Россилэн данъяськонэз

Ангелина Снигирева
By Ангелина Снигирева Декабрь 10, 2018 15:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт филармонилэн юртаз люкаськылӥзы элькунысьтымы усто семьяос. Соос ваньзы вормисе потэмын «Удмуртиысь семья — Россилэн данъяськонэз» 5-тӥ элькун конкурсын.

Усто семьяослэн конкурссы кыстӥськиз апрельысен ноябрь толэзёзь. Та ӵошатсконын кужымзэс мертаны мылкыд каризы элькунмылэн пӧртэм сэрегъёсысьтыз 470 семьяос. Озьы ӵошатсконлэн нырысетӥ люкетэз ортчиз ёросъёсын, отын вормисе потэмъёс пӧлысь быръемын вал 43 усто семья. Таос ик пыриськизы конкурслэн элькун люкетаз. Котькуд номинациын вормисе потэмъёсты ӟечкылан понна Удмурт филармониын яркыт концерт радъяськиз. Быдэс зал тыр калык люкаськиз — ӟеч семьяослэн ӵыжы-выжыоссы лачак. Ужрадэз нуисьёс но — кузпалъёс — Удмуртиысь дано артистъёс Михаил Солодянкин но Елена Мишина.

Сцена вылэ огез-бӧрсьы мукетыз потаны кутскизы песянай-песятайёс, соослэн нылпиоссы, таосызлэн пиналъёссы — быдэс сцена тыр чуренак люкаськыло ӵыжы-выжыос! Вормисе потэмъёсты ӟечкыланы вуизы Кун Кенешлэн Тӧроезлэн воштӥсез Надежда Михайлова, культурая но туризмъя министр Владимир Соловьёв, социальной политикая но ужъя министр Татьяна Чуракова, Печатья но ивор вӧлмытонъя агентстволэн кивалтӥсез Алексей Воронцов.

Элькунысьтымы усто семьяен лыдъямын Вотка городысь Каданцевъёс.

Ужъя династиос асьсэды ӟечен возьматӥзы Можга ёросысь Новопольск гуртысь Морозовъёс, Дэри ёросысь Якшур гуртысь Ашпалатовъёс, Дэри палъёсысь ик Созоновъёс. Конкурслэн Гран-приеныз пусъемын Вавож черкогуртысь Вичужанинъёслэн семьязы: сцена вылэ потӥзы огезлэсь етӥз мукетыз 6 нылъёс но анай-атайзы. Одӥгез нылзы вордыны басьтэмын, табере со но семьялэсь йылолзэ азинтэ: быгатыса шудэ крезен. Вичужанинъёс, крезьёссэс кутыса, сцена вылысен удмурт гур шудӥзы.

Лыдӟиськись семьяен лыдъямын Якшур-Бӧдья ёросысь Мукши гуртысь Брюхачевъёс. Песятайзы — Анатолий Брюхачев — Мукши поселенилэн йырыз. Филармоние вуиз кузпалыныз, нылыныз, эмеспиеныз, 2 нуныкаосыныз.

— Семьяе монэ пӧртэм конкурсъёсы кыскыны выре, — вера Анатолий Брюхачев. — Кырӟаськом но, кылбур но лыдӟиськом, огъя вераса, сценалэсь ум кышкаське. Эшшо ке мылкыдмес бурдъяса возе культурая юртмылэн кивалтӥсез Елена Анисимова. Но малы ке но вормон милесьтым палэнтӥ ортчылӥз: я 4-тӥ интыен бертӥськомы, я таукаронэн гинэ. Нош таяз радэ удалтӥз: трос лыдӟиськись семья луим. Мон муниципал кылдытэтлэн йырыз луисько бере, документъёсын, пӧртэм ужпумъёсын трос дыр быдтоно, книга лыдӟыны дыр уг кыльы ни. Но тол вылтӥ 2 ке но книга лыдӟисько.

Кызьы пиналъёслы пыӵатӥськоды та сямез? — юасько Анатолий Степановичлэсь.

Уд оске — пӧялляськыны дышоно, — пальпотэ песятай. — 2-3 аресъем нылпилэн ваньмыныз тунсыкъяськон вакытэз кутске ке, солы выль но выль выжыкыл малпано, ойдо ай, тани та книгаез лыдӟыса, эшшо но тросгес тодом, шуоно! Озьы буква бӧрсьы буква, книга сьӧры книга. Савелий внуке школае уг ветлы на вал, лыдӟиськыны дышиз. Али книгаос солы ческыт сиён интыын, — шуэ со.

Семья клубъёс пӧлын висъяськиз Вотка ёросысь Июльское черкогуртысь клуб. Семьяос сярысь тунсыко гожъяллям-возьматӥллям «Известия Удмуртской Республики» газет но «Мынам Удмуртие» компания.

Филармоние люкаськемъёслы шулдыр мылкыд кузьмазы «Италмас» ансамбльысь, «Шулдыр ӝыт» группаысь артистъёс. «Удмуртиысь семья — Россилэн данъяськонэз» конкурсэ пыриськемъёс но возьматӥзы та вожвылъяськонлы дасям номеръёссэс. Ужрад ваньзылы капчи мылкыд сётӥз.

Елена Никитина

Туспуктӥз М. Егоров

Ангелина Снигирева
By Ангелина Снигирева Декабрь 10, 2018 15:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<