Почтальон, почтальон, дорамы пырод-а тон?

Ангелина Снигирева
By Ангелина Снигирева Январь 11, 2019 12:50

Related Articles

Ува ёросысь Жужгес гуртэ пенсия ваё ке, кытын сётъяны ёрмо. Азьвыл почта интые но уг лэзё ни. Адямиос шугомо, кытын уксё басьтыны.

Бурдъёсме вӧлъяса, котыр дуннеез адӟоно кариськи. Лоби Жужгес гурт вадьсы. Почта юрт вадьсы вуи но трос калыкез адӟи. Нош почталэн ӧсэз ворсамын, калыкъёс лыкто но кошко. Улӥегес лэзиськыса, кӧня ке лобай но кылӥ мар сярысь вераськемзэс. Гуртоослы, пе, пенсия вайыны кулэ, нош кытын сёткалозы — уг тодо. Магазин пала но лобай — татын кышноос сыло. Одӥгез бодыез вылэ пыкъяськем, мукетыз, куссэ кутыса, мыкырскем. Бодыен кенак мырдэм шока.

— Кытын меда пензи сёткалозы, куиньметӥзэ потӥ ини, — лулыз пытсаське песянайлэн.

— Мон, нялтас машинае пуксьыса, почтальон доры ветлӥ ини — замок ошемын, — шуэ мукетыз кенак. — Вакытаз ужам-ужам, нош табере пенсимес басьтыны проблема луиз. Я, куке но басьтом ай, вылды, собере тыллы но газлы тыроно. Со понна Нылгае автобусэн мыноно, кынмыса но сылон дыръёс луо.
Вераськыса сылонъязы песянайёс адӟизы клубе пырисьёсыз. Татчы пырон дорын, сэреге шымырскыса, пенсия сёткало. Ма, нокинлы но кулэ ӧвӧл ни, лэся, пенсионеръёс…
Нялтас вераса, Жужгесын таӵе сюлмаськонзы ар мында кыстӥське ни. Татын ӧвӧл почта ёзэн кивалтӥсьсы но, почтазы но. Гуртоослэн вазиськонзылы валэктон вуиз «Почта России» предприятилэн Удмуртиысь управлениысьтыз.
Жужгесын улӥсьёслы арняяз куинь пол газет-журналъёс но гожтэтъёс вутто. Озьы ик чаклам графикъя пенсиос но пособиос сётъясько. Почта пыр пенсия басьтэ 97 адями. Почтальон коньдонэз котькудӥзлы дораз вуттыны кулэ, кышкытлыклэсь утиськонъя вань амалъёсты чакласа. Озьыен, адямиослы дорысьтызы потаны кулэ ӧвӧл. Со сяна, почтальонлэн вань мобильной почтово-кассовой терминалэз, соин, пенсия басьтыкузы, гуртоос соку ик тыриськонъёссэс но кысыны быгатозы. Таӵе юрттэтэз басьтыны быгатэ гуртысь котькуд адями, со понна почтальонэз дораз яке уж интыяз ӧтьыны кулэ.
Почталэн Удмуртиысь управлениез ивортэ, Жужгесысь почта ёз огдырлы гинэ ворсамын — татын ужасьёс уг тырмо. Соин та дыре клиентъёс вазиськыны быгато Нылга черкогуртысь почта ёзэ. Таиз ужа вторникысен субботаозь 9 часысен 17 часозь, нуназелы вис карытэк.
Уваысь почтамтлэн кивалтӥсез трос сюлмаське калыклы юрттэт сётон понна. Озьы ик отделение квалифицированной ужасьёсты но утчало: ялонъёс потало Ува ёрос газетын, Калыкез уже интыянъя центр сюлмаське кадръёс утчаны.
Ивортӥськом, котькыӵе юанъёсъя клиентъёс вазиськыны быгато Россиысь почталэн «пӧсь» телефоназ 8-800-100-00-00 номеръя.
Тӥни сыӵе визь-кенеш. Нош кӧня час кулэ луоз гуртысь почтальонлы пенсиез коркась корка нуллон понна? Котькуд юртэ кожыны 10 минут но лыдэ понӥд ке, 970 минут люкаське. Та лыдпусэз часэ берыктоно ке, 16 час луэ. Иське, 2 ужан нунал ӵоже почтальон коркась корка ветлоз? Сьӧраз — почта машинаен 2 возьмаськисьёс, водитель. Нош кыӵе ке пенсионер тыл понна коньдон тыроно кариськиз ке, коркан ӝыны часлы но ӝеганы луэ — уго мобильной терминал мед ужалоз шуыса, Интернет кулэ. Со почтальонлэн сотовой телефонэз борды герӟамын, нош ӵемысь связь ыше.
Мукет ласянь, пенсия басьтон нунал — со гуртысь арлыдоослэн адскон-пумиськон нуналзы. Соин но, дыр, Жужгесысь почтальон культурая юртлэн пичигес сэрегаз ужзэ быдэстэ — ярам, татысь коть уг улляло, нокыӵе коньдон уг куро.

Шӧкыч уром

Ангелина Снигирева
By Ангелина Снигирева Январь 11, 2019 12:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<