Умортоямы чечы нуллӥз

Ангелина Снигирева
By Ангелина Снигирева Декабрь 4, 2018 13:22

Трофим Борисов, Иосиф Наговицын, Кузебай Герд… Та югдытӥсьёслэн, удмурт автономиез кылдытӥсьёслэн памятникъёссы вӧзын луыны кулэ на эшшо огез — Максим Прокопьевлы сӥземез.

М. Прокопьев

Удмурт но, бигер но кылын дышетӥз

Максим Прокопьевез мон аслым усьтӥ, Башкириын Алтау гуртысьтымы 8-тӥ классын дышетскыкум. Школамылэн историезлы сӥзем альбомез учкыкум, син азям йӧтӥзы таӵе кылъёс: «Гуртамы нырысетӥ школа Максим Прокопьев усьтӥз». Фамилиез но, туспуктэмез но ӧвӧл. Максим Прокопьев сярысь соку кытысь ке лыдӟеме вал ни. «Шат ӵапак со Прокопьев усьтӥз?» — малпай ас поннам. Пересьёслэсь юалляськыны кутски. Максим Прокопьевлэсь гуртысьтымы одӥг азьвыл дышетскисьсэ шедьтӥ. Мукетъёсыз улэп вылӥллямтэ ни. Низамутдинов Эльтдин агайлэн верамезъя, зэмзэ но, 1912-тӥ арын Алтауын Максим Прокопьев школа усьтэм. Нимысьтыз юрт соку вылымтэ на, соин ик со буш коркае интыяськем. Максим Прокопьевич огназ ог 60 пиналъёсыз дышетэм, удмурт нылъёслы но пиослы сяна, бускель Ваныш гуртысь бигер нылпиослы но тодон-валан сётэм. Удмуртъёсты удмурт кылын, бигеръёсты бигер кылын дышетэм. Малы со озьы карем? Вань кивалтӥсьёс соку бигеръёс вал бере, удмуртъёсты дышетэмлы медаз пумитъяське шуыса, тӥни сыӵе амал малпам.
Семьяез Янаул ёросысь Каймашабаш (Шыр) гуртын улӥз бере, отчы Максим Прокопьевич арнялы быдэ буш валэн бертылэм. Нош сюрес вакчи ӧвӧл — ог 40 иськем. Биографиысьтыз тодмо: Казаньысь дышетӥсьёсты дасянъя семинариез йылпумъям егит М. Прокопьевез Башкириысь Каймашабаш школае лэзё. Татын ик со тодматске егит ӟуч дышетӥсен но семья кылдытэ. Та гуртын ик солэн пиез но нылыз вордӥсько. Нылпиосты дышетэм сяна, Максим Прокопьевич Шырысь но мукет бускель гуртъёсысь калык пӧлын валэктон уж нуэм, кружок радъям. Сыӵе ужен выремез понна полиция Прокопьевъёслэн коркаязы обыск лэсьтэ. Номыр сыӵе-таӵезэ уг шедьто, озьы ке но дышетон ужезлэсь палэнто. Ӵапак соку ик, уж утчаса, М. Прокопьев вуиз, дыр, Алтау гуртэ. Милям гуртамы дышетэмез солэн биографияз пыремын ӧвӧл.
Максим Прокопьевич Уфа карлы ог 60 иськеме интыяськем Канлы нимаськись гуртын но школа усьтэм. Та сярысь солэн биографияз гожтэмын ни. Пермь улосысь Бадӟым Гондыр гуртысь школаын но со дышетэм.

Удмуртъёслэн нимынызы

Максим Прокопьев трос кужымзэ сётӥз Удмурт автономия кылдытонлы но. Совето власть вуэмлэсь азьвыл ик Иосиф Наговицынэн, Трофим Борисовен но куд-ог мукетъёсыныз удмуртъёсын нимысьтыз кун (коммуна) кылдытон сярысь малпаськыны кутскиз. 1917-тӥ арын куартолэзе куиньназы ик соос Поволжьеысь пичи лыдъем калыкъёслэн кенешсылэн ужаз пырисько. Отын удмурт секция кылдыто. Секциен Иван Михеев кивалтэ, одӥгаз заседаниын секретарь луэ Трофим Борисов. Отын бадӟым саклык висъяло удмурт калыкез дышетон ужпумлы. Удмурт начальной школаослы правилоос юнмато, соосты Иван Михеев дасям. Правилоосын удмурт нылпиосты анай кылынызы дышетоно шуыса пусъемын. Ӟуч кылэз предмет чотын дышетоно. Валамон ни: дышетон понна учебникъёс кулэ. Т. Борисовлы удмурт кылын гожъяськон правилоосъя, И. Михеевлы но М. Прокопьевлы родиноведениея (шаертодон шуиськом али), М. Прокопьевлы но К. Яковлевлы лыдӟиськонъя учебникъёс дасяны оскизы.
Секциын ик «Войнаысь ивор» газетэз «Удморт» нимын поттыны кенешо.
Со вакытэ югдур капчи ӧй вал. Пӧртэм партиос калыкез ас палазы карыны выризы. Социал-революционеръёс, кадетъёс, монархистъёс, эсеръёс, меньшевикъёс, большевикъёс — ваньзы калык понна сюлмаськыны тыршо кадь. Нош огшоры калык кызьы валалоз, кин пала кариськыны? Максим Прокопьев удмуртъёслы анай кылынызы «Калык шорын», «Асьмелы кин палан луыны кулэез валэктон» нимаськись статьяос гожтэ. Гуртъёсы вуылыкуз, калыклы рос-прос но валамон кылын валэктыны тыршиз большевикъёслэсь программазэс, малпанъёссэс.
1918-тӥ арын инвожо толэзе Елабугаын Россиысь удмуртъёслэн съездзы М. Про-
копьевез председателе быръе. Шуг вераны, кызьы ортчысал со кенеш, председателе мукет адями быръемын луысал ке. Татын М. Прокопьев эсеръёсын ваче вуиз. Со люкаськем калыкез большевикъёс пала луыны ӧтиз. Вятка, Пермь, Уфа но Казань губерниосысь 78 делегатъёс М. Прокопьев пала луизы но солы вань ужаса улӥсь удмуртъёслы азьветлӥсь луыны оскизы. Та съездлэн решениосыз вылэ пыкиськыса, Москваысь Наркомнац калык комиссариатын Удмурт отдел кылдытон сярысь нимысьтыз постановление кутэ. Со ёзэн кивалтыны М. Прокопьевез юнмато.
Тӥни озьы, калыклэн представителез луыса, со Россиысь Правительствоын ужаны кутске. Вакчи дыр куспын вуоно автономилы конституция (проект) дася, автономилэсь гожъёссэ пусъён борды басьтӥське.
Москваын ужамез пумысен М. Прокопьев ӵапак 100 ар талэсь азьло гожтэ: «Комиссаръёсын кенешыса, удмуртъёслы кулэ ужъёсты радъяса улӥ. Уксё сётэм беразы удмуртъёс доры потӥ. Глазов карын удмурт уж сярысь сюлмаськись ӧвӧлэз адӟыса, сюлмы пут кошконо кадь луиз, выдыса бӧрдоно кадь луи. Татын «асьмелы марлы удмурт кыл кулэ» шуэмзы мынэсьтым пушме ик йӧӟектытӥз.
Ӟуч кылэз ӟеч валасалзы ке, удмуртъёслы ас кылзы кулэ но ӧй луысал… Асьме нылкышноос нош ӟуч кылын «сьӧдэз» но «тӧдьы» шуыса валало. Валатэк ужез лэсьтыны уг луы. Валам ужез нош шудыса кадь ужаськод. Ужез валаны асьмелы удмурт кыл кадь кыӵе кыл юрттоз? Аслэсьтыд кылдэ ӟеч тодӥськод ке, ӟуч кылэз валаны но тросгес каньыл. Озьы, уно дышетскемъёс кык арняскын котькыӵе кылын вераськымон дышо.
Ваньды асьтэ умортояды чечы нуллэ. Озьы гинэ асьмелэн кужмояммы луоз…»


Дурбасьтӥсьёс ӧз сюре ни

Максим Прокопьев 35 ар гинэ улӥз, 1919-тӥ арын Граждан ожын быриз. Нош кӧня лэсьтыны вуиз! Но малы Удмуртиын солэн нимыз нокытчы юнматэмын ӧвӧл? Нош Кузебай Герд ас вакытаз нылпи юртлы Максим Прокопьевлэсь нимзэ сётӥз вал ук.
Мынам малпамея, нимыз вунэ шуыса, мугъёсыз кӧня ке. Нырысь ик мон сое М. Прокопьевлэн Татарстанысь Кукмор ёросысь вордӥськем Нырья гуртэныз герӟасько. Отысь калык удмуртъёслы автономия кылдытон сярысь сюлмаськись гуртозэс малы ке но героен лыдъяны ӧз дырты. Кылем даурлэн 80-тӥ-90-тӥ аръёсаз ик Нырьяла М. Прокопьевлы синпелет пуктыны луэ вал. Калык пумит кариськиз. Алигес гинэ отысь школалы югдытӥсьлэсь нимзэ сётӥзы.
Кыкетӥез. Ог 35-40 ар талэсь азьло, М. Прокопьевлы сӥзьыса, книгаос потылӥзы, научно-практической конференциос ортчылӥзы. Книгаосты гожтӥсьёс — писатель Пётр Поздеев, тодосчи Никифор Павлов — улонысь кошкизы, тодосчи Кузьма Куликов висьыны усиз. М. Прокопьев пала дурбасьтӥсьёс ӧз сюре ни, лэся.
Малпасько, Иже Максим Прокопьевлы синпелет одно ик пуктоно. Нош солэсь биографизэ, «Калык шорын» книгазэ выльдыса поттоно. Умой луысал, Ижевскысь выль ульчаослы Трофим Борисовлэсь, Максим Прокопьевлэсь нимъёссэс сётыса. Жаляса верано, удмурт нимъёсын герӟаськемъёсыз кӧня ке гинэ: Михаил Петров ульча, писатель Самсонов ульча, Наговицын ульча, Кузебай Герд ульча, Удмурт ульча, Василий Зайцев ульча. Башкортостанысь Каймашабаш, Алтау, Канлы гуртъёсы М. Прокопьевлы данъян пулъёс усьтоно на. Та ласянь Бадӟым Гондырын улӥсьёслэсь ад-ӟем кароно: соослэн Прокопьев ульчазы вань, данъян пулзы но шуккемын, геройлы сӥзьыса, куасэн ӵошатсконъёс но ортчытъяло. Нош кыӵе умой луысал, Прокопьев нимо премия кылдытысалмы ке!
Вуоно арын Максим Прокопьевлэн вордӥськем дырысеныз 135 ар тырме, 2020-тӥ арын — Удмурт Элькунмылы 100 ар. Та юбилейёслы Максим Прокопьевлэсь вуныны кутскем нимзэ калык пӧлы одно ик берыктыны тыршоно.

Ульфат Бадретдинов

Ангелина Снигирева
By Ангелина Снигирева Декабрь 4, 2018 13:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<