Сюрессэ адӟиз пичиысен

Ангелина Снигирева
By Ангелина Снигирева Январь 11, 2019 12:11

Елена ДЕРБИЛОВА — Кун Кенешысь Кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссиен кивалтӥсь, депутат, кузпал, анай. Со сярысь капчиен вазисько эшъёсыз. Сое котьку чидатэк возьма округысьтыз калык.

Е. Дербилова

— Елена Анатольевна, пичи дыръяды кин тросгес дышетӥз, дасяз тӥледыз улонлы?

— Атае, дыр. Семья кылдытыса, Иже интыяськемез берегес ик, 23 арес дыръяз со кышкыт аварие сюриз. Ымнырыз, киосыз зол сутскизы, сӧсыр кылиз. Но улонэз, адямиосты яратэмысь ӧз дугды. Та сям солэсь пыӵаз. Со пӧртэм адямиосын пӧртэм сямен вераськыны, одӥг кыл шедьтыны дышетылӥз. Ӵемысь шуылӥз: арлыдоосын арлыдо мурт кадь йӧн-йӧн астэ возь, пиналъёсын — пинал мурт кадь.
Анае мукет. Вуз карон удысын ужаменыз, оло, со юн сямо, котьку дышетылӥз шуг-секытъёс азьын кужмо луыны. Семьяямы «уг быгатӥськы» но «уг поты» шуыны алэмын вал. Мылкыдыд, ӟигарыд ӧвӧл ке но, лэсьтоно, шуылӥз анаймы. Соин ик эшъёсын ӵош котьку юрттӥськомы вал арлыдоослы юртъер котырзэс утялтыны, сиён-юон басьтыны, бумага но корт бичаны. Азбарын но, школаын но отличница луытэк нокызьы но уг луы вал.
Нош кыӵе мон яратӥсько вал песянае дорын, Вотка ёросысь Паздеры гуртын, кунояськыны! Кам шур кузя ог 3 иськем кыстӥськись 1 урам быдӟа гурт али ӧвӧл ни, интыяз монастырь гинэ на сылэ. Но отчы семьяенымы ялан вуылӥськомы. Ялан тодэ лыктыло со аръёс. Песянае шудыны потэммылы быдэ шуэ вал: Каме выйиды ке, доре эн бертэ. Вуэз кезьыт, ӝог бызе. 1906-тӥ арын вордӥськем песянаймы кыӵе но тунсыко учыръёсты ӧз мадьылы! Ми черклэсь люкемын ни вал, нош со черк, обросъёс, лул сярысь вералляз. Ялан малпасько вал, кытын вӧзам лулы ветлэ меда шуыса. Эшъёсы пӧлын тросгес пияшъёс вал. Кескичъяськон, супыльтон, бӧрдон, вормытъяськон сямам ӧвӧл, оло, соин но пиос шудон пӧлазы басьяллязы. Кин тодэ, оло, соин но капчиен эшъяськыны быгатӥсько нылкышноосын но, пиосмуртъёсын но. Жаляса верано, али кинэн ке вань сюлмысь вераськиськод, эшъяськиськод ке, солы паймо, уг оско, маке умойтэмзэ утчало…

— Кин пыӵатӥз тӥледлы нылпиосты яратон? Сотэк дышетӥсе ӧй мынысалды, вылды…

— Та сям монэн ик вордӥськиз кадь. 2 нылъёс пӧлысь семьяямы мон бадӟымез бере, 4 аресысен сузэрме чакланы косылӥзы. Ми туж яратӥськом вал дышетӥсь луыса шудыны. Школаын но дышетӥсьёс тетрадь эскерыны оскылӥзы. Соин ик 8-тӥ классэз йылпумъяме бере юан ик ӧз кылдылы, кытчы пыроно шуыса. Уката ик со вакытэ Ижысь педучилище огез юнэз лыдъяськиз. Отчы пырыны конкурс бадӟым вал.

Пичи дыр. Семья.

— Анай-атайды мылкыддылы дурбасьтӥзы?

— Экзаменъёсме умой сётыса пыреме бере гинэ соослы верай. Паймизы, но кытчы пырозы на? Мон дышемын ваньзэ ачим лэсьтыны. Соин ик училищеез йылпумъяме бере радиозавод бордысь нылпи садэ но ачим ик интыяськи. Отын практикаме ортчи бере, кельшиз. Кин тодэ, оло, азьланяз но отын ик ужасал. Но пимы вордӥськем бере малпаськонэ уси: кыӵе садэ сое интыяно? Пимылы но, аслым но кужмогес нылпи сад быръёно кариськи. Озьы 63 номеро сад сярысь кылӥ. Соку отчы воспитательёсты конкурс амалэн кутылӥзы. Садэн кивалтӥсь Светлана Гайдаршина шуиз: подготовительной группаын математикаен урок ортчытоно луоз, кельшиз ке, кутомы. Педучилище бере ужамын ни, вылӥ образованиен дипломе киям, визьмо. Занятие ортчытӥ. Малпасько: табере комиссилэн ёзчиосыз нимаз кабинетэ нуозы но вералозы ляб но юн палъёсме. Интыысьтызы но ӧз вырӟе. Нылпиос котыртэме пуксизы гинэ, соослэсь юазы: асьме доры, пе, кӧня ке воспитательёс вуылӥзы ни, мар вералоды Елена Анатольевна сярысь? Соку занятие нуэме сярысь мадьыны кутскизы нылпиос, юанъёс сётъяны ӧдъязы. Таӵеезлы дась ӧй вал. Но нылпиос бырйизы монэ. Та, оло, огез умоез уже кутон амал. Оло, соин но садын ми бадӟым семьяен кадь огкылысь ужамы.
Огез выпускной бере Светлана Гайдаршина кабинетаз ӧтиз. Пырисько но, отын пумита Ижысь Индустриальной ёросысь дошкольной ёзэн кивалтӥсь Любовь Зайцева. (Али со Индустриальной ёрослэн администрациезлэн йырыз, но ми али ке но соин «Воспитатели России» калык огазеяськонлэн ужаз дэмен пыриськиськомы.) Соос мыным шуо: 33 номеро нылпи садлы кивалтӥсь кулэ, ойдо. Будыны, азинскыны одно кулэ. Но кызьы шуак кивалтӥсь? Соин ик пумитазы серекъяй гинэ. Кузпалылы верай. Ӵуказеяз ӵукна мышкам ӧсэз пытсакуз, со шуиз: кивалтӥсь луыса мед бертод. Соку но серекъяй гинэ. Садэ вуи но, монэ ваньзы утчало, собеседование, пе, возьмало, туннэ конкурс. Лыктӥ. Черодын йӧн-йӧн кышномуртъёс, киосазы презентациосын документъёс. Мар мон татын карисько? Малпанъёсме радъяса, собеседование пыри ик. Юалляськыны кутскизы, кызьы азинтысал садэз, кивалтӥсь луыса мар карысал. Кызьы малпасько, озьы ик верай. Монэ бырйизы. Шумпотӥ кожаськоды-а? Кызьпу арама пыртӥ бертытозям, зар-зар бӧрдӥ. Картэ шумпотыса ӟыгыръяз но уже кошкиз. Садысь нылпиослэн анай-атайёссы жингыръяны кутскизы, кыӵе сад сёто, адӟиды ни-а, юало. Уг тодӥськы, шуисько. Субботае дорам вуизы, машинаязы пуктӥзы но 33 номеро садэ вайизы, учком, пе, кинлы ми тӥледыз сётӥськомы.

— Кельшиз-а нылпи сад?

— Ӧз! Кенерез мырдэм века. Сторож юрт пушкы ӧз лэзьы. Но палэнысен но валамон вал, сад вуж, ремонт кулэ шуыса. Соин ик ӝогак юн-юн кариськоно луиз.
Ярам, коллектив умой пумитаз. Дэмен басьтӥськимы ремонт борды. Али ке но паймисько, кызьы со секыт ужез вормимы. Нылъёс картъёссэс юрттӥськыны ӧтизы. Нылпи сад син шорын воштӥськыны кутскиз. Шӧдӥськиз: ваньзы тае возьмало ни вал. Уже ик шумпотыса лыктылӥзы.
Нылпи сад котырез гинэ но югдытыны луиз. Участокъёсын фонарьёс воксё ӧй вал. Кызьы меда нылпиос пеймытын шудо? Вӧсь луозы ук. «Ижевские электросети» огазеяськонысь валтӥсь инженер доры мынӥ. Оло, атае татын ужамысь, дӥсьтонэ люкаськиз. Нунал ортчыса, огазеяськонысь специалистъёс вуизы, тыл кыскизы. Электрикъёс, пе, шуо: кивалтӥсьты шоры учкеммы потэ. Отчыозь мон кадь дӥсьтӥсь адямиосты адӟылэмзы вылымтэ на, лэся. Бератаз но уноез юаллязы на, кызьы озьы лэсьтыны быгатӥды шуыса.
Туж тау карисько Любовь Зайцевалы. Егит кивалтӥсез сямен со монэ котьку бурдъялляз. Соку Индустриальной ёросын 53 нылпи сад лыдъяськиз. Совещаниос дыръя со огпол шуиз: валасько, малы 63 номеро нылпи садэ черод, лицей бордысь садэ дуно машинаосын ветло, но 3-тӥ категориен 33 номеро нылпи садэ черод кылдэмлы мон туж пайми, озьыен, ваньзылы тазьы ужаны луоно. Зэмен ик, нылпи садэз выльдэм, ужан программаоссэ воштэм бере ми доры куриськисьёс трослы йылӥзы. Уен-нуналэн садын дырме ортчытъяй.
Мукет нылпи садъёсысь кылӥськыны кутскиз: 33-тӥ садын ужасьёслэн кытысь сомында грамотаоссы, кызьы соос пӧртэм конкурсъёсын вормыны ӧдъязы? Воспитательёсын ми одӥг команда вал. Ваньмы одӥг аресъемъёс. Котькудзылы юрттӥ квалификацизэс будэтыны. Соос мыным ӵемысь шуо вал: тӥтэк ми нокинлы но кулэ ум луэ ни.
Синвуэн тодам лыктэ таӵе учыр. Ясельной группа тырмемын: 28 пинал. Талы оскытэк, куд-огез пыкылыны кутскизы: озьы луыны, пе, уг быгаты, огез ке но пинал висе ук, кызьы ваньзы огдыре сомында кузя ветлозы? Соку уждун нылпиослэн лыдзыя тыро вал бере, списокъёсты пӧяса лэсьтӥськомы шуисез но сюриз. Эскеронэн лыктӥзы но паймизы: списокысь ваньмыз пиналъёс ветло. Нош ми нылпиосты котьку юн чаклаллямы, тазалыксы сярысь сюлмаськимы. Ураме пото ке, администрация пӧлысь кин ваньме, ваньмы васькиськомы ясельной группае. Воспитатель азбарын возьма, нош ми оген-оген нылпиосты дӥсяськомы, ӟыгыртӥськомы, чупаськомы но ураме келяськомы. Нокин пӧсяса ӧз сылы. Соин ик кынмыны но нокин ӧз шедьылы. Нылпиос но яратэмез, сюлмаськемез шӧдытэк ӧз кыле. Оло, таин сэрен но садысь кошкеме бере но пичиос монэ урамысен тодмаллязы. Огпол утреннике ӧтизы. Ӝог-ӝог вамышъясько. Кылӥсько: Атольевна, Атольевна! Мышме учкисько но, нылпиос сьӧрам бызё. Садэн кивалтыкум, бумагаосын гинэ вырысал ке, таӵе яратэмзэс ноку ӧй тодысал.

Калыкен пумиськон

— Ку улонады кылдӥз Кун Кенеш?

— Кун Кенеше депутатъёсты быръён вакыт кутскиз. Округамы кандидат вал Светлана Кривилёва. Командаеныз садамы лыктӥз. Маин быгатӥмы, юрттӥмы, кылмы но тупаз. Нош депутат луэмез бере со монэ «Регионы Удмуртии» фракцие ужаны ӧтиз. Фракциен соку Андрей Осколков кивалтӥз. Вылӥ кивалтӥсьёсты тодылӥ, но политикаен туж ик ӧй тунсыкъяськылы. Тросгес сюлмаськылӥ, кытысь шудон басьтыны, сантехника шедьтыны. Быдэсак нылпи садэн улӥ. Малпай: шыпыт ужало ай, ӵектонзэс асьсэос ик вунэтозы. Ӧз вунэтэ. Золгес но золгес ӧтьыны кутскизы. Кун Кенеше кошкыкум, садысь коллектив синвуэн бӧрдӥз. Со вакытлы туж трос лэсьтэмын ни вал угось. Нылъёс шуизы: Елена Анатольевна, кинлы тӥ вань та чеберез кылдытӥды, али кошкиськоды ке?
Кун Кенешлэн аппаратаз специалистын ужаны выжеме воксё но уг поты вал. Ӝыны ар ужаме бӧрсьы монэ татын возьыны Светлана Кривилёвалы трос кужым кулэ луиз. Сюлэмы нылпиос пӧлын, лэзе монэ, та мынам ӧвӧл, шуылӥ мон солы. Ураме поттэ, Кун Кенеш котыртӥ ветлӥськом, буйгатэ, валэктэ вал. Табере Кун Кенешын ужамелы 15 ар ни. Но нылпи садэз али ке но уйвӧтам адӟисько, сценарийёс гожъясько. 1-тӥ сентябрьлы али ке но дышем сямъя выль костюм басьтӥсько.

— Кун Кенешын ужатозяды, тужгес секытэз ар 2017-тӥез вал, дыр?

— Татын ноку но капчи ӧй вал… Зэм, нырысь праймеризэз, собере Кун Кенеше быръёнъёсты ортчон капчиен ӧз ортчы. Мон ӧй но малпалля, куке-соку депутат луо шуыса. Но тодӥськоды-а, соку ай «Огъя Россия» фракциен кивалтӥсь Алексей Прасолов, Кун Кенешлэн Тӧроез Владимир Невоструев кабинетазы ӧтизы но шуизы: тамында ар ӵоже астэ умоен возьматӥд ни, ми адӟимы, макем оскымон быдэстӥськод уждэ, кыӵе капчиен огкыл шедьтӥськод калыкен. Соос ик депутатэ кандидат луыны ӵектӥзы. Шумпотӥ шуыны уг луы. Со быдӟа кыл кутон ук! Ӧй пӧрмыты ке? Алексей Михайлович но, Владимир Петрович но шуизы: кызьы азьло умой ужад, али но озьы ик котьку котькытын вормыны тыршы. Кызьы оскемзэс тӥялод? Но кыӵе секыт ар вал со!
Бырйисьёсын пумиськонъёс 6 часын ӵукна кутскылӥзы. Гуртоослы угось вазь ик скал кысконо, бусыосы потоно. Округам Дэри но Вотка ёросъёс. Огпол Дэри ёросысь Казмаскае механизаторъёсын пумиськонэ тӧдьы пиджакен но ӝужыт беро туфлиосын лыктӥ. Отысен угось мукет пумиськонэ кошконо вал. Ангаре пырисько но, татын маке быдӟа комбайнъёс, тракторъёс, мазутэн саптаськем воргоронъёс. Учко, кыӵе интилюли татчы лыктэм ай шуыса. Атае юнме ӧз дышеты ук котькинэн огкыл шедьтыны. Татчы кышномуртъёс уг пырало, дыр, шуисько. Пыралляло ик, шуо. Озьы кутскиз но ӧръяськиз вераськонмы. Со механизаторъёс ик мон понна куаразэс сётӥзы.

Вордскем гуртаз

— Туннэ кыӵе юанъёсын ӵемгес вазисько тӥледлы?

— Нылпиосты школа азьын визьнодан, уксёен юрттэт, музъем кусыпъёс, пуктӥськон — ваньмыз, мар адямиосты сюлмаськытэ. Соос малпаськыса уг уло, кин кыӵе ужпумез лэсьтыны кулэ — интыысь кивалтӥсьёс я депутат. Со умой но. Озьыен, оско. Соин но куронъёс котьку нимысьтыз инты басьто котькуд депутатлэн ужаз. Выль ар азьын Вотка ёросысь Кудрино культурая юртысь вазиськизы. Улэп кызэз коралтыны кимы уг пыры, юрттэ, пе, искусственнойзэ басьтыны. Басьтӥм. Шумпотӥ, нылпиослы Выль ар шулдыръяськон ортчытэмзы бере кыз котырысь туспуктэмъёссэс адӟыса — сыӵе салам келязы.
Кылем ар пумын вазиськизы Дэри ёросысь Италмас но Вотка ёросысь Июльское гурт поселениосысь кивалтӥсьёс. Банное но Июльское гуртъёс вискысь сюрес вож угось котьку сямен машинаосын тымиськемын, авариос луыло, нош тыл ӧвӧл. Али юбоос сыло ни, ӝоген тыл вуоз. Озьы ик быгатӥмы Вотка ёросысь Первомайское гурт поселениысь сюлэм вӧсьсэс буйгатыны. Татысь культурая юртсылэн липетэз вия, борддоръёсыз пилиськылэмын, электропроводкаез вуж, укноосыз сисьмемын вал. Гуртъёсысь культурая юртъёсты ӝутонъя проектэ пыриськыны быгатӥмы. Шумпотэменызы ремонт лэсьтонэ быдэс гуртэн пыриськизы. Адямиос асьсэос ужало, улонзэс умоято ке, соослы золгес юрттӥськем потэ. Нимысьтыз пусйысал министръёсын валче ужаммес.

— Тӥ ялан ужась комиссиен кивалтӥськоды. Комиссияды бадӟым предприятиосын кивалтӥсь воргоронъёс пыро.

— Соосын уж котьку оскымон пӧрме. «Аксион» огазеяськонлэн директорез Сергей Сидоров огпол шуиз: ноку ӧй малпа, улонам кышномурт кивалтоз шуыса, но тӥ быгатӥськоды. Ваньзы котьку дурбасьтозы, визь-кенешен юрттозы. Ми ваньмы бырйисьёсмы понна ужаськомы ук. Сессиос дыръя сояз я таяз законэ воштонъёс дасяськомы. Кылсярысь, выль регламент кутӥмы. Алэм интыосын машинаосты дугдытъям понна штраф юнматӥмы. Дружинникъёсты страховать каронэз паськытатӥмы: табере котькуд мероприятиын соос утемын.
Миым 23-тӥ феврале югдурез утисьёсын валче мужествоя урок ортчытӥмы. Горд армилы 100 ар тырмонлы но сӥземын вал со. Кун Кенеш азьын учениос ортчытӥмы. Егитъёс синъёссэс паськыт усьтыса ик учкизы. Туэ но маке малпалом. Шумпотымон, Кун Думаысь депутатъёс но ужамы мыло-кыдо пырисько.

— Журналистъёс но тӥледыз ярато, вылды.


— Журналистика удысысь шуг-секытъёсын тодматски комиссиен кивалтыны кутскеме бере гинэ. Печатья но ивор вӧлмытонъя агентствоен табере валче ужаськомы. Газет-журналъёслы туннэ капчи ӧвӧл: тираж усе, газетэз лыдӟисьёс доры вуттыны секыт. Та юанъёсты Кун Кенешлэн Тӧроез бордын ужась координационной кенешын эскеримы. Мукет сямен уг луы. Калык понна ёрос газет туж кулэ, сое лыдӟо.

— Асьтэлы дырды кыле-а?

— Кузпалэлы но пиелы валамзы понна тау. 26 ар ӵош улытозямы, кин сиён пӧралоз, кин утялтӥськоз — ноку ӧм люке, кин вуттэ, со ик лэсьтэ. Куддыр уж дурын ӝегамелы кӧтсы ӝож ик. Но ми кышномуртъёс ук — сюлэмзэс буйгатыны быгатӥськомы. Шутэтскон нуналъёсы кузпалы — юрттӥсе, шофёре. Депутатлэн ужез уг бырылы угось. Картме табере округын тодмало ни. Пумиськонъёс дыръя синйылтӥсько, монэн данъяське шуыса. Но со чурыт судья: кытын ке маке уг кельшы ке, вера. Талы шумпотӥсько: сотэк уд буды. Пимы УдГУ-ын дышетске, улонам самой дуноез со. Жаль, пиналмы одӥг гинэ.

— Кытысь кужым бась-тӥськоды?

— Мылкыды секыт дыръя анае доры Казмаскае бертӥсько. Куддыр астэ пичи нылэн шӧдэм потэ. Со бадӟым шуд.

— Гуртын тӥледлы калык маза уг сёты, дыр?

— Воксё. Атае но, пырыса уг вуттӥськы на, созэ я тазэ юанэз ӝутэ ни, ваньзэ тодэмез, валамез потэ. Атай, вай туннэ мон тынад нылыд луо, шуисько солы. Нош со мыным вазе: тон нырысь валэкты, адямиос мынэсьтым юазы ке, гордэктоно медам луы.
Мыным ӵемысь шуо: уг яра адямиослы сокем оскыны но сокем шара луыны. Атае алигес шуиз: мон тонэ шонертэм дышетӥськем — калык понна баррикадае но потод, нош адямиос бордад уз султэ. Но сямез уд вошты. Мае малпасько, сое ик верасько. Анае табере ӵемгес тодаз вае пичи дырысьтым учырез. Мусо луэмысьтым ялан вешаса юало вылэм, кинлэн та нылыз шуыса. Огпол чидатэк вазиськем: нокинлэн — мон государственной. Улонын озьы ик луиз. 

Елена Сараматова

Ангелина Снигирева
By Ангелина Снигирева Январь 11, 2019 12:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<