Улонлэн ошмесэз

Ангелина Снигирева
By Ангелина Снигирева Декабрь 5, 2018 14:29

Можгаысь дышетӥсьёсты дасянъя Т. Борисов нимо колледж кемалась дырысен удмурт кадръёсты будэтонлэн кебитэныз лыдъяське. 100 ар ӵоже ни татын дасяло покчи классъёслы удмурт дышетӥсьёсты. Дышетсконнилэн кылдэмез меӵак герӟаськемын удмуртъёслэн нырысетӥ ӧтчаменызы.

Можга педтехникумын дышетскисьёс. 1927-тӥ-1928-тӥ аръёс.

Трокай валтӥз но валтэ

Россиысь удмуртъёслэн нырысетӥ ӧтчамзы ортчиз 1918-тӥ арын. Уно юанъёс пӧлын отын эскеремын вал удмурт школаос усьтон но отын ужаны дышетӥсьёсты дасян сярысь ужпумъёс. Озьы удмурт калыклэн дано пиосыз Максим Прокопьев (дышетӥсь), Трофим Борисов (эмчи) кутскизы дышетӥсьёсты дасясь семинариос кылдытон борды. Дышетсконниос усьтӥськизы кык интыын — Елабугаын но Выль Мултанын. Жаль, Выль Мултанын семинария кема ӧз ужа. Нош Елабугаысь семинарилэн нырысетӥ директорез ачиз Т. Борисов вал. 4 ар ортчыса ини, 15 адями семинариысь дышетӥсь луыса потӥз: удмуртъёс — 11, ӟучъёс — 4, оглом 12 пиос но 3 нылъёс. Озьыен, семинариын дышетскизы уногес удмурт пиос.

1922-тӥ арын дыше-тӥсьёсты дасясь курсъёсты Можга черкогуртэ выжто но педагогикая техникумлы пӧрмыто. Соку техникумен Яков Ильин кивалтӥз. Ӵапак та адями педтехникумын литературая кружок кылдытӥз но сое нуиз. Кружоклэн удмурт писательёсты дасянын кулэлыкез дунъянтэм бадӟым вал. Бӧрысь литературно-творческой кружок нуон ӟеч сямлы пӧрмиз. отысь потӥзы 50-лэсь ятыр писательёс.

1929-тӥ арын педтехникум Можга каре выже. 1937-тӥ арын сое педучилище каро. Быдӟым ож дыръя солэн юртаз Москваысь пулемётной училище интыяське. Ожмаськон йылпумъяськем бере педучилище азьвыл юртаз ик берытске но туннэ нуналозь, 90 ар ӵоже ини, отын ик ужа.

1999-тӥ арын педучилище луэ педколледж. Нош 2003-тӥ арысен нырысетӥ директорезлэсь Т. Борисовлэсь нимзэ нуллэ.

1991-тӥ арын училищеын Т. Борисовлы сӥзем нырысетӥ научно-практической конференция ортче, со Трокайлэн вордӥськем дырысеныз 100 ар тырмонлы сӥземын вал. Табере Трокайлэсь вордӥськем нуналзэ арлы быдэ пусйиськомы. 2006-тӥ арын ортчем научно-практической конференцилэн ужаз пыриськемъёс шаерысьтымы Правительстволы вазиськизы, Ижкарын Т. Борисовлы синпелет пуктыны курыса. «Удмурт Кенеш» огазеяськон сюлмаськемен, синпелет сылэ ни. 2013-тӥ арысен, арлы быдэ одӥг пол, колледжысь устоезлы студентлы но дышетӥсьлы Т. Борисов нимо премия сётӥське.

Котькуд группаын — удмурт кыл

1918-тӥ-1935-тӥ аръёсы педтехникумын дышетскемъёс пӧлысь 56,6 процентэз удмуртъёс вал. Дышетӥсь специальность басьтэмъёс пӧлысь 57,3 процентэз — пиос. 1936-тӥ — 1939-тӥ аръёсы но фашистъёсын ожмаськон вакытэ дышетскись удмуртъёслэн но пиослэн лыдзы туж ӧжыт кыле. Удмуртъёслэн лыдзы кулэсме 46-48 процентозь. Калыклэн улонэз секытгес луиз, ӧз быгатэ ни нылпиоссэс дышетыны, удмурт нылпиос колхоз уже кыткемын вал.

Ожмаськон бырем бере но югдур уг воштӥськы. 1948-тӥ-1956-тӥ аръёсы учи-
лищеез быдтэмъёс пӧлын удмуртъёс воксё 28 процент гинэ вал, 80 процентэз — нылъёс.

Училищеын тужгес секыт аръёсы ужазы: Т. Борисов, М. Ильин, Я. Ильин, И. Корепанов, Г. Федотов, Ф. Александров, Е. Коновалова.

1960-тӥ-1990-тӥ огсыр улон аръёсы Можга педучилище удмурт дышетӥсьёсты дасянзэ азьланьтэ. Педучилищеын трос ӟучъёс дышетско ни, но 1966-тӥ арын татын нимысьтыз удмурт отделение усьтӥське. Та аръёсы вуоно дышетӥсьёсты дасянын пӧртэм шугъяськонъёс кылдо: покчи классъёслы учебникъёсты министерство дыраз дасяса уг вутты, школаосы вуо выль дышетон амалъёс.

Та вакытэ училищеын ужало удмурт калыклэн дано нылпиосыз — кузпалъёс Григорий но Римма Даниловъёс, Рудольф но Антонида Березинъёс, Д. Лукьянов.

Можга педколледжын удмуртлыкез ӝутон понна бадӟым уж лэсьтӥз Л. Смирнов. Кылем вапумлэн 1980-тӥ аръёсаз со педучилищеын завуч луыса ужаны кутскиз, удмурт культураез возёнлы вань сюлэм пӧсьсэ сётӥз. Солэн кичӧлтэмезъя но педучилищеен азьвыл кивалтӥсьлэн И. Шавринлэн кыдёке азьпала учкыны быгатэмезъя колледжын вань дышетскон группаосын, вань специальностьёсын студентъёс удмурт кылэз но ӟуч кылэ берыктэм удмурт литератураез дышето.

2011-тӥ арысен училищеос, колледжъёс ужало ини 3-тӥ поколениысь выль кун стандартъёсъя. Но озьы луиз: удмурт кыллы инты отын ӧз шедьы. Ми туж паймимы, шугъяськонэ шедимы. Но директормы Николай Аркадьевич Пискунов шуиз: «Маке но кароно. Мынам уг поты директор луэме, кудӥз дыръя ворсаськоз удмурт дышетӥсьёсты дасян понна усьтэм колледжын удмурт дышетӥсьёсты дасян».

Озьы Н. Пискунов но завуч С. Исупова дыраз сюлмаськемен, кыл кутонэз ас вылазы басьтэмен, «Покчи классъёсын дышетӥсьёсты дасян» специальностья удмурт дышетӥсьёсты дасян Можга педколледжын азьланьтӥське, нош мукет дышетсконниосын сое утьыны ӧз быгатэ. Озьыен, быдэс элькунамы покчи классъёслы удмурт дышетӥсьёсты али Можга педколледж гинэ дася. Озьы ик удмурт кылэз но литератураез дышетонэз мукет специальностьёсын но кельтыны быгатӥм: удмурт кыл — 35 час, удмурт литература — 35 час.

Туннэ нуналлы 442 студентъёсмы пӧлын 259 удмуртъёс (59 процентэз), 160 ӟучъёс (36 процентэз), 14 бигеръёс (3 процентэз), мукет калыкъёс — 9 (2 процентэз). Соос пӧлысь «Покчи классъёсын дышетон» специальностья 96 студентъёс дышетско удмурт отделениын. Та группаосын удмурт кылэз но литератураез дышетон часъёс: удмурт кыл — 39 час, удмурт литература — 39 час, удмурт кыл но сое дышетон методика — 147 час; удмурт нылпи литература но сое быгатыса (выразительно) лыдӟон — 62 час. Озьыен, ваньмыз 287 аудиторной час. Та предметъёсты дышетыны нимысьтыз удмурт кабинетмы юрттэ. Но… соосъя нимысьтыз учебникъёсмы ноку но ӧй вал, куке луозы меда? Уже кутоно луиськом шор ёзо школаослы лэсьтэм учебникъёсты яке вылӥ дышетсконниослы дасям материалъёсты.

Омыр быре ке, улон кысэ

Мукет сюлмаськонмы но вань. Та вакытэ Удмуртиысь школаосын удмурт кылэз дышетон 2 пӧртэм программаосъя радъямын: удмурт кылэз ӟеч тодӥсь пиналъёслы но удмурт кылэз тодӥсьтэм пиналъёслы. Котькуд программая школаослы учебникъёс кылдытэмын. Но, школаос капчигес сюресъя мынэмен, «Ӟеч-а, бур-а, удмурт кыл!» программае выжемен, пиналъёс удмурт кылэз лябгес тодо ни, удмурт группае студентъёсты бичаку но, шугъяськонъёс кылдо. Соин ик дышетӥсьёслы но анай-атайёслы вазиськисько: «Эн дыртэ капчиятэм программае выжыны!» Удмурт тодосчи Геннадий Ушаков шуиз вал: «Анай кыл — со омыр кадь. Омыр быре ке, улон кысэ. Анай кыл вунэ ке, адямилэн будон сюресэз трослы вакчиёме». Вазиськеме потэ: «Эн вакчиятэ удмурт пиналъёслэсь бурдъяськон, будон сюрессэс!»

Берло аръёсы покчи классъёслы удмурт дышетӥсьёсты дасян бордын тыршо колледжысь дышетӥсьёс Т. Кибардина, Т. Иванова, М. Пискунова. Удмурт дышетӥсез будэтон понна ми трос пӧртэм ужрадъёс ортчытъяськом. Студентъёс но дышетӥсьёс пырисько «Удмурт Кенеш» но «Шунды» огазеяськонъёслэн ужазы, элькун конкурсъёсы, конференциосы, олимпиадаосы. Трос ужрадъёсы пыриське Удмуртиысь студентъёслэн одӥг гинэ удмурт хорзы, кыкетӥ арзэ ини колледжын ужа этнокультурая центр.

Шаермылэн кыӵе гинэ сэрегаз эн вуы, котькытысь шедьтод Можга педколледжез йылпумъям муртэ. Соос басьтэм тодон-валанъёссэс ас ужан интыязы азинто, дышетскон юртсэс но дышетӥсьёссэс шуныт кылъёсын тодазы ваё. В. Владыкин профессор шуэ: «Улон-вылонэлэн зэмос кутсконэз — чылкыт жильыртӥсь ошмесэз — Можга педучилище. Со асьмелэн удмурт Царскосельской лицеймы, оло, ваньмыз йӧскадь адямиосмы куке но татысь потэмын. Сюлмысьтым тау карыса, мон солы котьку музъемозь йыбырттӥсько. Ма, мон гинэ-а?»

Нош мон туннэ Россиысь удмуртъёслэн нырысетӥ ӧтчамазы люкаськем делегатъёслы верасал: «Мытэм уждэс азьланьтӥськомы. Дышетсконнимы, кызьы малпады вал, озьы ик удмурт дышетӥсьёсты дася. Бадӟым тау тӥледлы»!

Татьяна ИВАНОВА, Можга педколледжысь удмурт кылъя дышетӥсь

Ангелина Снигирева
By Ангелина Снигирева Декабрь 5, 2018 14:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<