж уездысь УОНО-лэн оскем муртэз вал. Соин трос сюлмаськиз Выль Мултанын дышетӥсьёслэсь, дышетскисьёслэсь улонзэс капчиятон, азинтон пумысен. Учебникъёс, тетрадьёс басьтон, семинариез возён, эстон понна УОНО ог 10 сюрс манет висъяз.

Нырысетӥ курсъёс гуртысь черк бордын ужась 2-аз ик школаосын радъяськизы. Дышетӥсьёс Пётр Лекомцев баӵколэн юртаз улӥзы. Кылсярысь, татын визьнодаз нимо-дано дышетӥсь Вильгельм Майер. Ачиз но К. Герд огдыре та техникумын дышетӥз, улӥз Иван Ирисов купечлэн коркаяз. Одӥг аре тол каникулъёсаз Вяткаысь берытскиз купечлэн нылыз Надежда Ирисова тётя Феняеныз. Н. Ирисова та вакытъёс пумысен тодэ ваёнъёсаз гожтэм: «Тол каникулъёсам ми вордӥськем Мултан гуртамы берытскимы. Кузебай, со сярысь тодыса, дышетон курсъёс ортчытыны лыктӥз но ми доры улыны дугдӥз. 2 арня шутэтскон нуналъёсты ми ӵошен ортчытӥмы, пиналъёс сямен шузияськыса, шудыса. Нош каникулъёс бырыку, со монэ бызьыны куриз, но сюанэн ӧз дыртыты, дышетскыны дыр сётӥз, ваньмыз мон бордысь потэ, шуиз». Сюанзэс соос Выль Мултанын 1920-тӥ арын августэ ортчытӥзы. Со аре толэз пумитазы Вавож ёросысь Партчи гуртысь юртын, отын али К. Гердлэн музей-квартираез интыяськемын. Сое усьтон понна трос сюлмаськиз Выль Мултан педтехникумын дышетскем Максим Егоровлэн пиез Анатолий Егоров.

Выль Мултанысь педтехникум, Можгаысь техникум сямен, дышетӥсьёсты дасянъя кебит луиз. Отын будӥзы дано дышетӥсьёс, тодосчиос, кивалтӥсьёс. Татын дышетскизы дано удмурт писательёс Пётр Блинов, Михаил Лямин, Аркадий Клабуков. Нош Андрей Скобелев Быдӟым ожын кышкасьтэм луэмез понна Совето Союзысь Герой нимын пусъемын.

Жаль, туннэ Выль Мултанысь педтехникум сярысь трос вераськон уг поттыло, солэн историезлы тырмыт саклык уг висъяськы. Но осконо, педтехникумлы сӥзем музей усьтонэн вырись адямиос шедёзы шуыса.

Евгений Эжбаев. Ува ёросысь шаерчи

Ангелина Снигирева
By Ангелина Снигирева Январь 14, 2019 14:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<