Нунал выльдӥське, улон азинске

Ангелина Снигирева
By Ангелина Снигирева Январь 9, 2019 17:04

Выль арез пумитаськомы, вужезлы йылпумъянъёс лэсьтыса, яркыт учыръёсты тодамы кельтыса.

А. Загитова

Кунгож сьӧрын
• Америкалэн но Евросоюзлэн Россилы пумит мылкыдзы ӧз басылскы. Кунмы пумит санкциоссэс азинтӥзы. Америка ӟуре, Россия, пе, лушкем пыриськиз президентсэс быръёнэ, калыклэсь мылкыдзэ воштӥз. Великобритания шуэ: азьвыл шпионэз С. Скрипалез но солэсь нылзэ быдтыны турттэ, пе, вал Россия. Таӵе выллем — йыре тэронтэм но куддыр тумошо — янгыше уськытонъёс туж ӵем чузъяськизы ар куспын.
• Допингъёсын йырин Олимпиадаосъя калыккуспо комитет Россиысь кужмо спортсменъёслы Лымшор Кореяе сюресэз пытсаз — отын 9-тӥ февральысен 25-тӥ февралёзь ортчиз Олимпиада. Рос-прос сборной кылдытыны луонлык ӧй вал, отчы шедизы бадӟым спортын асьсэды соку гинэ эскерыны кутскемъёс. Лэземын ӧй вал асьме куншетмы улсын вожвылъяськыны. Озьы огъя зачётын Россия 13-тӥ интые кылиз. Озьы ке но шараяськизы выль нимъёс: куасэн бызьылӥсь А. Большунов, фигуристкаос А. Загитова но Е. Медведева. Ижын вордскем но будэм А. Загитова, кылсярысь, дуннеысь рекорд пуктӥз: вакчи программаын со люказ 82,92 балл.
• Евросоюз мигрантъёсын ӝока, пичигес но лябгес кунъёсын ӵемгес шӧдӥсько та огазеяськонысь потон мылкыдъёс.
• Россия юрттэмен, Сирилэн данакез музъемез мозмытэмын террористъёслэсь. 28-тӥ июне Президент В. Путин ялӥз Россилэсь войскооссэ Сириысь поттон пумысен. Доразы берытскизы сюрслэсь трос военнойёсмы. Но кунмы Сириысь югдурез чакла на.

Крымысь выж

Кунамы
• Россиын 18-тӥ мартэ 4-тӥзэ Президент луиз Владимир Путин. Со понна куаразэс сётӥзы 76 но ӝыны процентэз бырйисьёс — 55 миллионлэсь ятыр адями.
• 14-тӥ июньысен 15-тӥ июлёзь ортчиз футболъя дуннеысь чемпионат. Асьме дорын гинэ ӧвӧл, быдэс шундыӝужан пал Европаын со вал нырысьсэ! Футболъя ӵошатсконъёс ортчизы 11 пӧртэм городъёсын. Соосты радъянэ пыриськизы 112 кунысь 17 сюрслэсь ятыр волонтёръёс. Быдэс дунне Россиен улӥз-шоказ кадь соку! Чемпионлэсь нимзэ кыкетӥзэ басьтӥз Франция, 2-тӥ но 3-тӥ луизы Хорватия но Бельгия.
• 16-тӥ мае усьтӥськиз Крымысь выж. Быдэс дуннелы со осконтэм кадь потӥз. Россиез курланы яратӥсь кунъёс оскем муртъёссэс ик отчы келязы: зэм ик-а Керчь пролив вамен выж сылэ? Кунамы гинэ ӧвӧл, быдэс Европаын та одӥгез кузез но бадӟымез выж. 2 ар куспын ӝутэмын 19 иськем!
• Калыклэсь мылкыдзэ тодонъя ВЦИОМ огазеяськон ивортэмъя, таиз ар тодэ кылёз пенсие потон арлыдэз ӝутон пумысен вераськон-эчешонъёсын: 2019-тӥ арысен воргоронъёс 65 аресозь, нылкышноос 60 аресозь ужалозы. 1990-тӥ аръёсы угось Россиын туж ӧжыт нылпиос вордскизы. Ӵапак соослэн али ужаны кутскон вакытсы вуэмын. Соин ик дыр вуиз выль амалъёс кутыны.

Шаерамы
• Удмурт шаерын ялэмын вал Сюресъёслэн арзы. Ар куспын улосамы быдэсъяськиз сюресъёсты тупатъянъя-выльдонъя 4 проект. Лэсьтэмын-выльдэмын 433 иськемлэсь ятыр сюресъёс. Кылсярысь, «Гурт сюресъёс» программая 19 интыын сюресъёс ӝутэмын. Уж азинскоз. Озьы 2020-тӥ арын пыронтэм-потонтэм гуртъёс уз кыле ни.
• Паськыт вӧлмиз «Лэсьтэмын Удмуртиын» проект. Со улсын радъяськизы бадӟым ужрадъёс. Проект кылдытэмын Тӧро А. Бречалов кичӧлтэмъя — Удмуртилэсь данзэ ӝутон, ужбергатонэз азинтон но шаермылы табыш ваён понна.
• 19-тӥ сентябре котькулэсь паськытгес пусйимы Пыӵал тӥрлык поттӥсьлэсь нуналзэ. Шаерамы вуылӥзы нимо-дано инженеръёс, тодосчиос, экономистъёс. Соос эскеризы обороная предприятиос, огъя промышленность азьын кылдэм ужпумъёсты. Оружейниклэсь нуналзэ пусйыку, нырысьсэ ортчизы биатлонъя гужем ӵошатсконъёс.
• Туэ ар тодамы кылёз кун ёзъёсысь кивалтӥсьёслэн выльдӥськеменызы. 19-тӥ октябре Иж городлэн йырыз луиз Глазовлэн азьвыл кивалтӥсез Олег Бекмеметьев. Воштӥськизы кӧня ке министерствоослэн, озьы ик федерал ведомствоослэн Удмурт ёзъёссылэн кивалтӥсьёссы. Кылсярысь, гурт удысъя но сиён-юонъя министр луиз Ольга Абрамова, югдурез утёнъя министр — Алексей Попов. Россиысь Президентлэн Приволжск федерал округъя оскем муртэз но выль — Игорь Комаров.

Удмурт кыллэсь нуналзэ пусъё К. Герд нимо гимназиын

• 27-тӥ ноябре нырысьсэ пусйимы Удмурт кыллэсь нуналзэ. Пӧртэм ужрадъёсы пыриськизы элькунамы но, Россиын но, кунгож сьӧрын улӥсьёс но.
• 9-тӥ декабре Ижысь Москвае нырысьсэ кошкиз улыно-вылыно вагонъёсын поезд. Одӥгаз тэре 64 адями — огшоры вагонлэсь 2 поллы ятыргес.

Елена Никитина

Ангелина Снигирева
By Ангелина Снигирева Январь 9, 2019 17:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<