Выль тыриськон кисые уз шуккы

Ангелина Снигирева
By Ангелина Снигирева 24 января, 2019 12:12

Туэ 1-тӥ январьысен Удмуртиын жаген выль сямен нюръяськыны кутскизы. Табере жагез утялтон нимысьтыз коммунальной услугаен лыдъяське, со понна огъя тариф юнматэмын.

Секыт чотаськон
Азьвыл жаген нюръяськон коркаез утялтон понна огъя услугаосы пыртэмын вал. Трос квартираем юртъёсын улӥсьёс та понна пӧртэм дун тырылӥзы — лыдпусэз квартираосын улӥсьёслэн огъя кенешазы юнматылӥзы. Тыриськонлэн быдӟалаез улон интылэн площадез бордысь потылӥз. Нош нимаз коркаосын улӥсьёс меӵак перевозчикен кусып тупатылӥзы. Огъя учыръёсы жагзэс утялтон понна нимысьтыз мешок басьтылӥзы. Но шерез озьы дун тырылӥз но жагез полигонозь вуттылӥз, ӵемгес со нюлэсъёсы, вукыремъёсы куяськылӥз.
Туэысен жаг поттонэз ас вылаз басьтӥз кунмы. Со понна Удмуртиысь Правительство Лэсьтӥськонъя, ЖКХ-я но энергетикая министерствоен валче лыдъяз но юнматӥз огъя тариф. Туэ 1-тӥ январьысен жаг поттонэз радъянэн вырись нимысьтыз улос оператор ужаны кутскиз. Асьме дорын со понна кыл кутэ «Спецавтохозяйство» огазеяськон, соин огкыл гожтэмын 10 арлы. Со жагез люка, поттэ, сое выль вузъёс лэсьтонэ кутэ, инкуазез изъянтытэк, музъеме соге.
Нырысь-валысь улос оператор ӵектӥз вал жагез утялтон понна нимаз коркан улӥсь но отчы прописать карем адямилы быдэ 166 манет, нош трос квартираем юртъёсын улӥсьёслэсь квадрат метрысь 7,54 манет бичаны. Но шаерамы жагез поттон амалъёсты радъясь «Большая тройка» огазеяськон выль дунъёс пуктӥз. Со вераз: жаг нуллӥсь транспортлэсь сюрессэ мукет сямен радъяса, шыръяны луоз. Озьы нимаз коркаосын улӥсьёслы тыриськон 135 манет но 25 копейкаозь усиз, нош трос квартираен коркаосысь адямиослэн будӥз 7 манет 61 копейкаозь.
Но калыклэн юанэз кылдӥз, малы квадрат метрысь дун басьтоно, жаглэн лыдыз квартираын улӥсь адямиос бордысь потэ ке. Та лэчыт ужпумъя трос кенешонъёс ортчылӥзы Кун Кенешын, «Калык фронт» огазеяськонын, радъямын вал калык пӧлын юалляськон но. Озьы Удмуртилэн Правительствоез нимаз коркаосын но трос квартираен юртъёсын улӥсьёслы быдэ дун пуктыны кенешиз. Та ужез тазьы радъяны ӟечгес шуыса, Интернет вотэсын мылкыдзэ вераз калык но.

Мар понна тыромы?
Управляющей компаниос яке товариществоос, жаген нюръяськон нимаз услуга каремын бере, коркаез возён понна дунъёсты квитанциосысь асьсэос воштыны кулэ. Со понна квартираосын улӥсьёслэсь огъя кенешсэс люкано ӧвӧл ни. Управляющей компаниос но ТСЖ-ос дунъёслэн воштӥськемзы сярысь калыклы азьлапал ивортыны кулэ. Адямиос, выль тыриськонлэн мар бордысь потэменыз тодматскемзы потэ ке, соослэсь документъёссэс курыны кулэ.
Мар бордысь потӥз жаглэн дуныз, ивортон поттэмын Лэсьтӥськонъя, ЖКХ-я но энергетикая министерстволэн сайтаз но, «ТКО» сузьетын. Солэн быдӟалаез герӟаськемын улос операторлэсь ужзэ радъяны кулэ луись коньдонэн, талы ог 407 миллион манет кулэ, пусйиз министр Иван Ястреб.
Тарифе пыртэмын:

жагез бичан, поттон, нимаз карон, выль вуз поттон понна коньдон;

жагез музъеме согон понна уксё. Лыдэ басьтэмын 5 полигонъёсын юнматэм тарифъёс, 2-ез быдӟалазэс пумен паськытатозы на;

улос операторлэсь ужзэ радъян понна уксё. Со азьвыл пуктэм дунъёслэсь трослы кулэстэмын.

Тыриськонэ ӧвӧл пыртэмын жаг нуллӥсь машинаос басьтон но жагез нимаз люкылӥсь комплексъёсты пуктон. Калык чотын бизнеслэсь ужзэ радъяны уг яра, шуизы Правительствоын. Угось жуг-жагез выль вуз лэсьтонэ кутыса, уксё поттыны луэ. Озьы ик одӥг но ӝынылы кулэстэмын адямилы быдэ люкаськись жаглэн нормативез. Трос квартираем юртъёсын улӥсьёс понна одӥг адямилы ар ӵоже 206, 64 килограмм (азьвыл 280,95 килограмм вал) яке толэзьлы быдэ 17,22 килограмм, нош нимаз коркаосын улӥсьёслы — 199,75 килограмм (вал 338,95 килограмм) яке толэзяз 16,64 килограмм.
Озьы, нормативъёсты но тарифез лыдэ басьтыса, жагез поттон понна трос квартираем юртын улӥсьлы 98 манет 48 копейка, нимаз коркан улӥсьлы 95 манет 20 копейка юнматэмын. Лыдэ басьтӥськоз прописать карем муртъёслэн лыдзы.

Кулэстыны луонлык вань
Азьланяз Правительство чакла жагез нимаз бичась муртъёслы скидкаос юнматыны. Со юрттоз жаглэсь выль вуз лэсьтонэз азинтыны, ӧжытгес кылем-мылемъёс согиськозы полигонъёсы но. Озьы ик вань луонлыкъёс тарифлэсь быдӟалазэ кулэстыны. Та сярысь ивортӥз Удмуртилэн Правительствоезлэн Тӧроез Ярослав Семёнов. Солэн верамезъя, Удмуртия кун реестре пырисьтэм полигонъёсты (со Глазовысь, Сарапулысь но Воткинскысь полигонъёс) уже кутон сярысь Россиысь Инкуазез утёнъя министерствое вазиськон гожтӥз. Озьы жагез нуллон сюресэз вакчиятыны луоз, иське, огъя тарифлэн дуныз но пичиялоз.

САКТЭЛЭ
Кинлы коньдонэз берыктӥськоз?

Жагез поттон табере коммунальной услуга лыдъяське бере, солы, мукет тыриськонъёслы сямен ик, законъя льготаос но субсидиос чакламын.
Компенсация басьтыны быгато федерал но улос льготникъёс. Квитанциын жаген нюръяськон понна дун льготатэк пусъемын луоз. Нырысь-валысь сое быдэсак тыроно. Бӧрысь компенсация берыктӥськоз пенсиен яке мукет выплатаен валче.
Сое басьтон вылысь калыкез улон-вылонын утёнъя ёзъёсы вазиськоно уз луы, со лыдъямын луоз азьлапал. 1-тӥ январьысен Удмуртиысь Ужъя но калыкез улон-вылонын утён политикая министерство льготникъёслы компенсация чотан борды басьтӥськиз ни.
Озьы ик шаерамы улӥсьёс жилищной субсидия басьтыны быгатозы, ЖКХ-я тыриськонъёссы семьязылэн огъя доходзылэн 22 процентэзлэсь уногес ке. Сое басьтон понна асьтэлы вазиськоно МФЦ-лэн ёзъёсаз. Солэн быдӟалаез котькуд адямилы, семьялы пӧртэм луэ.


Тросгес тодэ жаген выль сямен нюръяськон сярысь!
Ивортэ свалка яке дырыз дыръя поттымтэ жуг-жаг сярысь!


ПӦСЬ ТЕЛЕФОН
8-800-234-89-86
(жингыртыны луэ дунтэк)

«ВКОНТАКТЕ» НО «ФЕЙСБУК» ВОТЭС БАМЪЁСЫН
@REGOPERATORUDMURTIA ВИЗЬ-КЕНЕШ СЁТОЗЫ ОНЛАЙН АМАЛЪЯ

Сергей Захаров

Фото басьтэмын «Спецавтохозяйство» предприятиелэ «ВКонтакте» вотэсбамысьтыз

Ангелина Снигирева
By Ангелина Снигирева 24 января, 2019 12:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<