Одӥг липет улын

Ангелина Снигирева
By Ангелина Снигирева Январь 11, 2019 12:02

Улӥськомы посёлокын, 2 квартираен юртын. Вералэ вал, туала куронъёсъя кызьы пусйисько та юртъёс? Бускельёсын одӥг липет улын улӥськомы бере, таӵе учырын кызьы люкиське-пусйиське ваньбурмы?
Алевтина Иванова. Можга ёрос

Валэктон сёто Росреестрлэн Удмурт ёзысьтыз специалистъёс.
2 квартираен улон юртъёс шаерамы туж трос, тужгес но гуртъёсын. Тросэз пуктэмын 1970-тӥ-1980-тӥ аръёсы гурт предприятиосын тыршисьёс понна.
Таӵе постройкаос пӧлысь уноез та дырозь пыртэмын вал трос квартираен юртъёс пӧлы. Нош ваньбур люкиськылӥз-пусйиськылӥз котькуд улӥсьлы быдэ доляосын. Но учконо ке, 2 квартираен юртэз многоквартирнойёс пӧлы уд пырты. Таосаз угось этажез но, квартираосыз но тросгес. Таӵе юртын улӥсь квартираысьтыз потэ ке, нырысь ик шеде огъя пользованиысь интые, шуом, подъездэ, собере ини вуэ вань улӥсьёс куспын люкылэм ваньбур (музъем) вылэ.
Чылкак мукет югдур кылдэ 2 квартираен юртъёс ласянь. Нырысь ик, таосаз пыронэз нимаз. Озьыен, соосты пыртыны луоз блокированной застройкаос пӧлы. Россилэн Градостроительной кодексэзлэн 49 номеро статьяяз пусъемын: «Блокированной застройкаен лыдъяське сыӵе юрт, кудаз этажез 3-лэсь трос ӧвӧл, квартираос люкылэмын нимаз блокъёслы (10-лэсь медаз ортчы), отын котькудаз улэ нимаз семья». Таӵе юртлэн борддоръёсыз бускельёсын огъя луо ке но, ӧсэз куспазы ӧвӧл. Со сяна, та юртысь нимаз ӧсэтӥ потыса, шедиськод музъем кесэг вылэ — таяз но бускельёсын уд пумиськы, котькудӥзлэн азбарез нимаз.
2 квартираем юртын ваньбурдэс бускельёслэсь нимаз пусъён понна нырысь ик сое блокированной застройкаос пӧлы пыртоно. Озьы та юртлэн котькуд блокез нимаз юрт шуыса пусйиськоз. Соку гинэ луонлык кылдоз ваньбурдэс нимаз карыны, ас вылады гожтыны.
Нырысь ик тодоно, лэземын-а та участокын блокированной юртэз пуктыны. Сое тодыны луоз, муниципал кылдытэтады вазиськыса, музъемез кутонъя правилоосты лыдӟыса. Та бӧрсьы мыноно поселенилэн администрацияз — юрттэс блокированной застройкаос пӧлы пыртыны куроно. Интыысь кивалтӥсьёс куронэныды соглаш луизы ке, озьыен, басьтӥськыны луоз ни юрттэс но, со улысь музъемез но бускельёстылэсь люкон-пусъён борды.
Со понна ӧтёно кадастровой инженерез. Со музъемлэсь технической но межевой планзэ лэсьтыны кулэ, отын ик пусйиськоз 2 квартираез 2 нимаз юртлы люкон но. Музъем кесэгез лыдъяку-люкыку, эн вунэтэ, законъя музъем кесэг 400 квадрат метрлэсь тросгес луыны кулэ ӧвӧл. Элькунысьтымы унояз муниципал кылдытэтъёсын но таӵе ик лыдпус.
Межевой но технической планъёсты, вань кулэ луись документъёсты кутыса, вамыштоно нотариус доры. Отын юртэз люкон но доляослы висъян сярысь огкыл юнматоно. Та бӧрсьы ваньбурдэс — юрттэс но со улысь музъемез — регистрировать карон понна МФЦ-ысь специалистъёслы вазиськоно. Санэ басьтэ: та уже пыриськоно луоз юртын вань улӥсьёслы — доля басьтэмъёслы. Ваньбурдэс пусйиды ке, соин котьма карыны быгатӥськоды — вузаны, кузьманы, завещать карыны. Бускельёсыныды та пумысен кенешоно уз лу ни.

Уксёды шыръяськоз…

Кыкетӥ нылпимы понна анай капитал сётӥзы, соин улон инты басьтӥмы. Нотариус дорын огкыл гожтӥмы: мон, анай, оскытӥсько, кузпалэлы но, нылпиосылы но доля висъяло шуыса. Дуно усёз меда доляослы люкон?
Ирина П. Пичи Пурга черкогурт

Валэктон сётэ Ижысь риэлтор компаниысь юрист Анна Кравцова:
Анай капиталэн улон инты басьтыку, зэм но, одно ик гожтоно кузпаллы но, быдэ вуымтэ нылпиослы но люкет висъян сярысь обязательство. Кӧняен куспады люкылоды улон юрттэс — таизъя асьтэос огкылэ вуыны кулэ. Ваньбурез доляослы люкылон кисылы дунтэм ик уг усьы. Нотариус дорын огкыл гожтон 10-20 сюрс манетлэсь дунтэм уз луы (лыдэ басьтӥське улон интылэн дуныз но доляослэн быдӟалазы), эшшо ке регистрациез ортчон понна 2 сюрс манет тыроно луоз.
Нотариус дорын сделка дуно усе соин: сэрегды анай капиталэн басьтэмын но одӥг кузпал вылэ (шуом, анай вылэ) пусъемын ке, мукетызлы кузпаллы нотариус пыр гинэ доля висъяно. Угось ваньбурзы брак бере басьтэмын ке но, огъя ваньбурен ӧз лыдъяськылы, доляоссэс но нимаз кароно луылӥз.
Но уноез уг тодо на, кылем арын 1-тӥ июльысен воштӥськонъёс пыӵаны кутскизы шуыса. Выльдонъёс пыртэмын Недвижимостья огъя кун реестрез (ЕГРН) нуонэ. Табере кузпалдылы доля висъян понна нотариуслы одно ик вазиськоно ӧвӧл ини. Озьыен, уксёды шӧдскымон шыръяськоз. Асьтэ киын ручкаен куриськон гожтоно, сое нуоно МФЦ-е яке Росреестрлэн элькунысьтымы ёзъёсаз. Сьӧрады кутыны эн вунэтэ недвижимостьтылы вань документъёстэс. Озьы тӥляд кузпалэныды огъя доляды «совместная собственность» шуыса пусйиськоз, та пумысен ЕГРН-э воштонъёс пыртэмын луозы. Та бӧрсьы ини басьтӥськыны луоз быдэ вуымтэ нылпиостылы люкет висъяны. Но таиз ласянь нотариуслы вазиськытэк уз луы. 

Корка басьтӥсьлэн эшез — нотариус

Матысь дыре корка басьтыны малпасько. Вань кулэ луись документъёсты ачим люканы-бичаны чакласько. Кылӥ вал, та ужын кыӵе ке воштӥськон пыӵалоз шуыса. Кыӵе со, ку быдэсъяськыны кутскоз?
Павел Н. Дэри ёрос

Недвижимостен герӟаськем ужъёс — вузан, басьтон, кузьман — пусйисько нотариус дорын. Со бӧрсьы адямилы нимаз ветлоно луылӥз на Росреестре яке МФЦ-е — ваньбурзэ огъя реестре пыртон понна. Туэ 1-тӥ февральысен тӥледлы асьтэлы нокытчы вазиськоно-ветлоно уз луы ни. Угось пыӵаны кутско кун регистрациез нуонъя выль куронъёс.
Табере та уж оскемын нотариуслы. Со дорын сделкаез пусъем бере со нуналэ ик нотариус адямилэсь даннойёссэ келяны кулэ Росреестре — Интернет пыр «огъя укно» амалэн. Нош та бӧрсьы Росреестр одӥг нунал куспын пусйыны кулэ адямилэсь ваньбурлы правозэ. Озьы та уж табере ӝог ортчоз. Нош тужгес кулэез: регистрациез ӝогомытыны ӵектӥсьёс, калыклэсь уксёзэ кыскыны вырисьёс уз луэ ни.
Сак луэ: та понна нотариус уксё басьтыны кулэ ӧвӧл. Солы коньдон тыроно луоз недвижимостез вузан-басьтон сярысь огкылэз дасян понна гинэ.

Уз ыше-а аръёс?
Берло 2 арзэ декретын пукисько. Валэктэ вал, азьланяз кызьы лыдъяськоз пенсиелэн быдӟалаез — лыдэ басьтӥськозы-а декретын пукем аръёс?
А. Перевощикова. Дэри черкогурт

Валэктон сётэ Пенсиосъя кун фондлэн Удмурт ёзысьтыз ёзлэн кивалтӥсез Ирина Пасынкова:
1 но ӝыны аресозь нылпиен пукем дыр пыре страховой стаж пӧлы. Таизъя ини лыдъяське пенсилэн страховой люкетэзлэн быдӟалаез. 2015-тӥ арысен со лыдъяське выль сямен — адямилэсь ар куспын люкам пенсионной баллъёссэ лыдэ басьтыса. Тӥ берло 2 арзэ декретын пукиськоды, озьыен, лыдъяськоз со коэффициентъёсын (баллъёсын).
Адямилэн макем бадӟым уждунэз, ар куспын сокем трос люкасько баллъёсыз. Тӥ декретын пукиськоды бере, тыро-пыдо доходды ӧвӧл, озьыен, баллъёсты но люкаськыны кулэ ӧвӧл кадь. Но законын ваньмыз чакламын. Нырысетӥ нылпиен 1 но ӝыны ар пукем понна сётӥське 1,8 балл, 2-тӥ пиналэн — 3,6 балл, 3-тӥ но 4-тӥ нылпиен — 5,4 балл. Кылсярысь, 3 пиналэн быдэн 1 но ӝыны арен декретын пукем понна страховой стаже пыртэмын луоз 4 но ӝыны ар. Со понна сётӥськоз 16,2 балл. Но пусйыны кулэ: коэффициентъёс сётӥсько декретын (вань пиналъёсын) ваньзэ-ӧвӧлзэ 6 ар ӵоже пукем понна гинэ.
Озьы ик адямилы баллъёс сётӥсько армиын службазэ ортчемез яке мӧйы муртэз утялтэмез понна но. Сюлмаськытӥсь юанъёсыныды вазиськыны быгатӥськоды Пенсиосъя кун фондлэн пӧсь телефоназ 8(3412) 400-123 номеръя. 

Дасяз Елена Никитина

Туспуктэмез М. Егоровлэн

Ангелина Снигирева
By Ангелина Снигирева Январь 11, 2019 12:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<