Сюрес дурын

Ангелина Снигирева
By Ангелина Снигирева 25 января, 2019 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Берло аръёсы уно ӝожтӥськонъёс вуо, пичи гуртъёсысь ёрос центръёсы номырин мыныны шуыса.

Грузотаксиос вал

Алигес редакциямы вуылӥз кемалась эшмы — Шаркан ёросысь Вукогуртысь Вениамин Иванов. 85 арессэ тырмытӥз ни, 40 арлэсь ятыр дышетон удысын ужамын, Сурон школаын но, Мувыр школаын но директор вал. Вазенгес пенсие потӥз ни ке но, тэк улыны уг чида. Толалтэзэ ӵемысь вуылэ Ижын, Уваын, Воткаын улӥсь пиналъёсыз доры. Шаркан палъёсызлэсь кӧтыз уг ӵыды.

— Но транспортэн туж урод луэмын, ятэ, — вера Вениамин Матвеевич. — Шарканэ мыныны номырин. Вазен Сосновка пыр ортче вал Якшур-Бӧдья — Шаркан автобус. Сосновка, Мувыр палъёсын улӥсьёс соин ёрос центре ветлӥзы. Но сое дугдытӥзы. Озьы 10-лэсь ятыр гуртъёсын улӥсьёс табере Шарканэ вуон понна сюрес дурын сыло, нялтас ортчись машинаосты возьмаса. Таксиен, конешно, пожалуйста — коньдонэд гинэ мед луоз. 500 манет басьто. Но гуртоослэн уждунзы бадӟым ӧвӧл — таксилы ик со быроз. Ог 90 процентэз Шарканэ больницае мынэ. Ма, ёрос центре потыны мукет но мугъёс шедё…

Вениамин Матвеевич озьы ик шуэ: син адӟе, пель кылэ — собере ваньзэ сюлэм вылэ басьтоно. Аслым, пе, номыр кулэ ӧвӧл ни — улонэз адӟи. Но туала калык жаль потэ. Война дыръя но таӵеез ӧй вал — Ижысь Шарканэ ветлӥз грузотакси, брезентэн шобыртэм машина.

Вениамин Ивановен кенешеммы бере трос ик дыр ӧз ортчы — Шаркан ёросысь Мувырысь жингыртӥсьёс луизы на. Малы меда, пе, Шарканысь Сосновкае автобус уг ветлы? Шарканысен Сосновкаозь ог 20 иськем луэ. Бадӟым сюреслэсь ог 3 иськемын — Мувыр. Котыразы пичи гуртъёс лачак. Гуртоос валало, котькудаз ик гуртэ автобус уд лэзьы, но Сосновкаозь, Мувырозь ке но мед ветлоз вал, пе.

Кыле 2-3 мурт

Мувыр поселенилэн кивалтӥсезлы Александр Косаревлы транспорт пумысен юанмы шӧдтэк шорысь чик ӧз луы. Угось калыклэн сюлмаськонъёсыз — солэн сюлмаськонъёсыз.

— Берло 3 ар ӵоже та маршрутэз 2 пол радъяллям ни, — шуэ со. — Но частник кӧня ке ветлэ но дугдэ: мынӥсь-ветлӥсьёс ӧжыт, пайдаез ӧвӧл, пе.

Мувыр поселениын 900 пала улӥсез. Школа но, нылпи сад но, почта-клуб но — ваньмыз вань. Больницае Сосновкае пото — толалтэзэ бадӟым сюрес кузя ог 8 иськем луэ ке, гужемзэ меӵак гинэ но ветло — 3 иськем пала луэ.

— Бен, Шарканэ но потан мугъёс шедё, — веранзэ азинтэ Александр Владимирович. — Но туннэ тросэзлэн машиназы вань ни. Таӵеос Шарканэ ужаны но ветло. Шарканэ мынон сюрес дурын сылӥсьёс вань ке, соосты но нялтас куто.

Ужпум, пе, ӵапак та бордын ик — автобус ветлыку но, адямиос «попуткае» пуксё. Озьы автобусэ 2-3 мурт кыле. Валамон, перевозчик буш автобусэз солань-талань уз ворттылыты.

Поселенилэн кивалтӥсез тодаз вайиз таӵе но учырез. Одӥг пол потоно вал Шаркан ёрослэн нуналаз. Но Шарканэ нуись автобус вуон азьын 5-6 машина транспорт дугдылонниысь адямиосты басьтыса кошкиз, автобусэн мыныны 2-3 мурт кылиз на…

— Куд-огеныз нимысьтыз вераськеме но вань, коть автобус лыктон азьын адямиосты пуктыса эн нуэ шуыса, — ватса Александр Владимирович. — Но югдур ӧз воштӥськы.

Озьы-а, тазьы-а, но Шарканысь Сосновкае, Мувыре маршрут али но, пе, усьтэмын.

— Маршрут усьтон понна яке перевозчик, яке ачиз поселение куриськон гожтыны кулэ, — валэктӥз ёрос администрацилэн йырызлэн воштӥсез Владимир Лопатин. — Собере нимысьтыз кылдытэм комиссия, отчы пыро ГИБДД-ын ужасьёс но, эскере сюресэз: сюрес вылын знакъёс вань-а, сюрес дуръёс кышкытэсь ӧвӧл-а, вань-а транспорт дугдылон инты… Сосновкае но Мувыре сюрес вань куронъёслы тупа. Но автобус лэзён понна со ӧжыт.

В. Лопатин верамъя, Шаркан ёросын та вакытлы 7 маршрут усьтэмын. Но автобусъёс ветло 3-етӥз гинэ: перевозчикъёс уг шедё.

— 3 пол аукцион сярысь ялылӥм, одӥг мурт но мылкыд ӧз кары, — пусйиз ёрос йырлэн воштӥсез. — Али малпаськом, оло, ёросысьтымы ик кин ке шедьысал. Лицензия басьтыны но, оло, юрттӥськыны кызьы ке луоз. Ёрос йырмылы, ёросысь Депутатъёслэн Кенешсылы вазиськонэн но потыны луоз, вылды, оло, калыкез нуллыны соглаш луисьёслы кыӵе ке компенсация тупатоно ни…

Адями сярысь

Тодам лыктӥзы вавож палъёс. Кӧня ке ар ӵоже соос, шарканъёс музэн ик, ӝожтӥськыса улӥзы пичи гуртъёссы куспын транспорт ӧвӧллы. Ёрос администрация маршрутъёсты радъяны амал шедьтӥз. 2017-тӥ арын калыкез нуон-ваёнъя нимысьтыз проект гожтӥзы, «Устоез муниципал кылдытэт» конкурсын со вормисен лыдъямын вал, 530 сюрс манет утӥзы.

— Озьы автобусъёс котькуд гуртэ сямен ветлыны кутскизы вал, — вераз Вавож ёрос администрацилэн йырызлэн воштӥсез Владимир Горшков. — Конкурсын вормем понна басьтэм уксёен транспорт дугдылон интыос но лэсьтӥм, соос доры вуттӥсь пыдын сюресъёсты но тупатъям. Автобусъёс нуналлы быдэ ветлыны кутскизы вал. Но жаляса верано, ар куспын соос шергес но шергес сюрес вылэ потаны кутскизы. Али тросаз гуртъёсы понедельнике но четверге гинэ ветло на. Мугез сыӵе ик: калык уг люкаськы, автобусъёслэн солань-талань ворттылэмзылэн асдуныз уг берыктӥськы…

Тӥни озьы — бугормы тугаськиз. Одӥг ласянь, сюрес урдсын ӵемысь сыло песянай-песятайёс, трос нылпиё, ёрмыса улӥсь семьяос — угось асьсэлэн транспортсы ӧвӧл. Мукет ласянь, ёрос администрациосты но та понна меӵак янгыш карем уг луы, перевозчикъёс уг сюро бере…

Бугорез сэрттыны турттонъям ӧс усьтӥське но редакцие нош ик пыре… Шарканысь Вениамин Иванов — юри курем кадь.

— Ма бен, туала вакытэ тросэз коньдонэн мертаськыны кутскиз уга, — зӥбытак вазиз со. — Но медам вунэтэ вылэм адями сярысь. Котькытысь пайдазэ гинэ утчано ӧвӧл. Ог-огмес яратӥм, гажам ке, таӵе ужпумъёс уз кылдэ…

Амал утчан

Калыкез нуон-ваёнэн шугъяськонъёс кылдэмын быдэс элькунын, уката но уйпал, шундыӝужанпал ёросъёсын.

Удмуртилэн Тӧроез Александр Бречалов ӵемысь пота ёросъёсы, калыкен пумиськылэ — транспортэн герӟаськем юан котьку сямен ӝутӥське.

— Та югдурын али асьмеос заложникъёс, — вераз Тӧро, кылсярысь, Глазовысь калыкен пумиськылыкуз. — Соин ик та ужпумез сэрттыны-пертчыны пӧртэм амалъёсты чакласьком. Одӥгез соос пӧлысь — та уже федерал компаниосты кысконо. Но ваньзэ умой-умой чаклано: уз луы-а озьы — рыноке выль адямиез лэзём, со данаксэ маршрутъёсты ас вылаз басьтоз. Но кыӵе ке но гарантия луыны кулэ, ог ар ужаса, ваньзэ куштыса уз кошкы шуыса…

Мукетыз но малпан вань: ас вакытаз приватизировать карем «Удмуртавтотранс» предприятие интые выль кун предприятие кылдытоно, кун перевозчик мед ужалоз. Но, кызьы пусъе А. Бречалов, та понна кулэ луозы бадӟымесь инвестициос. Кыӵе решение кутэмын луоз, Удмуртилэн Тӧроез март толэзе ивортыны чакла.

Элина Кумачёва

Туспуктӥз М. Егоров

Ангелина Снигирева
By Ангелина Снигирева 25 января, 2019 15:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<