Бурдъясь «Билингва»

Удмурт Дунне
By Удмурт Дунне Декабрь 7, 2018 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Билингва» проект кылдӥз 3 но ӝыны ар талэсь азьло огшоры интернет-проект бордысен. Но ӝоген сокем будӥз — Президентлэн грантъёсъя фондысьтыз коньдон утӥз, Ижкарысь гинэ ӧвӧл, ёросъёсысь, мукет республикаосысь анай-атайёсты вырӟытӥз. Кенешиськом «Билингваез» валтӥсен, К. Герд нимо гимназилэн кивалтӥсеныз Татьяна Волковаен.

Городысь удмурт нылпиосты огазеяз «Билингва»

— Татьяна Геннадьевна, тӥ гинэ тодӥськоды, вылды, макем трос лулкужым кулэ вал анай-атайёсты «Билингва» котыре огазеян понна…

— «Билингва» проектэз азинтонлы зэмзэ но туж трос кужым понэмын. Проект пичиен-пичиен будӥз. Нырысь Интернетын кылдӥз сайт. Отысь шедьтыны луэ вал пиналэз огдыре ик 2 кыллы дышетонлы сӥзем ужъёсты но тодосчиослэсь та ласянь эскеронъёссэс. Но сайт кылдытыкумы ик, ми валаськом ни вал: проект улоз соку гинэ, куке со тунсыко луоз анай-атайёслы, дышетӥсьёслы. Озьыен, одно ик лыдэ басьтоно, нош мар соосты шугъяськытэ? «Билингва» будӥз но паськытаз, анай-атайёслэсь мылкыдзэс, дэмланъёссэс лыдэ басьтыса.

Нырысь ик ми семинаръёс ортчытъяны кутским. Валэктыны тыршим: мар со кыккылолык (билингвизм), мар бордын аспӧртэмлыкез, кыӵе шуг-секытъёс кылдыны быгато но кызьы соосын нюръяськоно. Кык кылын вераськись нылпи кылъёсты сура ке, мар кароно? Кышкано-а талэсь, ӧвӧл-а?

Дышетӥсьёслэсь, анай-атайёслэсь мылкыдзэс лыдэ басьтыса, выжимы котрес ӝӧкъёсты радъян борды. Угось котькуд семьялэн нылпиосты анай кыллы дышетонъя аслаз амалъёсыз, дэмланъёсыз вань. Кин ке уг вала, кызьы секыт югдурысь потыны, нош мукет семьяын валэктон шедьтӥзы ни, опытсы вань.

Тани, шуом, Шаркан ёросысь удмурт нылаш Лариса Широбокова Италие быземын, картэз итальянец. Но пиналзэс соос огдыре ик кӧня ке кыллы дышето, удмуртэзлы но. Одӥгаз семинарамы Лариса туж тунсыко мадиз, кызьы Европаын пиналъёс кӧня ке кылэз тодыса будо, мар ласянь соослэсь адӟем карыны луысал.

Таӵе семинаръёс пыр Ижкарысь анай-атайёс огазеяськыны кутскизы.

Туж умой соиз но: семинаръёсамы ми пӧртэм выжыысь семьяосты ӧтчаны кутским. Кызьы анай кылзэс утё шаерамы вуэм мукет кунъёсысь калыкъёс: армянъёс, азербайджанъёс, немецъёс?.. Мар юрттэ соослы анай кылзэс возьыны? Соослэн мадемъёссы милемлы туж дуно. Со семинаръёс бере одӥгез удмурт анай шуиз: мукет калыкъёс азьын, пе, возьыт, удмурт кылмес утьыны сомында луонлыкъёс вань вылысь, пиналъёсмес вордскем кыллы дышетыны ум быгатӥське. Табере, пе, одно ик нылпиосыным удмурт сямен верасько.

Тӥни озьы та пумиськонъёс куд-ог семьяос понна нялтас пельтӥсь тӧл, аспӧртэм катализатор выллем луизы. Уноез валазы: пиналэз анай кыллы дышетон — со уж, нокин но, палэнысь лыктыса, со ужез уз лэсьты.

Туннэ нуналлы «Билингвалэн» бурд улаз 18 семинар ортчытэмын ни.

— Анай кылэн герӟаськем тросэз пумиськонъёс кыл котырын ик бергало. Нош тӥляд семинаръёсты темазыя туж пӧртэмесь вал, малы?

— Билингвизм — со 2 кылын вераськон гинэ ӧвӧл. Соин ик нылпиосты будэтонъя пӧртэм ужпумъёсты эскерим. Кылсярысь, одӥгаз семинарын Франсуаза Дольто психологлэн книгаосыз сярысь вераськимы. Кызьы пичи нылпиез гажаса, луэ кылэз яратон мылкыд пыӵатыны. Пинал уг вордӥськы ук сыӵе малпанэн: таиз кыл умой, соиз — урод. Ойдо мон верасько та кылын, нош таиныз уг вераськы. Нылпи, нырысь ик, шӧдэ анай-атайлэсь мылкыдзэ, со адӟе, ачиз анай-атай гажа-а кылзэ, макем гажа, кызьы со кусып возе аслаз анаеныз, эшъёсыныз. Улонлы пинал дышетске, мумиз-бубиз шоры учкыса. Куке семьяын ог-огдэ но анай кылдэ гажан вань, со шӧдӥське адямилэн дунне шоры учконаз но.

— Анай-атайёсын кенешон пыр ик «Билингва» проектлэн бурд улаз кылдӥз «Нуныкай» проект. Кызьы тазэ дунъяськоды?

— Семинаръёсын милям котьку но 2 площадка ужалляз. Одӥгез — анай-атайёс понна, мукетыз — нылпиослы. Анай-атайёслы лекциос лыдӟо психологъёс, лингвистъёс, логопед. Нош нылпиос понна со вискын удмурт занятиос ортчо, удмурт кыллы дышетскон мынэ шудон, киужен вырон, эктон, кырӟан пыр.

Семинаръёсы ветлӥсь анай-атайёс ик вазиськизы: толэзяз огпол гинэ пумиськон туж ӧжыт, нылпиос ог-огзылэсь но, визьнодасьёссылэсь но мӧзмо. Ма кароно? Тӥни озьы вордӥськиз «Нуныкай» проект. Со понна туж тау «Удмурт Кенеш» огазеяськонлы. Солэн нимыныз ми пыриськимы Ижкарлэн проектъёсъя конкурсаз. Озьы нылпиослы чаклам «Нуныкай» клублэсь занятиоссэ ортчытъяны коньдон шедьтӥмы. занятиосмы 4 ӧръя радъяськизы: творчество, кылэз волятон, шудонъёс, крезьгур. Вань занятиос чылк-чылк удмурт кылын гинэ мынӥзы. Визьнодасьёс куспазы азьвыл ик кенешизы, кыӵе темая удмурт кылъёсты таяз пумиськонэ дышетозы, со кылъёсты вань 4 занятиосын ик кутылӥзы. Озьы нылпиос, асьсэос но валатэк, выль кылъёсты дышетӥзы.

Куддыръя озьы луэ: анай семинарысь потӥз, пиналзэ эскерыны мынӥз. Нош пинал анайзэ адӟиз но, солы ӟуч сямен вазиське ни, анай но солы ӟуч сямен вера. Соин ми котьку шуиськом: пиналэз вордскем кыллы дышетыку, анай-атайёс но визьнодасьёс огкылысь луыны кулэ, пиналзы удмурт кылын мед вераськоз шуыса, арняяз огпол ортчись занятиос гинэ уз тырме, дорады но удмурт сямен вераськыны тырше.

— Ар талэсь азьвыл югдур тодам на: «Нуныкай» проект йылпумъяське ни, анай-атайёс сюлмасько: нош азьланяз мар? Дась-а соос, коньдон тырыса, пиналъёссэс удмурт кыллы дышетыны. Тӥни соку туж бадӟым уж лэсьтӥды: «Билингва» прект но солэн бурд улаз ужась «Нуныкай» Россилэн Президентэзлэсь грантсэ утӥз.

— Та вал туж бадӟым шумпотон! Со понна тау Нациосын ужан политикая министерстволы, «Удмурт Кенеш» огазеяськонлы, ваньмызлы, кин кужым сётӥз но проектэз шонер гожтыны-дасяны юрттӥз. Быдэс ар ӵоже «Билингва» Россилэн Президентэзлэн грантэзъя ужаз, со трослы бадӟымгес тубат йылэ тубиз кадь. Азьвыл люкам опытмы, ужъёсмы паськытазы, трос вылез кылдӥз. Кылсярысь, «Нуныкай» проектлэн бурд улаз эшшо 2 ӧр усьтӥмы: эктон но театр. Нылпиос пӧлын удмурт кыллы сӥзем пӧртэм конкурсъёс радъямы: «Билингва ТВ», «Ӵужанае доры сюрес», «5 дуно кылъёс» но трос мукетыз. Ортчытъямы пӧртэм праздникъёс — Выль ар, Нылпиослэн нуналзы — вань шулдыръяськонъёс удмурт кылын мынӥзы, туж юрттӥськизы асьсэос но анай-атайёс.

— Ар ортчиз огшокчем кадь. Туэ Президентлэн грантэзъя пыӵась «Билингва» проект йылпумъяське. Нош ик юан: мар азьланяз?

— Проект улоз. Но кызьы со азинскоз, кыӵе сюресъя — али малпаськиськом на.

Котькуд проектлэн валтӥсь ужпумез — проект йылпумъяськем бераз но мед улоз, солэн удъёсыз, выжыосыз котыр мед вӧлскозы. Ми адӟиськом: «Билингвалэн» пазьгем кидысъёсыз отын-татын ӝужало ни. Городысь анай-атайёс кинэ ке возьмаса уг уло, семьяосынызы пумиськыло, удмурт сямен верасько, ог-огенызы кусып возё «ВКонтактеысь» «Нуныкай» но мукет группаос пыр.

Мон вань сюлмысьтым тау карисько ваньмызлы, кин та проектэз ӝутыны, вӧлмытыны юрттӥз, кин нуналмысь адскисьтэм ужез лэсьтӥз. Ми зэмзэ но туж бадӟым ужез вормим. Туннэ нуналлы «Билингва» пыр потӥз 200-лэсь трос семья. Милесьтым адӟем каро ни мукет улосъёсын но. «Билингва» проектэн тодматыны курыса, ӧтчазы Коми Республикае. Ужмылы туж синмаськизы. Табере Сыктывкарын но анай кылзэс дышетыны мылкыд карись нылпиос понна «Нуныкай» выллем клубзы вань — «Кыв поз» («Кыл кар»).

Малпасько, азьланяз «Билингва» потоз шаерысьтымы ёросъёсы. Тросэз потэ мыло-кыдо, югдурез ӟеч пала воштыны тыршись, огъя уж понна сюлмынызы висись адямиос бордысь. Мон оскисько, сыӵе адямиос вань но луозы. Туэ ар понна «Билингва» проект йылпумъянъёс лэсьтэ ни ке но, Ижкарысь удмурт нылпиос понна Выль ар праздник одно ик ортчоз. 

Бам поттэмын «Билингва. О практиках формирования двуязычия в современной городской среде» проект чотын. Проект улонэ пыӵа Россиысь Президентлэн грантъёсъя фондэз но Удмуртиысь Нациосын ужан политикая министерство юрттэмъя.

Елена Миннигараева

Туспуктӥз В. Вахрушев

Удмурт Дунне
By Удмурт Дунне Декабрь 7, 2018 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<