Выль арез пумиталозы огазьын

Ангелина Снигирева
By Ангелина Снигирева Январь 9, 2019 17:14

Кыӵе мылкыдъёсын уло, кызьы Выль арез пумитаны дасясько Ува ёросысь Парсьгуртын улӥсьёс? Оско-а соос, Парсьлэн араз соослы нимысьтыз удалтоз шуыса?

Ува ёросысь Парсьгурт

Журналистъёс лыкто
Гуртэ Выль арлэн матэктэмез шӧдӥське ини: пыронтӥяз ик вуоно арлэн пусэз — лымылэсь парсьпи — лэсьтэмын, вылаз яркыт ӵуж дэрем дӥсяллям. Сое погыллязы библиотекарь Валентина Поздеева но клубын ужась Людмила Гореева. Та мыло-кыдо кышномуртъёс парсьгуртъёслэсь улонзэс шулдыргес карон понна ялан сюлмасько.

— Арлы быдэ Выль ар азьын колхозмылэн юрттэмезъя клубамы, нюлэскысь вайыса, улэп кыз пуктӥськом, — вера Людмила Гореева. — Со кыз, гуртоослы ӟеч мылкыд кузьмаса, Вуж выль арозь сылэ. Туэ но пӧртэм уз луы.

— Гурттылэн нимыз парсьпиен герӟаськемын бере, кыӵе мылкыдын возьмаськоды сое? — юасько гуртоослэсь.

Шулдыръясько валче

— Ма, Парсьлэн арез вуэ ке, ми сярысь нырысь ик тодэ ваё журналистъёс, — азьланьтэ веранзэ Людмила Ефремовна. — Валерий Сидоров гуртмылэн историез, улэм-вылэмез, калыкмы сярысь чебер сюжет лэсьтӥз вал. Тани алигес нош ик телевидениысь вуылӥзы. Кемалась ик ӧвӧл куноязы «Ӟечбур!» газетысь ужасьёс. Милемлы журналистъёс сыӵе саклык висъяло шуыса, шумпотӥськом, историе кылем потэ уго. Котькин но, дыр, Выль аре выль малпанъёсын, выль мылкыдъёсын вамыштэ. Ми но со ласянь номырин ум висъяськиське. Нош ик бичаськомы вань гуртэн Выль ар кыз котыре бал-маскарадэ. Огзэ воргоронмес Тол бабай дӥсяломы, Лымы ныл кин ке асьмеос ик пӧрмытском, дыр. Парсен герӟаськем сценкаос возьматомы, кырӟаломы, кылбур вераломы. Эшшо гурт калыклы кузьым дасяськомы на, со сярысь тӥледлы ум вералэ. Угось гуртамы газеттэс басьтӥсьёс вань, азьлапал тодӥзы ке, умой ӧвӧл.

Ужаны пото дэмен

Тыршись калык
Гурт сярысь 17-тӥ даурлэн пумаз ик тодмо вал ини. Ландратской переписьын со сярысь 1716-тӥ арын гожтэмъёс вань. Татчы улыны выжиллям Булайысь адямиос, отын улӥсь бигеръёсын тэрытэк. Нырысь ик татчы Горей нимо воргорон вуэм, татысь ошмесъёсты эскерем. Нош кызьы гуртлэн нимыз кылдэм?
Гуртоос, татчы улыны интыяськозы шуыса, бугроос ӵупиллям, пудозэс кыре лэзьыса кельтӥллям. Бусы ужъёс йылпумъяськем бере выльысь лэсьтӥськон борды басьтӥськиллям. Нош одӥгаз бугро пушкын пиям парсез пумиталлям. Со бордысь ик гуртлы ним но сюрем.
Но Парсьгурт 1964-тӥ арын Родники луиз, нимыз чебер уг кылӥськы шуыса, озьы воштӥллям. Но выль ним ярамтэ, калык гуртсэ Парсьгурт ик шуэ.
Булай муниципал кылдытэтлэн йырыз Ирина Никифорова поселениен 13 ар ӵоже кивалтӥз.

Фельдшерен пумиськон

Парсьгуртысь калык туж ужась, ог-огенызы эшъяськыса уло, — вераз со. — Соос туж чылкытлыкез ярато, дэмен утялскыны пото. Ми палан соос кадь лыдӟиськыны, гожъяськыны яратӥсьёсыз вань меда? Собере, азбар котыръёссэс но соос огзыя огзы чебергес, яркытгес каро, сяськаос мерттыло. Поселениысьтымы вань гуртъёс пӧлысь соос гинэ Выль арез пумитаны 31-тӥ декабре огазе люкасько. Ваньмыз мукетъёсыз Выль ар кыз котырын шулдыръяськонъёссэс 30-тӥ декабре ортчыто, ӵуказеяз крезьгур улсын эктыны гинэ пото на.
Гуртын ужало клуб, библиотека, медпункт, вань нылпи садзы, магазинъёссы. Пиналъёсты школае автобус нуллэ, сюрес татын ӝутэмын, толалтэ но, гужем но чылкыт сузяса возё. Гурт ёрос центрлэсь палэнынгес — 45 иськемын, соин тросэз гуртоос колхозын тыршо. «Дружба» хозяйствозы зол ужа. Парсьгуртын гинэ 2 гидын скал возё, 2 гидын — ветыл. Гуртэ кылем егитъёс но кӧня ке вань. Егит пияшъёс механизатор луыса тыршо. Одӥгез гинэ сюлмаськытэ — ас вакытаз гуртэ чагыр эстӥськон кыскыса ӧз вуттэ.

Выль ар шулдыръяськон дыръя

— Мон Алнаш палъёсысь татчы вуи но татысь калыклы соку ик синмаськи, — парсьгуртъёс сярысь вера библиотекарь Валентина Поздеева. — Парсен ми ужась муртэз ӵошатӥськом. Синмаз ик ум вераське, но «парсь кадь ужа» шуиськом. Гуртамы адӟем карымон, тыршыса ужась семьяос вань — Акмаровъёс, Широбоковъёс. Соос музъем ужез валало, бадӟым бакчаос, трос пудо возё, воргоронъёссы йӧноесь, золэсь, кышнооссы но пӧртэмесь ӧвӧл, нокыӵе ужлэсь уг кышкало.
Калыкмы данъяське гуртамы будэм нимо-дано адямиосын, татын вордӥськиз удмурт гожъяськись Геннадий Мадьяров. Библиотекаын солэн творчествоезлы, улэм-вылэмезлы сӥзем сэрег возиськомы. Парсьгуртын вордӥськемын Пётр Акмаров — Ижысь гурт удысъя академиысь проректор, Елена Петрова — Удмурт кун университетысь журналистикалы дышетӥсь.
Гуртмы сокем бадӟым ӧвӧл ке но, адӟем карымон адямиосмы трос. Тани Людмила Медведева быдэс улонзэ скал кыскиз, али пенсиын ини. Со улонэз сярысь, гурт калыкез, гурт улон сярысь мылкыдъёссэ, малпанъёссэ аслаз чуръёсаз кисьтэ.

Ангелина Снигирёва

Ангелина Снигирева
By Ангелина Снигирева Январь 9, 2019 17:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<