Быронлэсь утиз кузял лыс

Ангелина Снигирева
By Ангелина Снигирева 27 января, 2019 11:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Ленинградэз кульчоысь мозмытэм дырысен туэ 75 ар тырме. Ог 900 нунал ӵоже — 1941-тӥ арын 8-тӥ куарусёнысен 1944-тӥ арын 27-тӥ толшорозь — сютэм улонлэсь, кынмыса но фашист снарядъёслэсь городын 640 сюрслэсь уно огшоры улӥсьёс быризы.

И. Душевская

Кык шӧйёс вискын

Ирэна Эдуардовна Душевская ачиз сярысь данъяськыса «мон Чурысь, мон Удмуртиысь» шуэ. Уноез озьы ик малпало, уго уг тодо: кышномурт вордскиз но пичи дырзэ ортчытӥз Ленинградын.

Улонысьтыз та бамзэ Ирэна Эдуардовна ӟеч тодэ на, война кутскыку, солы 8 арес гинэ ке но вал.

— Анае-атае Белоруссиысь вал, но егит дырысен улӥзы Ленинградын. Квартирамы городлэн центраз интыяськиз. Анае тыршиз Ленинградысь библиотекаын, атае — заводын, — вера Ирэна Душевская. — 1941-тӥ арын инвожо толэзе мыным 8 арес тырмиз. Сӥзьылаз школае мыныны дасяськисько вал, но ӧй мыны — кутскиз Быдӟым ож. Ленинградын вакчи дыр куспын быриз сиён-юон, городмы вылэ ялан бомбаос усьылӥзы. Огпол ми, нылпиос, урамын шудӥськом вал. Кытысь-марысь йыр вадьсамы ик туж улӥетӥ сьӧд свастикаен самолёт лобаны ӧдъяз, пилотсэ ик адӟыны луиз. Пичиосызгес пиналъёс ну шонало ук солы! Нош мон валай: со тушмон, малы ай мон соин ӟечбуръяськом? Доре бертӥ но анаелы со учырез верай. Берло гинэ, со нуналэз тодэ вайыкум, малпай, тушмон милемыз ыбылыса кельтыны но быгатэ вал ук!

1941-тӥ арын толалтэ ӟырт кезьыт кариськиз.

— Адямиос син азьын лябӟылӥзы но кулылӥзы. 1942-тӥ арын толшоре сютэм улыса атае кулӥз. Со берегес ик — Паша (Павла) апае, бӧрысь — ӵужае. Ноку уг вунэты: кыллисько катьтэммыса кезьыт квартираямы, нош мон вӧзын одӥг палаз кулэм Паша апае, мукет палаз — кулэм ӵужанае кыллё. Анае, монэ кельтыса, машина утчаны кошкем со шӧйёсты Пискарёвской шайвылэ нуон вылысь. Соосты ватӥзы вынлыко шайгуэ Ленинградысь трос мукет шӧйёсын огазьын. Сютэм улыса мон ӵемысь йырсазьме ыштылыны кутски. Анае лэсьтӥз ваньзэ, мон улэп мед кылё шуыса: паркысь кыз но пужым вайёсты тӥяса вайылӥз. Лыссэс векчиятылӥз но мыным сюдылӥз. Лыс кузял вал, но кыӵе ке коть витамин… Озьы ик милям дорамы вал пианиномы. 6-7 арескам мон мае но сое шудыны быгатӥсько ни вал. Ож кутскем бере анае со дуно инструментэз кыӵе ке воргоронъёслы 1 стакан рис понна сётэм. Мар карод — улон сыӵе луиз. Озьы ик ми эшъяськиськом вал туж умой семьяен. Мария Александровна Саша пиез но Ира нылыз понна туж сюлмаськиз, ачиз ымаз одӥг пыры но уг тыры вал. Соин семьяысьтыз ваньмызлэсь вазь кулӥз — Ленинградэз котыртэм берегес ик. 1942-тӥ арлэн кутсконаз кулӥз Ирочка но. Буш квартираын Саша (со мон быдӟа вал) огназ кылиз. Ярам, коркаосты эскерись но шӧйёсты поттась адямиос вал, соос Сашаез утизы.

1942-тӥ арын апреле фашистъёс Ленинградэз туж кужмо бомбить каризы. Ож йылпумъяськем бере ини документъёсысь тодыны луиз: 4-тӥ оштолэзе город вадестӥ лобазы 200-лэсь уно самолёт-бомбардировщикъёс но истребительёс. Со нуналэз Ирэна Эдуардовна но туж ӟеч тодэ на:

— Южтолэзь пумын фашистъёс кӧня ке буйгатскизы, нош 4-тӥ оштолэзе городмес адлы пӧрмытӥзы. Подъездысьтымы ваньмыз, кин улэп вал на (нош сыӵеос нуналысь нуналэ ӧжытгес но ӧжытгес кыльылӥзы, уноез валес вылысьтызы султыны уг быгато ни вал), бомбоубежищее ватскыны дыртӥзы. Матысез интыяськемын вал ураммылэн мукет палаз, черклэн мурӝолаз. Коркамылэн борддоръёсыз бомба пуштэмлэсь дырекъяны кутскизы, котыр ласянь лобазы пилиськем укно пиялаос. Соин йырин черк дорозь вуыны ми ӧм быгатэ. Ватскимы подъездамы огаз из борддор сьӧры. Тодам лыктӥз, кызьы вазенгес бускель корка пуштытэмын вал. Ми, нылпиос, котыртӥз бызьылыкумы, адӟимы, кызьы пушкысьтыз шӧйёсты но жуммем адямиосты поттазы. Сое син азям пуктыса, анае борды ӝиптӥськи, «монэ юнгес ӟыгырты» шуыса черекъясько. Туж зол кышкай, милемыз улэпкын ватозы шуыса. Визьтэммыса ураме потыны турттӥсько вал — мырдэм кутӥзы. Бомбардировка йылпумъяськем бере ми кыре дыртӥмы. Котыр ӵын вӧлдӥське. Бус пыртӥ сямен адӟимы корка вӧзысьтымы ӝуась грузовикез но киоскез. Огвакытлы чал-чал кариськиз. Нош собере ми кылӥмы асьме но тушмон самолётъёслэсь гужетэмзэс (куаразы висъяське вал). Тодӥсько на, кызьы соос инметӥ огезлы пумит мукетыз лобазы, ог-огзэс ыбылӥзы. Соку мон нырысьсэ адӟи омырын ожмаськемез. Тау Инмарлы, берпуметӥзэ но.

Гужем Ирэна чылкак лябӟиз. Анаезлы шуиллям: нылдэ Ленинградысь ӧд потты ке — кулоз. Городысь сюрес одӥг гинэ вал — Ладога ты вылтӥ. Но тушмон сое пуштытъяса возе вал.

— Мон пыд йылам мырдэм сылӥсько, йыры кыска, — тодаз вае Ирэна Эдуардовна. — Сыӵеен анае пуктӥз баржалэн кыӵе ке трюмаз. Вырӟим гинэ — вадьсамы тушмон самолёт кылдӥз. Вань кышномуртъёс нылпиоссэс бордазы ӝиптӥзы. Самолёт бомба куштӥз — ӧз йӧтты. Омырын котырскыса, выльысь вадьсамы вуиз но эшшо огпол бомба куштӥз на. Нош ик ӧз сюры. Кошкиз гинэ — мон соку ик умме уси. Со дыръёсы мынам ялан иземе потэ вал. Анайме но алылӥ: анай, малы тон монэ сайкатӥськод?

Чур — кыкетӥ дорез

Семьялэн Удмуртие вуэмез — нимаз история.

Кылем даурысь 30-тӥ аръёсы Ирэналэн анаезлэн сузэрез репрессировать каремын вал. Ог 20 аресъем Зинаида сьӧры 2 егит пиос бызьылӥллям. Со огеныз пумиськылыны кутскем, мукетсэ кулэ карымтэ. Соиз йыркуръяськыса донос гожтэм, Зинаидалэсь нимзэ саптам. Нылмуртэ лагере келяллям.

— Со вакытэ доносъёслы одӥгтэм оско вал. Кинлэсь ке сьӧсь ужамзэ возьматӥськод — озьыен, Родиналы юрттӥськод, — шуэ И. Душевская. — Зина апайме Бурятие лагере ыстӥзы. Отын со 6-7 ар костаськиз, тазалыкез лябӟиз. 1930-тӥ аръёслэн пумазы сое мозмытӥзы, но Ленинградэ берытскыны ӧз лэзе — тушмонлы отын инты ӧвӧл, пе. Ярам, лагерьын Зина апае тодматскем воргоронэн — Миша агаен. Бӧрысь соос ӵош улӥзы Удмуртиысь Чур станциын, отын нюлэс хозяйствоын тыршизы, лэсьтӥськизы. Ленинградысь баржаен потэммы бере ми анаеным Зина апаен Миша агай доры мынӥмы. Миша агай соку фронтэ кошкемын вал ни. Кӧня ке улыса, похоронкаез вуиз — Ржев дорын бырем.

Ирэна но анаез понна Якшур-Бӧдья ёросысь Чур кыкетӥ дор луиз. Отчы вуэмзы бере станциын улӥсьёс, Ирэнаез адӟыса, сое туж жаляллям: учкон интыез но вылымтэ — лы но ку. Мон коть улэп кыли, уноез эшъёсы Пискарёвской шайвылэ вуизы, шуэ И. Душевская.

Нылаш Чурын йылпумъяз 7 классэз, нош 10-тӥ классозь ветлӥз Иже. Собере дышетскыны пыриз Ленинградысь медициная институтэ.

— Азьвыл ужаны направлениен ысто вал, — шуэ И. Душевская. — Мынэсьтым юазы, кытчы, пе, мынэмед потэ. Кытчы келяды — отчы ик мыно, шуисько. Якутие но мынод-а, юало. Келяды ке — мыно, шуи. Озьы мон но курсысьтым эшшо 3-4 егит врачъёс Якутие мынӥмы. Отын милемлы 2 ар ужано вал. Но мон 1 арзэ гинэ тырши. Со вакытэ Чурын улӥсь анаелэн но Зина апаелэн тазалыксы воксё лябӟемын ни вал, Тазалыкез утёнъя министерство пыр соос монэ Чуре берыктыны куриллям. Чурын ӵапак туберкулёзной эмъюрт усьтӥськиз, монэ, егит фтизиатрез, соку ик кивалтӥсе пуктӥзы.

Чурын 2 но ӝыны ар ужаса, И. Душевская Иже улыны кариськиз. Шоркарын ик пумитаз вуоно кузпалзэ, ӵошен соос Вера нылзэс будэтӥзы. Табере нылзылэн нылыз но будэмын, правнучказы вань ини.

Иже выжыса, егит эмъясь туберкулёзной диспансере интыяськиз, но отын кема ужамез ӧйлась — туберкулёз паласькиз, ӝыны арлэсь кема йӧнатсконо луиз. Бурмемез бере диспансере ӧз ни берытскы, Ижысь мотозаводлэн медсанчастяз терапевтэ интыяськиз, 33 ар ӵоже отысь терапевтической отделениен кивалтӥз. Медсанчастьын, пенсие потытозяз, оглом 40 арлэсь кема тыршиз. Мотозаводын ужамъёс но ужасьёс, кышномуртэз урамысь адӟо ке, туннэ но тодмало, ӟеч кылын вазисько.

Али Ирэна Эдуардовна нылыныз но эмеспиеныз улэ.

— Аслам номыр карыны моӵе ӧвӧл ни, тау Инмарлы, нылпиосытэк мон бырысал, — шуэ 85 аресъем кышномурт. — Вералы табере 57 арес ини, со но, эмеспие но пенсиын. Федя кузпалы кемаласьгес ӧвӧл ини. Нош мон, сыӵе секыт улонэз адӟыса, 86 аресам потӥ. Пичиен ик улонысь кошкем эшъёсы, ӵыжы-выжыосы понна улӥсько, дыр.

Елена Рябина

Ангелина Снигирева
By Ангелина Снигирева 27 января, 2019 11:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<