Гуртъёс вискын вань нюкъёс…

Ангелина Снигирева
By Ангелина Снигирева Январь 10, 2019 17:13

Ортчем ар пумын «Удмурт дунне» газетэз лыдӟисьёс пӧлын юалляськон ортчытӥм: мар сярысь лыдӟыны тӥледлы тужгес кельше, мар уг тырмы газетамы но мар сярысь тодэмды потэ? Печатлано-а веросъёс, кулэ на-а туала вакытэ телепрограмма?

Юалляськонэ мыло-кыдо пыриськизы мӧйы лыдӟисьёсмы, шоро-куспо арлыдзы — 50-80 арес. Уноез пусйиллям, «Удмурт дуннеез» трос аръёс ӵоже лыдӟо ини шуыса. Кылсярысь, Сюмси ёросысь Евдокия Ильиных — 54 ар ӵоже, Балезино ёросысь Ушур гуртысь Галина Корепанова — 48 ар, Шаркан ёросысь Сергей Воронцов — 45 ар, Якшур-Бӧдья ёросысь Сюрсовай гуртысь Вера Агафонова — 30 ар…
Анкетаосъя тодмо луиз: лыдӟисьёслы тужгес ярало «Тӧр шорын», «Сю сюрес», «Кылпумысь», «Дунне котырес» рубрикаос улын гожъямъёс. Тани Глазов ёросысь Светлана Дмитриева («Удмурт дуннеез» 6 ар ӵоже лыдӟе) гожтэ:
«Котькуд статьяез яратыса лыдӟисько. Тужгес но «Тӧр шорын» гожтэм улын потэмъёссэ. Троссэ со статьяосты огазе люкасько но куддыръя нош ик лыдӟисько… Азьло дыръёсы газет лыдӟыны дыры ӧжытгес вал, табере котькуд ар гожтӥськисько, газеттэс яратӥсько. Ми, уйпал удмуртъёс, мукетгес ке но вераськиськом, кызьы ке капчиен лыдӟыны но валаны луэ…»
Юалляськонэ пыриськемъёс пӧлысь бадӟым люкетэз пусйиллям историен, Граждан но Быдӟым ожъёсын герӟаськем ужъёсты, гурт сярысь гожъямъёсты но огшоры адямиослэн улонзы-адӟонзы сярысь сюлме пырись материалъёсты. Синву пыр лыдӟиллям фермер Галина Белозёрова сярысь (авторез Е. Сараматова) но ӧлексы кыльыса но шудо луыны быгатӥсь Алексей Талай сярысь (авторез Е. Скворцова) материалъёсты.
Тунсыко, ваньдылы сямен ик кельше вылэм веросъёсты лыдӟыны. Ар ӵоже тужгес кельшымон статьяос пӧлын но тужгес кельшем веросъёсты, повестьёсты пусйиллямды. Та ласянь сюлэмдэс золгес вырӟытэм Елена Миннигараевалэн «Сайкатэ монэ, рай вуиз ке» повестез.
Нош программаез печатлан сярысь мылкыдъёсты висъяськиллям. Тани Балезино ёросысь Люк гуртысь Ф. Наговицына меӵак гожтэ: «Программа воксё кулэ ӧвӧл. Мон сое соку ик газет пушкысь поттӥсько но гурез эстыны кутӥсько. Нош мукет бамъёсты коробкаосы тырисько но амбарын возисько…» Нош Алнаш ёросысь Елена Смирнова гожтэ: «Программа туж кулэ. Кузпалы нырысь ик программа бордысен кутске. Со спортэн тунсыкъяське. Программаез чакласа гинэ улэ пӧртэм ӵошатсконъёсты учкон понна. Уйшор бере но султэ но учке…» Соин ик таяз арын но программаез поттонлэсь ум куштӥське.
Дэмланъёс но трос гинэ сётӥллямды. Таиз понна эшшо но бадӟым тау! Одно ик лыдэ басьтом Ольга Верняевалэсь дэмланзэ: элькунмылы 100 ар тырмонлы сӥзьыса, пӧртэм юанъёсын вожвылъяськон ортчытомы.
Лыдэ басьтыны тыршом дэмлам темаостэс но. Тани Ф. Наговицына куре Брангуртысь песянайёслэн коллективысьтызы котькуд бабушен «Тӧр шорын» рубрикаын нимаз-нимаз тодматыны. Зэм, Брангуртысь песянайёс сярысь ас вакытаз ми ӧжыт ӧм гожъялэ, но тазэ но курондэс быдэстыны тыршом.
Куриськоды на тросгес кырӟанъёс, кылбуръёс но веросъёс печатланы. Таӵе дэмланэн вазисько, вылды, газетмес арняяз 1 пол гинэ (четвергъёсы) басьтӥсьёс. Угось арняяз 2 пол газет басьтӥсьёс доры толэзьлы быдэ литературалы сӥзем «Ингож» ватсэтмы вуэ на, отысь трос гинэ выль вакчи веросъёсты но кылбуръёсты лыдӟыны луэ. Зэм, туала кырӟанъёслэсь кылъёссэс туж шер печатласьком. Но тазэ но дэмланэз быдэстыны тыршом.
Малпаськонэ уськытӥзы Елена Смирновалэн (Алнаш ёрос) дэмланъёсыз. Лыдӟисьмы куре школалы сӥзем рубрика усьтыны, кылэн герӟаськем сэрегез улӟытыны.
Витёнтэм луиз Можга ёросысь Пычас гуртысь Николай Емельяновлэн дэмланэз:
«Пӧртэм гуртъёсы вуылӥськоды но милемлы ивортӥськоды. Нош гуртъёс вискын вань шуръёс но нюкъёс, возьёс но нюръёс. Вот соос сярысь но лыдӟем потэ вал. Узыр инкуазьмылы сӥзем паймымон сэрег медло вал газетын».
Тазэ дэмланэз но матысь дыре уже кутыны тыршом: Удмурт шаерысьтымы тунсыко шуръёсын, ошмесъёсын, тыосын, шулдыр интыосын тодматыны тыршом.
Юалляськонэ пыриськем вань лыдӟисьёсмылы бадӟым тау кариськом. Тӥляд бурдъямды-визьмамды, куддыръя куаретэмды но азьланяз ужаны туж ӟеч мылкыд сётэ. Выльзэ арез но эшъяськыса улоно мед луом!

УД

Ангелина Снигирева
By Ангелина Снигирева Январь 10, 2019 17:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<