Синтэм, пельтэм яратон

Ангелина Снигирева
By Ангелина Снигирева Декабрь 3, 2018 11:37

Арлы быдэ, 1988-тӥ арысен кутскыса, быдэс дуннеын пусйиськом СПИД-эн нюръяськон нуналэз. Та нуналэ ВИЧ-ен улӥсьёслы дэмен вераны турттӥськом: ми тӥледын артэ, ми тӥледыз валаны дасесь.

Ижысь СПИД-эн нюръяськонъя элькун центр

Кузьым

ВИЧ-ен паласькем мурт шаерамы нырысьсэ тодмо луиз 1993-тӥ арын. Со дырысен та лыдпус арлы быдэ йылэ. Туннэ нуналлы 11 сюрс 249 адями луэмын. Котькуд 100 сюрс мурт пӧлысь — ог 457-эз. Россиен но, Приволжск федерал округен ӵошатыса, Удмуртиын сыӵеос кӧнялы ке ӧжытгес. Озьы ке но буйгатскыны уг луы. ВИЧ-ен улӥсьёс уката трос Ижын, Глазов, Камбарка, Вотка палъёсын, соос пусъемын ни вань ёросъёсын. Угось ВИЧ уг юа адямилэсь кытысь кин луэмзэ но, арлыдзэ но, кытын ужамзэ но.

Кылсярысь, Ижысь 37 аресъем Наталья кузпалыныз шыпытак гинэ 2 нылъёссэс будэтӥзы, шумпотӥзы пичиоссылэн нырысетӥ вамышъёссылы, нылпи садэ, школае мынэмзылы. Бен, улӥзы пичигес сэрегын — улон интызэс бадӟыматыны луонлык ӧз шедьтэ. Наталья картсэ та понна пыкылыны кутскиз. Нош кузпалыз ӵемгес шӧмаськыса бертылӥз. Собере уйлы-кыклы ышылыны ӧдъяз, люкиськизы. Ӟеч муртъёс Натальялы веразы: картэд толон соиныз, туннэ мукетыныз кышномуртэн юмша…

Но Натальялэн егитысен пурӟем яратонэз пушказ гома на вылэм. Картэз пыдесъяськыса дораз вуиз — вождэ эн вай, ваньзэ валай, мыным тон гинэ кулэ. Натальялэн кӧтыз берытскиз. Семьяын нош ик ваньмыз интыяз пуксьыны кутскиз вал кадь. Но туэ эмъясьёс Натальялы веразы: бордады кырмиськем ВИЧ. Тодмо луиз: картэз кузьмам…

— Мон интыям пумем кадь луи, — вера Наталья. — Но малы ке но картэным кусыпъёсмес выльысь тарканы кужмы ӧз тырмы. Ас поннам бӧрдӥ, буйгатски, кузпалылэсь юай: кылиськом-а ӵошен?

Наталья уг ваты: тросэз потӥз, дыр, эмъясьёс бордысь. Нылкышно шоры соос пыкылыса, жаляса ӧз учке — ваньзэ лад-лад валэктӥзы, мар карыны веразы. Озьы та семья табере улэ тросэз мукет семьяос кадь ик. Ӵукналы быдэ уже вамышто. Нылкышно тросгес берга пиналъёссы котырын, воргорон юонзэ вормыны кужым шедьтӥз. Мукет семьяослэсь висъясько соин гинэ: нуналлы быдэ эмъюмъёс юо. Сое дунтэк сёто СПИД-эн нюръяськонъя центрын. Специалистъёс верало: эмъюмъёсты юоно луоз пырак улытозь, вис уд карылӥськы, таза улонэн эшъяськиськод ке, номыр кышкытэз ӧвӧл — улон кузь луоз. Угось туннэ вань ни мугорлэсь висёнъёсын нюръяськон кужымзэ — иммунитетэз — возьыны юрттӥсь пӧртэм пумо подоваос. Кыӵеез тупалоз соизлы я таизлы адямилы — быръё специалистъёс.

Улоно!

Яратон ӵемысь луэ синтэм но, пельтэм но. Вазен специалистъёс верало вал: ВИЧ аля наркоманъёс пӧлын. Туннэ черламъёс пӧлысь 50,2 процентэз ВИЧ-ез кырмиллям вень йылысь. Но берло аръёс возьмато: чер ӵемысь вӧлме нылкышноослэн но воргоронъёслэн матысь кусыпъёссы пыр. Туэ нырысьсэ шараям 53,9 процентаз учыръёсы инфекция выжем… яратыса. Берло аръёсы черламъёс тросгес луизы 30 ареслэсь ортчемъёс пӧлын: 2017-тӥ арын нырысьсэ шараямъёс пӧлын сыӵеос 74,4 процент вал ке, туэ 77 процент луизы ни.

СПИД-эн нюръяськонъя центрысь психолог Александра Поприк верамъя, данакез ВИЧ кырмемъёс озьы ик уло, кызьы уло вал азьло — соослэн диагноззы сярысь котырысь адямиослы тодытэк но яралоз. Угось мукетъёсызлэн тазалыксылы со кышкыт уг луы. Висён уг паласькы тусьты-пуньы, ӵушкон но мукетыз пыр. Тодоно: ВИЧ вӧлме 3 амалэн гинэ: воргоронъёслэн но нылкышноослэн матысь кусыпъёссы пыр, вир пыр, кылсярысь, наркоманъёс одӥг венен бышкиськыку, но анай бордысь кыльыны быгатэ пушкысь нунылы. Но нимысьтыз терапия ортчытыса, пинал таза вордӥське.

— Но, жаляса верано, тае ваньмыз уг валало на, тодо ке, вӧзаз ВИЧ-ен мурт улэ шуыса, солэсь палэнтӥськыны кутско, туж матысь адямиос луыкузы но, — азинтэ веранзэ Александра Владимировна. — Асьсэос инфекция кырмемъёс но пушказы выйыны, матысь адямиоссэс шуге-леке вуттозы шуыса, кышканы кутско. Кылсярысь, анайёс нылпиоссэс ӟыгыръямысь-чупамысь дугдо — малпало, висёнзы паласькоз. Со шонер ӧвӧл. Кызьы ассэ шӧдоз ВИЧ-ен улӥсь мурт — тросэз потэ семья бордысь. Тыршоно ганяк кариськыны, адями диагнозэз пумысен медаз куректы. Со сяна, таӵе адями дорысь котькыӵе ужез мед быдэсъялоз.

Ачиз ВИЧ-ен улӥсь куд-ог куронъёсты чакланы кулэ ик. Кылсярысь, солэн нимаз луыны кулэ мисьтӥськон мучолоез, пинь сузян щёткаез, бритваез, гижы вандылон качыез — но мукет. Ма, котькуд семьяын озьы луыны кулэ, ВИЧ сяна, трос мукет но инфекциос та арбериос пыр вӧлмо.

Эскериськы

Тодӥськом: ВИЧ-ез дыраз ӧд шарая но эмъюмъёс юыны ӧд кутскы ке, со СПИД-э выжыны быгатэ — мугорлэн висёнъёсын нюръяськон кужымез быре. Озьы адями борды кырмисько трос мукет висёнъёс, ӵемысь туберкулёз, пневмония но мукет. Соин ик адями одно тодыны кулэ черламез сярысь. Дун тырытэк, котьку эскериськыны луэ СПИД-эн нюръяськонъя центрын но солэн Вотка, Сарапул, Можга городъёсысь, Эгра, Ува каргуртъёсысь ёзъёсаз. Нош та вакытэ 30-тӥ ноябрёзь, нялтас, дун тырытэк, эскериськыны луоз на В но С гепатитъёслы но.

Эскериськонъёс ӵемысь ортчыло трос калык люкаськылон интыосын но, кылсярысь, вуз каронъя центръёсын. Ижысь «Петровский» вуз карон центрын акциос ортчозы 30-тӥ ноябре но 1-тӥ декабре нуназе бере, «Италмас» но «Талисман» вуз карон центръёсын — 1-тӥ декабре 16 часысен 19 часозь.

— 1-тӥ декабрь котырын быдэс странаямы радъяськыло та инфекцилы пумит пӧртэм пумо ужрадъёс. Калыклы угось тодаз вайытоно: ВИЧ-ен улыны луоно, но солэсь чакласьконо.

Мар со сыӵе ВИЧ? Кызьы солэсь утиськоно но мар со сыӵе антиретровирусной терапия? Кытын ВИЧ-лы эскериськыны луэ? Та но мукет юанъёслы валэктонъёс шедьтыны секыт ӧвӧл.

Со понна вазиськоно Роспотребнадзорысь но Гигиеная но эпидемиологияя центрысь специалистъёслы. Соос жингыртэмдэс витё 26-тӥ ноябрьысен 7-тӥ декабрёзь.

Ижын — 8 (3412) 68-36-54; 59-89-99, Воткаын — 8 (341 45) 5-18-34, Глазовын — 8 (341 41) 2-79-62, Можгалан — 8 (341 39) 3-25-75, Сарапулын — 8 (341 47) 4-03-96, Эгралан — 8 (341 34) 4-17-75, Уваын — 8 (341 30) 5-12-96 номеро телефонъёсъя.

Элина Кумачёва

Ангелина Снигирева
By Ангелина Снигирева Декабрь 3, 2018 11:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<