Гуртоослы кузьым — музей

Ангелина Снигирева
By Ангелина Снигирева Январь 9, 2019 17:25

Николай Павлович Соколов быдэс улонзэ улэ но ужа Пичи Пурга ёросысь Баграш-Бигра гуртын. Ӝоген солы 80 арес тырмоз ни, но, арлыдыз шоры учкытэк, со трос сюлмаське, гуртысь нылпиос выжыоссэс тодыса мед будозы шуыса. Озьы солэн кичӧлтэмезъя, гуртамы веме карыса, музей пуктӥськомы.

Н. Соколов

Сокол Колягаймы кин гинэ луыса ӧз ужа — быдэс шаерысьтымы калыклы гур пуктылӥз, коркаос ӝутылӥз, тыршиз газовикъёс дорын — котькытын лулысь-сюлмысь тыршиз, калык понна сюлмаськыса улӥз. Зарни киосыз ваньзэ быгато, солэн ас киыныз бичам тракторез но вань. Пенсие потыса но, со гань-гань улонэз уг тодылы, вашкала арбериосты люка — азбараз пичигес музей сэрег лэсьтӥз. Со тырмиз сандыкъёсаз утиськем вашкала арбериосын. Со сяна, Николай Павлович унозэ аслаз киыныз лэсьтӥз. Паймод но бырод, 2 метр ӝуждалаем вукоез адӟыса, со Лудорвайысь музей-заповедникын кадь ик лэсьтэмын, тӧлъя берга. Кӧня солэн уробоосыз, дӧдьыосыз, вашкала вакытысь ю тысь изонэз но вань. Нош али со вань мылкыдзэ но сюлэмзэ сётэ Баграш-Биграын музей пуктонлы.
Ӵапак солэн кичӧлтэ-мезъя ик та бадӟым ужез вырӟытоно кариським. Гуртмы йӧно — школамы, нылпи садмы, клубмы — ваньмыз вань, музеймы гинэ ӧвӧл. Музей карим Пугачёвоысь лесничестволэсь кема аръёс ӵоже буш сылӥсь 2 этажъем юртсэ. Гуртоосмы асьсэос сое Биграла вуттӥзы. Баграш-Бигралэн старостаеныз Анатолий Матвеевен та ужез берыкто, гурт тӧро калыкез бича, Николай Павлович кызьы мар лэсьтыны индылэ, ачиз но кыштыр гинэ ужа. Юртэз пуктонлы котькуд хозяйстволэсь коньдон бичамы, бумага, пияла люкаса, уксё поттыны выримы. Юртэз ӝутыны быдэс гуртэн потӥмы, куд-огез лэсьтӥськонэ уж дуре сямен ветлӥзы, дырзэс но кужымзэс жалятэк. Ваньмызлэсь тросгес, нунал кельтытэк, лэсьтӥськонын ужаз Колягай. Угось музеез йылаз-пумаз вуттоно. Калык возьма. Али музей липет улын ни, пуш ужъёс гинэ кылемын на, вуоно сӥзьылозь ужъёсты йылпумъяно, шуиськом. Зэм, куд-огез егитъёс, марлы гуртлы музей кулэ шуыса, уг валало, но дыр ортчемъя соослэн та ласянь мылкыдзы воштӥськоз шуыса оскиськом.

— Музей пуктон тятямылэн валтӥсь малпанэз луиз ни, шуыны луоз, — вера Николай Соколовлэн внучкаез Елена Ильина. — Бадӟым уж борды басьтӥськыса, висёнъёсыз сярысь но вунэтӥз. Зэм, со быдӟа уж берыктыны пӧрмытэ шуыса, дан поттыса уг улы. Тятямы туж лякыт, кепырась. Со трос вераськыны уг яраты, кутске но лэсьтэ. Ассэ ушъяны уг яраты, мукетъёсыз но ушъяса верало ке, кепыр вае. Ма, али но тани, газетэ гожтӥськомы шуыса, куаретоз ни.
Тятямы кемалась ни вашкала арбериосты люкан борды басьтӥськиз. Маиз гинэ солэн ӧвӧл — азвесь поскесъёс, чильпам ӵушконъёс, кутъёс, пестэръёс, вашкала дӥськут. Ваньзэ тае тятямы ачиз сандыкъёсысьтыз поттӥз, куд-огзэ ӵыжы-выжыосмы, гуртоосмы сётъязы. Но вань та узырлык пӧлысь тятямы понна тужгес дуноез, дыр, атаезлэсь кылем чаркаез. Пичи дыръямы ик тятямы сое сандыкысьтыз поттэ но атаез сярысь вера вал. Павел Михайлович фин ожысь сьӧраз со чаркаез ваем. Берло фашистъёсты жугыны кошкем, отысь берытскымтэ ни. Тятямылэн атаезлэсь со чарка гинэ кылемын, туж чакласа, утялтыса сое возе. Со бордысен ик, малпасько, солэн вашкала арбериосты люкан мылкыдыз вордӥськиз. Юртэз бордысь пичигес гинэ гужем коркае вашкала арбериосты люканы кутскиз — узырлык музей тыр люкаськиз. Гуртысь нылпиос, элькунысь адямиос тятямылэн музеяз ветлыны ӧдъязы.
Али со вань люкам узырлыксэ калыклы сётыны дась, арбериос калык понна пайда мед ваёзы, пе. Гуртоос историез, вашкалазэ мед тодозы, мед асьсэ синмынызы адӟозы. Тятямы сюлмаське, туала егитъёс азьтэмесь, киын ужез валатэк, тодытэк будо шуыса. Соин но вуоно юрт-музей мастерской сямен мед ужалоз, пе.
Гуртоос понна сюлэмзэ поныса тыршемзэ ад-ӟыса, Николай Соколовез «Гурт адями» конкурслэн «Ӟеч сюлэм» номинацияз ӵектӥськомы.

Баграш-Бигра гурт калыклэн нимыныз гожтӥз муниципал кылдытэтлэн йырыз Светлана БАГРАШОВА

Ангелина Снигирева
By Ангелина Снигирева Январь 9, 2019 17:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<