Йӧ карын луоз пӧсь

Ангелина Снигирева
By Ангелина Снигирева Декабрь 28, 2018 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Йӧ карын луоз пӧсь

Ижысь Шор площадьын ортчиз Выль ар кызэз но йӧ городокэз сӥё-дано усьтон ужрад.

Калыклэсь Выль ар мылкыдзэ бурдъян понна Ижкарысь ульчаосты но юртъёсты али чебермамын ворекъясь тылъёсын но билбордъёсын. Шор карлудын пуктэмын Выль ар кыз но пиналъёслы йӧлэсь шудон интыос: лабиринт, йӧ гурезьёс, Кӧлӥсь чеберайлэн дворецез. Вуоно ар Россиын Театрлэн ареныз ялэмын бере, карлудын кылдытэмын тодмо спектакльёсысь геройёслэн йӧлэсь скульптураоссы. Кылем арен ӵошатыса, Йӧ карын дун тырытэк шулдыръяськыны луоз.

25-тӥ толсурысен Шор карлудын ужзэ мытӥз Выль ар ярмарка. Татын калыклы ӵектозы «Удмуртия заряжает» нимо юонэз веръяны — марлэсь со лэсьтэмын, али уг шараяло на. 27-тӥ толсурысен кутскыса вань шутэтскон нуналъёс ӵоже Шор площадьын ортчозы пӧртэм арлыдо адямиослы чаклам шулдыръяськонъёс: турлы концертъёс, шудонъёс, юмшанъёс, ӵошатсконъёс, мастер-классъёс, фестивальёс. Выль ар уе Шор карлудын 3 часозь кыстӥськоз шулдыръяськон. 2-тӥ толшоре ижкаръёслы кырӟалоз «Ундервуд» рок-группа, концерт дыръя калыкез паймытозы на световидеошоуэн.

Выль ар ужрадъёс озьы ик ортчозы Ижкарысь мукет интыосын но. Вань мылкыд карисьёс пыриськыны быгатозы Киров нимо паркын, Ижкар прудлэн ярдураз, Ижкарлэн администрациез сьӧрысь садын, Дун-чылкыт Михаиллэн соборез дорын ортчись ужрадъёсы. Ижкарлэн котькуд ёросаз озьы ик ортчозы Выль ар ужрадъёс но ёлкаос.

Ижкарын улӥсьёслэсь куронъёссэс лыдэ басьтыса, радъямын Киров нимо паркысь фан-зоналэн ужез. Али тросэз спортэн тунсыкъясько но тазалыксэс утьыны тыршо, соин «Фан в кубе» нимо площадкаын ортчозы пӧртэм ӵошатсконъёс но шудонъёс. Нялтас вераса, фан-зонае пырон понна коньдон тыроно луоз, но паркын лэсьтэм бадӟым катокын (кузьдалаез ог 400 метр) вань мылкыд карисьёс дунтэк нискыланы быгатозы.

Ижкарлэн администрациез нимысьтыз саклык нылпиослы висъя. Выль ар каникул дыръя Шор площадьысь валтӥсь сценаын котькуд нунал возьматозы нылпиослы представлениос. 21-тӥ толсуре быгатӥсь пиналъёс пыриськозыОперая но балетъя театрын радъям Выль ар ёлкае. Шуге-леке сюрем пиналъёслэсь Выль арзэс шулдыргес карон понна Ижкарысь вань театръёсын ортчозы благотворительной ӝытъёс. Кузьымъёс дасямын ог 40 сюрс нылпиослы. 2-тӥ арзэ ортче «Ас киын лэсьтэм кузьым» акция: Удмуртиысь нылпи юртъёсысь пиналъёс пӧртэм арбериос, шудонъёс, открыткаос лэсьто, соосты кун учреждениос, пӧртэм компаниос кузьымлы шуыса дунэн басьто. Озьы пиналъёс коньдон потто, нош куд-огез кузьым басьтэм адямиос бӧрысь нылпиосын кусып тупато но детдомъёслы юртто. Таяз арын та акция улсын ог 1 сюрс 400 кузьым дасямын.

Котькуд нунал Ижкар прудлэн йӧ вылаз кылдоз выль суред. Снегоходэн сое лэсьялоз Семён Бухарин. Ижкарысь огаз школаын дворник луыса ужась воргорон ожо яке асфальт вылын суредъёс лэсья. Прудэз чеберматон понна суредаськись дворник лопатазэ но ӵужонзэ снегоходэн воштоз.

Выль ар ужрадъёслэсь ку но кытын ортчемзэс тодыны луоз 2019.izh.ru вотэс бамысь.

Шор карлудын
25-тӥ толсурысен 7-тӥ толшорозь
Нуналлы быдэ 10 часысен 21 часозь — Выль ар ярмарка

27-тӥ толсур
16 часысен 18 часозь — Кызлэсь тылъёссэ ӝуатон, Йӧ карез усьтон

28-тӥ толсур
19 часысен 21 часозь — Тол бабаен юмшан

31-тӥ толсур
20 часысен 3 часозь — Выль ар шулдыръяськон

2-тӥ толшор
19 часысен 21 часозь — «Ундервуд» рок-группалэн концертэз но световидеошоу

3-тӥ толшор
19 часысен 21 часозь — «Свет. Холод. Огонь» фестиваль

6-тӥ толшор
19 часысен 21 часозь — «Волга-Волга» группалэн концертэз,

Ымусьтонлы сӥзем шулдыръяськон
Ижкар прудлэн ярдураз

4-тӥ толшор
«Лечу как хочу!» аспӧртэмлыко дӧдьыослэн фестивальзы
8-тӥ толшорысен 14-тӥ толшорозь

УД

Туспуктэмъёс басьтэмын www.izh.ru сайтысь

Ангелина Снигирева
By Ангелина Снигирева Декабрь 28, 2018 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<