Габи

Ангелина Снигирева
By Ангелина Снигирева Декабрь 21, 2018 19:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Улонысь учыръёс

Н. Касаткина

Кучапи

Кучапи басьтӥм. Пиналъёс кемалась куро ни вал, но мон пумит луылӥ. Кызьы бен городысь квартираын пудоез возёд? Вераським быръёнъёс дыръя сямен куара сётыны: кин вормоз, озьы ик луоз.

Куинь нылпиосы медаз ворме шуыса, мон малпай соослэсь куаразэс быдэн ӝыныен гинэ лыдъяны. Ми картэным кык кузя пумит луом но вормом. Одӥг но ӝыны куара — пуны понна, одӥг — пумит, нош картэ кылзэ отчы но, татчы но ӧз вера. Пиналъёс вормизы.

Табере малпаськонэ усим: кыӵе выжыысь пуны басьтоно? Трос книга лыдӟыса но пуны возисьёсын вераськыса, малпам басьтыны боксёр выжыысь эш, мумызэ. Со пуны, пе, ассэ но, котырзэ но туж чылкыт возе, кышкасьтэм. Туж яратэ бызьылыны, шудыны, пересьмытозяз ик. Кучапимылы лэсьтӥм кӧлан, сиськон инты, кызьы валэктэмын книгаосын. Шедьтӥм боксёр вузасьёсты.

Кучапилы мынӥм быдэс семьяен. Корка пырим но, адӟисько: туж чебер тигровой выжыысь боксёр, кымесаз тӧдьы пус, пыдъёсыз «носкиосын», азьпалаз сыӵе ик тӧдьы «азькышетэз». Коробкаын 10 кузя кучапиосыз, огезлэсь мусо мукетыз. Кузё кышно кучапиосты исаны ӧз лэзьы, кыӵеез кулэ, сыӵезэ ик ачим, пе, сёто. Ми одӥг ымысь кадь шуиськом: мумиз кадьзэ сётэ. Карточкаос сётыса, ним бырйыны косӥз. 10 пӧртэм нимъёс пӧлысь быръёно одӥгзэ — ваньмыз кутско «г» букваен. Милемлы яраз Габриель Зильбер Кёниг. ГАБИ. Милесьтым ваем шобретмес нылкышно кӧнялы ке коробкае кучапиос борды тырылӥз, собере отчы пичи чебер комокмес бинялтӥм но шумпотыса гуртэ бертӥм.

Пунымылы вал одӥг толэзь. Нуназе со нискетыса аслэсьтыз сузэръёссэ, анайзэ утча, шобрет бордысь кошкемез ик уг поты, нош уй вуэ ке, нокинлы кӧлыны уг сёты — бӧрдэ.

Кӧлон интызэ диванэ борды карыса, киме вылаз понӥсько но, со чалме. Арнялэсь ятыр кучапиелы мумызэ воштоно луи, уйбыт киыным шунтыса. Пиналъёс кыл сётӥзы вал пуныез утялтыны, сюдыны, ураме поттылыны — ваньмыз мон вылэ усиз. Бен кызьы соослы оскод сыӵе пичи мае ке, будӥз ке, утялтозы ай.

Дышись

Быдэс тулысэз но гужемез пуныеным ӵош педло калгыны потам, аслэсьтыз «ужъёссэ» асфальт но калык ветлон сюрес вылэ ноку ӧз лэсьтылы. Вуиз сӥзьыл. Котьку сямен ик, ӵукна пунымы юмшаны куриськиз. Ураме потӥм но… тӧдь-тӧдь, уй куспын лымы усем. Кучапие отчы, татчы кариське — котькытын чылк-чылк, чебер. Нискетэ, инты утча, уг вала кытчы «ветлыны». Кызьы юрттоно Габиелы? Учкисько, палэнын, дыдык возён корка улын, лымы ӧвӧл. Пуныме лымытэм интые нуи, отын гинэ быгатӥз аслэсьтыз «ужъёссэ» быдэстыны.

Ми яратӥськом, вань семьяен машинае пуксьыса, кыдёке возь вылэ, шур дуре яке нюлэскы ветлыны. Пунымы котьку но бордамы. Кыӵе со яратэ милемын ӵош бызьылыны, бубылиосты но ӟозъёсты кутылыны. Огпол озьы узы-боры сиим, тупен шудӥм но гурт пала бертыны малпам. Ваньмы пуксим машинае, пунымы уг пыры, машина котыртӥ тэтча, шудыны куриське. Ческыт сиёнэн но эрекчаммы уг луы. Тон озьы ке, ми тонэ дышетом ай шуыса, ваньмы машинае пуксим но гурт пала ширтӥм. Габимы сьӧрамы уйиське, сутэмез уг луы. Кӧня ке мыныса, дугдӥм, ӧсэз усьтӥм гинэ но, пунымы шумприч интыяз пыриз. Мукетъят, кытчы ке мыноно яке бертоно ке, сое кема куроно ӧй вал ни: ӧсэз усьты гинэ — милесьтым азьло пуксе.

Утись

Потӥмы ураме шудыны, бызьылыны. Пунымы сиськонзэ но кельтоз, педло потом шуид ке. Ульчаын бызьылэ ни вал ӵош шудоно эшез, Сэм, бускельёсмылэн ротвейлер выжыысь бадӟым пунызы. Пумиськемзылы шумпотыса, огзы бӧрсьы огзы бызьылыса шудо, тэтчало. Шӧдтэк шорысь берлань чигнаса тэтчанъяз Сэм мон шоры мырӟиськиз. Габие пештырскыса ротвейлер шоры урдӥськиз, ачиз солэсь кык поллы пичи ке но, пурыны дась. Мырдэм люкыса, валэктӥм, со монэ куртчыны уг малпа вал шуыса. Мукет дыръя пумиськыкузы, жугиськемзэс тодазы ӧз вае ни.

Вераськись

Аня нылмы — покчиез, соин со пуныен юмшаны уг пота вал. Ветло пиос яке мон кузпалэным. Нылмылэн ужез — Габи ульчаысь пыре ке, солэсь пыдъёссэ миськоно, коркан котькытӥ ветлыны мед быгатоз. Одӥг сӥзьыл нуналэ Ванямы пуныен юмшаз но сое ӧс доры кельтӥз, «носкиоссэ» миськыны. Нылашмы кыштыр гинэ ас ужъёсыныз выре, суредаське, лыдӟиське. Пунымы пукиз-пукиз, жадиз, лэся, возьмаса, «А-а-а-ня-я!» шуыса куаретӥз. Ма, ма та шуыса кылзӥськом, зэм оло даур. Кӧня ке улыса, эшшо но золгес «А-а-а-ня-я» кылӥськиз. Анямы вань ужзэ вунэтӥз, эшез доры мыныса, ӟыгыръя, чупа. Мон, пе, пыдъёстэ майталэн ик мисько, чебер выль ӵушконэн ӵушыло, вера гинэ мынэсьтым нимме.

Мон малпасько, «Аня» шуыны быгатэ бере, оло, «мама» но шуоз. Озьы малпаса, печення кутӥ но, пуныме ас вадьсам пуктыса, «мама» шуыны косӥсько. Куинь пол, ныль пол одӥг кылэз вераса, ческыт сиёнэн гочатыса, Габие «м-м-а-а-ма» шуыны валаз. Собере, пыжиськисько яке магазинысь ческыт сиён басьтӥсько ке, пуные сьӧрам «м-ма-а-м-ма» шуыса бызьылэ ни вал.

Вожась

Гуртысь родняосмы, мар но со басьтыны шуыса, базаре лыктӥзы. Тямыс толэзьем нунызэс дорам учкыны кельтӥзы, одӥг час пала, пе, юмшалом. Пичи Юляез мон азям возисько, шудӥсько. Пуные палэнын нискетыса ветлэ. Собере дорам лыктэ но пыдыныз монэ шукке, пиналын шудэмез потэ-а, мар-а, малпасько. Со бен милям дышемын пичиосын погылляськыны. Пичи дыръяз асьмелэн пиналъёсмы вал, нош али внукмылэсь эрикез ӧвӧл. Ильямы кызьы гинэ соин уг шуды, миндэр карыса вылаз но выдэ, пыдкутчан тыре, очки понэ. Габилы со ваньмыз уг акыльты, лэся, вӧсь карон гинэ ӧвӧл, куаразэ но уг поттылы. Вуизы Юлялэн анай-атаез. Пиналэз киысьтым басьтӥзы гинэ, Габие бызьыса дорам лыктӥз, пыдъёссэ азям понӥз но, вӧзам ӝиптӥськыса, мӧзмыт синъёсын шорам учке, «малы мурт пиналъёсын шудӥськод, монэ вунэтыса» шуэ кадь. Соку гинэ валатски: вожаса озьы пыдыныз чабкылэ вылэм.

Чидась

Котькуд ар, Тройча нуналъёсы, Дэбес пала ветлӥськом. Туэ но дасяським отчы мыныны, пунымес гуртэ огназэ кельтыса. Одӥг пол ветлӥм ни вал соин, но дэбесъёсмылэн кык кузя пӧйшурась пуныоссы Габимес туж ик ӧз яратэ, соин сэрен пунытэк мыныны малпам. Габи соку ик шӧдӥз, гуртэ огназ кыле шуыса, пыд котырамы шумпотыса ӧз тэтча — аслаз интыяз выдӥз но шорамы мӧзмыт учке. Индылӥм, валес выламы эн кӧлы шуыса. Тусьтыяз тыраз ву понӥм, ӵуказе гуртэ вуом шуим но кошким.

Одӥг нуналлы кельтылэммы вал ни, но таяз радэ ӧз удалты: машинамы тӥяськемен сэрен Дэбесын кык нунал улоно луиз. Ма гинэ малпаса ӧм вуттэ: юонэз уз тырмы, педло потамез потоз, кӧтыз сюмаса уродмоз. Корка пыриськом — Габимы милям валесамы пыс-пыс кӧлэ. Ассэ янгышен лыдъятэк, дыртытэк султӥз, кузялтӥськиз, шорамы ӝож синмын учкиз но вузэ юыны кошкиз. Азьвыл, корка пырыкумы, пунымы милемыз котьку ӧс дорын пумиталляз. Кытын изид шуыса юаськом ке, со ӝогак гинэ кресло улэ ватске яке шумпотыса вакчи быжыныз шона, честной синъёсын шоре учке. Тодмо ни, кытын та рад Габимы шутэтскиз. Табере ми йыртэмасьёс луимы. Татчыозь одӥг гучык но юымтэ на. Тодэм-а, мар-а, гуртэ дыраз ум бертэ но, уз чида, педло потамез потоз. Юэмез бере гинэ ваньместы нюлыштӥз, ӟечбуръяськиз но ульчае куриськиз.

Кескич

Коркан кезьыт. Диван вылын, шобрет улын кылльыса, телевизор учкисько. Кин шобырскыса креслоын пуке, кин интыяськемын пукон вылэ — кыӵе ке тунсыко передача мынэ. Пунымы, дорам лыктыса, нырзэ гинэ шобрет улэ донгиз, ваньмы шоры учке, мар вералом. Кӧня ке озьы сылыса, номыр верамтэысьтымы, шобрет улэ быдэсак йырзэ ватӥз. Нош возьмаз, куаретомы-а шуыса, собере азь пыдъёсыз диван вылэ вуизы. Ми телевизормес вунэтӥм, витиськом, мар луоз азьланяз. Возьмаз, нокин пумит ӧвӧл солэн малпамезлы, кутскиз но, быдэсак диван вылэ тубыса, бордам выдӥз.

— Габи, возьыттэм, пуныос шобрет улын кыллё-а, мар-а. Мын интыяд!

Йырзэ ошыса, кошкиз аслаз кӧлан дораз. Кема кылльыны ӧз чида, нош дорамы вуиз но йырзэ гинэ шобрет улэ донгиз — со понна сое ӧз куаретэ вал ук.

Шӧдӥсь

Пунымы яратэ куноосты. Ӧсэ жингыртэмез кылэ гинэ, ури-бери вуэ потон доры, ваньзэсты азьпалтыса. Шумпотыса быжыныз шона, куаразэ сётэ: усьтэ ни, пе, ӝоггес. Корка пырыса вутто-а, уг-а, вань куноосты нюлышъя.

Одӥг нуналэ жингыртӥсь луиз. Марлы ке пуные воксё шум ӧз поты, лек утыса, ӧс шоры учке, тыбыр вылаз гонэз ик пештырскем. Пуныме чырты возеттӥз кутыса, ӧсэз усьтӥсько, отын сыло коркась корка ветлӥсь вуз карисьёс. Кошке, шуисько, ӝоггес, пуны шӧдэ укылтэм, кескич адямиосты.

Уно пол тазьы но луылӥз: Габимы кыллён висказ шумприч султыса укно доры бызе но, азь пыдъёсыныз косяк вылэ султыса, витетӥ этажысен азбаре учке, вакчи быжыныз ӵем шона. Мар тонэн луиз? Али гинэ педло потад ук. Кӧня ке озьы учкыса, бызьыса ӧс доры кошке. Валамон, машина куараез шӧдӥз — картэ ужысь вуиз.

Кыӵе гинэ учыръёсыз ӧй вал Габимылэн, ваньзэ вераса но уд быдты. Туж кема куректӥм Габимы кулэм бере. Гуртэ бертӥськом, нокин тонэ шумпотыса уг пумита. Уг сайкаты ӵукна, валес дорын пукыса, чал-чал шорад учкыса…

Надежда Касаткина

Суредэз Чудья Женилэн

Ангелина Снигирева
By Ангелина Снигирева Декабрь 21, 2018 19:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<