Дӥсьсы — яркыт, мылкыдзы — ӟырдыт

Ангелина Снигирева
By Ангелина Снигирева Декабрь 4, 2018 13:41

Дӥсьсы — яркыт, мылкыдзы — ӟырдыт

Ижысь Эшъяськон юртын 28-тӥ шуркынмонэ «Пичи чеберайёс но батыръёс» элькун фестивальлэн йылпумъянэз ортчиз. Сое радъяз «Удмурт нылкышно кенеш» огазеяськон Нациосын ужан политикая министерстволэн но Эшъяськон юртлэн юрттэмзыя.

50 устоосыз

Ужрадэз усьтӥзы нациосын ужан политикая министр Лариса Буранова но «Удмурт нылкышно кенешлэн» кивалтӥсез Надежда Степанова.

Удмуртиысь нылпиос понна та фестивальлэсь паськытгес но бадӟымгес ужрад малпамтэ на, дыр. Туэ тани оглом 27 площадка ужаз, отчы пыриськизы нылпи садъёсысь удмурт кылэз дышетӥсь 400 визь погъёс, нош кӧня визьнодась ужаз нылпиоссэ конкурсэ дасян понна! Ижкаре — фестивальлэн йылпумъяназ — вуыны удалтӥз асьсэ ёросъёсазы но городъёсазы усто луэм 50 визь погъёслы гинэ. Ваньзы соос фестивальлэн вормисьёсыз ини. Эшъяськон юртын пичиос эктӥзы, кырӟазы, кылбур веразы — ваньзэ удмурт сямен, удмурт крезьгур улсын.

— Та фестивалез 7-тӥ арзэ ортчытӥськом ини. Туэ, шуыны луоз, отчы пыриськиз быдэс Удмуртия. Нылъёс но пиос быгатӥсь зэмос удмурт ныл но удмурт пи луэмзэс возьмато. Кылсярысь, нылашъёслэсь удмурт сиён-юонъёсты тодэмзэс, кырӟаны, эктыны быгатэмзэс учкизы, удмурт сямен вераськемзэс дунъязы. Ужрад арысь аре ортчылэ ке но, со уг акыльты, отчы ялан выль нылпиос пырисько. Конкурс борды шумпотыса итӥсько анай-атайёс но, визьнодасьёс но. Угось со огшоры кырӟан-веран выллем гинэ ӧвӧл, со удмурт кылэз азинтонъя ужрад. Со пиналъёслэсь но, анай-атайёслэсь но удмурт кылэз дышетыны мылкыдзэс ӝутэ. Ужрадлы нунал но туж тупамон сюриз — Удмурт кыллэн нуналыз, — вераз «Удмурт нылкышно кенешлэн» кивалтӥсез Надежда Степанова.

Кыстӥсько сцена вылэ

Элькун сцена вылысен яркытъёсыз номеръёс возьматэмын вал. Люкаськем калык азьын реп лыдӟиз Пичи Пурга ёросысь Баграш-Бигра гуртысь Антон Баграшов.

Баграшовъёс

— Тон, Антон, бадӟым будӥд ке, артист, дыр, луод? — юасько.

— Уг, — пудо першал, пудоосты йӧнатэме потэ, — рос-прос вераз пияш.

— Антонмы милям сценаез, кырӟанэз яратэ, — вераз анаез Светлана Михайловна. — Со Богдан Анфиногеновлэсь «Суперудмурты» кырӟанзэ быдэс тодэ, дорын но концертъёс пуктылэ. Али но Богданэн пумиськимы, Биграла вуиз ке, Антонэн ӵош реп лыдӟозы шуыса вераськимы.

Светлана Михайловна но Павел Петрович Баграшовъёслэн 5 нылпизы, ваньзы соос удмурт кылэз, культураез тодыса но гажаса будо.

Е. Григорьева

Алнаш ёросысь Вуж Шудья гуртысь Даша Григорьева но ужрадэ анаеныз вуиз.

— Туж тунсыко йӧтӥзы нылпиослэн дӥськутъёссы — кыӵе соос яркытэсь, чебересь, синмез кыскисесь, пиналъёс но макем быгатӥсесь, — ужрад пумысен мылкыдзэ вераз Дашалэн анаез.

Алнашын ортчем фестивальын Даша кырӟаз, акробатикаен герӟаськем номер возьматӥз. Григорьевъёслэн семьяязы вань 4 нылпиоссы удмурт сямен верасько.

Кыдёкысь — Юкаменск кемысь — визь погъёсынызы вуизы «Берёзка» но «Ладушки» нылпи садъёсысь визьнодасьёс Татьяна Булдакова но Светлана Сабрекова.

С. Сабрекова но Т. Булдакова.

— Ёросамы арлы быдэ та конкурс ортчылэ, отчы, оло, 6-тӥ арзэ пыриськиськом ни, — верало нылкышноос. — Но туэ гинэ финалэ сюрыны удалтӥз. Садикъёсамы нимысьтыз удмурт кылэз нуись дышетӥсьёс ӧвӧл уго. Пиналъёсты удмурт шудонъёсын тодматӥськом, удмурт культуралы сӥзем сэрегъёсмы вань, ортчыло удмурт арняос но ужрадъёс. Но со тырмыт ӧвӧл. Тросэз потэ семья бордысь. Нылпи садъёсамы удмурт сямен вераськисьтэм пиналъёс ветло, куд-огезлэн анай-атайзы удмурт ке но. Соин нылпиосты удмурт ужрадъёслы дасяны секыт. Милям пиналъёсмылы удмурт кыл кыӵе ке кунгож кыл кадь потэ, озьы ке но соослы кельше солэн чузъяськемез, яратыса удмурт кырӟанъёсты быдэсто, экто. Туэ конкурслы дасяськыны зол юрттӥз Виктория Саламатова чебераймылэн песянаез — бадӟым тау солы. Со удмурт кылэз ӟеч тодэ.

И. Петрова

Ужрадлэн финалаз кыкетӥ ползэ пыриськыны удалтӥз ни Можга карысь 23 номеро нылпи садысь визьнодасьлэн Ирина Петровалэн нылпиосызлы. Со шуэ:

— Татчы вуимы Рамазан Шаймарданов но Альбина Александрова нылпиосын. Рамазанлэн атаез — бигер, анаез — удмурт, пияш удмурт кылэз дышетыны мыло-кыдо ветлэ. Таяз радэ ми нылпиосынымы туж тунсыко «Лу батырпи» кырӟан дасямы. Кылъёссэ Алнашысь Ульяна Климкина гожтӥз, крезьгурзэ — мынам нылы — «Дэмдор» группаын кырӟась Диана Петрова. Туж гажасько крезьгурез, нылпиосын номеръёсамы но эстрада шӧм пыртыны тыршисько.

Нылпи садэ ветлӥсь пинал уг вала на, трос кылын вераськон — со узырлык, анай кылэз утёно но азинтоно шуыса. Соин ик анай-атайёс, нылпиосын ужасьёс бордысь потэ кылмылэн ӵуказе нуналыз. Но тамында нылпи садъёс, пиналъёс, визьнодасьёс ужрадэ пыриськыны мылкыд каро бере, иське, удмурт кылэн, культураен тунсыкъяськисьёс йыло.

Ангелина Снигирёва

Туспуктӥз Максим Егоров

Ангелина Снигирева
By Ангелина Снигирева Декабрь 4, 2018 13:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<