Кечыло ньылон

Ангелина Снигирева
By Ангелина Снигирева Январь 15, 2019 15:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Тазалыкез утёнъя министерствоысь валтӥсь диетолог, вылӥ категориен врач Ирина Белокрылова шуэ: висьытэк но кема улон понна чаклано 3 куронэз — мугорез кыдатоно, валаса сиськоно но чыры-пыры пумысен мылкыдэз ӧвӧл уськытоно.
Ижысь «Эмъясен поръян» акция дыръя эмчи пыр-поч мадиз валаса сиськон сярысь.

Емышъёс котьку пайдаё

Кӧжы но йӧл

— Нуналаз 30 грамм ке но кӧжы одно сиёно, — шуэ Ирина Белокрылова, — отын крахмалэз трос, фосфорез тырмыт, озьы ик вань марганецез, метианинэз, аминокислотаосыз, мугорлы кужым сётӥсь белокез. Юнметэк-а туберкулёзэн висисьёсты кӧжы сиыны косо. Соин одно сюдо лулсэр висёнъёсъя больницаосын йӧнатӥськисьёсты но. Малы? Малы ке шуоно лулсэръёслы но туж кулэ белок. Белок уг тырмы ке, лулсэр висёнъёсын курадӟисьёс лекесь луо.
Нош асьмеос кӧжы тырмыт сииськом ке, шергес ӝожомиськом, куатаськиськом. Адямиез ултӥяны выро ке, мукет ужпум. Но адями ассэ ултӥяны сётэ ке — туж кышкыт. Со пуш ласянь ӝуаны-бырыны кутске. Таин валче сюлэм кутэ, пери шукке, пушке яраос кылдо…
Малы мон кӧжы интые соя сиыны уг дэмласькы? Соя — со ГМО, солэн генотипез юромо воштэмын. Кылсярысь, ГМО вылын будэтыны кутскизы ни картошка — ярано, асьме дорын сое будэтыны но, палэнысь вайыны но алэмын. Нош кунгож сьӧрын картошкалэн генотипаз скорпионлэсь трансгенъёссэ тырыны кутскизы. Кызьы со шӧдӥськыны быгатоз адямиослэн тазалыксы вылын — малпаны кышкыт. Толалтэ но магазинъёсысь ӝажыос вылын ӵыж-ӵыж чебер помидор, узы тыремын — соос уг уродмо. Малы ке шуоно генъёсазы ватсамын камбалалэн яке эбеклэн трансгенъёссы. Ярам, таосыз тазалыклы сокем кышкыт, оло, уг но луо, угось камбалаез сииськом, эбекез но куд-ог калыкъёс сиё.
Аръёс люкаськемъя мугорын гормонъёс ӧжытгес кыльыны кутско. Нош белок соосты утьыны юрттэ, иське, калленгес пересьмом. Озьыен, кӧжы пинал возиськыны но юрттоз.
Эшшо белокен узыр йӧл. Сое но одно сиёно. Кин но со шуэ: йӧл сиыны ум быгатӥське, кӧтмы чутыръяны кутске. Иське, ойдолэ ӝушмес, сюлъёсмес эскером но йӧнатӥськом. Но йӧлын ӝук одно сиёно. Азьло дыръя бакча емышъёсын шыдэ йӧл ватсаллязы на — туж ческыт но пайдаё. Кефир, аръян ӝӧк вылын одно луыны кулэ. Уката но — кӧлыны выдон азьын. Сютэм изьыны уг яра. Юнметэк-а больницаосын ӝыт кефир сётъяло на — ваньзы шумпотыса юо. Нуналаз пичи-пичи сыр, йӧлвыл, варог (творог), скал вӧй сиёно — солэсь сэръёс уз ӵакме, атеросклероз уз кырмиськы. Эшшо ке йӧлвылэз но варогез сиёно ӝыт — отысь кальциез мугоре пыӵа уйин. Валады, луоз — майонез сярысь пал кыл но ӧй поттылы. Со — яд.

Нянь но вӧй
Нянь, пыжиськемъёс сиёно, но кыӵезэ? Угось соос туала вакытэ туж трос пумо. Соку ик верало: эн басьяське дась пыжиськемен вуз карон интыосысь, Ижын али соос тачак. Кытысь тодӥськоды, кызьы соос пӧрасько, оло, трансжиръёс вылын. Контрольной палата шараяз: 1995-тӥ арысен ни Россиын уг будэтӥськы 1-тӥ, 2-тӥ классъем чабей. 22 процент кылемын на 3-тӥ классъемез. Кылемез — 4-тӥ классъем, нош со — фураж. Ярам, со вылын куайим гинэ ке. Но со туж курадӟытэ ӝушул безэз (поджелудочной железа) — кырмиське сакыр диабет.
Соин ик пӧраськыны кулэ дорын. Котэм няняды ватсалэ кӧмыныз валче таза изэм пызь. Няньды ӝутскыны кема мед выроз. Туала вакытэ нянь котыны олокыӵе но рецептъёс вань, куд-огезъя нянь 15 минут куспын гинэ но ӝутӥське — мон соосты умоен уг лыдъяськы. Кытысь потӥзы маял (дрожжи) сярысь умойтэм веранъёс — ӧйтӧд. Но сое азьло пиналъёслы но сётъяськом вал, мед нуйтӥськозы шуыса.
Удмуртиын тужгес умой нянь — «Дарницкий». Отчы 60 процент ватсаське кӧмыныз валче изэм пызь — обдирной нимаське. Соин ик магазинысь «Дарницкий» нянь басьтэ, нош перепеч, шаньги сиемды потэ ке — асьтэос пӧралэ.
Чурыт сортъем чабейлэсь макарон — деликатес чотын. Россиын поттэм куд-ог макарон-вермишельёсы ог 10-15 процент вылӥ категориен пызь ватсало ке, гожто ини, чурыт сортъёслэсь лэсьтэмын шуыса. Бен, соосты 7-10 нуналлы одӥг пол сиыны луоз. Но сӥльтэк! Тросгес ватсалэ бакча емышъёс, укроп, петрушка но мукетсэ. Соус лэсьтэ асьтэос. Котьку дэмласько: одӥг мында басьтоно горд помидор, ческыт перец, улмо — ваньзэ тае изэ, шӧмызъя чеснок, кирень ватсалэ. Туж ческыт но пайдаё кетчуп пӧрмиз! Майонез кулэ ӧвӧл. Вӧй — мылкыд каремдыя. Но кинлэн дораз вань рафинированной сема вӧйыз — али ик жалятэк кисьтэ. Со тазалыклы яд кадь ик кышкыт луэ. Асьмелы рафинировать карымтэ, шӧмо вӧй кулэ. Мед луоз со сема вӧй ик яке горчицалэсь, гречкалэсь пызьыртэмъёсыз. Туж пайдаё оливкалэсь вӧй, но со дуно.

Салат — колбасатэк, чорыг — сылалтэк

  • Басьтэм колбаса тазалыклы туж кышкыт. Дышетске сое асьтэос лэсьтыны — туала вакытэ куд-ог лавкаосын сюлъёс но вузасько ни. Вунэтэ «Оливье» салат сярысь. Тодады вае ай, азьло сое «Зимний» шуиськом вал. Колбаса интые песянай-песятайёсмы курег яке кунян сӥль тырылӥзы. Майонез интые — йӧлвыл.
  • Эн басьялэ полуфабрикатъёсты. Фарш лэсьтэ асьтэос. Пӧртэм сӥльёсты огазеяса мясорубка пыр поттэ, бордазы кабачок ватсалэ на — коть пельнянь кутэ, коть котлет лэсьтэ. Ческыт но пайдаё пӧрмоз.
  • Дуннеысь тазалыкез утёнъя организация лыдъя: адямилы нуналаз 5 грамм гинэ сылал сиёно. Нош солэсь ичигес ке — сюрсъёсын улонъёсты утьыны луысал, ӧжытгес луозы сюлэм но сэр висёнъёсын курадӟисьёс. Нянь котоно сылалтэк, чорыг пыжоно сылалтэк. Сӥльын, бакча емышъёсын но аслаз сылалэз вань ини. Вашкала дыръя адямиос сылалтэк сисько вал ук, нош али кузьыт сиськон сямамы пыӵамын.
  • Дуннеысь тазалыкез утёнъя организация ик шуэ: нуналаз 50 грамм сакыр песок сиыны яра. Но мон ватсасал на: варення пӧзьтэм интые, емышъёсты толлы кынтыса гинэ кельтэ.
  • Ӝӧк вылын котьку луыны кулэ укроп, петрушка но мукет вож сиёнъёс. Соос сием сиёнлы ӝушын, сюлъёсын сисьмыны-чырсаны уг сёто. Сием сиён чырсаса улэ ке, мугор ӝоггес пересьме. Соин ик кулэ щёлочь. Куд-огез сода сие — уг валаськы таӵеосты. Сад-бакча возёно, кизёно-мерттӥськоно. Толлы вож будосъёсты кынтыса кельтоно. Но тодэ: укропез кынтоно тулыс будэмзэ. Сӥзьыл потэмаз микроэлементъёсыз ӧжытгес луо ни, зыныз но ческыт ӧвӧл.
    Сиён бырйись, тэргась муртэ асьмеос курласа кечыло яке чебер ньылон шуиськомы. Но, оло, зэмзэ но ваньзэ, мае син адӟе, тыконо ӧвӧл.

Элина Кумачёва

Туспуктэмез М. Егоровлэн

Ангелина Снигирева
By Ангелина Снигирева Январь 15, 2019 15:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<