Кемагес ужалом но чылкытгес улом

Ангелина Снигирева
By Ангелина Снигирева Январь 10, 2019 16:09

Россиын туэ ар ялэмын Театрлэн ареныз, нош шаерамы со сӥземын тазалыклы. Озьы ар ӵоже ортчозы пӧртэм ужрадъёс, пыӵалозы пайдаё кичӧлтонъёс. Нош кыӵе законъёс быдэсъяськыны кутскизы ни? Ог 50 выльдӥськонъёс пӧлысь кудъёсыз тужгес но зол шӧдӥськозы калыклэн улоназ?

Уждун
Йылӥз пичиез уждун (МРОТ), солэн быдӟалаез луиз 11 сюрс 280 манет. Озьы МРОТ нырысьсэ ужась калыклы улыны тупатэм минимум мында луиз. Азьланяз минимумлэн быдӟалаез синӥз ке но, МРОТ уз кулэсмы.
Ужтэк кылемъёслы пособие
Йылэмын ужтэк кылемъёслы чаклам пособие — со ӧз вошъяськы вал ни 2009-тӥ арысен. Пичиез 1 сюрс 500 манет луоз (азьвыл 850 манет вал), бадӟымез — 8 сюрс манет (талэсь азьло 4 сюрс 900 манет лыдъяськиз). Нош пенсие потон арлыдзы вуытэк ужтэк кылемъёс понна — кышномуртъёслы 55 аресысен, воргоронъёслы 60 аресысен — пособилэн быдӟалаез чакламын 1 но ӝыны сюрс манетысен 11 сюрс 280 манетозь. Котькуд адями понна солэн быдӟалаез нимаз лыдъяське — ужам аръёссэ, уждунзэ лыдэ басьтыса.
НДС
Ватсаса будэтэм дун понна выт (НДС) 18 процентысен 20 процентозь йылӥз. Та воштӥськон нырысь ик шӧдӥськоз ужбергатӥсьёс вылын — расходъёссы йылозы, продукцизылэсь дунъёссэс йылтоно луозы, озьыен, соос ӝутскозы.
Но калыклы нырысь ик кулэ луись вузъёсты вӧлмытӥсь огазеяськонъёс понна 10 процентъем льгота утемын. Озьыен, уз дуноялэ сӥль (солэсь лэсьтэм дуно сиён сяна), йӧл, эмъюмъёс, чорыг, кӧсвӧй, пичи нылпиослы чаклам сиён. Озьы ик уз дуноялэ книгаос, калыкез дышетонын но наукаын кутӥськись но мукет та выллем арбериос.
НДС-эз йылтон чотын люкаськем коньдон келямын луоз тазалыкез утёнлы, дышетонлы, наукалы, экологилы но мукет.
Пенсиос
Пыӵаны кутскиз пенсиос сярысь выльдэм закон. Со юнматэмын кылем арын 3-тӥ октябре. Сое быдэстыны чакламын люкетэн-люкетэн: 2019-тӥ арысен 2028-тӥ арозь.
Туэ та выльдӥськон шӧдӥськоз та ар куспын 60 арессэс пусйыны чаклась пиосмуртъёс но 55 арессэс тырмытӥсь кышномуртъёс вылын: соос пенсие потозы ӝыны арлы бергес — 60 но ӝыны, 55 но ӝыны аресысен.
Законын льготаос утемын. Кылсярысь, вазьгес пенсие потыны быгато тазалыклы кышкытлык кылдытӥсь производствоын, озьы ик Крайний Северын тыршисьёс, стажзэс тырмытэм дышетӥсьёс но эмъясьёс, 3 яке солэсь ятыр нылпи будэтӥсь анайёс но мукет. Озьы ик чурыт курон пуктэмын огазеяськонъёслэн кивалтӥсьёссы азе: пенсие потон арлыдаз вуымтэ муртэ ужысьтыз мозмытэм яке ужаны кутыны пумит луэм понна Уголовной кодексъя кыл кутоно луозы. Со сяна, гуртын улӥсь пенсионеръёслэн пенсизы вӧзы ватсаса 25 процент тыриськоз. Но та ватсэтэз басьтон понна лыдэ басьтӥськоз адямилэн гурт удысын ужам дырыз — со 30 арлэсь ичи луыны кулэ ӧвӧл, озьы ик со та вакытэ гуртын улыны кулэ.
Арлыдзыя пенсия басьтӥсь но нокытын ужасьтэм пенсионеръёслэн кисызы 1-тӥ январьысен йылӥз 7 процентлы. Озьы Россиын шоро-куспо пенсилэн быдӟалаез 15 сюрс 400 манетозь ӝутскиз (та дырозь со 1 сюрс манетлы ичигес вал).
Апреле йылтэмын луозы социальной пенсиос но — 2,4 процентлы. Озьы та пенсилэн шоро-куспо быдӟалаез 9 сюрс 200 манет луоз. Нош августэ ӝутскозы ужась пенсионеръёслэн пенсиоссы.
Ваньбур понна выт
Ваньбур (транспорт, музъем, юртъер) возем понна вытэз туэысен люкетэн-люкетэн тырыны луоз — авансэн, вытъёсъя ёзъёслэсь гожтэтсэс витьытэк. Со понна Вытъёсъя федерал службалэн сайтаз нимысьтыз сэрег усьтэмын. Та дырозь угось адямилы ваньбур понна вытсэ тырыны дыр сётӥськиз 1 толэзь куспын: вытъёсъя ёзъёсысь гожтэт вуэ ке 1-тӥ ноябрёзь, сое пытсаны кулэ луылӥз вакчи дыр куспын — декабрьлэн кутсконаз.
Пу люкан
Нюлэсъя кодексэ воштонъёс пыртэмын. Озьы туэ 1-тӥ январьысен калыклэн луонлыкез кылдӥз тэльын лошъяськись вайёсты, куасьмем писпуосты (валежник) дунтэк но нокинлэсь юатэк бичаны. Азьвыл соосты нюлэскысь поттэм понна нимысьтыз огкыл юнматоно луылӥз, нош лушкаськисьёслы тыриськон лякылӥзы.
ЖКХ но жаг
Улон инты понна тыриськонъёс туэ ӝутскозы 2 пол. 1-тӥ январьысен тарифъёс ӝутскизы 1,7 процентлы. Кыкетӥзэ соос йылозы 1-тӥ июльысен — 2,4 процентлы.
Коммунальной тарифъёс пӧлы туэ пыртэмын жуг-жагез утялтон-поттон. Удмуртиын трос квартираен юртын улӥсьёслэсь адямилы быдэ 98 манет 48 копейка басьтозы, нош нимаз коркан улӥсьёслэсь — быдэн 95 манет 2 копейка.
Сад-бакча
Сад-бакча возисьёс понна 1-тӥ январьысен воштӥськон пыӵаны кутскиз: законын «дача» валан ӧвӧл ни. Кельтэмын 2 пӧртэм огазеяськонъёс: сад (СНТ) но бакча (ОНТ) товариществоос. Нырысетӥяз юртъёс пуктыны но отчы пусйиськыны лэземын, нош кыкетӥяз таӵе луонлык уг сётӥськы. Соин ик туэысен сад-бакча басьтыны мылкыд карисьёслы сакгес луоно.
Дольщикъёс
Туэ 1-тӥ июльысен чурыт курон пыӵаны кутскоз улон юртъёсты пуктӥсь огазеяськонъёс понна: дольщикъёслэсь бичам уксёез соос кутыны уз быгатэ, юртэз пумозяз-йылозяз вуттытэк. Калыклэн уксёез утиськоз нимысьтыз счётын, нош огазеяськонлы пуктӥськыны банкысь кредит басьтоно луоз. Та амал юрттоз пӧям дольщикъёслэсь лыдзэс кулэстыны.
Пунэмаськон
Россиысь банк микрофинансовой огазеяськонъёслы куронъёссэ чурытатӥз. 1-тӥ январьысен соос гожтыса кельтыны кулэ пунэмен уксё курисьёсын вераськемзэс, соосын мобильной приложениос пыр кусып воземзэс, озьы ик ӟечгес эскерыны кулэ адямилэсь коньдонъя югдурзэ, малы уксё пунэмамзэ но мукет. Туэысен калыклы лэземын одӥг огазеяськонлэсь 9 пол пунэмаськыны, нош кредитэзъя процентъёссэ пытсаны луонлык сётӥськоз 5 пол гинэ.
Поездэ билетъёс
Россиысь чугун сюрес транспортлэн уставаз воштон пыртэмын. Соя кыдёке ветлӥсь поездъёсын берыктыны луонтэм билетъёс вузаськыны кутскизы, огшоры билетъёсын ӵошатыса, соос дунтэмесьгес. Невозвратной билетъёсты берыктыны луоз 4 учырын гинэ: адями шӧдтэк шорысь висьыны усиз я сӧсырмиз, семьяысьтыз кин ке улонысь кошкиз, поездлэн кошкон дырыз воштӥськиз.

Елена Никитина

Ангелина Снигирева
By Ангелина Снигирева Январь 10, 2019 16:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<