Вань нылпиосты ӟыгыртысал!

Ангелина Снигирева
By Ангелина Снигирева Декабрь 5, 2018 15:51

Нылпи садысь воспитательёс тӧр шорамы ӵем уг шедьыло. Но ӵапак соос будэто, визьмало, улонэз усьто нылпиосмылы. Марина Геннадьевна РОДИОНОВА — Ижысь К. Герд нимо нылпи садысь вылӥ квалификациен воспитатель, пусъемын Удмуртиысь но Россиысь Дышетонъя но наукая министерствоослэн Данъян грамотаосынызы.

М. Родионова

— К. Герд нимо нылпи садысь одӥгез трос нылпиё анай шуэ: «Бадӟымъёсыз пиналъёсы пӧртэм садикъёсы ветлӥзы, нош пичиез татчы шедиз. Ас шудмылы табере ум оскиське — Марина Геннадьевна кадь воспитательёс дунне вылын вылӥллям ук!»

— Сыӵе шуныт кылъёсты кылӥсько ке, пушкы тыре. Озьыен, юнме уг улӥськы, юнме уг ужаськы… Мон туж шумпотыса ветлӥсько ужам, туж яратӥсько нылпиосты. Соос пӧртэмесь, но котькудӥзлэн сюлэмызлы усьтон шедьтыны тыршисько. Собере, малпасько, милям нылпи садмы (Ижысь Коммунаръёслэн ульчаысьтызы) пичи ке но, татын туж ӟеч воспитательёс ужало. Ми ог-огмылы юрттӥськом, ог-огмес дышетӥськом но ӝутӥськом. Анай-атайёслэн верам ӟеч кылъёссы — со огъя вормонмы.
Выжыея мон Кез ёросысь Югуртысь. Анай-атае школаын дышетӥсьёс вал. Соин ик мон но дышетӥсьлэсь сюрессэ бырйи, Глазовысь пединститутэ мынӥ. Сое йылпумъяса, арлэсь кема ужай гуртысьтым ик школаын, бызи но, улыны Иже интыяським. Татын ар шорын кыӵе школае мынод на? Ижысь огаз нылпи садын воспитатель луыса ужаны кутски. Озьы кӧня ке ар ӵоже. Нош огпол эшъёсылэсь кылӥ, К. Герд нимо гимназия бордын вань, пе, удмурт садик. Татчы лыктӥ но, монэ уже кутӥзы. Али валасько: макем бадӟым шуд татчы шедеме! Уж дуре мон, бурдъёс вылын лобыса кадь, мынӥсько.
Огшоры садъёслэн ужзы юн кабъёсы пыртэмын, отын азьлапал чаклам программая ужаськод, ваньмыз кызьы кулэ пусъемын ни. Нош татын бадӟым саклык висъяське творчестволы. Тыныд аслыд луонлык сёто малпаськыны, утчаськыны.
Туж тау кареме потэ К. Герд нимо садысь азьвыл методистлы Надежда Тихоновна Куртеевалы. Со пыд улысь огшоры арберилэсь гинэ но маке выльзэ кылдытыны, нылпиосты валаны, шӧдыны дышетӥз. Котькуд пиналлэн кыӵе ке но быгатонлыкез вань, сое усьтыны гинэ быгатоно, солы усьтӥськыны юрттоно.
Тани, шуом, ми котькуд пиналлэсь нимысьтыз адӟытонъёссэ радъяськом. Кин ке зарезь дурысь ваем изъёслэсь киужъёссэ возьматэ, кин ке сяськаос суреданы яратэ, кин ке конструкторлэсь роботъёс лэсьтэ. Аслаз адӟытонэзлы пинал туж дасяське, со сярысь чебер мадьыны тырше, пӧртэм юанъёслы валэктэ. Со адӟытонъёсы мукет группаосысь воспитательёс но, нылпиос но вуыло. Нош собере пичияк чай юон радъяське. Куддыръя асьсэос нылпиос но кыӵе ке малпанлы инъет сёто. Тани одӥгез нылашмы мода возьматӥз, озьы огнуналэ группамы подиумлы пӧрмиз, нош мукетыз эктонъя мастер-класс радъяз. Туж тунсыко. Ӟеч сяме пыӵаз ини нылпиослэсь быгатонлыкъёссэс возьматӥсь пичи книгаос поттон. Мон соосты ачим ик лэсьтӥсько, пиналлы синпель мед кылёз.
Мон кылдытӥ нылпиослэсь тазалыксэс юнматонъя программа, соя ужаськомы. Пиналъёс шудон пыр тодматско шокан гимнастикаен, кезьыт вуэн пыласько, асьсэос асьсэлы массаж лэсьто.
Бадӟым саклык висъяны тыршисько анай кылэз дышетонлы, удмурт сям-йылолъёсын, культураен, геройёсын тодматонлы. Арнялы быдэ четвергъёсы милям удмурт нунал. Та нуналэ нылъёс-пиос туала удмурт дэремъёсын ветло, анай-атайёс, ӟуч-а, удмурт-а, бигер-а, ваньзы пиналзылы удмурт шӧмъем дӥсь вуризы ни. Милемыз, татын ужасьёсты, ог-огмылы матэгес каре анай кылмы, соин ик садамы сыӵе шуныт но лякыт.
Туж тау кареме потэ анай-атайёслы но воспитательёслы. Та садын мон воспитатель сямен будӥ.

Егит дыръяз

— Мынам тодэмея, пиналъёсын ужан понна тӥляд трос гинэ асьтэлэн методразработкаосты.

— Бен. Туж данъяськисько аслам кылдытэм дидактической шудонъёсыным: «Бакча», «Пӧраськисез сюд», «Тунсыко кӧжы», «Конструктор», «Пӧртмаськись писпу». Соос дышето буёлъёсты тодманы, анай кылэз валаны… Та разработкаосы но пӧртэм занятиослэн конспектъёссы интыямын Россиысь воспитательёслэн МААМ.РУ порталазы но. Отысь соосты кунысьтымы мукет воспитательёс но кутыны быгато, талы шумпотӥсько. Та порталын ик аслэсьтым блогме нуисько. Россиысь воспитательёс пӧлын методразработкаосъя «АРТ-талант» конкурсын но кӧня ке пол вормисе потылӥ.

— Али нылпиослы кыӵе гинэ шудонъёс ӧвӧл! Нош тӥ садысь пиналъёслы асьтэ киын но шудонъёс лэсьтӥськоды: чильпаськоды, керттӥськоды, вуриськоды. Малы солы дырдэс быдтӥськоды на?

— Аслад киыныд лэсьтэм шудонлэн лулкужымез вань ук. Школаын дышетскыкум ик, туж яратӥсько вал чильпаськыны, керттӥськыны. Шудон лэсьтыны трос дыр уг быры, нош мылкыд дурыныз басьтӥськод. Нылпиос тужгес ярато бакча сиёнъёсын шудонме. Пӧлы быдӟа гинэ керттэм ӵужкушманъёсты, кубистаосты, кушманъёсты соос киын лэсьтэм бакчае радэн-радэн мертто, утялто, висказ выжыкыл малпало-верало на. Унозэ шудонъёсме но методпособиосме мон керттӥ, декретын пукыкум. Мынам аслам 3 пиналы ук.
Группаын нылпиосын но ӵемысь киужен выриськом. Пичи дыръя чиньыос пыр пиналлэн йырвизьмыз азинске.
Шутэтскон нуналъёсы дорын пукеме уг поты. Республикаямы но городын ортчылӥсь пӧртэм ӵо-шатсконъёсы, конкурсъёсы семьяенымы пыриськиськом. Огвакытэ яратыса ветлӥмы семья клубе. Отын пӧртэм сценкаос дасяськом, концертъёсы пыриськиськом вал. Бен, нырысь папамес общественной уже кыскыны секыт вал. Но нылпиосыным ӵош вормылӥм, берло ачиз но шумпотыса ветлӥз ни.
Арлы быдэ пыриськиськом «Пельнянь» фестивале. Кылем арын огаз конкурсаз вормим но, 50 килограмм пельнянь сётӥзы! Котьку ветлӥськом «Россиысь куас сюресъёс», «Ижевскысь кругосветка» но мукет та выллем ужрадъёсы, концертъёсы, адӟытонъёсы. «Россиысь куас сюресъёс» ӵошатсконэ аресъем нылыным но пыриськеме вань, сое ныпъетэн азям понӥ но 5 километрез бызи, азьпалам — кузпалы, бадӟымъёсыз пиналъёсы.
Садын ужаса, туж шӧдӥсько: нылпиос анай-атайёссы кадь луо. Соос, асьсэос но валатэк, анай-атайзылэсь сямъёссэс, выросъёссэс басьто. Тон телевизор азьын ялан пукид ке, пиналыд но сыӵе ик луоз. Мон соин но тыршисько, семьямы огинтыяз медаз пукы шуыса. Пие суворовской классын дышетске, спортэн выре. Шоретӥез — нылы — эстрадая «Сюрприз» ансамбльын эктэ, Россиын ортчылӥсь пӧртэм ӵошатсконъёсы пыриське, вормонъёсын бертылэ. Покчиез но нылы эктыны ветлэ.

Семьяеныз

— Берло дыре тросэзлэсь воспитательёслэсь, дышетӥсьёслэсь кылоно: азьвылэн ӵошатыса, туала нылпиос лекесь луизы. Озьы-а?

— Мон ӧй шуысал, пиналъёс лекесь луизы. Соослэн шудонъёссы луизы лекесь. Шӧдӥське, мае нылпиос учко но мар вылын дышетско. Со адӟемзы ӟеч ик ӧвӧл, со ик соосты лекгес каре. Тани азьвыл пиос кубикен корка, гараж пуктыса шудо вал, машинаен груз нулло. Али ӵемысь ыбылӥсько, соос я монстръёс, я супергеройёс, киязы «супероружие» куто но дуннеез кинлэсь ке утё, лекъясько. Тазьы шудэмзы умой ик ӧвӧл. Соин ик мон шӧдсконтэм вылысь соосты мукет ӧре кыскыны тыршисько, куддыръя озьы ик шуисько: ой, та шудонды умой ӧвӧл, ойдолэ маке мукетсэ малпалом… Нылпиос пичи дырысенызы азьланяз улонзылы макет кылдыто. Кыӵе шудонъёсын али шудозы, сыӵе ик ужъёсы азьланяз кыстӥськозы.

— Пичи пиналлэн быдэс нуналъёсыз садын ортчо, анаеныз со бер ӝыт гинэ адӟиське. Озьыен, пиналлэн ӵуказе нуналлы инъетэз тросэтӥ сад бордысь потэ. Тӥ тае шӧдӥськоды-а?

— Шӧдӥсько. Но нырысь ик вераме потэ: анай-атай уж пушказы котькыӵе выемын мед луозы, пиналын вераськыны дыр шедьтоно. Пичи дыръязы нылпиослы туж кулэ анай-атаен вераськон, мылкыдзэс кисьтон, валтӥсь интыын — эмоциос. Берло, 8 арес беразыгес, соос тӥледлы ваньзэ уз ни вералэ, эшъёсынызы шудозы-кенешозы. Нош быдэ вуыкузы, воксё палэнскозы. Соин ик дунъялэ пичи дырзэс.
Анай-атайёс но пӧртэмесь, воспитательлы соосын огкыл шедьтыны кулэ. Куддыръя валамтэос кылдо. Кызьы секыт югдурысь потоно, ог-огдэ пыкылытэк, кесяськытэк? Та ласянь эшъёсын-воспитательёсын кенешисько.
Туж куректӥсько, пинал вӧсь луыны шеде ке. Соос бызьыло, тэтчало ук. Пинал али гинэ татын вал, нош учкиськод но, кытчы ке кечырскем, усем ни. Мар вискын? Малы мон адӟыса ӧй вуы? Анай-атай азьын сыӵе дыръя туж возьыт. Соос пиналзэс тыныд оскыса кельто, нош озьы пӧрмиз…

— Огвакытэ быдэс кунмес бугыртӥзы шимес суредъёс: огаз нылпи садын, мед изёзы шуыса, пиналъёсты думылыса возё, мукетаз, медаз бӧрдэ шуыса, ымзэс скотчен ляко. Малы таӵе учыръёс луо? Кытысь сыӵе воспитательёс пото?

— Сыӵе учыръёс сярысь кылыса, мыным котьку но верантэм возьыт луэ. Пиналъёс сокем жаль пото, ваньзэс бордам ӝиптысал, буйгатысал, соосты асьме садэ вайысал. Со адямиосты воспитатель шуыны уг луы. Кыӵе лулыз, кыӵе сюлмыз луыны кулэ адямилэн? Малы со сыӵе лек луиз? Малы со садэ шедиз? Сыӵе учыръёслы валэктонъёс мон уг шедьтӥськы…
Туж куректӥсько, аналтэм нылпиос шоры учкыса но. Соос йыркуръяськыса будо, лекесь луо. Воспитатель но куддыръя югдурез тупатыны уг ни быгаты.

— Ижын воспитательёс ӵемысь одӥг сменаен гинэ ужало, нош тӥ быдэс нуналъёсын садын. Ӝытъёсы вуоно занятиослы дасяськиськоды на, дыр. Жадён дыръёсты уг луо-а?

— Мыным туж яра быдэс нуналъёсын нылпиос пӧлын луыны. Соку мон соослэсь будэмзэс, сямъёссэс ӟечгес адӟисько, соку мон азьланезлы ужпумъёс но валасагес пуктӥсько. Бен, луыло ик, дыр, жадён вакытъёс, куке кыӵе ке бадӟым ужрадъёслы дасяськиськод. Дорамы ӵемысь пӧртэм семинаръёс ортчыло, республикаысь воспитательёс ветлыло ук. Но ужрадмы ӟеч ортче ке, олокытысь эшшо тросгес кужым потэ.
Кык пӧртэм группаосын ужасько бере, серемес учыре но сюреме вань. Огпол пиналъёс сайказы гинэ, СМС вуэ: Даша, пе, чалякгес мед дӥсяськоз, 10 минут улыса, вуо. Мон соку ик Дашимылы шуисько: али анаед лыктоз, ойдо ӝоггес пӧрмытском. Йырсизэ ӝоггес пунӥ, дӥсяськыны юрттӥ, вахтае васькытӥ. Вахтёрмылы шуисько: али анаез вуоз. Кӧня ке улыса, эскерыны васьки: Дашие весь пуке но пуке. Нокин ӧз ветлы шат? Вахтёр шуэ, ӧз, пе, бадӟымъёслэн группаысьтызы Дашаез гинэ атаез нуыса кошкиз. Мон, пичиосыныз ужакум, кинлэсь СМС вуиз, дыртонъям ӧй но учкы. Ой, шуисько, Дашие, вождэ эн вай, янгышаськем. 5 аресъем нылаш али но серекъяса тодам вайытэ на, тодӥськоды на-а, пе, Марина Геннадьевна, со учырез?

— Ялан нылпиосын, ялан ужын — кузпалды вала-а?

— Со ЖКХ удысын ужа ке но, монэ вала. Кузпалы Пичи Пурга ёросысь Сизяшур гуртысь. Но анай-атаезлэн выжыосыз Кез палась ик. Милям тодматскон но семья кылдытон учырмы туж тунсыко. Андреен ми Кез ёросысь пичи гинэ Юрук гуртын сюан дыръя тодматским. Мон выль кенлэн свидетельницаез вал, нош со — эмеспи ласянь ӵыжы-выжы. Сюанлэн кыкетӥ нуналаз мон весь маке ужасько на, куноосты келясько. Нош та Андрей ялан сьӧрам ветлэ, бызь мыным, шуэ. Ӵыжы-выжыосыз но уг кошко, монэ сьӧразы ӧтё. Эше шуэ ни: ма, пе, тӥ Марина борды ёрмиды, бертэ ни. Нош соос уг берто. Монэ лӥято, ойдо, пе, ми тонэ дорад келялом, ма, пе, транспорт утчаса ветлод, 30 километр Кезозь, собере 6 километр гуртозяд мынонэз на. Весь ёртэмысьтызы, шуисько ни: я, ойдолэ. Я, вуим ини гуртэ. Милемыз бабушмы пумита, анай-атае юбилее кошкиллям. Бабушелэн номыр сыӵе-таӵе йыраз ӧвӧл, сюанэз келясьёс лыктӥллям малпа, ойдо, пе, пырелэ. Нош таосыз ныл, пе, кураны вуим. Бабуше мар вазьыны ик паймиз. Ойдолэ, шуисько, анай-атаймес ваём.
Гуртысьтымы юбиляр доры мынӥськом ни таре, учкисько: анай-атае берто инь. Мон пумитазы машинаысь тэтчыса потӥ. Шуисько, монэ кураны лыктӥзы. Анае но атае бакомизы, мар вераны уг валало.
Али паймисько: мыным, егит ныллы, соку номыр кадь ик ӧй вал ук. Бен, Андрей мыным яраз, но сое воксё уг тодӥськы шуыса, йырам но малы ке ӧз лыктылы. Анае куректэ: ӧйтӧд, нылы, ачид малпаськы, тынад улонэд ук. Атай сюлмаськеменыз отчы-татчы ветлэ, лулӟылэ. Озьы уйшор но вуиз ни.
Мар вал отӥяз, мон ачим ӧй адӟы, берло веразы гинэ. Келясьёс шампанской поттӥллям. Атае бокалъёсты ӝӧк вылэ радэн-радэн тырем но Андрейлэн атаезлы шуэм: та бокалъёсы шампанскойдэ ваньмызлы одӥг кадь тырыны быгатӥд ке, нылме сёто. Нош соизлэн сюан бере киосыз куалекъяло, пе. Огкадь тырыны быгатэм, лэся. Уйшор бере кутскизы ми ласянь ӵыжы-выжыосмылы жингыръяны. 3 часын вуиз Дэбесын улӥсь апае, мукет ӵыжы-выжыосмы. Нош ӵукна 5-6 часын курасьёс монэ сьӧразы нуизы. Сизяшурын ӝӧк тыр пӧрамъёсын пумитазы ни. Андрейлэн апаез уйин 3 часын жингыртэмзы бере нянь котэм, пыжиськем.
Бӧрысь ини картэлэн анаез шуэ: ми, пе, Кезэ сюанэ потыкумы ик, шуимы вал, тани сюанэ ветлом но отысь, вордӥськем интыосысьтымы, Андрейлы кышно ваём.

— Огпол но ӧд жалялэ-а?

— Улонын олокыӵе но вакытъёс луо, дыр. Но мон оскисько, ваньмыз Инмарен азьвыл ик чакламын. Озьы луыны кулэ вал, дыр.
Тани дышетскемея но мон дышетӥсь ук, но малы ке садэ вуи, воспитатель луон понна курсъёсты ортчи на. Табере асме мукет удысын уг но адӟиськы. Туэ вордӥськем нуналам садэ лыктӥсько, 7 час ӧй вал ай, шыпыт. Группаям пырисько, тылэз ӝуатӥсько, нош отын… Быдэс группа яркыт шаръёс пушкы выемын, борддор кузя нылпиослэн суредъёссы ошылэмын. Котькуд пинал монэ суредам, ӟеч кылъёс, сӥзёнъёс гожъям. Ваньзы сямен ик пусйиллям: Марина Геннадьевна, тӥ самой ӟеч воспитатель! Ваньзэ тае адӟыса, ма карыны ик уг ни валаськы, бам кузя синкылиосы васько но васько. Анаелы жингыртӥсько, бӧрдыса верасько. Со но бӧрдэ. Озьыен, шуэ, тон шедьтӥд аслэсьтыд интыдэ, аслэсьтыд уждэ, озьыен, тон шонер сюрес вылын… Пумен нылпиос вуыны кутскизы, пырыса вуо-а, уг-а, вордӥськем нуналэным ӟечкылало, сяськаос кузьмало, яратэмзэс верало. Пичи дыръяз пинал аслэсьтыз мылкыдзэ уг ваты, со вера сое, мае шӧдэ, мае адӟе. Макем бадӟым шуд со — нылпиосын ужан!

Елена Миннигараева

Ангелина Снигирева
By Ангелина Снигирева Декабрь 5, 2018 15:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<