Косыса ӧвӧл — тунсыко луыса!

Ангелина Снигирева
By Ангелина Снигирева Декабрь 25, 2018 15:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт кыллэн нуналыз, Удмуртилэн кунлыкезлы 100 ар тырмон, шаерамы тупаса улон но мукет сюлэмшугъяськытӥсь ужпумъёс сярысь кенешимы «Удмурт дуннелэн» редакцияз нациосын ужан политикая министрен Лариса БУРАНОВАЕН.

Л. Буранова

— Кемалась ӧвӧл «Удмурт Кенеш» огазеяськон ӵектэмъя кылдӥз выль дано нунал — табере 27-тӥ шуркынмонэ быдэс дуннеысь вань мылкыд карисьёс дэмен пусъёзы Удмурт кыллэсь нуналзэ. Юрттоз-а со кылмылэсь данзэ ӝутыны?

— Таӵе нуналъёс ноку мултэс уг луо, соос тодэ вайыто кыллэсь кулэлыксэ, калыкез огазеяны юртто. Но мынам вераме потэ: удмуртлыкмес данъяммы, вӧлмытэммы ке потэ, асьмеос сое вань мукетъёслэсь кык йырлы вылынгес карыны кулэ котьма ласянь — малпанэз бордысен кутскыса, котькуд чыры-пырыозь, дизайнзэ но вераса…

— Тӥ трос выриськоды социологиен — воштӥське-а берло аръёссэ мукет калыкъёслэн удмурт кыл шоры учконзы?

— 2000-тӥ арын удмурт кылэз школаосын одно дышетонлы дурбасьтӥллям 6 процентэз шаерамы улӥсьёс, нош 2016-тӥын — ӝыныезлэсь тросэз ни — 53,9 процентэз. Удмурт кылэз анай кылынызы лыдъяло но сое тодо 50 арессэс ортчемъёс но егитъёс, нош шоро-куспо арлыдъемъёс палэнско, со валамон — 1970-тӥ-1980-тӥ аръёсы Ижкарын удмурт кылэз кылыны уг луы вал, мон будыку, татын одӥг школаын но удмурт кылэз ӧз дышетэ… Но оглом югдур зэмзэ но ӟечоме. Туж шумпотымон, берло аръёссэ удмуртлыкез гажало вылӥ кивалтӥсьёс но, ёрос йыръёс но — бадӟым ужрадъёс ортчытон азьын ӵемысь асьсэос кыӵе ке удмурт кичӧлтонэн пото. Удмурт кыл чузъяськыны гинэ ӧвӧл, адӟиськыны ӧдъяз город ульчаосын. Мынам кемалась малпанэ вань ини котькуд ёросын удмурт кылъя «уполномоченной» юнматыны — со юрттысал кылъя югдурез син азьын возьыны но кивалтӥсьёслы юрттӥськыны.

Али удмурт кылъя туж валантэм югдур кылдэмын: со азинске городын, нош гуртын чалме… Шуо, нылпи сад ӟучомытэ. Шонерез вань, дыр. Малы чылк-чылк удмурт гуртын нылпи садъёсын воспитательёс ӟуч сямен гинэ верасько? Куд-огез шуэ, программаос ӧвӧл, мукетызлы озьы аслыз ужаны лякытгес потэ… Но программаосын яке кивалтӥсьёсын шугъяськонъёс вань ке, малы уд ивортӥське? Кӧня ужасько ни, министерствое одӥг ӝожтӥськон но ӧз вуы на, кытын ке удмурт кылэз дышетыны луонлык уг сёто яке юрттэт кулэ шуыса…

— Лариса Николаевна, кызьы тӥ, городын будыса, берытскиды анай кылды борды?

— Зэмзэ вераса, чылкыт вераськисько шуыны уг быгатӥськы. Удмурт кылэз тодыны юрттӥзы Алнаш ёросысь Асанын — егит дыръям мон отын ужай. Нош бӧрысь та удысам ужаны кутскеме бере кылэз дышетон борды пыр-почгес басьтӥськи. Нялтас вераса, соку курсъёс ӧй вал ай. Али котькуд мылкыд карисьлэн вань луонлыкез удмурт кылъя курсъёсы ветлыны — вольыт вераськыны, оло, уз дыше, но валан понна со туж ӟеч амал. Милям ужмы — калыклы луонлык кылдытыны, нош отӥыз ини ачиз адями бордысь потэ. Нялтас вераса, мон пумит кылэз школаосын кужмысь дышетонлы, малы ке шуоно озьы асьмеос, ӟеч карем интые, урод лэсьтыны быгатом. Та ласянь мыным туж кельше Святой Августинлэн веранэз: «…в изучении языка важнее свободная любознательность, чем грозная необходимость». Калыкмес, культурамес, кылмес мед гажалозы шуыса, асьмелы мукетъёс понна тунсыко луыны кулэ. Учке ай, кин котыре кыстӥсько пиналъёс школаын? Дышетӥсь борды. Пичи дыръязы соос уг валало на, мар тунсыкогес: физика-математика яке удмурт кыл, соос учко дышетӥсь шоры: чебер-а со, лякыт-а, визьмо-а… Соин ик удмурт кылъя дышетӥсьлы самой чебер но йӧно луыны кулэ, солэн урокъёсыз тужгес тунсыко мед ортчозы. Ӟуч сямен но чылкыт мед вераськоз, соку анай-атайёс валалозы: удмурт кыл уг люкеты мукетсэ но ӟеч тодыны. Озьы ик вань удысъёсын — асьмеос котыр ласянь синмаськымон луыны кулэ: быгатонлыкъёсынымы но, вылтусэнымы но. Та ласянь асьмелэн вань улэп примермы — Брангуртысь песянайёс. Соос Удмуртиын гинэ ӧвӧл, быдэс Россиысь культураын революция лэсьтӥзы. Соос ӧз ватэ асьсэлэсь выжызэс, ымнырзэс, соин данъяськыса, мукетъёсын оградэ султӥзы но вылэгес ӝутскизы.

— Удмуртиез котьку ӟечен пусъё калыкъёслэн эшлыко кусыпъёссы пумысен. Мае сыӵе дыръя лыдэ басьто эскерисьёс — туала Интернетэз учконо ке, ог-огдэ мыскыл карыны турттонъёс пальккаськыло ук…

— Бен, сыӵе учыръёс пумиськыло, ми сое чакласа возиськом. Ӵемысь со шӧдӥськыны кутске, куке шоркарын но мукет интыосын бугыръяськонъёс ӝутско. Сое возьматэ телевидение, Интернет, палэнын улӥсьёс «адӟем карыны» кутско, пачылась мылкыдзэс ӟеч уже ӧръям интые, асьсэлы дунтэм дан дуро. Жаляса верано, сыӵе учыръёс асьме дорын но пумиськыло. Ваньмыз потэ адямилэн культураез, дышетскемез бордысь. Туала законъёс сыӵе учыръёсты сак чаклало, вотэсын мукет выжы калыкысь адямиез ултӥямез озьы ик экстремизмен лыдъяло но суд улэ кыско. Кӧня ке адями кыл кутытэмын Удмуртиын но. Но кыӵе ке кышкыт ваче вуонъёс, жугиськонъёс асьме дорын ӧвӧл, медаз но луэ. Со понна ми трос ужаськом. Керетонъёс пото, куке адямиос уг валало ог-огзылэсь улон сямъёссэс, йылолъёссэс, культуразэс, тӥни соин ми тыршиськом тросгес валче ужрадъёс ортчытъяны, пӧртэм выжы калыкъёсын тодматыны. Инмар асьмеды пӧртэм кылдытэм ке, иське, озьы луыны кулэ, иське, ог-огмес воштыны турттытэк, тупаса-эшъяськыса улоно.

— 2020-тӥ арын асьмеос пусъёмы Удмуртимылэн кунлык басьтэмез дырысен 100 ар тырмонэз. Сое ортчытонъя проект дасямын тӥ кивалтэм улсын.

— Ваньмыз ужрадъёс тунсыкоесь, отчы адями ачиз пыриське ке. Ми ум дасяське кыӵе ке одӥг гинэ бадӟым ужрад — соос луозы 2 ар ӵоже пӧртэм интыосын — ёросъёсын, городъёсын. Валтӥсь малпанмы — Удмуртиын улӥсьёс мед тодматскозы асьсэлэн шаеренызы. Тросэз-а гуртысьтызы потало мукет интыосы, тодо-а соос, кытысен кутске Кам шур, нош вань-а тубамзы Байгурезе? Ваньмыз вуылӥзы ни-а Гербере, Пельнянь-фестэ? Асьмелэн туж трос тунсыко интыосмы, али котькытчы мыныны луонлыкъёс вань, котькуд ёросын сямен тунсыко турмаршрутъёс ужало, соин ик ми ваньзэс ӧтиськом шаермес котыръяны.

Кайта озьы ик мытом «Удмуртилэн ошмесъёсыз» проектмес — котькуд мылкыд карись нимысьтыз порталэ гожъяны быгатоз адӟем карымон адямиос, интыос но учыръёс сярысь. Историез лэсьто адямиос, соос сярысь тодыны кулэ, ваньзэ уго кивалтӥсьёс но, газетчиос но данъяса уг вутто.

— Ваньмыз чидатэк возьмало Удмурт культурая центрез…

— Тӧро олокӧня пол вераз ни бере, со луоз шуыса, мон оскисько, юбилейлы со усьтӥськоз. Но туж потэ вылэм, со удмурт клублы, кырӟан-эктон интылы гинэ медаз пӧрмы. Та юртэ пырись котькуд адями: удмурт-а со, ӟуч-а, татысь-а, палэнысь турист-а — мед быгатоз тодматскыны элькунэнымы но калык узырлыкенымы. Со сяна, мед луоз со удмуртлыкез азинтонъя туала центр: эскеронъёс ортчытонъя, выль проектъёс кылдытонъя но трос мукет — кызьы мон шуисько, аспӧртэм ЦУП (центр управления полётами). Огласянь, концепциын со ваньмыз чакламын — инъет чотын басьтэмын «Удмурт Кенеш» огазеяськонлэн ӵектосэз.

— Удмуртлыкъя кыӵе синмаськымон проектъёсты берло дыре пусйыны луоно?

— Бен, туж шумпотымон, али проектъёслы дурбасьтэ ачиз Президент но, кылдытэмын трос фондъёс, табере НКО-ос пыр ӟеч уж лэсьтыны луонлыкез вань котькуд адямилэн, котькуд городлэн но пичи гуртлэн. Но, жаляса верано, берло дыре, мон чакламъя, со пӧрмыны ӧдъяз уксё кысконлы — проект гожтӥсьёс нырысь лыдъяло, кӧня уксё кыскыны луоз, туж ик уг малпало, мар пӧрмоз малпанзылэсь, быдэсмоз-а со, уз-а, коньдон вуэмысь дугдӥз ке… Ӟеч проектъёс али трос, пӧлысьтызы усто проектэн лыдъясько «Билингва» центрез. Али со Ижкарын ужа, малпасько, одно вӧлмытоно ёрос центръёсы — отчы, кытын удмурт кыл али воксё уг чузъяськы. Нош таӵе тунсыко инты (площадка) кылдӥз ке, малпасько, анай-атайёс отчы одно нуозы нылпиоссэс. Бен, асьмеос нырысь ик анай-атайёсын ужаны кулэ. Ӵапак соослы нырысь валэктоно, малы кулэ анай кыл — асьмелэн быгатонлыкъёсмы, азинсконъёсмы вылын.

Зинаида Рябинина

Ангелина Снигирева
By Ангелина Снигирева Декабрь 25, 2018 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<