«Театрлы котьку вань дыры…»

Ангелина Снигирева
By Ангелина Снигирева Январь 29, 2019 12:07

Берло дыре ӵем верасько, Ижкарын культураез возьматӥсь журналистика начар шуыса. Кин ке та пумысен нёръя гинэ, нош мукетъёсыз югдурез тупатыны тыршо. Таосыз пӧлын — 23 аресъем Екатерина ГУЗЁМА.

Е. Гузёма

Екатерина Гузёма дышетске УдГУ-ысь Удмурт кылосбуръя, финно-угроведениея но журналистикая институтын. Ог ар талэсь азьло со институтысь эшеныз Евгения Пушкарёваен ӵош «Шахта» проект бордын ужаны кутскиз — соос Ижкарысь егитъёслэн шулдыръяськонъёссы, концертъёссы сярысь видеоос дасяло. Но тросэз Катяез тодо драматургез сямен — со Екатеринбургысь тодмо драматург Николай Коляда дорын дышетскемын, пьесаоссэ сцена вылын пукто но журналъёсын печатлало, нош кылем арын Павел Зоринэн ӵош гожтэм «Трижды три Бабы-Яги» пьесаез Удмуртиысь Правительстволэн литературая премиеныз пусъемын вал.

  • Алигес «Шахталэн» вотэс бамаз ивор потӥз, тӥ «зэмос журналистикаен» вырыны дась адямиосты утчаськоды шуыса. Кызьы та проект вордскиз но мар тӥ лэсьтӥськоды?
  • Кызьы ке одӥг но ӝыны ар талэсь азьло мон STV-ын — УдГУ-ысь студентъёслэн медиацентразы — ужась эшелы шуисько: мар тӥ сыӵе мӧзмыт материалъёс дасяськоды, ялан университетысь ужрадъёс сярысь гинэ, малы уд возьматӥське кыӵе ке шулдыръяськонъёсты, концертъёсты — егитъёслы со тунсыко ук. Тани, шуисько, туннэ «Псина» шулдыръяськон ортчоз, отчы ваньзы тунсыко дӥсяськыса мынозы, ветлэ, пӧй, отчы. Со мыным шуэ, ойдо, пе, ӵошен.

Ветлӥм, пичи камераен адямиосты снимать карим, бӧрысь асьмеос ик монтаж лэсьтӥм. Собере ми нимысьтыз рубрикаен та выллем материалъёсты STV-ын потталлям, но милемыз университетын соос понна куаретылӥзы. Соку ми малпам асьме коже ужаны, проектмес «Шахта» нимам. Но кыкнамылэн ик дырмы ӧз окмылы, толэзьлы огпол гинэ видео потталлям. Валам: тазьы вырытозь, «Шахтамес» яке ворсано, яке паськытатоно. Ворсаммы ӧз поты, малпанэз тунсыко вал ук.

Али Ижын культура уртче: «Арт-резиденция» трос ужа, Оксана Бода Ижкарысь музыкаез азинтэ, со крезьгур зол вӧлмоз ай, ЦСДР-лэн (Центр современной драматургии и режиссуры) проектъёсыз уно — со сярысь рос-прос уг гожъяло, тырмыт уг верасько. Соин командаямы калыкез люкаськом шуыса ялӥм, 10 адямиез бырйим. Пӧлазы тунсыко гожъяськыны быгатӥсь адямиос но вань, туспуктӥсьёс но. Али Москваын улӥсь Таня Черкасова но милемын ужаны мылкыд кариз. Ми малпам нимысьтыз рубрика: Удмуртиысь потэмъёс шоркарын трос, соос оломар но тунсыкозэ лэсьто, со сярысь но верано. Мылкыды ӝутскемын, оскисько, милям мар ке но пӧрмоз. Мон малпамъя, «Шахта» кышкатэк вераны кулэ Ижкарысь культура сярысь егитъёслы валамон кылын.

  • Театрлы дырыд кы-ле-а?
  • Театрлы мынам котьку дыры вань. Мон араз 2 ке но пьеса гожтыны тыршисько. Монэ нырысь кыӵе ке ужпум ӵабыштэ, мон сое йырам бергатӥсько, геройёсты малпасько. Улонысь кыӵе ке учыръёсты синйылтыса, вераськонъёсты кылыса, ас поннам шуисько: таиз та геройлы тупасал. Ваньмыз син азе пуксе ини ке, малпан кисьма ке, пьесаме гожтыны пуксисько.

Со сяна, мукет адямиос куддыр вазисько, мар ке гожтыны курыса. Кылсярысь, Андрей Хмелёв актёр но режиссёр куремъя «Девочки» пьесаме гожтӥ, сое Ижысь «Догма» группа пуктӥз — отын школаын дышетскисьёс шудо. Актёръёс нырысь егитъёсын, пиналъёсын вераськизы, бӧрысь мон, интервьюоссэс лыдӟыса, пьесаысь геройёсылы типажъёс бырйи. Мыным туж кельшо «Догмаысь» егитъёс, соос дартэн пыӵамын. Соос шоры учкисько но малпасько: кыӵе аспӧртэм егитъёс будо.

  • Кызьы тон пьесаос гожъяны кутскид?
  • 10-тӥ классын мон малпай, дышетскем сяна, маин ке выреме потэ шуыса. Ӵапак суредаськонъя школаез быдтӥ ини вал. Валай: театрын шудэме потэ. Учки, кыӵе театръёс вань Ижкарын, но одӥгез но бордаз ӧз кыскы. Кӧня ке дыр ортчыса, вотэсысь ялон адӟи, Les Partisans театр кастинг ортчытэ шуыса. Мон отчы ветлӥ, кӧня ке улыса, Павел Зорин режиссёр жингыртӥз, ми, пе, тонэ кутӥськом. Ура! Озьы мон театрын шудыны кутски.

Огпол ми «партизанъёсын» Францие ветлӥм. Отысь бертыкумы, Паша Зорин ивортӥз: милемлы Удмурт филармониын 3-тӥ этажын инты висъязы, отын спектакльёс пуктыны быгатом, пе, соин ик, кыӵе ке малпанъёсты вань ке, вералэ мыным. Малпанъёс? Мынам вань ук малпанэ! Озьы шӧдтэк шорысь монопьеса гожтӥ. Мон соку кожасько вал, монопьесаез гожтыны капчи шуыса, мар секытэз кадь: одӥг гинэ герой асэныз вераське. Мон али валасько, та одӥгез тужгес секытэз жанр шуыса. Озьы ке но, театрысь актёръёсын читка ортчытыкумы, мон туж трос ӟеч кылъёс кылӥ. Со пьесаез драматургияя «Евразия» конкурсэ лэзи, со лонг-листэ пыриз. Со монэ бурдъяз, мон малпай: азьланяз но мар ке гожтоно на. Бӧрысь Екатеринбургысь Николай Коляда драматурген но режиссёрен, солэн дышетскисьёсыныз но «Коляда-театрысь» актёръёсын тодматски. Солэн театраз ветлэме бере мон валай, театр улонын самой тунсыкоез шуыса. Соин школаез быдтэме бере мон Екатеринбурге кошки, Николай Владимировичлэн драматургъёслы курсъёсаз ветлӥ.

Соку Екатеринбургын ЦСД (Центр современной драматургии) кылдӥз — отын «Коляда-театрысь» ик адямиос ужало, но спектакльёссы мукетгес шӧмо пӧрмо. Отын туала драматургъёслэсь пьесаоссэс лыдӟылӥзы, выль репертуар дасязы. Тодӥсько на, мынам пьесаелэн но читкаез огпол вал, нош мон ӵапак со нуналэ атаеным Египетэ шутэтскыны мыныны кулэ. Жингыртӥ солы но шуисько: атай, билетъёсты берыкты, мон уг мыны, театрын читка луоз. Но билетъёсты берыктыны ӧм быгатэ, соин Египетэ мыноно луиз. Али малпасько: паймод но бырод, мон 5 кизилиё отелез читкаен воштыны дась вал. Но соку со зэмзэ но туж дуно вал мон понна, мон малпасько вал, азьланяз читкаосы, оло, уз ни луэ шуыса. Собере ини читкаос но трос луизы, «Вся правда о моём отце» пьесае Россиысь егит драматургъёслэн «Любимовка» фестивалязы 2015-тӥ арын вормисьёс пӧлы пыриз.

  • Кызьы Николай Колядаен занятиосты ортчыло вал?
  • Солэн 20 ар ӵоже ини номыр уг воштӥськы. Нырысь со лыктэ но кыӵе ке иворъёс вера, улонэз но театр сярысь маде, кинлэсь ке мар ке юалляське. Со огшоры вераськонъёс гинэ но туж муресь пӧрмо, малы ке но дышето. Собере драматургъёс ог-огзылэсь пьесаоссэс лыдӟо, малпанъёссэс шараяло. Сыӵе вераськонъёс олокытчы но выжо. Ми котьку туж трос серекъяськом вал, Н. Коляда ялан мар ке серемзэ вера. Со шуэ, адямиез, пе, тужгес ик кутскись авторез, ушъяно — янгышъёсыз понна тышкано ӧвӧл. Вӧсь карид ке, адямилэн, оло, мылкыдыз куашкалоз, со номыр уз ни гожты. Соин котькуд пьесаын маке умойзэ шедьтыны тырше, оглом пьеса туж урод ке но. Адями бӧрысь со ӟечез борды кырмиськоз но, ужез пӧрмоз. Бӧрысь ини, куке тынад тодон-валанэд люкаське но быгатонлыкед будэ, Н. Колядалэн куронъёсыз чурытгес луо. Со мыным огпол вераз: «Катя, тон сыӵе алама гожъяськиськод вал!» Нош азьло со та малпанзэ ватыса возиз, ушъяны тыршылӥз.

Николай Владимирович — паймымон адями, со театрен улэ. «Коляда-театрысь» куд-ог актёръёслы аслаз коньдонэныз квартираос но басьяз, дышетскисьёсыз сярысь ялан сюлмаське. Мон малпасько, мыным дышетӥсьёсын котьку туж удалтылӥз — школаын но, университетын но, оглом улонын но.

  • Нош ку тон Иже берытскид?
  • Мон Екатеринбургын 2 ар улӥ но, мынам малпанэ кылдӥз, Ижкарын улон монтэк ортче шуыса, Les Partisans театрлэсь мӧзмыны кутски. Мынам берытскеме но Ижкарысь Туала драматургияя но режиссурая центрлэн оглюкетэз луэме, сое азинтэме потӥз. Соин мон берытски но татын журналистэ дышетскыны пыри. Таяз арын университетэз йылпумъяло.

Ижкар туж ик чебер ӧвӧл ке но, со мыным адямиосыз понна дуно. Мынам чакламея, мукет каръёсысь яке кунъёсысь адямиос вуо ке, ижкаръёс соосты нырысь ик кытчы ке куное чорто, эшъёсынызы тодмато. Ижкарын номырзэ возьматыны кадь — тужгес ик толалтэ — но татысь калыкен тодматскыса, Ижкар пумысен умой мылкыд кылдэ. Соин ик мон дорысь кошкисько ке, мӧзмисько адямиослэсь но огыр-бугыр ужрадъёслэсь. Ӵем кылӥсько мукет каръёсысь тодмоосылэсь: тӥляд Ижкарын ялан кыӵе ке «движуха», оломаин но выриськоды.

  • Нош театрен кыӵе югдур Ижкарын?
  • Мыным потэ, али асьмелэн ваньмыз туж умой, нош луоз эшшо но умойгес. ЦСДР, Павел Зорин туж трос лэсьто со понна. Соос татчы театрын ужась тодмо адямиосты ӧтчалляло, кылсярысь, критик, театровед Павел Руднев, драматург Евгений Казачков ми доры вуылӥзы, ӝоген драматург Михаил Дурненков лыктыны кулэ. Соос адӟо, Ижкарын театр азинске шуыса. ЦСДР али выль юртэ выжиз. Ӟуч театр но берло дыре туалаез пала кыӵе ке вамышъёс лэсьтэ. Вань «Птица» театр — соослэн асьсэлэн учкисьёссы — мон асме соос пӧлы ӧй пыртысал, но тодӥсько, спектакльёссы кельшымонэсь шуыса. Вань мае учкыны но маин ӵошатыны — соин ик кулэ на луыны СМИ, кудӥз таин вырысал. Оскисько, «Шахтамы» сыӵелы пӧрмоз но ми быгатом Ижкарлэсь пуштроссэ усьтыны.
Ангелина Снигирева
By Ангелина Снигирева Январь 29, 2019 12:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<