Зол-а шуккиськоз «Куара»?

Ангелина Снигирева
By Ангелина Снигирева Декабрь 26, 2018 12:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Арлэн пумаз Ижкарысь егитъёс выль огин кылдытӥзы. Огазеяськонзэс «Куара» нимазы, асьсэос сярысь верало: «Милям котькытысь удмурт кылэз адӟеммы но удмурт куараез кылэммы потэ».
Егитъёс асьсэлы кивалтӥсе Киужъёсъя элькун центрысь методистэз Влад Степановез бырйизы, солэн воштӥсез Кузебай Герд нимо гимназиысь дышетӥсь Артём Малинин луиз. Вотэс бамысь «ВКонтакте» огиназы «куараос» верало, мар бордын ужаны чаклало: соос удмурт кылын видеоконтент — лекциос, интервьюос, маскаръяськон видеоос — лэсьтыны ӧдъяло, форумъёс, лекторийёс но мукет ужрадъёс ортчытъяны медо.
Та дырлы ужзылэн куд-ог емышъёссы кисьмазы ини, кылсярысь, мытэмын «Тубат» проект. «Тубатын» удмурт тодосчиос пӧртэм темаослы сӥзем лекциос лыдӟо. Удмурт кыллэн нуналызлы сӥзьыса, егитъёс Сергей Максимов тодосчиен удмурт кыл сярысь лекциез вотэсэ поттӥзы. Кемалась ӧвӧл выль лекциен шумпоттӥзы — литератураез эскерись Вера Пантелеева вераз ӟуч кылысь удмуртэ берыктонлэн историез сярысь. Азьланяз «куараос» ӟуч но англи кылъёсын удмуртъёслы сӥзем пуштросэн лекциос но гожъяны малпало. «Куара» чакла пӧртэм адямиос понна тыршыны, пӧлазы покчиос но егитъёс, удмурт улонэн тунсыкъяськись но удмурт кылын вераськисьтэм муртъёс.
«Куара», тодон-валанэз вӧлмытэм сяна, калыкез серекъятыны но малпа. Кылсярысь, алигес «Горон быдтон» проектсылэсь 2-тӥ люкетсэ гожтӥзы. «Горон быдтонэ» 2 адями пыриське, соос черодэн ог-огзэс серекъятыны тыршо — ворме ӧжытгес серекъясез. Шудонлэн малпанэз «Ютубысь» асэстэмын — та выллем проектэн али трос блогеръёс выро.
Влад Степанов верамъя, улонамы вотэс бадӟым инты басьтэ, соин удмуртъёслы отчы одно ик выжы лэзёно, удмурт кылын малпанъёссэс вӧлмытоно. Калыклэн азьлань сюресэз но вотэсэн герӟаськемын: покчиос али будо, «Ютубысь» видеоосты учкыса. «Куаралэн» азьветлӥсез огин азе чурыт куронъёс пуктэ.

— Удмурт азьветлӥсьлы профессионал луоно. Котькыӵе ужез лэсьтыку, чаклано, мед со ӟеч луоз. Оглом югдурез ӟеч тодоно — туала вакытлы тупась тодметъёсты валатэк, азьлань мыныны уд быгаты, — малпанзэ шарая Влад Степанов.
«Куараос» пусъё, удмуртъёс азьло веме ортчытъяло вал шуыса. Ӵапак веме — бӧлякен ӵош ужан — удмуртлыкез азинтон амал луэ огин понна. «Милям вань мылкыдмы но быгатонлыкъёсмы лэсьтыны мар ке выльзэ озьы, кызьы ми адӟиськом», — верало егитъёс. Чаклам ужъёссы «куараослэн» трос. Табере дыр возьматоз ини, зол-а чузъяськоз куаразы.

Виктория Крамова

Ангелина Снигирева
By Ангелина Снигирева Декабрь 26, 2018 12:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<