Выль малпанъёс вордӥсько огазьын

Ангелина Снигирева
By Ангелина Снигирева Декабрь 19, 2018 12:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижысь Эшъяськон юртэ люкаськылӥзы шаерысьтымы пӧртэм ёросъёсысь азьветлӥсь удмурт нылкышноос — ваньзы соос «Удмурт нылкышно кенеш» огазеяськонлэн ужаз пырисько. Туэ огазеяськон 25 ар тырмонзэ пусъе, со улсын «Анайлы сӥзьыса» форум ортчытӥз.

Бадӟым ужрадэ вуиз ёросъёсысь, каръёсысь 25 делегация, лыктӥзы кыдёкысь куноос но — Башкортостанысь Татышлы ёросысь нылкышноос. 10 пӧртэм удмурт гуртъёсысь кышномуртъёс «Эшъяськон тугоко» клуб кылдытӥллям, нимаз нылкышно клубъёс ужало котькуд гуртазы. Соос семьяын удмурт культураез, кылэз, сям-йылолъёсты утён но азинтон понна сюлмасько.

25 ар ӵоже движение паськытаз, туннэ солэн ёзъёсыз шаерысьтымы тросаз ёросъёсын ужало ни. Нина Малых кичӧлтэмъя «Удмурт Кенеш» огазеяськонлэн бурд улаз кылдыса, огазеяськон аслэсьтыз ужзэ паськытатӥз — анайлэсь данзэ будэтон, нылпиослы удмурт кылэз, культураез гажан мылкыд пыӵатон бордын тыршиз. Пӧртэм вакытъёсы солэн ёзчиосыз вал тодосчи Людмила Христолюбова, кун деятель Светлана Смирнова, эмчи Елена Ботникова но мукетъёсыз. Али но огазеяськонлэн ужаз пырисько нимо-дано дышетӥсьёс, гожъяськисьёс, журналистъёс, врачъёс.

Удмурт азьветлӥсьёсты бадӟым праздникенызы ӟеч-кылазы нациосын ужан политикая министрлэн воштӥсез Людмила Соковикова, Кун Кенешысь депутат, «Удмурт Кенеш» огазеяськонлэн тӧроез Татьяна Ишматова.

Татьяна Витальевна верамъя, туннэ удмуртлыкез азинтон — семьяын-а, общественной ужын-а — трослы потэ нылкышно бордысь. Огазе люкаськыса, кышномуртъёс ог-огзылэсь мылкыдзэс бурдъяло, выль кичӧлтонъёс малпало, соосты улонэ пыӵато.

Нылкышно движенилэн кылдэмез но азинскемез, туннэ нуналыз сярысь вераз огазеяськонлэн кивалтӥсез Надежда Степанова. Ёросъёсысь нылкышноос асьсэ уженызы тодматӥзы. Кылсярысь, Можга ёросысь огазеяськон «Анае, тыныд та кырӟанэ…» ужрад ортчытӥз. Можгаос ёросысьтызы кылбур но крезьгур гожъясьёсты бичаллям. Озьы ёрос сцена вылысен азьвыл быдэсъяллямтэ кырӟанъёс чузъяськизы. Форуме люкаськем нылкышноосты но аслаз кырӟанэныз шумпоттӥз Можга ёросысь дышетӥсь, кылбурчи Любовь Чукарева. Пичи Пургаысь нылкышноос Удмурт кыллэн нуналэзлы — сое 27-тӥ шуркынмонэ пусйимы — аспӧртэмлыко акция ортчытӥзы. «Анае гурзэ эстэм, дыр, но» кырӟанэз быдэстон борды итӥськизы скал кыскисьёс, библиотекаын ужасьёс но вань гурт калык. Вотка карысь Галина Перевозчикова «Чигвесь» клубзылэн ужаменыз тодматӥз. Доразы арлыдоосгес ветло ке но, соос сьӧразы нуныкаоссэс ваё. Киужен выронъязы, кырӟакузы пичиосты удмурт культураен тодмато.

Ангелина Снигирёва

Туспуктэмез авторлэн

Ангелина Снигирева
By Ангелина Снигирева Декабрь 19, 2018 12:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<