Мон татын токма ӧй вордӥськы!

Ангелина Снигирева
By Ангелина Снигирева Декабрь 26, 2018 12:27

Туала вакытэ егитъёс гуртэ выжыяськыны сокем уг дырто. Дэбес ёросысь Четкер гуртысь Илья Шкляев та ласянь йӧспӧртэм. Пӧртэм шуг-секытъёс кылдо ке но, со оске: вордӥськем гуртсэ ӝутыны, азинтыны быгатоз. Сотэк, пе, малы мон та музъем вылын вордӥськи?

— Куазь жобаськыку, шуо, гуртад пырыны но уг луы, егитъёс кошко. Сыӵе гуртэз ӝутыны луоз на-а?

Мон оскисько, луоз шуыса. Котькуд гуртын адямиос уло ук, ӵуказе нуналлы оско, иське. Мон та гуртын будӥ, армие кошки. Собере гурт удысъя академиын нюлэс хозяйствоя инженере дышетски. Туэ магистратурае пыри на. Огвакытэ ик Данёгурт (Старый Кыч) поселениын егитъёсын ужанъя специалист луисько. Гуртысь егитъёсты вырӟытыны, пӧртэм ужрадъёс ортчытъяны вырисько. Малпасько на аслэсьтым ужме кутскыны, хозяйство кылдытыны. Солы мон, бакалавриатын дышетскыкум ик, дасяськи ни. Стипендиме люкаса, пичиен-пичиен басьяй техника, пудо (скалъёс, порозъёс…). Али хозяйствоме атай юртам ик люкасько, собере нимаз кариськыны малпасько. Вуоно арысен мушъёсын выро на. Бен, аслэсьтым ужме кутскон понна шуг-секытъёс вань на. Озьы пӧрмиз: гуртмылэсь музъемъёссэ вазенгес ик ини палэнысь лыктэм адями басьтӥз. Тросэз гуртоос солы ас пайёссэс сётӥзы. Нош милям (анай-атай, песянай-песятай) пайёсмес сётэммы ӧз поты. Атае палэнысь лыктэм муртэн ваче вуиз. Со ваче вуэмен сэрен ик Иже кошконо луиз, 10 ар пала отын улӥз, ужаз. Нош мон бабуше вӧзын будӥ, вань гурт ужез валаса-тодыса, гурт школае ветлыса.

Али атае вордӥськем гуртамы бертӥз, котьма мед луоз но, аслад музъемед кыске ук. Но пайёсмес берыктон понна нюръяськоно луиськом на.

Мон шуг-секытъёслэсь уг кышкаськы. Армиын службаме ортчыкум, лейтенантмы Кировысь вал, удмурт сямен тодылӥз. Паймыса вералляз: тон, пе, удмурт ӧвӧл, дыр, удмуртъёс кылзылэсь возьдасько, нош тон туж сэзь. Шуисько вал, мон, пӧй, уйпал удмурт, ми отын сыӵеесь…

— Шаплы луэмед шӧдӥське: Четкерын ёрос ужрадъёс ортчытъяны кутскемед ни, шуо…

— Туж гажасько спортэз. Гуртамы асьмелэн футболэн шудонъя командамы вань. Огпол выныным малпам: ойдо Четкерын ёрос ӵошатскон ортчытом. Футбол сеткаос, кубокъёс, грамотаос ас коньдонэнымы басьтӥмы. Ёросамы та ужрад сярысь ялӥмы, мылкыд карисьёсты курим заявка азьлапал келяны, жингыртыны. Но гуртамы связь урод бере, адямиос жингыртыны быгатӥллямтэ. Ма, зор бере сюресъёс но татын туж уродэсь, гуртэ пырыны секыт. Малпам вал, калык уз луы, нош футбол бусыямы лыктӥськом но… 5-6 команда вите ни. Шумпотӥ. Шуисько: таӵе урод сюресэтӥ но вуиды. Нош соос шуо: футболэн шудыны, пе, сюрес урод уг луы. Кинлэн сюлмыз спортэн ӝуа, со коньдон но, инты но, дыр но шедьтэ. Гуртъёсысь гинэ ӧвӧл, ӵошатсконамы райцентрысь, Дэбесысь но, 2 команда вуиз. Вуоно аре но, пе, таӵе ӵошатскон лэсьтэ на. Табере малпасько, вуоно арын, оло, 2-3 пумиськон ортчытом ай.

— Нош мукет ёросысь вуизы ке?

— Ми соосты но пумитаны дась ини. Бен, туэ Шаркан ёросысь команда куриське вал, но милям палэнысь куноосты пумитаны опытмы ӧй вал на, соин ик пумит луим. Нош туэ ӵошатскон ортчытэммы бере валам: бадӟымгес ужрадэз но берыктыны быгатом. Туж тау кареме потэ поселенимылэн йырызлы Нэля Коробовалы. Со юрттӥз калыкез сюдыны, шаньги-чай басьтыны коньдон висъяз, эшшо одӥг кубок басьтӥз. Мукет гуртъёсысь командаос тау карыса кошкизы: туж, пе, ӟеч куно луим.

Милям дась ини спортэн герӟаськем выль проектмы. Гуртамы волейболэн, футболэн шудонъя умой-умой площадкаос лэсьтысалмы. Куд-огез пайме, тӥ палан гуртъёс быро ни кадь но, кытысь сомында егитъёсты шедьтӥськод на шуыса. Но, тодӥськоды-а, егитъёс ичи ӧвӧл ук, соос городъёсы гинэ кошкемын. Гуртын уж ӧвӧл. Но кыӵе ке ужрад сярысь вераськод, ӝутъяськод ке, бертыны выро. Мынам футболъя командае — со школаын ӵош дышетскем эшъёсы. Кулэ дыръяз соос котькытысь вуозы. Ижын дышетскыкум, рукопашный бой шуонэн выри. Пӧртэм городъёсы ӵошатсконъёсы ветлылӥ. Али уггес ваньмиськы: нуназе ужасько, ӝыт дышетскисько. Тол полиатлонын мон спортъя мастере кандидат. Россилэн кубокез понна Дэбесын гурезь бызьылонъёсы котьку пыриськисько, туэ отын 2-тӥ инты басьтӥ. Куасэн бызьылонъя, пыдын ӝог ветлонъя мынам нырысетӥ разряд.

— Кызьы ваньмаз вутскиськод? Семья но кылдытэмед ни…

— Кузпалы куддыръя спортлы пумит, монэ шер адӟылэ шуыса. Но мон одӥг интыям пукисько ке, улонэ токма ортче кадь потэ. Азьлань мынон — со улон. Кузпалы дышетсконзэ туэ гинэ йылпумъя ай, со агроэколог луоз. Четкере улыны интыяськом шуисько но, со пумит. Пока калык гуртэ ӧз берты, со татчы лыктыны дась ӧвӧл. Соин улон инты Дэбесэ басьтыны малпаськом, нош ужаны мон татчы, Четкере ик, ветло. Мон та музъем вылын токма ӧй вордӥськы. Инмар монэ татчы юнме ӧз вайы.

Студент дыръям ик мон машина басьтӥ вал. Маин? Стипендиен. Осконтэм кадь, но со озьы. Стипендие мынам ӟеч вал, ачим активной студент, эшшо стройотрядэн кивалтӥ. Бен, дышетскон вискам азбар утялтӥсьын (дворникын) ужай на, озьы машиналы люканы пӧрмытӥ. Собере, машинаме вузаса, сельхозтехника басьтӥ, 2 трактор, турнан арбери (косилка), усы, мажес, уробо. Вань та техникаеным али ачим ик ужасько.

Тодӥсько: куд-ог студентъёс дышетскон дыръязы ужаны уг дӥсьто, ваньмаз ум вутске, шуо. Но дырдэ валаса радъяськод ке, ваньмаз вутскыны, ваньзэ ӟеч лэсьтыны луэ.

Елена Панфилова

Ангелина Снигирева
By Ангелина Снигирева Декабрь 26, 2018 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<