Лэчыт юанлы — нод-нод валэктон

Ангелина Снигирева
By Ангелина Снигирева Январь 29, 2019 16:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

1-тӥ январьысен жуг-жагез выль сямен утялтыны кутскимы. Та ужлэн радъяськемез сярысь кылем номеръёсамы пыр-поч гожъямы ни. Озьы ке но калыклэн юанъёсыз кылемын на. Соослы валэктон сётэ Удмуртиысь «Объединение советов домов УР» огазеяськонэн кивалтӥсь Александр ЕВСЕЕВ.

— Жуг-жаг поттэмез понна улос операторлы одно-а уксё тырыны кулэ, уг луы-а та услугалэсь куштӥськыны?

— Услугалэсь куштӥськыны уг луы. Россиысь Жилищной кодекслэн 30-тӥ статьяысьтыз 5-тӥ пунктъя жуг-жагез поттон понна кыл кутэ улон интылэн кузёез, нош «Об отходах производства и потребления» федерал законъя жуг-жагез утялтон понна тыриськонлэсь палэнтӥськыны уг луы, улос операторен огкыл юнматымтэ ке но. Услуга сётэм понна дунэз улос оператор басьтыны быгатоз суд пыр.

Тыронъёстэс дыраз ӧд пытсалэ ке, пени люкаськоз: 31-тӥ нуналысен 90 нуналозь — Центробанклэн рефинансированиея ставкаезлэсь 1/300 люкетэз мында, 91-тӥ нуналысен — 1/130 люкетэз мында.

Улос оператор услуга сётэ, публичной огкыл вылэ пыкъяськыса, со юнматэмын Правительстволэн 1186 номеро постановлениеныз. Услуга басьтӥсьёс огкыл улэ кинюртэмзэс уг пукто ке но, со лыдъяське кутэмен. Соин ик услуга понна тыроно луомы.

— Кин кыл кутэ трос квартираем коркаос бордысь жаг куян интыосты утялтыса возён понна?

— Огъя ваньбурез возён понна кыл кутӥсь организация — ТСЖ яке управляющей компания. Со жаг куян инты радъяны, контейнеръёс котырез чылкыт возьыны кулэ. Нош отысь жагез поттоз ни улос оператор. Улос оператор ик утялтыны кулэ мусоровозэ тырыку кисьтӥськыны шедем жагез но.

— Куд-ог пичи гуртъёсын нимысьтыз жаг куян интыос туннэ нуналлы ӧвӧл. Отын улӥсьёс кытчы но кызьы жуг-жагзэс поттыны кулэ?

— Туннэ амал шедьтэмын: ёрос администрация инты тупатэ, кытчы адямиос жагзэс поттыны быгатозы. Нимысьтыз тупатэм дыре отчы мусоровоз лыктэ — графикез адямиос вазен ик тодо ни. Озьы азьло ик чаклам интые, дыре адямиос жагзэс ваё но пырак машинае куяло. Нялтас вераса, жагез тазьы бичан законэз тӥянэн уг лыдъяськы, со учкемын ТКО-я услугаос сётонъя типовой огкыллэн 3-тӥ пунктэзъя, юнматэмын Правительстволэн 1156 номеро постановлениеныз.

— Квартираын, коркан кема дыр ӵоже нокин уг улы ке, жагез поттэм понна перерасчёт лэсьтыны луэ-а?

— Луэ, коммунальной услугаослы перерасчёт лэсьтонъя план юнматэмын Россиысь Правительстволэн «Правила предоставления коммунальных услуг» 354-тӥ постановлениеныз. Перерасчёт мед лэсьтозы шуыса, вазиськыны кулэ «ЭнергосбыТ Плюс» компание яке улон интыдыя управляющей компание.

Вань юанъёсъя валэктон сётозы улос операторлэн «пӧсь» телефоназ:

8-800-234-89-86

Учыръёс

Улон интылэн кузёез вань, но нокин регистрировать каремын ӧвӧл, нокин уг улы.

Коркалэн (квартиралэн) кузёез, оло, одӥг гинэ но ӧвӧл ай. Соин ик тыриськон тупатӥськоз собственник вылэ.

Улон возьматэ, 90 процентаз учыръёсы улон интыын нокин прописать каремын ӧвӧл ке но, отын кин ке улэ. Соин ик кузёосты тыриськытон сярысь норма юнматэмын федерал законэн.

Ӵемысь луэ тазьы: адями квартираын (коркан) регистрировать каремын, отын со уг улы ке но. Нош мукет азьын регистрациез ӧвӧл. Таӵе дыръя коммунальной услугаослы перерасчёт карыны уз луы. Платёжка лыктоз коркалэн кузёез вылэ. Зэм, коркалэн кузёез тыриськытыны быгатоз сое, кин отын улэ.

Коркан трос мурт регистрировать каремын, но улӥсез ӧжыт.

Кылсярысь, коркан песянай огназ улэ. Пиналъёсыз мукет азьын уло, кудӥз ке нунокез, оло, армиын, кыкетӥез мукет городын дышетске…

Коркан кӧня муртлэн регистрациез вань, ваньзы вылэ тыриськон вуоз. Соосты тыронтэм понна «ЭнергосбыТ Плюс» компание яке управляющей компание заявлениен вазиськоно, заявлениен ӵош ваёно на пиналъёслэн, нунокъёслэн мукет интыын огдырлы регистрацизы вань шуыса документъёсты.

Перерасчёт озьы ик лэсьтыны быгато соос, кинъёс гужемзэ сад-бакчаосазы уло, стационарын яке курортын йӧнатӥськизы. Валамон, та понна озьы ик сад-бакчаысь, эмъян учреждениысь адями зэмзэ но отын вал шуыса документъёс кулэ луозы (учке Коммунальной услугаос сётонъя правилоосысь 354 номерзэ). Студентъёс озьы ик мукет городын дышетско шуыса документъёс вайыны кулэ — перерасчёт лэсьтыку, лыдэ басьтӥськоз мукет интыын огдырлы регистрациез возьматӥсь справка.

Адями ӝыны арлэсь кема дораз уг бертылы ке, перерасчёт лэсьтыны выльысь заявление гожтоно луоз, мукет сямен вераса, котькуд 6 толэзьлы быдэ документъёсты выльдоно.

Зэм, улос оператор тодӥз ке, коркан регистрацитэк но улӥсь муртъёс вань шуыса, соос вылэ акт гожтыны но жаг поттэм понна тыриськытыны быгатоз.

Мылкыдъёс

Е. Сомов

Удмуртиысь «Калык фронт» огазеяськонысь «Бадӟым чылкытатӥськон» проектлэн координаторез Евгений СОМОВ:

— «Калык фронтын» 2 ар ӵоже ӟеч быдэсъяське ини «Бадӟым чылкытатӥськон» проект. Удмуртиысь свалкаосъя интерактивной картае пусъемын 228 кырсь инты. Туннэ нуналлы соос пӧлысь утялтэмын 76-ез. Туннэ шаерысьтымы котькуд адями со картае кырсь интыез пусйыны но отын мытэм чылкытатон ужъёсты син азяз возьыны быгатэ.

Бадӟым ужпум — жаг быдтонэз шонер радъян. Со понна улос оператормылы ужаз тырмымтэоссэ шараяны юрттоно но выль коммунальной услуга понна дырыз дыръя тыроно. Озьы улос оператор свалкаосты чылкытатон борды басьтӥськыны быгатоз, жагез поттон азинтӥськоз. Азьланяз та ваньмыз инкуазь вылын умоен шӧдӥськоз.

Огъя юнматэм тарифлы луыса котькуд адями жагзэ контейнеръёсы яке жаг поттӥсь машина доры нуоз. Угось дун тыре бере, силёзэ вукыремъёсы, нюлэсъёсы нуыны киыз уз ӝутскы ни. Нош азьло жаг поттон понна дун тырылӥзы чылкытлык понна сюлмаськисьёс гинэ.

А. Безухов

«Зелёный паровоз» огазеяськонлэн азьветлӥсез Андрей БЕЗУХОВ:

— Малы жаглэсь выль вуз поттоно? Сисьмемезлэсь, инкуазез сӧрисьтэм луэмезлэсь азьло солы музъем пушкын трос аръёс кыллёно. Нош со вискын омыре кырсёмытӥсь газъёс вӧлмо (ӵапак соос бордысь кӧш зын лыктэ, тылпу потыны быгатэ), музъеме кышкыт суретъёс пыӵало. Соин ик туала полигонъёс сертификация пыр ортчо, соосты эскерыса возё федеральной ведомствоос. Шыръян вылысь жагез гуръёсын сутон но югдурез зол уз вошты. Полиэтиленэз, пластикез сутыса, музъем вылэ лысвуэн ӵош кырсь суретъёс пуксё.

Полиэтилен пакетъёсты, пластик выллем упаковкаосты ӧжытгес кутыны луэ ук. Озьы ик котькудмы «Разделяйка» акцие (жагез нимаз люкылон но сое переработкае кутон ужрад) пыриськыны яке асьме ёросъёсамы со выллем ужрадъёс ортчытыны быгатӥськом. Ижын со кӧня ке ар радъяськылэ ни.

Сергей Захаров

Ангелина Снигирева
By Ангелина Снигирева Январь 29, 2019 16:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<