Небыт книга — шудыны

Ангелина Снигирева
By Ангелина Снигирева Январь 16, 2019 16:24

Ижын улӥсь Жанна Степановалэн киужъёсызлы паймыса бырод — со пӧрмытэ басмалэсь книгаос. Отысь яркыт но небыт геройёсты, арбериосты кутылыса, нылпиослэн чиньыоссы воляло, чеберез валаны дышетско.

Ж. Степанова

Жанна вордскемын Пичи Пурга ёросысь Куреггуртын. Дышетскиз бускель Баграш-Бигра школаын, бадӟым классъёсын тодон-валан люказ Пичи Пурга черкогуртысь гимназиын, сое азвесь медален йылпумъяз. Школа вакытаз сюлмыз кыстӥськиз гожъяськон борды — мылысь-кыдысь пыриськиз егит гожъясьёслэн «Пурга кизилиос» огазеяськоназы, ужъёсыз печатласькизы шаерамы потӥсь удмурт изданиосын.

Школа бере йылпумъяз Удмурт кун университетысь юридической факультетэз. Бӧрысь кӧня ке дыр ӵоже отысь ик кафедраын ужаз, судын секретарь но, одӥгаз министерствоын валтӥсь специалист но вал. Та вискын семья кылдытӥз, 2 нылпи вайиз. Соосын пукон висказ киуж борды басьтӥськиз. Вурыны кутскиз нылпиослы небыт шудонъёс, выж лёгетъёс, шудон коркаос. Нырысь-валысь — аслаз пиналъёсызлы, дыр ортчемъя мукет анай-атайёс но курыны кутскизы. Озьы со ужаны потыны уг дырты, дораз вуриськыса, уксё поттэ.

— Пичи дыръям, туала вакытэ кадь, трос пумо шудонъёс ӧй вал, — шуэ Жанна. — Небыт шудонъёс, мунёос — ваньзэ ас киын пӧрмытоно луылӥз. Уг вунэтӥськы ни 4-тӥ класс бӧрсьы «Дзержинец» лагере вуылэмме. Отын небыт шудонъёсты вуронъя кружоке ветлӥ. Шудонлэсь вылзэ кылем-мылем юдэсъёслэсь вурылӥмы, пушсэ но соосын ик тырмытъямы. Бертон азямы шуизы: вурем шудонъёстэс, пе, сьӧрады кутыны быгатӥськоды. Доре бертыса, вуриськыны мылкыды сокем зол вал, ваем шудонъёсы пушкысь юдэсъёсты поттай но выль шудонъёс вури. Ма, соку басма но шедьтыны секыт вал ай. Мамаелэсь вужмем пальтооссэ, куашканы кутскем гоно воротникъёссэ вандылӥ, соослэсь шудон лэсьтӥ. Дорын мон тэк пукыны уг чидаськы. Кыӵе ке арбери кылдытӥськод ке, нунал юнме ӧз ортчы кадь потэ, — вера егит анай.

Небыт книга

Жанна усто чильпаське но, керттӥське но. Но вуриськыны золгес яратэ. Небыт книгаоссэ кылдытэ пӧртэм басмаослэсь, кылсярысь, фетрлэсь но флислэсь, бордазы кутэ бирдыосты, лентаосты, инӟыосты, калъёсты-гозыосты, пластмассалэсь пӧртэм чыры-пырыосты. Юрттэ Интернет: книгалы сюжетъёсты-геройёсты отысь капчиен шедьтод. Нош куддыр анай-атайёс книгаын возьматыны ӵекто нылпизылэн улонысьтыз учыръёсты. Кемалась ик ӧвӧл Ижысь одӥгаз нылпи центрын Жанна радъяны кутскиз мастер-классъёссэ. Но мылкыд карисьёс сокем трос ӧвӧл на, аслым ачим реклама лэсьтыны уггес пӧрмытӥськы, пальпотыса вера кибашлы.

Берло дыре со басьтӥськиз удмурт кылын небыт книгаосты кылдытон борды. Соос туж тунсыко потозы удмурт кылын вераськись, удмурт кылэз дышетӥсь пиналъёслы.

Елена Никитина

Ангелина Снигирева
By Ангелина Снигирева Январь 16, 2019 16:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<