Кылбуръёсыз пӧрмо кырӟанъёслы

Ангелина Снигирева
By Ангелина Снигирева Январь 9, 2019 17:18

Кияса ёросысь Вуж Салья гуртысь дышетӥсь Надежда Витальевна Бочкарёва трос сюлмаське выжыоссэ тодон, удмуртлыкез утён, анай кылмес гажан мылкыд пыӵатон понна. Сое ӵектэммы потэ «Гурт адями» конкурслэн «Выжыоссэ утись» номинацияз.

Н. Бочкарёва

Надежда Витальевна Пичи Пурга ёросысь Аксакшур гуртын ке но вордӥськиз, улонзэ герӟаз Кияса ёросысь Вуж Салья гуртэн. Глазкарысь дышетӥсьёсты дасянъя институтысь ӟуч кылъя но литературая факультетэз йылпумъямез бере егит дышетӥсез ыстӥзы Вуж Салья школае.
Кема ик дыр ӧз ортчы, та гуртысь адӟем карымон воргоронлы, крезьгуръя дышетӥсьлы Владимир Бочкарёвлы бызиз. Кутскизы кузпалъёс кылбуръёс, кырӟанъёс пӧраны. Егит нылкышно нылпиосын ӵош кылдытӥз драмкружок, бӧрысь «Кубо» фольклор ансамбль. Надежда Витальевна гуртоослэн юрттэмзыя классаз кылдытӥз пичи музей сэрег. Отчы люказ вашкала ужан тӥрлыкез, арбериосты, дӥськут. Табере нылпиос куиськонэн но тодматскыны ӧдъязы ни.
Надежда Витальевна нылпиосты дышетэ вордӥськем музъемзэс, дорзэс яратыны но гажаны. Кылсярысь, «Уг вордӥсько солдат луыса, луо солдат» ужрад ортчытӥз. Та ужрадлы нылпиос Вуж Салья гуртысь армие ветлэмъёслэсь туспуктэмъёссэс бичазы но альбом дасязы. Бочкарёв кузпалъёс кичӧлтэмъя школа вӧзын кылдӥз Быдӟым оже быремъёсты буре ваён аллея. Писпу мерттонэ пичиез но, бадӟымез но пыриськиз.
Мыло-кыдо дышетӥсь семьяезлэсь выжы писпузэ гожтон борды басьтӥськиз, 6 поколениысь ӵыжы-выжыоссэ шедьтӥз ни. Надежда Витальевна «Нылкышно шуд» клублэн ёзчиез луэ, кузпалыныз ӵош пыриськыло семьялы сӥзем пӧртэм ужрадъёсы. «Мынам Удмуртие» телерадиокомпанилэсь «По соседству мы живём» проектсэ радъяны юрттӥзы: гурт улонэз шӧмъяны лыктэм одӥгез герой — журналист Макар — соос дорын улӥз.
Гуртоосмы адӟем карымон дышетӥсьмес бырйылӥзы ёрос Кенеше депутатэ но.

— Мыным удалтӥз кузпалэным, — шуэ Надежда Витальевна. — Мон гожтӥсько кылбур, нош Володя кылдытэ сюлэме пырись кырӟан.
Владимир Леонидович Вуж Салья школалэн директорез луэ, арганэн зол шудэ. Туэ ортчем «Элькуновидение» вожвылъяськонын В. Бочкарёв «Устоез крезьгурчи» номинациын вормиз, нош Надежда Витальевна 3 усто кылбурасьёспӧлы шедиз. Та вожвылъяськонын Маша нылзы быдэстӥз «Вордӥськем палъёс» кырӟанзэс, со 10 устоосыз пӧлын луиз. Со ӧвӧл-а шумпотон! Бочкарёвъёслэн гожтэм кырӟанъёссы мед вӧлмозы шаерамы, мед пыӵалозы улонамы.
Надежда Витальевна кузпалыныз ӵош будэтӥзы 3 нылпи. Бадӟымез Ирина нылзы эмсузэрлы дышетскиз, берло Ижысь техникая университетэз йылпумъяз на. Аслаз семьяез вань ини. Ӵужанайзэ но ӵужатайзэ Дима нуноксы шумпоттэ. Маша нылзы Казаньысь консерваториын дышетске. Женя пизы азьланьтэ дышетсконзэ Ижкарысь крезьгуръя колледжын. Маша но Женя пӧртэм крезьгуро инструментъёсын шудо. Надежда Витальевна но арганэн эшъяське. 2008-тӥ арын Бочкарёвъёслэн семьязы Саранскын ортчем калыккуспо вожвылъяськонын вормисьёс пӧлын вал. Отын соос удмурт культуралэсь чеберлыксэ кырӟан, эктон пыр возьматӥзы.
33 ар ӵоже дышетон удысын ӟеч тыршемез понна Надежда Витальевна уно данъетъёсын пусъемын: ёросын устоез классэн кивалтӥсь луиз, «Россиысь огъя тодон-валан сётон удысысь дано ужась» ним басьтӥз, кылем арын сое пусйизы Удмурт Элькунлэн Данъян грамотаеныз.

Марина Морякова.

Кияса ёрос, Уддяди гурт

Ангелина Снигирева
By Ангелина Снигирева Январь 9, 2019 17:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<