Бадӟым кунян ёрка

Ангелина Снигирева
By Ангелина Снигирева Январь 15, 2019 15:41

Кыкез ик скалъёсы, кунян вайыкузы, кулӥзы ни. Али нош ик кунян возьмаськомы, нош ик пияны уз вормы шуыса кышкаськомы. Туала вакытэ ошъёс бадӟымесь, соин ик кунянъёссы но бадӟымесь будо, ёркало, скаллэсь пушсэ кесяло. Но ош бордысь гинэ со потэ меда? Оло, кунян ваёно скалэз кызьы ке мукет сямен сюдыны кулэ, пиез сокем бадӟым медаз буды шуыса?

Ольга П. Вотка ёрос

Валэктон сёто Удмуртиысь Пудо эмъянъя валтӥсь управлениысь специалистъёс

Ошъёс зэмен ик олокыӵеосыз но вань. Куд-огезлэн кидысэз паськыт беро скалъёслы гинэ тупа. Фермаосын, гуртъёсын ӵемысь одӥг ошлэсь ваем кидысэн скалъёсты бызьылыто, пудолэсь быдӟалазэ уггес эскеро. Соин ик отысь но, татысь но ялан кылӥськылэ, скал, кунян вайыкуз, кулӥз я сӧсырмиз шуыса.

Котьма ке но котькуд кузё югдурез ас кияз кутыны, шуг-секытлэсь утиськыны быгатэ. Туж тросэз потэ сюдэм бордысь. Кунян ваёно скалэз ческыт, витамино сиёнэн сюдыны косо. Сотэк кунянэз ляб но висись вордске угось. Но куд-огез бакча сиёнъёс, кыд (жмых), концентратъёс, комбикорм, фураж вылэ чӧлске но умой лэсьтэ кожа. Тужгес но фермаосын силос, сенаж вылэ оскисько. Ческыт. Пайдаё. Но ӝушез таӵе сиён кема уг ужаты, со ӝог быре. Нош скаллэн ӝушез котьку но тырмемын луыны кулэ. Сиёнэз бырыса, ӝуш пичия, со дыше шымыртӥськыса улыны. Озьыен, кунянлы будон инты трос кыле.

Кунян ӝог но бадӟым медаз буды шуыса, уката ик скалэз кыскемысь дугдэм бере пудолы тросгес сётъяны кутсконо чабей, йыды куро — со кузь медло, кылсярысь, рулонысь. Таиз ӝушын 24 час ӵоже улэ, витаминъёсыз но, озимойлэн сярысь, тросгес. Озьы ик одно сётъяно турын — таиз ӝушын 36 час возиське. Та культураос ӝушез ялан тыро возё, ужато, шымырскыны но гань-гань кариськыны уг сёто. Пудо но сютэм уг улы, кунян но мултэс уг буды. Со сяна, ялан мед луоз на тусьын чылкыт шуныт ву.

Куд-ог кунянъёс угось 55-60 килограммъем но вордӥсько. Но 37-45 килограммъемез тужгес умой, вылды. Бадӟым кунян угось вордскыкуз скаллэсь кунян ваён карзэ но сьӧраз ик кыскыса поттэ. Сыӵе дыръя скалэз вандоно луэ — эмъяны сое туж секыт, вань пудо першалъёс со борды уз но басьтӥське: вурылоно, уколъёс пуктоно. Со сяна, бадӟым кунян скаллэсь ӝушсэ интыысьтыз вырӟытэ, кырыжтэ. Ӝушысь огез ёзэз — сычугез — кырыжа ке, скал кема уг улы ни. Сое угось йӧнатыны эшшо но шуг: пудоез тыбыр вылаз выдтыса эмъяно луэ, нош сое озьы выдтыны туж шуг. Кунян ачиз но вӧсь луэ на — ёркаса улэмлэн ӟечез ӧвӧл.

Скаллэсь вӧсьсэ шӧдыны но, адӟыны но куддыр уг луы. Соин ик кунян ваемез бере чаклано, макем капчиен интыысьтыз султоз. Кунянзэ умой ваем скал нырысь ик бер пыдъёсыз вылэ султоз, собере гинэ азь пыдъёсыз вылэ пыкиськоз. Султыны уг вормы ке, пушкыз сӧсырмемын. Пудоез утьыны луонлык ӧвӧл ке, кулэмзэ возьмаса улоно ӧвӧл — вандоно.

Адямилы сямен ик, скаллы кунян ваемез бере кытысь ке кужым люкано. Та ласянь тужгес пайдаё луэ ӵӧжы. Кунянлы вордӥськемез бере 1 час ӵоже секталаезлэсь 7 процентсэ люктады ке, кылемзэ ӵӧжыез скаллы сётэ. Ымдуръёссэ нюлыса ик, юоз — отын сомында витаминэз! Со сяна, скаллы кораса сюдоно жобзэ (последзэ). Азьвыл гуртоос туж эскеро вал, скал жобзэ сиыны медаз шедьты шуыса. Но татын витаминъёсыз но скаллы юнманы кулэ луись элементъёсыз туж трос. Соин ик берло дыре жобзэ сюдон умоен лыдъяське. Со сяна, скаллы ӝыны ведра ву, 1-2 стакан сакыр песокен сураса, сётоно. Сюдыны кутсконо пичиен но каллен. Ог 3 арнязэ ке но турынлэсь но куролэсь люконо ӧвӧл. Сюдон бордысь угось скаллэн но кунянлэн азьланяз тазалыксы потоз.

Юан-веранэз дасяз Елена Сараматова

Ангелина Снигирева
By Ангелина Снигирева Январь 15, 2019 15:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<