Удмурт кадь фин

Ангелина Снигирева
By Ангелина Снигирева Декабрь 21, 2018 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Удмурт кадь фин

Финляндиын вордскем Эса-Юсси САЛМИНЕНЭЗ удмуртъёслэсь висъяны секыт ни: 1997-тӥ арын Удмурт шаере нырысьсэ вуыса, со быдэс сюлмыныз-мылкыдыныз бурмиз кадь удмурт калык борды. Кема аръёс ӵоже ини со фин кыллы дышетэ Удмурт кун университетын. Эса-Юсси Салминен — фин-угор кылъёсъя одӥгез кужмо тодосчи, Финляндиысь Турку университетлэн докторантэз, философияя магистр. Тодэ но вольыт вераське 20 пӧртэм кылъёсын.

— Мыным воксё паймымон потэ: макем меда кыллы-калыклы синмаськоно, азинскем но номырлы ёрмисьтэм Финляндиысь Россилэн пыдлось сэрегаз выжемед мед потоз шуыса. Кытысь-марысь тодӥд удмуртъёс сярысь, кызьы улон сюресэд ми доры вуттӥз?

Бадӟым классъёсын дышетскыкум, фин кылъя но литературая дышетӥсьмы вакчияк гинэ мадиз Россиын улӥсь калыкъёс сярысь. Возьматӥз урал кылъёсъя писпуэз. Мукет огъёзъёсы сямен ик, мон но верамъёссэ, нокыӵе кариськытэк, кылзӥ. Нош бӧрысь со милемлы шуиз: адӟисько, та тема тӥледлы тунсыко уг поты, азьланяз уг мадьы ни. Нош дышетӥсьлэсь сяна, со вакытэ кытысь тодод ай кулэ луись иворез? Интернет ӧвӧл на, нош школаысь, шуом, удмуртъёс сярысь книгаез уд шедьты. Али валасько ни, дышетӥсьмылэн милемлы возьматэм кыл писпуэз но вужмемын вылэм ни. Отын хантыос но комиос пусъемын ай остякъёс, зырянъёс шуыса. Соку, конешно, мыным со тунсыко ӧз поты.

Гимназиез йылпумъякум ини, мылкыды ӝутскиз вордскем фин кылме эскерыны. Чакланы кутски, кыӵе кылъёс солы тужгес но матын. Нырысь тодматски эстон, саам кылъёсын. Нырысетӥез фин кыллы туж матын ке, кыкетӥез — кыдёкынгес. Нош кыӵе калыкъёс меда финъёсын одӥг выжыысь луо на? Озьы тунсыкъяськонэ монэ вуттӥз Россиысь фин-угоръёс дорозь. Бӧрысьгес мылкыды пуромиз кылъёссэс дышетыны. Но таиз борды басьтӥськи ни Турку университетэ пыреме бӧрсьы. Учконо ке, финно-угроведениея курсъёс соку, Туркуын сяна, усьтэмын вал на Хельсинкиысь университетын но. Но мон Туркуэз бырйи: вордскем интыелы матынгес, шоркарын сярысь, отын шыпытгес. Вылаз ик, Туркуысь университет одӥгез вашкалаез но нимо-даноез.

Лыдӟиськыны яратэ

— Нош семьяед, анай-атаед кызьы учкизы таӵе вамышед шоры?

— Семьяямы мон берпуметӥез, 6-тӥез, нылпи. Удмуртъёс верамъя, шумес пыдэс. Но монэ эркияса-нуныяса ӧз возе, агай-апайёсыным огкадь будэтӥзы.

Ааро нимо атаелэн тыро-пыдо дышетскемез ӧй вал, со будӥз-быдэсмиз пичигес черкогуртын. Семьяез пудо-живот вордонэн, бакча сиён будэтонэн выриз. Со вакытэ угось Финляндиын но, Россиын сямен ик, котькудӥзлэн дышетскыны луонлыкез ӧй вал. Нош Хилкка анае Лахти городлэсь кыдёкын ик ӧвӧл вордскемын но будэмын. Йылпумъямын со карысь ик нылъёслэсь гимназизэс, собере дышетскемын Хельсинки университетын фармацевтикалы. Анаелэн сузэръёсыз но дышетскыны пӧрмытӥзы: одӥгез Ювяскюля городын физик луыса тырше, мукетыз — училищеын лаборант.

Кинлы ке кылъёсты эскеронэн но выроно ук, соин ик фин-угор кылъёсын выреме пумысен анай-атаелэн мылкыдзы ӟеч вал. Жаляса верано, 2009-тӥ арын анае улонысь кошкиз. Атаелы али 85 арес, Шор Финляндиысь одӥгаз гурт поселениын улэ. Сое чакла-эскере агае.

Тунсыко потэ: атае мынэмын анае сьӧры. Семья кылдытыса, Лахти город дорысь Хейнола интые дугдӥллям. Атай тыршиз пулэсь арбериос лэсьтонъя огазеяськонын, анае фармацевт луыса ужаз. Озьы мон Хейнолаын вордскемын. Со Финляндилэн шораз интыяськемын, вераны луонтэм чебер интыын: нап-вож нюлэс, лапегесь гурезьёс, лыз тыос. Отын улӥ, 18 арес тырмытозям. Собере тӥни Туркуэ шонтӥ.

Туркуын тодон-валан люкай 4 ар ӵоже. Со вакытэ ик одӥг семестр ӵоже дышетски Венгриысь Сегед университетын. Отын рос-прос радъямын вал Россиысь фин-угор калыкъёслэн кылъёссылы дышетон. Нырысь басьтӥськи пор кыл борды, бӧрысь удмуртсэ дышетыны кутски. Та ужын туж юрттӥз удмурт профессор Валентин Кельмаков. Соку ик йырам кисьмаз Удмурт шаере одно ик вуылон сярысь малпан. Книгаос пыр гинэ угось кылэз дышетыны секыт но кема, нош калык пӧлы вуыса, ачид ик валатэк кылиськод выль кылын шатыр! вераськыны кутскемдэ.

Туркуысь университетын дышетсконме йылпумъяса, шонтӥ Хельсинкиысь университетэ. Отын кутскиз зэмос студент улон: кыӵе гинэ ужрадъёсы ӧй пыриськы! Эсьмаса, африка эктонъёслы но дышетски. Хельсинкиын ик тодӥ ни: Удмурт шаерез ас синмыным адӟо. Угось со вакытэ Хельсинкиысь но Удмуртиысь университетъёс куспын студентъёсын вошъяськонъя огкыл юнматэмын вал. Мынэсьтым азьло та программая нокинэ но Иже ысъяллямтэ на вылэм, та ласянь нырысетӥез луи. Озьы 1997-тӥ арын мон Иже вуи, удмурт кылэз дышетӥ одӥг семестр ӵоже. Удмурт кылме вакчи дыр куспын волятыны юрттӥз Удмурт кун университетысь дышетӥсь Раиса Шкляева.

Куноын телевидениын

Удмуртие нырысьсэ вуылэме бере улонэ пӧлэстӥськыса кадь кошкиз: 2001-тӥ-2002-тӥ арын стажёр луыса нош ик УдГУ-э вуи, 2003-тӥ арын Марий Элын улӥ, собере нош ик Удмуртиын, бӧрысь Финляндиын, нош ик Марий Элын, Ижын. Та вискын фин кыллы дышетӥ Румыниысь Трансильваниысь венгер студентъёсты но.

Со вакытэ ик басьтӥськи наука борды. Эскерыны кутски Россиысь улосъёсын, кылсярысь, Удмуртиын, Марий Элын, Мордовиын, Комиын, фин кыллы дышетонлэсь аспӧртэмлыкъёссэ. Валай, таизлы тужгес но ӟеч луонлыкъёс кылдытэмын Ижын но Саранскын гинэ. Со сяна, мылысь-кыдысь пыриськи кылъёсты дышетонъя калыккуспо гужем лагерьёсы. Соос Финляндиын но, Россиысь фин-угор улосъёсын но радъяськылӥзы. Егитъёсты фин кыллы дышетӥ, со куспын удмурт, ӟуч, пор, коми кылъёсты тодэмме муромытӥ.

— Нырысьсэ татчы вуылыкуд, кыӵеен тодад кылиз Удмурт шаер?

— Пайми, сотовой телефонъёс татын ӧй вал на. Финляндиын соос паськыт кутӥськизы ни. Чаклай: Удмуртиысь калыклэн маиз ке вань ке, со одно ик самой чеберез, самой дуноез луыны кулэ. Мынам вордскем кунам озьы ӧвӧл: адями ассэ тодыса улэ, муртлэн со шоры кызьы учкемез-дунъямез сое чик уг сюлмаськыты.

Со сяна, уг вунэтӥськы ни куасъёслы паймемме. Куасэн бызьылыны яратӥсько бере, син шорам йӧтӥзы, вылды. Финляндиын вал ни капчи но зол ширтӥсь пластик куасъёс, нош татын соос вал ай секыт пулэсь. Тани тол вуиз ни, ӝоген нош ик сюрес лёго Ижысь яратоно интыям — куасэн бызьылонъя Г. Кулакова нимо комплексэ.

Эшшо ке Ижын соку супермаркетъёс ӧй вал на. Магазинъёсын мар тыныд кулэ, ваньзэ вераса-валэктыса басьтоно. Но таизлэн умой палыз но вань: ӟуч кыллы ӝог дыши.

Мон пор кылэз но дышетӥ, трос пол вуылӥ Йошкар-Олае. Вуылэм гинэ ӧвӧл, Марий Элысь кун университетысь студентъёсты фин кыллы дышетӥ. Но мон шӧдэмъя, удмуртъёс финъёслы менталитетсыя матынгес. Поръёс мыным куддыр Россиысь калык ӧвӧл кадь пото, шундыпуксёнпал кунъёсысь кадь: соослэн мылкыдзы ӝог ӟырда, сое пушказы возьыны уг быгато, калыке потто. Соин но, лэся, пӧсекъямзы ӝог ортче. Туннэ кинэн ке ченгешизы ке, ӵуказеяз соос эшъёс ни. Нош удмуртъёс финъёс кадесь — небытэсьгес, лачмытэсьгес. Кыӵе ке малпанзы-кичӧлтонзы кылдӥз ке, сое пӧсекъятэк но малпаськыса быдэстыны тыршозы. Тазьы ужамлэн пайдаез, валамон, шӧдӥськытэк уг кыльы. Тазэ выжтыны луэ удмуртлык вылэ но: кыӵе гинэ проектъёс-кичӧлтонъёс уг пыӵало Удмурт шаерын, ваньмыз тунсыко но пайдаё пӧрме кадь потэ мыным. Поръёс, зэмзэ вераса, таиныз ушъяськыны уг быгато на.

Удмуртиын

— Нош туала вакытэз басьтоно ке, вордскем кунэдлэсь маке ласянь бере кылиськомы на-а кадь?

— Али пӧртэмлыкез чик ӧвӧл ни. Россия табере азинскемын, калыклы улыны ӟеч условиос кылдытэмын. Мон тани асме тодам вайисько: кыӵе ке кылэн тунсыкъяськыны кутскиськод, нош кулэ луись книгаос ки улад ӧвӧл. Нош али юрттэ Интернет. Табере кылэз дышетыны луонлыкъёс кылдытэмын, но уг тырмы мылкыд. Куддыр паймымон потэ, малы меда Россиысь калык уг тыршы мукет кылъёсты дышетыны. Ми, финъёс, кӧня ке кыл тодыса будӥськомы — со озьы ик луыны кулэ кадь. Мон азьланяз чакласько испан но латыш, литва кылъёсты дышетыны.

Тон 20 кылэз тодӥськод, соосын вольыт вераськыны но, лыдӟиськыны но быгатӥськод. Нылпиез пичиысеныз ик кӧня ке кыллы дышетыны тыршоно, дыр, озьы-а?

Школаын мон, фин кылэз сяна, дышетӥ швед, англи, немец но француз кылъёсты. Соосын вераськисько но, лыдӟиськисько но. Бӧрысь тӥни пӧлазы ватсаськизы на эшшо трос мукет кылъёс.

Нылпи кӧня ке кылэз тодыса будэ ке, туж умой. Солэн котыр дуннеез шӧдонэз но паськыт. Собере ваньмыз мылкыдыз бордысь потоз ни: я со та кылъёсты тодэмзэ муромытоз, яке учыр тупаку гинэ вераськоз. Озьы-а, тазьы-а, но кылъёсты тодон котьку пайдаен берытскоз. Мон тани, кыӵе ке кылэз дышетыкум, нуналаз 15 час но пукыны дась. Нош мукетыз 5 минут но уз чида. Ваньмыз потэ адямилэн мылкыдыз бордысь.

— Кылысь кылэ берыктон уж борды но басьтӥськид. Мар пӧрмытӥд ни та дырлы?

— Фин кылэ берыктӥсько удмурт, пор, коми, эрзя но мокша кылъёсын произведениосты. Озьы ог 7 ар талэсь азьло фин кылын потӥз фин-угор литературалы сӥзем «Volga» антология. Отчы пыризы мыным тужгес но кельшем произведениос. Отын лачак удмурт веросъёс.

Учконо ке, фин литература тросгес берыктэмын удмурт кылэ, нош удмуртэз финэ — ичи. Ма, нырысетӥез фин кылысь удмуртэ берыктэм произведение потэмын 1924-тӥ арын, нош фин кылысь удмуртэ берыктэмез — 1994-тӥ арын гинэ. Соин ик малпасько та удыслы вань кужымме-мылкыдме сётыны.

Пичи дыр

Фин кылэ берыктӥ ни уно удмурт произведениосты — соосын нимаз книга поттыны турттӥсько. Отчы пырозы, кылсярысь, Г. Верещагинлэн «Тукташ», К. Гердлэн «Матӥ», Г. Медведевлэн «Сютэм ар», К. Митрейлэн «Сурсву», Т. Архиповлэн «Одӥг пол приёмын», Л. Нянькиналэн «Лара», Д. Лелилэн «Арамаын арыкман», М. Векшиналэн «Шудон» но мукет произведениос — ваньмыз-ӧвӧлэз 37 авторъёслэн ужъёссы.

Туж тунсыко потэ калык эпосъёс бордын ужаны. 1986-тӥ арын ӟуч кылын поттэмын тодмо историкен М. Худяковен люкам удмурт батыръёс сярысь гожъямъёс. Соосты удмурт кылэ берыктӥз тодмо кылбурчи Д. Яшин. Нош 2004-тӥ арын солэсь пуштроссэ лыдӟисьлы эшшо но валамонгес кариз филология наукаосъя доктор В. Ванюшев. Озьы потӥз удмуртъёслэн «Дорвыжы» эпоссы. Мон соку ик сое фин кылэ берыктон борды басьтӥськи. Мыным юрттӥз тодмо фин кылбурчи Йорма Ваккури. Ар куспын быдэстӥ та ужез, книгаез чебертӥзы удмурт суредасьёслэн ужъёссы. Та эпос капчиен сётскиз. Юнме шуиллямтэ ук: финъёслэн но, удмуртъёслэн но эпосъёсазы трос огкадез. Огбыдӟаесьгес, пуштроссыя но тупась интыосыз ичи ӧвӧл, гожтэмын но со огкадь амалэн — четырёхстопной хореен.

Егит дыр

Фин кылэ берыктэм литератураез Финляндиын книгаен поттыны секытгес. Эстониын но Венгриын та ласянь лякытгес. Кылысь кылэ берыктэм произведениосты дасян-поттон но вӧлмытон понна кылдытэмын асьсэлэн книгапоттонниоссы. Та ласянь бадӟым уж нуизы но нуо эстон но венгер гожъясьёс-тодосчиос А. Валтон но Я. Пустаи. Нош Финляндиын кыӵе ке книга поттоно ке, вазиськоно асьсэ понназы ужась издательствоосы. Таосаз коньдон тросгес куро. Но фин кылэ берыктон удысме аналтыны уг малпаськы. Азьланяз чакласько Р. Валишинлэсь «Тӧл гурезь», М. Петровлэсь «Вуж Мултан», К. Митрейлэсь «Секыт зӥбет» романъёссэс берыктыны.

— Удмурт литература ас бордаз кыскыны быгатэ-а фин лыдӟисез?

— Финляндиысь калык лыдӟиськыны яратэ. Мон чакласа возисько, мар ӵектӥське отысь книга ӝажыосын. Куд-огзэ произведениосты лыдӟыса потӥськод но, йыре номыр уг кыльы, сюлмын номыр уг вырӟы. Мар сярысь гожтыны, малы дышетыны вырем автор — воксё валантэм. Мон шуысал, удмурт гожъямъёсын ӵошатыса, али финъёслы трослы уродгес литература ӵектӥське. Удмурт авторъёслэсь гожъямъёссэс соос тунсыко потыса лыдӟозы. Тани Тампере карысь университетысь лектор Сиркола Латомаа берыктэм произведениосты студентъёсызлы лыдӟыны мылкыд кариз. Азьланяз удмурт авторъёсын тодматскыны мылкыд карисьёс уногес луозы.

Финъёс тросгес мед тодысалзы удмуртъёс сярысь, одӥг выжыысь луэммы сярысь. Кӧня ке ар ӵоже ини кусып возисько «Alkukoti» изданиен. Отчы удмурт калык, солэн сям-йылолъёсыз сярысь статьяос гожъясько.

— Тон, оло, Удмурт шаере ик улыны кылёд ни? Шуиськод ук, удмуртъёс финъёсын огкадесь, ми пӧлын тыныд кельше…

— Татчы весяклы каръяськыны уг малпаськы, вордскем палъёсы бордазы зол кыско. Но кин шуиз, кунъёсмы вискысь иськемъёс эшъяськыны люкетозы шуыса. Тужгес но туала вакытэ. Вылаз ик, быдэсмиз льӧль малпанэ: 2012-тӥ арын мынам кылдӥз ты дурын улыно-вылыно коркае. Со Финляндилэн шор люкетысьтыз Варпумяки гуртэ пуксемын, отын туж шулдыр инкуазь. Эшшо мынам 2 пуные вань. Соос Лапландиын пужейёсты возьманы тупась выжыысь. Но али соос Эстоние, эше доры, келямын. Нош ты дурысь коркаме эскерыса возё бускельёсы.

Вуоно арын Ижын ик азинтыны малпасько кылысь кылэ берыктон но фин кыллы дышетон ужме. Но со понна визаез но нуйтоно, коньдон но шедьтоно. Грантъёсъя конкурсэ куриськонме ыстӥ. Озьы, грант сётӥзы ке, ужало яке Удмуртиын, яке Мордовиын. Ӧз пӧрмы ке, Суоми палъёсы берытсконо луоз.

— Шуид вал: атаед анаед сьӧры лыктэм. Нош тон кызьы лыдъяськод — кин кинэ валтыны кулэ?

— Монъя кышномурт пиосмурт сьӧры мыныны кулэ. Семья сярысь малпатэк уг улӥськы. Но удмурт-а кузпалы луоз, пор-а, фин-а — мон уг тодӥськы. Но али ик вераны быгатӥсько: мон Финляндиын уло.

Елена Никитина

Ангелина Снигирева
By Ангелина Снигирева Декабрь 21, 2018 14:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<