Вуоно арын пумиськытозь

Ангелина Снигирева
By Ангелина Снигирева Декабрь 21, 2018 12:39

Кылем арня пумын Ижысь «Олимпиец» комплексын Калашниковлэн кубокез понна следж-хоккеен шудонъя нырысетӥез калыккуспо ӵошатскон ортчиз. Россиысь сяна, отчы пыриськизы Словакиысь но Чехиысь спортэз яратӥсьёс.

Ужрадэз усьтонэ лыктӥзы Правительстволэн Тӧроез Ярослав Семёнов, мугорез кыдатон культурая, спортъя но егитъёсын ужанъя министр Наталья Гольцова, ужъя но калыкез улон-вылонын утён политикая министр Татьяна Чуракова, «А. Волков нимо «Белкамнефть» огазеяськонлэн кивалтӥсез Дмитрий Арсибеков но мукетъёсыз. Озьы ик вал Сочиын ортчем Паралимпиадае пыриськыса азвесь медаль басьтэм спортсменъёс.

Вожвылъяськонэ пыриськизы Европалэн, Россилэн (татчы люкамын Ханты-Мансийскысь, Татарстанысь, Тюменьысь, Оренбургысь, Тулаысь спортсменъёс) но Удмуртилэн командаоссы, «Башкирские пираты» команда. Ваньмыз тодазы вайизы, шуныт кылъёс веразы Виктор Николаевич Кузнецов сярысь. Ӵапак со сюлмаськемен, Удмуртиын кылдытэмын вал следж-хоккеен шудон.

— Удмурт шаерын ортчись ужрад кемалы вунонтэм кылёз, угось быгатонлыкъёссэс кыдатэм сяна, егитъёс асьсэлы выль эшъёс но шедьтозы. Оскисько, йӧ вылын ӟырдыт нюръяськон пуромоз шуыса, — вераз Ярослав Семёнов. — Нырысетӥ вожвылъяськонэ 50 пала спортсменъёс люкаськизы. Следж-хоккейя калыккуспо вожвылъяськонэз азьланяз но ортчытъяломы, угось отчы пыриськись пиналъёс — дуннелэн вуоно чемпионъёсыз. Йӧ вылын тросгес шудыса гинэ, вормонъёсты уноятыны луоно.

— Таӵе ужрадэз ортчытон сярысь огкыл гожтэмын вал Удмуртиысь Правительство но «Белкамнефть» огазеяськон куспын кылем арын 3 арлы, — шуиз Дмитрий Арсибеков. — Шуг-секытэ шедем муртъёслы «Белкамнефть» котьку юрттыны дась.

Вожвылъяськонэ Словакиысь 1 мурт, Чехиысь быдэс команда вуэмын вал. Со Европалэн командаез нимаськиз. Словакиысь тренер Мирослав Драгу юри тодматскыны лыктэм Удмуртиысь следж-хоккейлэн азинскеменыз. Та дыре странаязы 17 мурт гинэ следж-хоккеен шудэ. Озьы ке но вуоно арын, пе, быдэс командаен лыктозы.

Удмуртиысь следж-хоккей сярысь ке верано, «Удмуртия» клубын 2 команда шудэ. Бадӟымъёслэн командаязы мугорзэ кыдатэ 17 мурт, егитъёслэназ (19 аресозь) — 9 кузя. Удмуртиысь команда Россилэн 2 пол чемпионэз луэ, Ижын кыдам спортсменъёс пӧлысь уноез Россиысь но кунгож сьӧрысь командаосын шудо. Россилэн сборной командаяз но ӝыныез пала Удмуртиысь луо.

— Туж шумпотӥмы кунгож сьӧрысь лыктэм куноослы, пиналъёс азе бадӟым ужпум пуктӥмы: шудоно вормытозь, — шуэ егит следж-хоккеистъёслэн тренерзы Юрий Широбоков. — Шумпотоно, таӵе ӵошатсконъёс пиналъёслы кыданы юртто.

Ужрадэз усьтон нуналэ шаерысьтымы нимо-дано спортсменъёс, Сочиын ортчем Паралимпиадаын 2-тӥ инты басьтэмъёс: Владимир Каманцев, Иван Кузнецов но Евгений Петров — мастер-класс возьматӥзы. Следж-хоккеистъёслэн пичи дӧдьыязы тазалыко адямиос но пуксьыса оскалтӥзы. Палэнысен учкыса гинэ, капчи адске вылэм, шонер пукыны но шаплы нискыланы одӥгзы но соку ик ӧз пӧрмытэ.

— Туннэ шудӥсь пиналъёслы ӧжытак ке но удалтӥз, визьнодасьёссы коть вань, — серекъяса вера Иван Кузнецов. — Соосты ми шонер нискыланы дышетӥмы, шайбаез кутон, пас сётон амалъёс возьматӥмы, вань юанъёссылы валэктон сётӥмы. Нош милям следж-хоккей сярысь кылэм-адӟеммы но ӧй вал, ас тодэммыя шудыны дышетскимы. Калыккуспо ӵошатсконъёс пиналъёслы туж кулэ: шудон опыт люкалозы.

Следж-хоккейя ныры-сетӥез калыккуспо ӵошат-скон йылпумъяськиз. 1-тӥ инты басьтӥз Россилэн сборной командаез, 2-тӥ луизы Удмуртиысь спортсменъёс, 3-тӥ — «Башкирские пираты» команда. Вань спортсменъёслы кузьымъёс сётэмын, нош вормисьёс медальёс но кубок басьтӥзы. Спортсменъёс люкиськизы вуоно арозь, Калашниковлэн кубокез понна калыккуспо ӵошатскон азьланьтэмын луоз.

Валентина Емельянова

Туспуктэм басьтэмын http://www.udmurt.ru/ сайтысь

Ангелина Снигирева
By Ангелина Снигирева Декабрь 21, 2018 12:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<