Малы Четкерлы «Удмурт дунне»?

Ангелина Снигирева
By Ангелина Снигирева Декабрь 5, 2018 16:38

«Удмурт дунне» газетын ужасьёс вуылӥзы Дэбес ёросысь Четкер гуртэ. Татчы газетчиос туж шер кожало, куазь жобаськыку, гуртэ уд но пыры, уд но поты. Озьы ке но Четкерын «Удмурт дунне» газетэз потэмез бере ӵуказеяз ик басьто.

Четкерысь лыдӟисьёс

Четкере ми потӥмы бускель Шудӟалуд гуртысь Любовь Чирковалэсь гожтэтсэ басьтэммы бере. Гуртазы почта ӧвӧл ке но, газетэз калыклы Любовь Павловна ачиз вуттэ. Та мыло-кыдо кышномуртлэн сюлмыз висе удмурт кыл понна.

Пумиськон Четкер гуртлэн школаяз ортчиз. Татчы Четкерысь но вӧзысь гуртъёсысь калык лыктӥз. Вераськон тросгес бергаз гуртоослэн шуг-секытъёссы котыр: сюрессы урод, егитъёслы уж ӧвӧл. Оглом гурт, пе, быре, но гуртоослэн сётскемзы уг поты.

— Мон республикаысь самой пичи школалэн директорез, дыр, — шуэ Надежда Юрьевна Тронина, — школамес туэ начальной кельтӥзы, дорамы али 5 пинал гинэ дышетске. Бадӟымъёсызгес нылпиос Дэбес школае автобусэн ветло, отын интернатын уло. Кылем арын, пиналъёсмы ӧжыт кылемен но бадӟым нылпиосты дышетскыны мукет гуртэ келямен, школаямы сокращениос вал. Туж жаль, 6 дышетӥсь ужезлэсь мозмытэмын.

— Нош 1955-тӥ арын та школаын 5-тӥ классын дышетскисьёс гинэ 3 класс вал, — ӧпкеле азьвыл дышетӥсь но фельдшер, 88 аресъем Роза Первушина, — сыӵе сюлэм вӧсь луэ… Почтаез но быдтӥзы, оптимизация каризы, табере телефонлы, тыллы тыриськон ласянь шугъяськоно. Посылка келяно ке, Дэбесэ мыноно, больницае ке, нош ик — Дэбесэ. Со понна частникен (таксиен) мыноно луэ. Али тани одӥг ветлэме понна сюреслы гинэ 1 сюрс манет тыри.

— Нош газет-журналъёсты дыраз вутто-а?

— Ой, таиз коть дыраз, «Удмурт дунне» потэмез бере ӵуказеяз ик, пятницае, вуэ, — шуо гуртоос.

Зэм, газетмес басьтӥсьёс татын трос ӧвӧл, муниципал кылдытэтын 9 кузя гинэ, пе. Малы сокем ӧжыт? Гуртоос асьсэос но валэктыны уг быгато, дорамы журналистъёс уг вуыло, оло, соин, пе, газетэ но ялан мукет гуртъёс, хозяйствоос сярысь гожъяло, ми палэнэ кылиськом…

Газетэз лыдӟисьёс ваньзы сямен ик пусйизы: «Удмурт дунне» — тунсыко газет, тужгес но кельшо, пе, «100 сюрес» но «Тӧр шорын» рубрикаосысь гожъямъёс.

— Нош яралоз-а, мон война вылтӥ улэммы но ужаммы сярысь газетэ гожтӥ ке? — шӧдтэк шорысь юаз Роза Первушина, — лыдӟисьёс уз шуэ-а, оломар гожъяськоды…

Ми валэктӥськом: газетын ужасьёс котьку шумпото гожтэтъёслы. Зэм, ваньзэ ум печатлаське, бырйиськом устооссэ яке тужгес сюлмаськытӥсьёссэ гинэ, гожтэмъёсты лыдӟисьлы тупамон карыны тыршиськом. Соин пичи но шугъяськоно ӧвӧл, мылкыдды вань ке, гожъяське. Куд-ог учыръёсы сыӵе гожтэтъёс ик журналистъёсты сюрес вылэ потто. Тани таяз учыре но, Любовь Чирковалэн гожтэтэз ӧй ке вуысал, оло, «удмурт дуннеос» Четкере ноку ӧй но лыктысалзы…

Нялтас вераса, Четкерлэн ӝутсконэзлы туж оске татын вордӥськем Илья Шкляев. Пияш муниципал кылдытэтлэн администрацияз ужа. Солэн сюлмаськемезъя Четкерын спортъя ёрос ӵошатсконъёс ортчыло ни.

— Милям туж шулдыр интыосмы, — ватсало на гуртоос, — губи, емыш — ваньмыз вань, шурамы — чорыгмы. Сюрес кӧс ке, оло, вань Удмуртия татчы чорыганы люкаське. Гужем гурт тыр шуккисько нылпи куараос.

Зэм, сӥзьыл-толалтэ мӧзмытгес. Но, оло, ӵапак соин но гожтӥськоно «Удмурт дуннелы»?

Елена Миннигараева

Туспуктэмез авторлэн

Ангелина Снигирева
By Ангелина Снигирева Декабрь 5, 2018 16:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<