Буйгатӥсьсы — Ита шур

Ангелина Снигирева
By Ангелина Снигирева Декабрь 5, 2018 16:22

Дэбес ёросысь Орехи удмурт гурт ноку бадӟым ӧй вал. Тужгес шулдыр вакытаз татын 12 юртъер сяна сылымтэ. Туннэ 2 коркан асьсэ колодчаысьтызы ӝутэм вуысь чай быректыто — мукет ву уд шедьты. Та юртъёсысь семьяос матысь родняос луо.

Гурт пумен бушаз
Сюрес дуре, Ита шур котырысь чебер интыослы синмаськыса, пашпумульы писпуос пӧлы 1930-тӥ аръёсы удмуртъёс выжы лэзёно кариськизы. Гуртсэс, трос мульы шуыса, Орехово нимазы. Куспазы сое Орехи шуо. Туннэ но отысь трос мульы окто. Куакъёссэ кин но, кыӵе но ёросэ ӧз выжыятэ ни. Калыкез та гуртысь уг бырылы. Ита шур налим, чипей чорыгъёсын узыр бере, толэн-гужемен визнало. Гурезь бамалъёсын борыясез но лачак луэ. Соин но гурезетӥ Ита шур дуре сик пыр васькись сюресэз Надежда но Виталий Иванов кузпалъёс гужембыт турнаса возё, нош толалтэ — сузяса: асьсэлы но, калыклы но озьы сюресэз волято.

— Ми Орехиын 4 кузя гинэ улӥськомы. Огаз коркан — Пётр Николаевич атае, мукетаз — ми хозяйкаеным но пиеным, — шуэ Виталий Петрович. — Азьвыл семьямы бадӟымгес вал. Но нылмы Сарапул пала бызиз. Нош анаелэн ар пала ни кулэмез. Берло дыре татын трос луизы кулӥсьёс но, гуртысь кошкисьёс но. Огез бускельмы али нылыз доры улыны выжиз — ассэ но, юртъерзэ но воземез ӧз луы ни. Шимесгес ик: али гинэ ульчалэн мыд-мыд палаз тыл пиштылӥз, табере шоре учко тём-тём бадӟым укноос. Ачим татын будэмын, анай-атай но татын уло бере, семьяме артысь Четкер гуртысь татчы васькытӥ, корка пуктӥм, калык рад скал басьтӥм. Четкерын местаез урод вал — музъемез мерттӥськыны кот. Нош татын бакчамы кӧс но вӧл-вӧл. Гурт пересьме шуыса, малы ке соку ӧм ик малпаське.
Виталий Иванов пичи дыръя татын ветыл, вал, ыж, парсь вордылӥзы. Меӵ гурезь улысь Ита шурысь пудоез люктаны ву бекчеосын толэн-гужемен тубытъязы. Тапалан угось водопровод ноку ӧй вал, уз но луы ни. Вуж Кыч гурт поселениен кивалтӥсь Нэля Коробова пусъемъя, сельсоветысь 10 гуртъёс пӧлысь 2 гуртын гинэ — Орехи но Шуралуд — колодчаысь ву юо. Вулы ёрмеменызы ик, скал вордэмлэсь но куштӥськизы.

Кинлы кулэ музъем

— 1983-тӥ арын монэ Афганистанэ келякузы, гуртын калык вал на, — тодаз вае Виталий Иванов. — Сӧсырмыса бертӥ но (кӧт пыртӥм пуля потӥз, туж кема госпитальын эмъяськи), гурт туж шимес потӥз. Ферма бервылъёс копаса ик поттамын вал ук. Калыкез но гуртысь кин городэ кошкем, кин Четкере улыны тубем. Отын коть школа но, магазин но вань. Ми но кузпалэным Четкерын кӧня ке улӥм.

В. Иванов

— Ву ӧвӧлэн но тросэз Орехиысь кошкизы, — бордаз итӥське Надежда Владимировна. — Кӧс сӥзьыл куазен но, толалтэ но колодчаысь ву бырылэ. Ми егитэсьгес бере, ву трос быдтӥськомы. Мунчое но пырем потэ. Мисьтаськоно но луэ. Ярам, нылы нодъяз мисьтаськон машина басьтыны, тырмоз, пе, колодчаысь вуэн кидэ кынтыны. Азьло малпасько вал, автомат машинаез водопроводысь вуэн гинэ ужатыны луэ шуыса. Нош машина бордын ву понон бачокез вузаське вылэм.
Ивановъёс тылобурдо, муш вордо, бакча возё. Гужем уж пӧлы выйыса, мӧзмыны дырзы ик ӧвӧл. Со сяна, одӥг гинэ вакчи ульчазэс утялтыны, турнаны дыр шедьтоно на. Сыӵе дыръя Виталий Иванов мотоблоксэ поттэ но быдэс гурт кузя ортче. Юрт бервылъёссы но, музъемзы но угось кузёоссылэн нылпиоссылы кулэ ӧвӧл ни. Корка азьёсты ӧд турна ке, гурт уката шимес адӟиськоз шуыса, Виталий Петрович ачиз ик турнаса ветлэ. Куд-огезлэсь куашкась кенерзэ но ӝутэ-пыкъя.

— Кинлы татысь музъемез кулэ луоз на? — шуэ Надежда Владимировна. — Пиналъёслэн гуртэ бертэмзы но уг луы. Куарето, малы татын улӥськоды на шуыса. Ӧжытак зоре гинэ — гуртэ пырыны но, потыны но уг луы ни. Нянь гинэ но ваемзы уг луы. Татчы «скорой» но дэриен уз вуы. Но кытчы шуак кошкод? Нылмы пала Сарапул ёросэ кариськы вал, но атаймылэн нокытчы вырӟемез уг поты. Татын улӥ, татын ик куло, шуэ. Солы 78 арес ни, инсульт бере. Сое огназэ нокызьы уд кельты. Юртмы но выль ай — жаль кельтыны.

Байгурезьзы асьсэлэн
Надежда Владимировна — гуртын огназ кышомурт. Одӥг коть ми кадь арлыдо семья гуртын луысал ке, улондэ ул вал, кинэн вераськыны коть луысал, шуэ. Куное но, пе, ог-огмы доры ветлысалмы, узы-боры ӵош октысалмы, ӝыт юмшаны потасалмы. Ужасал ке, калык пӧлын сюлэмы, оло, сокем ӧй мӧзмысал. Кылем арын Четкер школаын дышетӥсьёсты кулэстӥзы. Котырысь гуртъёсын нылпиос ичи кылемен, основной школазэс начальной кельтӥзы. Надежда Иванова математикаен, физикаен дышетылӥз, завуч вал. Ачиз со Кез кемысь татчы быземын. Солы 52 арес. Кузпалыз школаын ужа. Мужиксэ нуналлы быдэ сюрес вылэ келякуз, сюлэмыз вырӟе.
Гуртамы юбоын тыл коть вань, шуо кузпалъёс, сотэк эшшо но шимес луысал. Сельсовет сюресэз но толалтэ сузя.

Н. Иванова

— Лампазы сутске ке, соку ик воштӥськомы, — шуэ Нэля Коробова. — Чаклатэк уг луы. Гурт пичи ке но, татын но адямиос уло ук.
Ульча шоразы юнматэм таксофонзэс но ялан эскерыло. Но соин жингыръясь уг шедьылы — сотовой умой кутэ. Телевизор но спутник пыр учко. Газлы ке шат вожъясько. Татын угось пуэн эстӥсько. Гуртазы котькуд лыктӥсез роднязэс кадь пумитало, сьӧраз одно ик чечызэс салам келяло. Тани редакцие но кузьым лэзизы. Кузпалъёс куноосты одно ик васькытъяло Ита шурзы дуре. Милям асьмелэн Байгурезьмы вань, шуо. Зэмен ик, шурлэн ярдуръёсыз ӝужытэсь!

— Мужике дыр шедьтэ ке, татчы гинэ ваське — куддыр гурт но кулэ ӧвӧл. Солы ӵемысь шуисько: тон гармонист луысал ке, мон ӝытлы быдэ кырӟасал. Кыӵе кырӟам потэ! Та улонын номыр но кулэ ӧвӧл ни кадь.

Елена Сараматова

Туспуктэмез авторлэн

Ангелина Снигирева
By Ангелина Снигирева Декабрь 5, 2018 16:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<