Вуко берысь бадьпуос

Ангелина Снигирева
By Ангелина Снигирева Январь 12, 2019 09:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Паськыт возь вылтӥ Шошмо шурмы вуоссэ зыл-зыл нуэ. Нялмыт ярдуръёсаз бадьпуос но лулпуос чылкыт синучконэ учкыса сыло кадь. Турья гурт па­ла матэ вуэмъяз шурмы музэ куштэм карнан выллем ӧр лэсьтэм. Татчы вуыса, шутэтскыны дугдэ со. Ярдурын будӥсь вистэм-вожтэм шашыос борды кырмиськыса пуке, кожалод. Татӥ солэн вуэз но мур, кисьтаськыса но уг шуды. Ерпечка дырыз ортчыса, визьмаськем кадь, зӥб-зӥб улэ. Ыркыт тӧл пельтэмъя гинэ лызалэс-тӧдьы тулкымъёс шур вылтӥ шудыса ортчо.
Куке но татчы, интыез кельшытыса, турьяос вуко пуктӥллям. Солэн котыраз, исась-йӧтӥсь луымтэен, вожмаськыса будӥллям бадьпуос. Дыр ортчемъя вукоез сэрттӥзы. Арысь аре куасьмыса погразы вуко берысь бадьпуос но. Нош али отын, мӧйыослы ортчем дырез тодазы уськытыса, куинь апай-сузэръёс, пересь бадьпуос, кылем нуналъёссэс лыдъяса сыло.
…Турьяе выль председатель лыктэмен валче трос воштӥськонъёс луизы. «Выль ӵужон чылкыт ӵуже», — шыпыртылӥзы калыкын Бакреев сярысь. Чупрес сямзэ калык соку ик шӧдӥз. Адями синъёслэсь уродзэ но, ӟечсэ но ватыны шуг угось. Соос котьмае адӟо, ас мертэтэнызы мертало. Буш кыллись музъемъёсты ӝог синйылтӥз Бакреев. Вуоно араз ик соосты гырытӥз. Выльвылысь ю-нянь басьтыса, колхозлы шӧдскымон пайда усиз. Рамиль Гариповичлэн лэчыт синъёсызлэсь палэнэ ӧз кыле бусы шорын оген-кыкен сылӥсь писпуос но. Кытӥ-мартӥ районысь мелиораторъёсты ӧтьыса, лудъёсты чылкытатӥз. Дауръем писпуос секыт усьылӥзы музъем вылэ. Табере бусы шорын оген сылӥсь писпуосты бадӟымесь но паськытэсь агрегатъёсын котыръянэз ӧй вал ни. Воштӥськонъёс вуизы Турья возь вылъёсы но. Нюр интыос кӧсатэмын, кускозь ик турыно возь вылъёс гыремын. Яркыт пиштӥсь италмасъёс интые ӵуж ӟег пӧлы одӥг-ог зангари сяськаос ӝужазы. Мӧзмытгес луизы Шошмо дур возьёс…
Огнуналэ тулыс бусыосты машинаеныз котыръяса бертӥсь Бакреев вал гид дорын ужасьёс доры дугдӥз. Бригадирез, Коротковез, ӧтиз но калыклы кылӥськымон вераз:

— Михаил Степанович! Вуко берысь бадьпуосты но утялтыны дыр вуэмын.

— Ма, соос уг люкето ук, Рамиль Гарипович. Мед сылозы, даурзы кема уз кыстӥськы ни.

— Витёно ӧвӧл, отын куинь гектар музъем тэк кылле.

— Ӧйтӧд, ма быдӟа пайда басьтоды меда? — каллен гинэ куаразэ сётӥз Коротков.
Ужаны лыктэм воргоронъёс но, кышноос но ымазы ву ӟузем кадь сылӥзы, нокин, номыр вазись ӧз луы. Председательлэн машинаез тузонэз пурӟытыса ышем бере гинэ соос кӧлэмысь сайказы кадь.

— Хм, бадӟым музъем шедьтэм! Колхоз узырмоз ини соин, — тымиськем вераськон ӧрез кырыса лэзиз пересь Ондыръян агай.

— Вань вылэм музъем тырмымтэ адями но. Кулӥз ке, аслыз одӥг сажень музъем тырмоз, — вожпотэмзэ ӧз ваты Пильып Гриша.

— Тыныд но, мыным но сомындаен тырмоз, Гри­ша. Нош малы йӧтонэз ни вал со пересь бадьпуос­ты? — папироссэ аратонъяз вазиз Коротков.

— Вукоез коть тодэ вайыто вал али…

— Вукоез гинэ-а? Мон отын нырысь сюлэм яратэмме верай. Отын ик бадьпуос пӧлын… нырысьсэ чупаськи. Тӥни, Натальяе татын, ӧрекчаны уз лэзь, — кор вылын пукись кузпалэз шоры возьматӥз тракто­рист Санька. Мылпотытэк кадь серектӥзы ужасьёс.

— Чик но серемез ӧвӧл, Санька зэмзэ вера, — лулӟиськиз Наталья.

— Тӥ чупаськемды ке чупаськемды, нош мон отын вордӥськемын, — вераськонэ пыриськиз Матвей Геня. — Бен, ӵапак вуко дор возез турнаку, вордӥськиськем. Анае секытэн вылэм бере, турнаны ӧтьымтэзы ни. Нош вань калык возь вылынысь, сиён пӧраны ке но куриськем. Турнасьёсыз нуназелы сюдэм но ватскыса-ватскыса бадьпуос пӧлы интыяськем. Тӥни отын ик вордскиськем. Озьы бере, отын мынам вордӥськем музъеме…
Пӧртэм тодэ ваёнъёссы бугырскизы адямиослэн, вуко берысь бадьпуосты жаляса. Ужзэс вунэтыса, лач-лач вераськыса пукисьёс доры гуртысь самой арлыдоез пересь, Ладимер песятай, лыктӥз. Пельыз кылымтэысь, гуртоосызлэсь ма сярысь вераськемзэс тодытэк пукиз. Пильып Гриша пель дораз ик черекъяса валэктэмез бере Коротковлэсь кысконзэ куриз. Шошмо палась вуко бервылэз бездыт синъёсыныз утчаса шедьтэмез бере вазиз:

— Кулэ ӧвӧл, гуртоосы. Кулэтэм уж со. Азьвыл аръёсы пересьёс лудъёсын нимаз будӥсь писпуосты йӧтылыны уг лэзё вал. Со гинэ-а? Ортчемзэ тодэ уськытӥсь бадьпуос ук соос. Ӟечсэ но, уродзэ но тодэ вайытӥсьёс. Быдэс ёросысь гуртъёс ветло вал асьме вукоямы. Туж бадӟым, дано вуко вал со ас гумыраз. Нош Граждан ож дыре отын кӧня сӧсырмем горд солдатъёс йӧнатскизы. Тодӥськоды-а сое? Уд! Гонь­ба гурт дорын туж лек ож вал. Тани та пыды но отысен чут кылемын. Сӧсырмем солдатъёсты, валэн уробое тырыса, асьме вукое нуллӥзы. Тросэз берен кошкизы тушмонэз жугыны. Нош одӥгез, егит бигер пи, вуко коркан ик кулӥз. Сое бадьпуос пӧлы ватӥзы асьме гуртоос…
Чалмытскиз Ладимер песятай. Кемалась кысэм кысконзэ куштӥз но шуиз:

— Эн исалэ, гуртоосы, со бадьёсты. Эн исалэ!
Собере, пыкъяськон бодызэ басьтыса, чутыса дор палаз кошкиз.

— Нокин но уз иса со бадьпуосты. Кызьы сылӥзы, озьы ик сылозы, — тӥрзэ кияз басьтыса, меӵак шуиз Ондыръян агай. Со сьӧры ик мукетъёсыз но султӥзы.

— А монэ косӥзы ке, мон кыл вератэк погыръяло, — ужаны кошкисьёслэн бӧрсязы вазиз Турьяе пыртосэ лыктэм Микол. — Начальстволэсь кылзӥськоно, — маскаръяськыса будэтӥз со. Ваньмыз ик малпазы: со серекъя гинэ.
Миколлэн та верамез Бакреевлэн пеляз вуэм. Уж бере Миколэз кабинетаз ӧтьыса, кема вераськизы. Микол нырысь пумитъяськиз ке но, предзы дас вить манет — бадьпулы быдэ вить -ӵектэм бере соглаш кариськиз.
Бер ӝыт, гурт калык кӧлыны дасяськон азьын, погыръяз со бадьпуосты. Аслаз ужано трактореныз ик ферма доры вандылыны кысказ. Кулонлы сётскемзы потытэк-а, ӵем зоръёс кисьтэмен-а, музъем вылын кыллись бадьпуос гужембыт вож куаро пушъетъёсынызы шильыртӥзы на. Сӥзьыл, кезьыт тӧлъёс куаръёсты ишкам бере, бригадир косэмысь Микол бадьпу­осты ферма сьӧрысь нюке кыскаса питыръяз. Адями син азьын, пе, медаз кылле. Озьы, оло, ӟечгес луоз…
Нош вуонояз тулыс Шошмо шур, кужыменыз ушъяськыса тудвуэн шудыкуз, ас ужзэ лэсьтӥз, тракторен порылыса басьтэм бадьпу выжы бервылъёстӥ шонерак выль ӧр усьтӥз. Озьы выльвыл музъем ву шорысь шормуӵлы пӧрмиз. Кужмо зоръёс дыръя гинэ Шош­мо вуж ӧраз кожылэ на. Соку со лекъяськыса куашетэ пож тулкымъёсыныз. 

Николай Никифоров

Туспуктэмез М. Егоровлэн

Ангелина Снигирева
By Ангелина Снигирева Январь 12, 2019 09:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<