Гожъяськонтэк улыны уг луы!

Ангелина Снигирева
By Ангелина Снигирева Декабрь 25, 2018 12:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Дарт» газетлэн азьвыл редакторез, журналист Мария ВЕКШИНА нырысетӥ книгазэ поттӥз. «Оӵ/ӧч кар» бичетэ (16+) роман, веросъёс но новеллаос пыризы.

М. Векшина

— Книгаед потэм бере тон аслад вотэс бамад гожтӥд: «Таин йылпумъясько улонэлэсь но творчествоелэсь эшшо одӥг люкетсэ». Кыӵе люкет со вал?

— Книгаям 2012-тӥ — 2017-тӥ аръёсы гожтэмъёсы пыризы. Веросъёс гожъяны кутскыкум, Удмурт кун университетын дышетскисько вал. Студент вакытэ романтической мылкыдын улӥськод, улонэз шӧмъяны кутскиськод, тонэ шулдыръяськонъёс, синмаськонъёс одолё. Нырысетӥ веросъёсам со туж шӧдӥське. Со вакытэ гужемъёссэ проводникын ужалляй на, озьы тросэз сюжетъёсы сюрес вылын вордскемын: пассажиръёсын вераськонъёс, дуннеез котыръян, пӧртэм югдуръёсы сюрылон. Журналистикае мургес выеме бере веросъёсы мукетэсь луизы — публицистика шӧм пыриз. Берло кутски лыдӟыны интеллектуальной проза: Милан Кундера, Умберто Эко, Хорхе Борхес, Герман Гессе… Мылкыды но, кылы но, малпаськон ӧры но воштӥськизы. Тани книгаям берлогес гожтэм 2 веросэ — «12 книга но одӥг пытьы», «Шудон» — вань. Соосты бичетэ пыртыны но уг луы вал кадь, шӧдске мукет шӧмзы, темазы. Романам но: нырысетӥ главаоссэ гожтыкум, монэ валтӥз мылкыд, берлоосыз ини, визь пыр поттыса, кема малпаськыса, гожтэмын — таосыз романлэсь огъя концепцизэ кылдыто.

— Романэд «Кенеш» журналын потэм бере тыныд лыдӟисьёслэсь гожтэтъёс вуылыны кутскизы. Кызьы тон со шоры учкиськод?

— Зэмзэ ке, котькыӵе критика гожъяськись понна тунсыко. Нырысь ик тон валаськод, тонэ лыдӟо шуыса. Собере, произведениед шоры мукет паласен учкыны кутскиськод. Котькуд писательлэн аслаз лыдӟисез ук. Уггес валаськы на, кыӵе со мынам. Но сое кыӵе ке но интеллектуальноенгес адӟеме потэ.

— Литература борды ку басьтӥськид?

— Пичи Пурга ёросысь Пуро школаын кружоке ветлӥсько вал, отын кылбуръёс гожъяй. Бадӟым классъёсы Италмасысь лицее дышетскыны выжи, гуртысь кошкеме бере пушкам бугыръяськыны кутскиз, соку зол кылбураны кутски. Кылбур бичет но поттыны малпасько вал, ярам, ӧй вутты. Будӥ со кылбуръёсысь, али со чуръёсме лыдӟи ке, пӧлысьтыз ог 10-эз коть кельшымонэз сюрозы на меда?

Нош быдэ вуыса пӧртэм адямиос пӧлы шедиськод ук. Соос тонэ будэто, семьяын кадь. Со туж кулэ. Университетэ пырыса, Алексей Шкляев, Лариса Дмитриева, Дарали Лели котыре сюри. Соос мыным троссэ пыӵатӥзы. А. Шкляев — журналистика, менеджмент ласянь. Соку вотэсын «Уралистика» журнал зол нуиське вал, отчы гожъяськылӥ. Дарали улон шоры учконме воштӥз, гожъяськон ласянь будэтӥз — мон солэсь блогзэ лыдӟисько вал, «Дарт» газетэ гожъяськисько. Весь кыӵе ке проектъёсаз кысказ, озьы мыло-кыдо луон но сяме мургес пыӵаз. Лариса Дмитриева, кытысь ке гожъямъёсме адӟыса, дэмлаз аслэсьтым блогме усьтыны. Озьы ик кари. Собере сюри «Удмурт дуннелэн» кыткетаз — татын ини мон быдэсак пӧрми сыӵеен, кыӵе вань. Кыдай. Адӟиськод, быдэс улонме гожъяськисько: кылбуръёс, блог, журналистика…

— Нош «Дартэн» кызьы кусыпъёстэ юнматӥд?

— «Дартэ», 11-тӥ классын дышетскыкум, гожъяськыны кутски, соку мон тодӥсько ни вал, улонме журналистикаен герӟало шуыса — школаын газет поттӥськом вал. Со сяна, Пуро гуртам «Узы-боры» киноез снимать каризы, сое Италмасын возьматӥзы. Озьы ик Дарали Лелиен, Алексей Шкляевен тодматски, соос ик газет борды кыскизы.

2014-тӥ арын «удмурт дуннеос» оскизы «Дартлэн» редакторез луыны. Газет бордын мон, Вера Штыкова но Настя Шумилова ужаны кутскимы. Милям вал командамы, соин капчи но тунсыко ужаськиз. Бордамы вал на ӟеч авторъёс, туспуктылӥсьёс, программистъёс — пичи редакция. Кылсярысь, Гриша Григорьев «Ватсам дунне» приложение лэсьтыны дэмлаз но ачиз ик лэсьтӥз. Дарали Лели юрттӥськылӥз ужрадъёс, концертъёс ортчытъяны. Котьку малпаськомы вал, газет номермес малы сӥзёно шуыса, со винегрет медаз луы. Вера газетлэн тусыз, суредъёс понна кыл кутӥз. Мон — материалъёс понна. Настя Тартуысен (соку отын дышетскиз) юрттӥськылӥз. Тунсыко: газетэз дасякумы, мынам бамез трос букваосын тырмытэме потэ вал, Вера нош алэ вал. Собере гинэ валай ни, омыр, суред но кыл газетын одӥг радын сыло шуыса.

Газет толэзьлы одӥг пол потэ, толэзь ӵоже соин гинэ выриськод ке, газет капчиен лэсьтӥське. Гожъяськисьёсмы вань, но соосты весь чаклано, утчано луэ. Умой, куке соос асьсэос вазисько яке блогъёссэс усьто. Эшшо ке мылкыдзы медаз быры шуыса, адямиосты лӧпкытъяно.

Зэмзэ ке, «Дарт» бордын бадӟым кужым. Со егит журналистъёслы, литераторъёслы, суредасьёслы будыны, ужъёссэс возьматыны умой инты. Со сяна, газет туала вакытэ материалъёсын тырмытэм кагаз гинэ ӧвӧл. Со проектъёсын вырыны, ужрадъёс ортчытъяны, лыдӟисьёсты пӧртэм амалъёсын бордаз бинялтыны кулэ. Удмурт егитъёслэн сыӵе газетсы вань шуыса, со бадӟым вормон.

— Тон но мукет егитъёслы «Дартэз» оскид ни. Кыӵе со али син азяд пуксе?

— Мыным кельше, кызьы тӥ ужаськоды, выль авторъёс вань, шаянтонъёс. Быдэс редколлегиеныды йырыныды зымысалды ке газет лэсьтон уже, эшшо но умойгес пӧрмысал. Зэмзэ ке, тӥледыз бичакумы, ми кышкамы вал, газетлэн пуштросэз туж егитомоз шуыса, но мон шӧдэмъя, со озьы ӧвӧл. Умой.

Быгатӥсько вераны: милемын кылдытэм сям-йылолъёс газетын кылемын. Вылбамъёсты озьы ик малпаса лэсьтылэмын — огшоры туспуктэм гинэ ӧвӧл. Ас вакытаз Дарали Лели «Культпросвет» рубрикаез усьтӥз, лэчыт ужпумъёс пумысен интервьюос дасялляз. Ми сое «Зарни егитъёс» шуыса нимамы, та рубрика котькуд номерын потаны кутскиз, тӥляд но со вань. Озьы ик 8-тӥ бамысь «Адӟытон» сэрег азинтӥське.

Но потэ, «Дарт» вотэсын но чупыресгес мед луоз шуыса, «ВКонтактеын» огин ӵемгес мед выльдӥськылоз. Газет бамын аналитической материалъёс уггес тырмо.

— Тон понна та ар туж узыр луиз. Толшоре тонэ Эрик Батуев нимо премиен пусйизы вал. Бадӟым-а со дунъет ужедлы?

— Мыным та премия туж дуно! Со дыре ик мон валасько, вань малпанъёсме ӧй на быдэсты, тросэз улонэ пыӵатэк кылиз. Кылсярысь, «Дарт» газетлэсь сайтсэ лэсьтыны кутскимы вал, уксё ӧвӧлэн со ӝыныё кылиз.

Эрик Батуев нимо премия вань шуыса, «Удмурт Кенешлы» тау кароно. Ӟуч журналистъёс пӧртэм вожвылъяськонъёсы пыриськыны быгато, нош удмуртъёсызлэн сыӵе луонлыкъёссы ӧжыт. Та премия сярысь но тросгес адями тодысал ке, конкуренция бадӟымгес луысал.

— Нош табере журналистикаын мар борды кыстӥськиськод?

— Азьпала учкытэк улыны уг луы. Потэ ӟеч журналист луэме. Потэ, журналистикамы гражданской мед луоз. Материал печатласькем бере кивалтӥсьёс югдурез сэрттыны-пертчыны мед кутскозы, кызьы со вал азьвыл вакытъёсы. Мон пушкын социально-ответственной тыл ӝуа-а, мар-а. Сюлэм висе калык понна, юрттэм потэ.

Журналистъёслы олокытысь но жингыръяло, юрттэт курыса. Кылсярысь, Шаркан ёросысь жингыртылӥзы: каре вал, пе, мар ке но, гожтэ материал, клубмес ворсало, милемлы 2-3 иськеме мукет гуртэ ветлоно луоз. Мон валасько, ми гожтомы, но югдур солэсь уз тупатскы. Нош журналистика со котьку калык но кивалтэт куспын выж вал ук.

— Нош кызьы малпаськод, удмурт журналистика вань-а?

— Удмурт журналистика вань! Но котькуд издание ас пуртыяз улэ, ог-огенызы кусып уг возё. «Удмуртия» ивор вӧлмытонъя агентстволэн гожъяськон кылыз туж искусственной, та сярысь трос вераськонъёс вал ке но, номыр ӧз воштӥськы. Нош «Кенеш» журналын верало, газетын ми урод гожъяськиськомы шуыса. «Инвожо» журналэз лэсьтӥсьёс ас понназыгес уло, выль адямиосты бордазы уг кыско. Кулэ кызьы ке огазеяськыны, удмурт журналистикамы одӥг питран кадь мед бергалоз.

«Удмурт дунне» Россиысь газетъёсын одӥг радын сылэ, ялан азинске, выль проектъёс малпа. Телевиденимы но милям азинлыко, Вероника Ваулиналэсь ик передачаоссэ басьтоно ке, кылсярысь, «Пятница» каналын потӥсь программаослэсь со одӥг но пӧртэм ӧвӧл.

— Журналистика тонэ уг лэзьы. Али нылпиен пукыса но, гожъяськонлэсь уд шутэтскиськы.

— Гожъяськонлэсь палэнскем уг луы ни. Газетын ужаку, литератураен вырыны дыр уг тырмы, соин ик али солы ваньмон дырме висъясько.

— Нош нылпиед вордскемен, ачид воштӥськид кадь-а?

— Мон валай, семья улонын валтӥсь инты басьтэ, пыкъет луэ шуыса. Азьло мон понна нырысетӥ интыын творчество, уж сылӥзы.

Мария Емельянова

Ангелина Снигирева
By Ангелина Снигирева Декабрь 25, 2018 12:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<