«Ми сое ум но тодӥське!»

Удмурт Дунне
By Удмурт Дунне Декабрь 9, 2018 11:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

2007-тӥ арысен Россиын пусйиськомы Атыкай музъеммылэн Героезлэсь нуналзэ. Ӵектӥськомы огеныз удмурт героен, Валерий Попковен, тодматскыны.

В. Попков

Сяртчы кадь ымныро

Одӥг пол шедьтӥ Афганистанын данлыко ожмаськемзы понна Совето Союзлэн Геройёсызлэсь туспуктэмъёсын бичетсэс. Учкисько но данъяськисько йӧн-йӧн мугоро, военной дӥськутэн пиосын. Пӧлазы лётчик, капитан Валерий Попков… Туспуктэм вылысь пальпотӥсь воргорон шорам учке. «Сяртчы кадь ымныро» шуысалзы со сярысь арлыдо удмурт нылкышноос. Туспуктэмлэн мукет палаз кӧня ке чур гожтэмын та геройлэн ожъёсы пыриськылэмез сярысь. Лыдӟисько но синъёсылы уг оскиськы.

«Валерий Филиппович Попков вордскемын 1961-тӥ арын Удмуртиысь Сюмси ёросысь Кильмезь посёлокын. Удмурт. 1982-тӥ арын Сызраньысь лётчикъёсты дасянъя авиацияя вылӥ училищеез йылпумъямез бере ыстэмын Афганистанэ. Интернациональной юрттэт сётыкуз, кышкасьтэм луэмез понна 1989-тӥ арын со пусъемын Совето Союзлэн Героез нимын».

Мон талы шумпотӥ но пайми: малы асьме элькунын Валерий Попков сярысь номыр но уг тодо. Со асьме дорын вордскемын!

Мон утчаны кутски та лётчикез. Нырысь ик гожтэт ыстӥ Россиысь Обороная министерстволэн «Красная звезда» газетаз. Малпай, оло, отын мыным шонер валэктон сётозы. Отысен гожтэтме Обороная министерстволэн кадръёсъя управленияз ыстӥллям. 1996-тӥ арын 13-тӥ сентябре Москваысь гожтэт вуиз:

Вазиськондэс эскеримы, тӥледлы ивортӥськом, Совето Союзлэн Героез луэм муртъёс пӧлын Попков Валерий Филипповичлэн нимыз-тулыз ӧвӧл».

Мон азьын ӧс пытсаськиз. Табере ма кароно? Соку бичетысь В. Попковлэсь туспуктэмзэ ксерокс пыр поттӥ но выльысь кадръёсъя управление ыстӥ. 1997-тӥ арын 22-тӥ январе шумпотымон ивор басьтӥ:

«Гожтэттыя ивортӥсько, выльысь эскеронъёс ортчытэммы бере тодмо луиз, Попков Валерий Филиппович, кудӥз вордскемын 1961-тӥ арын, зэмзэ но Совето Союзлэн Героез луэ, сыӵе вылӥ ним солы сётэмын вал 1989-тӥ арын 21-тӥ апреле СССР-ысь Вылӥ Кенешлэн Президиумезлэн указэзъя. Жаляса верано, та указэз дасянэ КГБ-ысь специалистъёс пыриськиллям, соин ик геройлыко подвиг лэсьтэмез сярысь ми рос-прос валэктон сётыны ум быгатӥське».

Инбаме ӝутскылон

Зэм шуо, военнойёслэсь трос кылзэс уд кыскы. Озьы ке но мон тодӥ Валерий Попковлэн одӥг оже пыриськемез сярысь. Асьмелэн улосчимы Афганистанэ сюре лётчикъёсты дасянъя училищеез йылпумъямез бере ик.

1982-тӥ — 1989-тӥ аръёс. Со дыр ӵоже офицер В. Попков кык сюрслэсь трос пол инбаме ӝутскылӥз. Озьы ик десантирование пыриськон, инмысен разведка ортчытон, сиён-юон но пыӵал тӥрлык нуон-ваён, сӧсырмемъёсты отысь поттон, автомашинаосты инмысен утён но мукет ужъёс пыр потэмын. Олома но вал егит офицерлэн улоназ. Солэн «университетъёсыз» кутскизы, куке афган ожлэн шӧмыз чик валамон ӧй вал на вылӥ кивалтӥсьёслы но, асьме солдатъёслы но, офицеръёслы но.

…1986-тӥ ар, август. Экипажлэн командиреныз С. Болговен соос инме ӝутӥсько. Соку командир, одӥг секунд но малпаськытэк, шузимыса ыбылӥсь пулемётлэсь кышкатэк, музъем вылэ усем вертолёт доры пуксе, вань кулэзэ басьтыса, выльысь инбаме ӝутске. Соку душманъёс вертолётлэсь эстӥськонэн тырмем баксэ пасяны вуо, пуляос двигателяз но йӧто.

В. Попков капитан командирезлы паймиз ке но, ачиз но дэймыса ӧз улы, лётчик, штурманлэн интыяз пуксьыса, командирезлы юрттӥз. Озьы ке но та учырез со подвиген уг лыдъя. Со, пе, ожмаськыны дышетскон вал.

Вуоно лётчикъёс табере В. Попковлэсь урокъёссэ басьтыны кутскизы. Ачиз экипажлэн командирез луэмез бере солэн йыраз но ӧй вал, оло, кин ке солэсь лобан но ожмаськон манерзэ синйылтоз но соя дышетскоз шуыса. Ожын нырысь ик ожмаськоно. Афганистан ачиз дышетэ кадь, одӥг кадь урокъёс но сётэ. Одӥгез гинэ умойтэм: «кыкъёсты» мукет дыръя тупатыны дыр уг висъя ни.

Эшлы юрттон

…1989-тӥ ар, январь. Попков Шариков капитанэн ӵош инбаме ӝутске. Соку Ханабад вадьсын пурысь пилемъёс уязы, гурезь йылъёс гинэ но бус пӧлын вал: солань-талань бызьылӥсь душманъёс йӧл пушкы кадь ышо, собере выльысь олокытысь пото. Инмын пичи гинэ пась усьтӥськиз но, Шариковлэн вертолётэз из кадь уллань усьыны кутскиз, сьӧраз ӵын пытьы гинэ кылиз на. Ма кароно? В. Попков адӟыса вуттӥз ик — вертолёт музъем вылэ усён азьын Шариковлэн парашютэз усьтӥськиз. Со доры, дуринчиос кадь, моджахедъёс лобӟизы. В. Попков вертолётысьтыз кӧня ке НУРС-снарядъёсты лэзиз но, тушо муртъёс огинтыязы дугдӥзы.

Музъем борды кык пол йӧтскылыса, Валерий Попковлы шудоно луиз. Нырысь ик — вертолётысь куинь эшъёсыз потыса, парашютэн пуксем Шариковез тушмонъёслэсь ватыны быгатӥзы. Душманъёс автомат пуляосын пумитамын вал. Таосыз но лекаськыны ӧдъязы. Соку капитан В. Попков, вылӥе ӝутскыса, выль залпъёсын музъемез зуркатыны кутскиз. Вертолёт шоры музъем вылысь автомат, пулемёт, гранатомёт гумыос урдскизы. Со куспын куинь ӟуч пиос Шариковез из сьӧры ватыны вуизы. Табере соосты вертолётэ басьтоно. Капитанлэн вертолётэз выльысь музъемез «чупаз» — кӧня ке секунд куспын «корт вукарнанын» вань десантникъёс но капитан Шариков вал ини.

Аэродроме мырдэм но кызьы вуизы. В. Попков вертолётысьтыз кызь одӥг пасям интызэ шедьтӥз. Со ӧз но малпалля, кыӵе ке но геройлыко вамыш лэсьтӥз шуыса. Солэн вираз пыӵамын матысь эшлы шуг-секыт дыръя юрттон сям. Мукетыз сярысь малпанэз ик ӧй вал. Та учыр бере Афганистанысь асьме частьёсты поттон дырозь 26 нунал гинэ кылиз на вал…

1989-тӥ арын 15-тӥ феврале Б. Громов генерал вань советской солдатъёсты но офицеръёсты Афганистанысь поттӥз. Кӧня куректон вайиз «шур сьӧрын» ожмаськон! Удмуртиысь 2 сюрс но ӝынылэсь трос пиос Афганистанын ожмаськизы, 83-ез быриз. В. Попковез Инмар утиз — со ӵыжы-выжыосыз доры берытскиз.

Тодомы!

Асьме улосчимы сярысь тыро-пыдо ӧй но тодысал, солэсь гожтэтсэ ӧй басьтысал ке. Отысь тодӥ, Валерийлы 5 арес тырмем бере семьязы Кильмезь посёлокысь Дон шур дуре улыны кошкем. Нылпи садэ но, школае но отын ик ветлэм. Али со шаерын улэ анаез, нош атаез 1993-тӥ арын кулэм. Валерий Попковлэн бадӟымез выныз — Виктор — озьы ик военной адями, служить каре Калугаын. 1999-тӥ арын гожтэтаз со ивортэ, али Россиысь Пограничной федерал службалэн академияз служба нуисько шуыса. Дасяське вал кандидатской диссертацизэ утьыны. Соин ик жаляса вера, вордскем палъёсаз бертыны уг быгатӥськы шуыса. Одно ик вуыны тыршо, пе, угось ӵыжы-выжыоссы уло Воткинскын, Сарапулын, Глазовын…

Сокугес ик пумиськылӥ вал Сюмси ёросысь кивалтӥсьёсын. Вераськон потӥз татысь потэм дано адямиос сярысь. Валерий Попков сярысь кыл поттэме бере кивалтӥсь паймиз: «Ми сое ум но тодӥське!» Та вакытэ Валерий Попков — запасысь полковник, улэ Москва улосысь Лобня городын.

Оскисько, вуоз сыӵе вакыт, куке Удмурт шаерын улӥсьёс Н. Ульяненкоен, А. Тороповен, Г. Кулаковаен но Т. Тихоноваен оградэ пуктозы Сюмси ёросысь Кильмезь посёлокын вордскем удмурт воргоронэз Совето Союзлэсь Геройзэ Валерий Филиппович Попковез но. 

Басьтэмын Г. Грязевлэн «Вамыш» бичетысьтыз.

Сётэмын вакчиятыса.

Удмурт Дунне
By Удмурт Дунне Декабрь 9, 2018 11:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<