Кырпарсь каръяське азбаре

Ангелина Снигирева
By Ангелина Снигирева Январь 15, 2019 15:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вавож ёросысь Квачкам гуртысь фермер Александр Миловидов ог 5 арзэ ни кырпарсьёсты (кабан) вордэ. Вазерпиньёссы кышкытэсь ке но, животъёс туж сабырлыесь, шуэ.

Кырпарсь

Кырпарсь сярысь вераку, син азе пуксе борддоръёсты йырйись, музъемез гудӟись, куртчыны турттӥсь живот. Нош Юлия Пантелеева нуналлы быдэ кырпарсьёс доры пыре, пӧйшуръёсты мыло-кыдо сюдэ.

— Мар соослэсь кышкалод? Уд тышкаськы, уд кышкатӥськы ке, уг куртчылӥсько. Соос асьсэос адямиослэсь кышкало ай, — шуэ нылкышно.
Кырпарсьёсты вордонын шуг-секытэз воксё ӧвӧл. Кин ке рабицалэсь кенер лэсьтэ, кин ке нюлэс котыре пӧйшуръёсты каръя. Нош А. Миловидовлэн кырпарсьёсыз садаз уло, шуыны луоз. Пулэсь гинэ кенерез. Сое кесяны животъёс уг ик малпало, будӥсь писпуоссэ но уг йыръё. Толэн-гужемен — инкуазьын. Пӧсьлэсь но ӟырт кезьытлэсь ватӥськыны липет лэсьтӥд ке, эшшо умойгес. Но сотэк но уз кынме: кузы но гонзы зӧк. Собере, кырпарсьлэн тазалыкез юн — висёнъёслы уг сётӥськы.
Зэм, парсьпи поттыны пыд улазы куро валёно. Мумы кырпарсь угось куро пушкы кар лэсьтэ. Отысь пиосыз арня ӵоже уг потало — та дыр куспын гонзы напче, кезьытъёслэсь кышкамысь дугдо. Соин ик мумызы нырысь-валысь ачиз гинэ сиён доры вуттӥськылэ, отӥяз пиосыз борды кошке. Вордскемзы бере угось часаз 3 пол но сиемзы потэ.

— Нюлэслэсь мӧзмозы но, сюез гудӟыса, пегӟозы шуыса кышканэз ик ӧвӧл, — шуэ Юлия Пантелеева. — Татын угось соослы ялан ческыт сиён сётъяськом, асьсэлы кӧтсэс тырон сярысь сюлмаськонэз ик ӧвӧл ни. Нош кыӵе соос ярато картошка, бакча сиён, яблок, нянь! Весь сиськысалзы — тусьсэс ялан тыро возид ке, нунал ӵоже кырпарсь 5 килограммлэсь но трос сиён сиёз. Но мултэс трос сюдыны уг яра — азьтэмъяськыны кутско, гань-гань карисько но пи поттэмысь дугдо. Бызьылон вакытсы ноябрь-январь толэзьёсы тупа. Урод сюдыку, та дыр ӝега. Пиоссэ кырпарсь нуллэ 124-140 нунал. Арлыд люкамъяз тросгес пи вае.
Кырпарсьёс шорлыдын 4-5 пи ваё, нош фермерлэн хозяйствояз 12-сэ но адӟылӥзы ни. Парсьпиос вордскем бере кар котыртӥзы нырысь-валысь туж ик уд ветлы — пиоссэ утьыса, мумы кырпарсь вожоме.
Кырпарсьёслэн синъёссы лябесь. Но туж лэчыт пельзы, туж умой шӧдэ нырзы. Соин Юлия Егоровнаез ӧсэтӥ пыремез бере ик тодмало, котыраз нурскетыса лыкто, нырынызы пыд бордаз зырасько, ведраяз йырзэс месо.

Кырпарсьёс адямиослы, утялтэмлы туж ӝог дышо, — шуэ нылкышно. — Нош кенерез йырйыны, сюез гудыны ӧдъяло ке, тодӥськомы ни: таослы маке уг тырмы. Сыӵе дыръя сиёнзэс воштыны тыршиськомы, минералъёс сётӥськомы но, пӧйшуръёс нош ик буйгало. Горд сюй мыло-кыдо сиё. Толалтэ туж ярато изьыны, нош гужем — вуын пыласькыны.
Кырпарсьлэн сӥльыз ческыт, шуэ Александр Миловидов. Диетической лыдъяськеменыз, парсьлэн сярысь, кырпарсьлэн сӥльыз дуногес. Мугорыз но бадӟым луэ. Таосты вордонын одӥг гинэ ке шат курон: мукет животъёсын одӥг каре интыяны уг яра. Кырпарсь угось турын-куар вылын гинэ уг улы — вир зынэз шӧдӥз ке, мукет животэз но сиыны быгатоз. Адями котырын кырпарсь 20 арозь улэ.
Берло дыре модае пыре ни дорын олокыӵе но аспӧртэм живот возён. Тани Вавож ёросын ик Александр Миловидовлэсь адӟем карисьёс сюро ни — кырпарсь вордыны кутско. Пӧйшуран хозяйствоос но парсьпиосын вуз каро ни.

Елена Сараматова

Туспуктэмез Н. Широкихлэн

Ангелина Снигирева
By Ангелина Снигирева Январь 15, 2019 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<