Котькуд куаралы шумпотэ

Ангелина Снигирева
By Ангелина Снигирева Декабрь 3, 2018 11:26

Зураысь 9-тӥ классын дышетскись Диана Корепанова кылем арын йылпумъяз Эграысь искусствоосъя нылпи школаысь суредаськонъя ёзэз. Кемалась ик ӧвӧл ёрос центрысь художественной галереяын солэн ужъёсыныз адӟытон ортчиз.

Дианаез суредаськыны дышетӥз Ирина Валерьевна Семакина. Нылаш дышетӥсьлэсь верамзэ котьку быдэсъяны тыршылӥз. Табере суредъёсыз вылысь Индиысь, Франциысь, Япониысь синпелетъёсты но тодмо интыосты адӟыны луэ, нош тужгес трос ужъёсыз Удмурт шаерен герӟаськемын, отысь инкуазь суредъёс улэп кадь син азе пуксё.

Диана ялан маке выльзэ лэсьтыны тырше, котьмаин тунсыкъяськыны выре. Кемалась ик ӧвӧл гуртысьтызы культурая юртэ сюрес лёгиз. Ия Геннадьевна Ковалёва юрттэмъя чебер эктыны дышиз. Ас мылкыд каремезъя гижы буян борды но басьтӥськиз, турлы суредъёс но пуктыны быгатэ ни. Ачиз ик ческыт зыно майталъёс лэсьтыны дышетскиз. Нош ваньмон дыр шедьтэ ке, конькиос я роликъёс вылэ султэ. Каникулъёссэ но туж пайдаё радъян сярысь сюлмаське. Песянаеныз Ираида Владимировнаен ӵош Россиез котыръяны ярато. Озьы соос вуылӥзы ни Хабаровск, Приморск улосвылъёсы, Симферополь, Ялта, Керчь, Москва но мукет городъёсы. Нылаш адӟемзэ суредъёс вылэ пуктылэ.

Казаньын улӥсь Диана Корепанова, оло, Зура черкогуртэ ноку ӧз бертысал, секыт ӧй ке висьысал. Арес но ӝыны дыръяз кынман висёнэн черлаз. Эмчиос нылашез пыд вылаз султытӥзы ке но, висёнлэн бервылъёсыз пыраклы кылизы: пельёсыз кылэмысь дугдӥзы, соин валче вераськыны но ӧз дышы. Нылашлэн анай-атаез кыкназы ик военнойёс вал, со вакытэ кузпалъёсты Россилэн шундыӝужан палаз ыстыны медо вылэм. Озьы соос Хабаровскын, отӥяз Приморск улосын, Донбассын улӥзы, нош али Москваын уло. Нош со вакытэ шуг-секытысь потон амал одӥг гинэ вал — нылзэс Зураын улӥсь песянай-песятаез доры огдырлы кельтон.

— Пимылы но, кенмылы но, милемлы но нырысь секыт вал, — ортчем аръёс сярысь тодаз вае Ираида Владимировна. — Диана мед кылоз шуыса, дуно аппаратъёс басьтоно луылӥз. Со понна дэмен коньдон люкаллямы, Кун Кенешысь депутат Софья Широбокова но быгатэмезъя юрттӥз.

3 арес дыръяз Дианаез келяно луизы Ижевскысь ляб кылӥсьёслэн интернатазы. Зураын улӥсь песянаен песятаез арнялы быдэ интернатэ адскыны ветлӥзы. Пятницае гуртазы басьто вал, нош арнянуналъёсы берен городэ нуллӥзы. Озьы, вис карытэк, 6 ар ветлӥзы. Отӥяз нылашлы операция лэсьтӥзы.

— Дунтэк операция лэсьтон вылысь трос интыосы вазиськылӥмы, пумитамы одӥг валэктонзы вал — луонлыкмы ӧвӧл, — веранзэ азьланьтэ кышномурт. — Нош дыр ортче, Диана будэ. Тодӥськомы вал, висёнзэ азьланяз эшшо но секытгес йӧнатыны луоз шуыса. Мар карыны паймеммы бере Дмитрий Медведевлы, со вакытэ Россилэн Президентэз вал, гожтэт гожтыны валамы. Москваысь ивор кема витёно ӧз луы. Озьы 2010-тӥ арын Санкт-Петербургысь одӥгаз больницае мынӥмы, отын квотая нырысетӥ операция лэсьтӥзы. Эмчиос шумпотыны вазь на, шуизы. 2 ар ортчыса, пе, нош ик операция лэсьтоно луоз. Быдэсак бурмонлы оскон ӧз сётэ. Ватсазы на, йӧнатскон понна, пе, ӵемысь возьматъяськоно логопед, психолог но дефектолог доры. Кытысь таосты шедьтод пичи гуртын?

Ираида Владимировна Санкт-Петербургын дыръязы эмъясьёслэсь дышетскыны малпаз, чаклаз соослэсь ужамзэс, юанъёс сётъяз. Гуртазы бертыса, Санкт-Петербургын басьтэм тодон-валанъёссэ уже кутӥз. Быгатӥз ведь! Нылаш каллен-каллен, туж шуген ке но, вераськыны кутскиз. Соиз но умой, операция бере ик Дианалы умойгес луиз, вань куараосты кылыны ӧдъяз. Озьы со 9 аресаз дышетскыны вамыштӥз Зура школаысь 2-тӥ классэ.

Ираида Владимировна дышетӥсь ке ӧй луысал, оло, шуг-секытъёсты вормыны ӧй быгатысалзы. Нырысь со покчи классъёсын урокъёс нуиз, али удмурт кыллы дышетэ, нылпиослэсь ваньмон дырзэс пайдаё радъян сярысь но сюлмаське. Дианалэсь югдурзэ умой вала школалэн кивалтӥсез Вадим Анатольевич Захаров. Нылаш сярысь шуныт кылъёс верало мукет дышетӥсьёс но: эшъёсыз сярысь котьку сюлмаськоз, быгатэмезъя юрттӥськоз, волонтёръёслэн радазы сылэ.

— Вань урокъёс мон понна тунсыко луо, — вераськонамы итӥськиз нылаш. — Кӧня выльзэ тодӥсько! Тужгес но шумпотыса ветлӥсько география урокъёсы. Дышетӥсьмы Фаина Николаевна Стрелкова синмаськытӥз монэ та предметлы. Оло, соин ик дуннеез котыръян мылкыдын улӥсько.

Диана котыре люкаськемын ӟеч сюлэмо адямиос. Соос кужым пыӵато кадь нылашлы. Азьланезлы малпанъёсыз бадӟымесь. Выль арлы песянаеныз ӵош Москваын улӥсь анай-атаез доры мыныны дасяське.

Надежда Данилова

Ангелина Снигирева
By Ангелина Снигирева Декабрь 3, 2018 11:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<