«Атае монэ яратэ!»

Ангелина Снигирева
By Ангелина Снигирева Январь 17, 2019 15:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Матысь нуналъёсы Ижысь Маша Бочкарёвалы 12 арес тырмоз. Нош Ымусьтонэз со ортчытӥз Москваысь но быдэс Русьысь Кирилл Патриарх дорын куноын, вуылӥз Кремльысь Рождественской кыз дорын шулдыръяськонэ.

Берлань адрестэк гожтэт

Маша дышетске 5-тӥ классын. Со сяна, суредаське, кырӟа, эктэ, туж яратэ вуэ зымылыны. Ӝыт 8 часлэсь вазь дораз туж шер вуылэ — урокъёс бере одно кыӵе ке кружоке вамыштэ на. Соин ӵош анаез — Татьяна Егоровна. Нылзэ со огназэ чик уг кельтылы, шуыны луоз. Школаын урокъёсыз дыръя гинэ ке шат. Угось Маша — аспӧртэмлыко нылаш, вордскиз Даунлэн синдроменыз. Соин ик Машалэн вормонъёсыз кыксы понна но туж бадӟым шумпотон луо. Эшшо кыксы ик оско, улонын туж трос паймымонэз, осконтэмез быдэсмыны быгатэ шуыса.

Ӵапак сыӵе учыр Бочкарёваосын Ымусьтон азьын луиз.

— Социальной сетьёсын мон гожтӥськемын Кирилл Патриархлэн бамаз. Отысь ик тодӥ: 20-тӥ ноябре — солэн вордскем нуналыз. Эшшо туж яратӥсько «Спас» телеканалэз учкыны, со пыр адӟи, кызьы Патриархез ӟечкылало. Малпасько, малы милемлы но ӟечкылантэм. Машие монэн соку ик соглаш кариськиз. «Многая лета!» шуыса сӥзёнмес видеозаписен келяны турттӥськом вал — нылыным юромо дасяським, котькуд кылзэ валамон, шонер кырӟаны мед пӧрмытом шуыса. Но видеозаписьмес келяны ӧй быгаты…

Озьы Маша но анаез Москвае огшоры гожтэт келязы — кытӥ Маши ас киыныз гожтӥз, кытӥ анаеныз ӵош: ӟечкылазы, шуизы, Инмар тӥледлы мед юрттоз. Нимтулъёссэс, Ижын улэмзэс пусйизы, но ӧз гожтэ телефон номерзэс но, адрессэс но…

Паймизы пумитамзылы

— Одӥг нуналэ жингыртэ телефонэ — Москваын улӥсьёслэн кадь акцентэн юало: тӥ-а Кирилл Патриархлы гожтэт ыстӥды вал? — тодаз вае Татьяна Егоровна. — Мон, валамон, куалекъясь луи, пайми но, кызьы милемыз шедьтӥллям шуыса… Тӥледыз, пе, Патриарх возьма Москваын, Рождественской кыз дорын…

Татьяна Егоровна вера, самолётэ пуксьытозямы, пе, ӧй оскы, та кыӵе ке шудон-розыгрыш ӧвӧл-а шуыса. Нош Москваысь аэропортын ни соосты Патриархлэн машинаез пумитаз, улыны интыязы Даниловской монастырьлэн кунокуаяз.

— Ӵукна сиськыны бергес кылим, но милемлы вуэммы бере ик ӝӧк выламы маке мында емышъёс пуктӥзы — туж паймымон, шумпотымон вал. Нырысетӥ нуналаз ик Христос Спасительлэн храмаз ёлкае ветлӥм, нош ӝыт Ымусьтон службаын сылӥм. Кыстӥськиз со ӝыт 11 часысен ӵукна 3 часозь. Маша чидаз, со сыӵе бадӟым ни!

Бочкарёваослэн кыкетӥ нуналзы сӥземын вал дун-чылкыт интыостӥ ветлонлы — вуылӥзы Успенской соборе, Николай Святительлэн храмаз, йӧтӥськизы Николай Чудотворецлэн, Спиридон Тримифунтскийлэн лысьӧмъёссы борды, кирос понӥзы Инмар Анайлэн «Утоли мои печали» но Владимирской обросъёсыз азьын. Быдэс нуналлы Татьяна Егоровналы но Машилы нимысьтыз машина висъязы: кытчы вуылэмды потэ, отчы ик ветлэ, шуизы.

— Москваысь жингыртэмзылэсь ог арнялы вазьгес уйвӧтам адӟи дун-чылкыт Спиридон Тримифунтскиез, соку ик мон валай: ваньмыз умой луоз. Милемыз Москваын зэмос королеваосты кадь пумитазы, — шуэ Т. Бочкарёва.

Патриархлэн кияз кутскыса ветлӥз

Маши Патриархез адӟиз гинэ, пумитаз бызьыса мынӥз — соку ик тодмаз. Патриарх но нылашез тодмаз, «О, Машенька приехала» шуиз.

Отӥяз нылаш анаез шоры ӧз но учкылы ни, ялан Патриарх бордын ветлӥз. Ымусьтонлы сӥзем представлениез но соос артэ пукыса учкизы.

— Мон вӧзазы пуки ик, но соос ялан кыкназы маке вераськизы. Патриарх Машилэсь кизэ ялан кутыса возиз. Со вакытэз мон ноку уг вунэты. Патриарх бордысь сыӵе шуныт потэ…

Нош «Многая летаез» Бочкарёваос Патриархлы кырӟазы ик — видеосвязьтэк ни, пырак азяз. Маши чик ӧз кышка. Татьяна Егоровна уг ваты: ачиз куалектӥз, куараез дырекъяны кутскиз вал — Патриархлэн котыраз угось сомында адямиос, юрттӥсьёсыз бызьыло. Но солэн синъёсаз учкиз гинэ — ганяк луиз…

— Кирилл Патриарх доры дасяськыкуз, Маши шуиз вал: «Мон атае доры мынӥсько!», — вера Татьяна Егоровна. — Сое атай интыын адӟе ни 2 аресысеныз. «Спас» каналэз ялан учкисько, Патриарх Кирилл вераськыны кутске ке, вань ужъёсме ик вунэтыса, кылзӥсько, со сыӵе визьмо, шонер кылъёс котьку вера… Маши тае адӟытэк уг кыльы. Атай шуиз бере, мон пумит ӧй луы — со ведь, зэмзэ но, вань оскисьёслы атай кадь…

Патриарх Кирилл Машилы ческыт кузьым но небыт шудон, коньы, кузьмаз. Табере нылаш кӧлыны но со кузьыменыз выдэ, туж шумпотэ: «Атае монэ яратэ!»

Инмарлы тау

Татьяна Егоровна Машиез огназ будэтэ. Уг ваты: пиналызлэн Даунлэн синдроменыз вордсконэзлы со дась ӧй вал. Ярано, пе, нылпи ваён юртын 3-тӥ нуналаз гинэ веразы, нылыз аспӧртэлыко шуыса. Вордскемез бере ик верасалзы ке, кин тодэ, оло…

— Кин таӵе учырен ӧз пумиськылы, монэ уз вала, — азинтэ веранзэ Татьяна Бочкарёва. — Нуназезэ серекъясько вал, нош уйёссэ синкылиен пыласькисько. Одӥг пол быдэс мугоры горд виштыосын шобыртӥськиз, лыдыны кутски. Соку гинэ аслым шуи: тон мар дауртӥськод, тыныд нылдэ будэтоно! Улӥсько на вал гуртын — Пичи Пурга ёросысь Валионын. Нош гуртын улон, городынэн ӵошатыса, чылкак мукет. Малпасько, гуртоос аслэсьтым но, вань ӵыжы-выжыосылэсь но сьӧлыкъёсмес утчаны кутскизы, дыр — мар ке понна но Инмар сыӵе пинал сётэм ук. Уг тодӥськы, малы сӧсыр пиналъёс вордско — анай-атайёссылэн сьӧлыкъёссы понна-а, дуннеез зӥбытгес карон понна-а? Нош сьӧлыктэм адямиос дунне вылын ӧвӧл, дыр. Мынам но соосы вань…

Татьяна Егоровна лыдъя: улоназ туж кулэ вамыш лэсьтӥз — улыны выжиз Иже. Тодӥз, татын солэн кадь пиналъёслы нимысьтыз нылпи сад вань. Нырысь аръёссэ пропискатэк мурт патеръёстӥ кыстаськизы — туж секыт вал. Но собере квартира басьтыны быгатӥз.

— Аслэсьтыд пиналдэ туж яратыны кулэ, соку ваньмыз пӧрме, — шуэ нылкышно. — Машие аслам, сыӵе, кыӵе вань. Табере ортчизы возьдаськонъёсы но, куректонъёсы но. Мар луоз ӵуказе? Тазалыко адямиос но уг тодо, мар луоз ӵуказе. Соин ик Инмарлы котькуд нунал тау карисько, огнам ӧвӧл, мынам нылы вань шуыса.

Ижын Бочкарёваос тодматскизы асьсэ кадь ик семьяосын, табере куректонъёссы но, шумпотонъёссы но ваньзылэн одӥг. Гужемзэ бертыло Валионазы. Корказэс ӧз вузалэ: вордскем гуртлэсь мусо инты ӧвӧл.

— Кызьы музъемтэк кылёд? — вера Татьяна Егоровна. — Бакчаын ужаса, мон туж шутэтскисько. Котьма мерттӥськом, виноградмы гинэ но вань. Бен, воргорон ужъёсты но аслым быдэсъяно луэ. Тятямы кулыку, мыным 10 арес гинэ вал. Мамамы висьыса улӥз. Соин ик дыши бензопилаен но, дрелен но ужаны. Вань та инструментъёсы мынам вань. Мунчоям тыл но ачим ик кыски… Машие туж юрттӥське. Гуртын лавкае но огназ ветлэ, мар кулэ, бумага вылэ гожтыса келясько вуз карисьлы. Нош кыӵе уриське со пичи чиньыосыныз!

Вордскем нуналыз Машилэн ӵапак 19-тӥ январе, Йӧвылэсултон нуналэ. Нош ик ӧтчалоз эшъёссэ.

— Нош эшъёсмы милям трос! — шумпотэ анай. — Кинэн Маши тодматске-вераське, ваньзы эш луо ни солы. Котырысьтымы котькуд магазинын вань эшъёсыз — вуз карисьёс пӧлысь кин ке соин умой вераське ке, солы со эш ини. Соин ик, черке мынӥськом ке, Маши одно сюсьтыл пуктэ эшъёсыз понна но — соослэн но ваньмыз умой мед луоз шуыса.

Элина Кумачёва

Туспуктэм басьтэмын партриархия.ру сайтысь

Ангелина Снигирева
By Ангелина Снигирева Январь 17, 2019 15:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<