Бесерманъёслэн улэп энциклопедизы

Ангелина Снигирева
By Ангелина Снигирева Декабрь 5, 2018 16:13

Дэмласьком «Гурт адями» конкурслэн «Ӟеч сюлэм» номинацияз Балезино ёросысь Юнды гуртысь сабырлы удмурт кышномуртэз Ангелина Петровна Урасиноваез. Быдэс улонзэ дышетонлы, югдытонлы сӥзиз, трос кужымзэ понӥз бесерман калыклэсь культуразэ утёнлы но азинтонлы, солэн сюлмаськеменыз Юнды гуртын нимысьтыз музей усьтэмын.

Ми Ангелина Петровнаен одӥг гуртысь — Балезино ёросысь Поторочиноысь (али со быремын ни). Но солэн сюлмаськемезъя котькуд ар пумиськиськом вордӥськем кӧкыямы.

Та адӟем карымон кышномурт вань улонзэ удмурт кылэз дышетонлы, нылпиосты визьноданлы, калыкез югдытонлы кузьмаз. Солэн ӵош ужась эшъёсыз тодазы ваё, Ангелина Петровна пиналъёсты ялан маин ке паймытъяны, вылез борды кыстӥськытыны тыршылӥз шуыса. Солэн визь погъёсыз олимпиадаосы, конкурсъёсы, пӧртэм ужрадъёсы пыриськылӥзы, вормонъёс басьтылӥзы. Адӟем карымон кышномурт луиз дышетон удысысь отличник, ужысь ветеран, Удмурт Элькунысь культура удысысь дано ужась но трос мукет данъетъёс басьтӥз.

Ангелина Петровна трос кужымзэ сётӥз бесерман калыклэсь культуразэ, сям-йылолъёссэ утён понна. Одӥг пол со гуртысьтызы пересьёслэсь шайвылысен кырӟамзэc кылэм. Макем чебер куараоссы, пе, магнитофонэ гожтоно, малпам. Озьы 1980-тӥ арын Юндыын ансамбль кылдытӥз. Ангелина Петровна сюлмаськемъя гуртоослэсь люкамын но гожтэмын 10 бесерман гуръёс. Кырӟась коллектив кытчы гинэ ӧз вуылы, быгатӥсь луэменызы, чебер куараосынызы трос калыкез синмаськытӥзы. Али Ангелина Петровналэсь кутскем ужзэ Юндыысь клубын ужасьёс азинто ни.

Мыло-кыдо кышномуртлэн сюлмаськемезъя Юндыын бесерман калыклы сӥзем нимысьтыз музей усьтэмын. Нырысь-валысь сое школа музей шуыса кылдытӥзы, дышетскисьёсын ӵош артысь гуртъёстӥ вашкала арбериосты бичаса ветлӥзы. Со музей кылдытэм дырысен 28 ар ортчиз ини. Мае но уд адӟы-тоды отысь — гуртлэсь историзэ, бесерман калыклэсь сям-йылолъёссэ, Юндыысь нимаз адямиослэсь улэм-вылэмзэс. Кылсярысь, А. Урасинова трос материал люказ дышетӥсь, гуртысь удмурт кылын нырысетӥ спектакль пуктӥсь Анисья Урасинова (Волкова) сярысь. Та нылкышно 1918-тӥ арын ортчем вань удмуртъёслэн нырысетӥ ӧтчамазы пыриськем. Ангелина Петровна али аслыз кивоштӥсь шедьтӥз ини, но музей ужлэсь палэнэ уг кыльы. Сое азинтон пумысен трос малпанъёсыз бергало на — стендъёсты выльдоно, пересьёслэсь юалляськоно на, Юнды сярысь книга поттоно.

Туэ 15-тӥ куарусёнэ Ангелина Петровна 80 арессэ тырмытӥз. Но, арлыд люкаса но, со гань-гань улонэз уг вала. Азьвыл но, али но ми, балезиноос, со шоры паймыса учкиськом: мыло-кыдо, котькытчы вутскись, котьмаин тунсыкъяськись, котькинэн кыл шедьтыны быгатӥсь, кибашлы, ужез яратӥсь, визьмо, лякыт сюлмо, чупрес, ӟеч анай но песянай. Со паймытэ аслаз лулкужыменыз, пуксисьтэм мылкыдыныз. Со котьку дась ваньмызлы — ӵыжы-выжыезлы, бускелезлы, гуртысь калыкезлы — визь-кенешен но ужен юрттӥськыны. Ангелина Петровна куно пумитаны быгатэ, ческыт пыжиськеменыз утялтэ. Со сярысь ваньзэ вераса но уд быдты. Та кышномуртлэн сыӵе ини сямыз — «уг» шуонэз уг вала: быгатэ-а, уг-а, кутске но — лэсьтэ.

А. Урасинова газет-журналъёсын кусып возе, гожтэмъёсыз печатласько «Иднакар», «Удмурт дунне», «Вперёд» газетъёсын. «Вперёд» ёрос газетын ужась Ю. Шмелёва Ангелина Петровнаез ёрослэн дано муртэз шуэ. Соин вераськыку, пальпотытэк уг луы, солэн улон шоры капчи мылкыдын учкемез мылкыдэз ӝутэ, пе. Поторочиноысь потэм калык со сярысь гажаса шуэ: Ангелина Петровна бырем гуртмылэн улэп энциклопедиез. Гуртлэсь выжы писпузэ но кылдытэм. Табере поторочиноос отысь ӵыжы-выжызэс шедьытыны быгато. Мыло-кыдо кышномуртлэн бырем гурт сярысь люкам материалъёсыз утисько Турецкое гуртлэн библиотекаяз.

Ангелина Петровна пӧртэм конференциосы пыриськылэ, архивъёсын бугыръяське, Юнды гуртэ лыктэм куноосты пумиталля. Туэ тулыспалэ со вордскем Поторочино гуртэз сярысь «Вордӥськем гуртэ — кӧкые (Поторочино)» книгазэ поттӥз. Отчы пыртэмын гуртлэн пӧртэм аръёсы улэм-вылэмез, аслаз А. Урасиновалэн тодэ ваёнъёсыз. Турецкое библиотекаын книгаен тодматскон ортчиз. Ангелина Петровна гуртэз сярысь аслэсьтыз чуръёссэ лыдӟиз.

Улонзэ Ангелина Петровна герӟаз Юнды гуртысь бесерман воргоронэн Гай Варсанофьевичен. Ӵошен соос будэтӥзы Коля но Вова пиоссэс. Владимир Гаевич ужа Юнда муниципал кылдытэтлэн йырыз луыса. Николай Гаевич бырйиз ожгарчилэсь удыссэ. Ангелина Петровналэсь кутскем ужзэ табере азинтэ внучкаез Ольга Урасинова. Егит кышномурт Москваысь венгер культурая центрын ужа, шоркарысь удмуртъёс пӧлын удмурт но бесерман культураосты вӧлмытон понна сюлмаське.

Анна Наговицына. Балезино ёрос, Дядьпи гурт

Туспуктэмез Ксения Ворончихиналэн

Ангелина Снигирева
By Ангелина Снигирева Декабрь 5, 2018 16:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<