Вормонъёслы шумпотыны — одӥг минут

Ангелина Снигирева
By Ангелина Снигирева Декабрь 28, 2018 18:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

25-тӥ декабре Кун Кенешлэн азьвыл ялымтэ 9-тӥ сессиез ортчиз. Отчы ӧтемын вал Удмурт Правительстволэн, Федерация Кенешлэн ёзчиоссы, Кун Думаысь депутатъёс, муниципал кылдытэтъёслэн йыръёссы, город Думаослэн, ёросъёсысь Депутатъёслэн Кенешъёссылэн йыръёссы, Удмуртилэн дано адямиосыз, общественникъёс.

А. Бречалов

Калык ужтэк ӧз кыльы…
Повесткае пуктэмын вал одӥг ужпум — Удмуртиын югдур сярысь доклад лэсьтӥз Удмуртилэн Тӧроез Александр Бречалов.
Докладзэ мытыса, Александр Бречалов вераз:

— Туннэ вераськом вош-тӥськонъёс сярысь, соос вань удысъёсын ортчо, озьы ик — котькуд адямилэн улоназ. Реформаослы кутскон сётэмын, Россилэн Президентэз соос сярысь май указъёсаз вераз. Бен, выльдӥськонъёсты кельтыны луоно берлолы, ӟечгес вакытъёсты возьмаса. Но али соослэсь кышкатским ке, элькунмылэсь азинсконзэ ум адӟе.
Мар лэсьтэмын шаерамы 2018-тӥ арын, азьланьын азинсконъёс басьтон вылысь? А. Бречалов нимысьтыз вераз бадӟым вормонъёс сярысь. Одӥгез соос пӧлысь — Москваен юнматэм вань огкылъёс быдэстэмын. Талы луыса бюджетэ ватсаса 250 миллион манет пыртэмын. Кыкетӥез — закупкаосъя улос центрлэн ужез радъямын. Озьы 1,61 миллиард манет шыръямын. Пайдаез вань бере, вуоно арын 1-тӥ январьысен вань муниципалитетъёс но торгъёссэс та центр пыр ортчытъялозы ни. Куинетӥез — бадӟым вамыш лэсьтӥзы коммерциен вырисьтэм огазеяськонъёс, пӧртэм проектъёсынызы пӧртэм фондъёсысь ог 4 поллы тросгес коньдон кыскыны быгатӥзы: кылем арын 50 миллион манет вал, туэ луиз 220 миллион манет.

Ортчись арын куд-ог промышленной предприятиосмы малпамтэ шорысь шуге-леке вуыны быгато вал, — пусйиз Удмуртилэн Тӧроез. — Вераськыны кутскизы трос калыкез ужысь мозмытон сярысь. Ярано, Ижысь механикая заводын та сярысь вазенгес ик ивортӥзы, соин ик югдурез син азямы возьыны быгатӥм. Нош «Ижметмашын» югдур шуак пуромиз — 800 мурт малпамтэ шорысь ужтэк кыльыны быгатэ вал. Огъя кужымен предприятиез банкрот луэмлэсь утьыны быгатӥм. Табере со интые кылдӥз «Буммаш». 230 муртэз выльысь уже кутон сярысь огкылъёс но гожтэмын ни. Чакламын ог 1 сюрс муртэ ватсаса кутыны — азьланьлы планъёс бадӟымесь.
Одӥг мылкыдын ужаны быгатэммес возьматӥм сюресъёсты тупатъянын но. Удмуртия Россиысь улосъёс пӧлын 3-тӥ луиз, та ужез чырмыт но валаса быдэстыны быгатэменыз. Сюрес фондэ ватсаса 250 миллион манет вуиз.

Но вормыны быгатӥм шуыса, шумпотыны 1 минут гинэ висъяно. Собере нош ик ужъёс борды кутсконо, — ватсаз А. Бречалов. — Сотэк кызьы вормон басьтод?

Уйпала сюресъёс
Нацпроектъёсты быдэстон — кызьы Россия азьын, озьы ик Удмуртия азьын сылӥсь валтӥсь ужпум. Соос 12 пумо, быдэстоно 2024-тӥ арозь. Нош котькуд нацпроект улсын вань на нимысьтыз федерал проектъёс — таосыз 67 пумо.

Удмуртия 67 проект пӧлысь 50-аз пыриськоз, ваньмыз та документъёсын юнматэмын ни, — пусйиз Удмуртилэн Тӧроез. — Нош 17-аз асьмеос пыриськыны но ум быгатэ, угось соос асьме улосэн нокызьы герӟаськемын ӧвӧл.
Федерал программаос, кудъёсаз шаермы пыриськоз, герӟаськемын вань удысъёсын ик. Уката тросэз экономикаез юнматыны кулэ. Кылсярысь, одӥгез герӟаськемын вуз поттонэз йылэтонэн, ужтэк кылемъёслэсь лыдзэс кулэстонэн. Элькунысьтымы 19 предприятиос вуз поттонзэс шӧдскымон йылэтозы шуыса веразы. Быгатӥзы ке, соослы пӧртэм пумо юрттэт луоз, кылсярысь, 1 процентъем кредит сётӥськоз, ужасьёссэс дунтэк дышетыны быгатозы но мукет. Нош гурт удысын азинлыко тыршисьёсты ватсаса 200 миллион манет возьма.
Азинтӥськоз сюресъёсты тупатъян но. «Кышкыт луисьтэм но ӟеч сюресъёс» проект интые табере луоз «Автомобиль сюресъёс». Нырысетӥезъя тупатъяны лэземын ке вал бадӟым городъёс котырысь ог 100 иськемозь сюресъёсты гинэ, табере таӵе алонэз уз луы ни. Соин ик вуоно арын элькунмы тросгес уксё висъяны быгатоз уйпал ёросъёсысь сюресъёсты волятонлы но. Россиысь талы ватсаса 964 миллион манет вуоз.
1,16 миллиард манет Россилэн казнаысьтыз лыктыны кулэ «Улон инты» программая. Со коньдонысь оглюкетэз висъяськоз нылпи садъёс, школаос пуктонлы, мукет люкетэз — егит семьяослы улон инты басьтыны. Эшшо — куашкам калэ вуэм юртъёсын улӥсьёсты выль интые выжтонлы.

Урод юртъёсын векаса улӥсьёсты выль интые поттонъя проект 2019-тӥ арысен выльысь ужаны кутскоз! — пусйиз Александр Бречалов. — 2019-тӥ арын талы Россилэн бюджетысьтыз 280 миллион манет пала возьмаськом ни. Ог 1 сюрс муртлэсь улон интызэ умоятыны пӧрмытом. Выль проектэ пыриськыны быгатозы соос, кинъёслэн улон интызы ярантэмен лыдъямын 2017-тӥ арын 1-тӥ январёзь.
Мукетыз бадӟым проект герӟаськемын тазалыкез утёнэн. Вылаз ик, 2019-тӥ ар Удмуртиын тазалыкез утёнлы сӥземын луоз. Соин ик туж трос ужрадъёс чакламын. А. Бречалов верамъя, Россилэн бюджетысьтыз талы 2019-тӥ арын 784 миллион манет вуоз ке, 2021-тӥ арозь оглом — ог 3 миллиард манет. Выль туала тӥрлык басьтыны чакламын лек пыктосъёсъя, сюлэм но сэр висёнъёсъя центръёсы. Выльдыны чакламын туберкулёзэн нюръяськонъя элькун больницаез. Туэ 14 ФАП усьтӥськиз, вуоно арын но та уж азинтӥськоз, нош 50-аз фельдшер-акушер пунктъёсын тупатъян ужъёс ортчозы. Ватсаса вуозы питранъёс вылын ворттылӥсь эмъян центръёс — али соос 8, басьтоно на 4-зэ. Вань та малпанъёсты улонэ пыӵатыны юрттӥськоз Россия но. Нош быдэсак элькун бюджет чотын усьтыны чакламын онкологияя 7 центръёс, соос ужаны кутскозы Сарапулын, Воткаын, Глазовын, Уваын, Эгралан, Можгалан, Ижын.
Вань на дышетонэн, демографиен, инкуазез утёнэн, культураен герӟаськем кун программаос — соосъя республикаямы озьы ик ватсаса уксё вуыны кулэ.

— Россилы возьматӥм, Удмуртия ужаны пӧрмытэ шуыса, — ватсаз А. Бречалов. — Соин ик данмес уськытыны кулэ ӧвӧл. Ужалом! Вуоно арын пусъём Михаил Калашниковлэн вордскемез дырысен 100 ар тырмонэз. Соин валче трос яркытэсь ужрадъёс чакламын. Юбилеез пусъёнэ ӧтемын Россилэн Президентэз Владимир Путин. 

МАЛПАНЪЁС

Э. Касимов

Энвиль Касимов, политик, журналист, суредась:

— Тӧроез кылзыса, трос кужым, мылкыд басьтӥ. Выльдыны чакламын Национальной библиотекаез. Усьтӥськоз нылпиослы театр. Туж потэ на, Суредаськон искусствоосъя музей но мед выльдӥськоз шуыса. Туала вакытэ творчествоен вырись адямиослэн луонлыкъёссы бадӟымесь. Культураысь куд-ог тодмо адямиос вуж сямен малпасько на: мон дано ке, иське, данэным адямие потыны быгатӥсько. Но али творчествоен выриськод-а тон, уд-а — ялан бергано, ужано.

Иван Черезов, «Калашников» концернысь спорт проектъёсъя директор:

И. Черезов

— Усьтӥськозы выль спорткомплексъёс, стадионъёс. Гурт спортсменъёслэн шудонъёссы азинтӥськозы. Элькунамы ӧжыт ӧвӧл пиналъёсты спортэ кыскыны, кыдатыны быгатӥсь дышетӥсьёс-тренеръёс. Соинтэк-а шаерысьтымы трос нимо-дано спортсменъёс пото. Профессиональной спортсменъёслы шаерамы ужаны, бадӟымесь ӵошатсконъёслы дасяськыны луонлык кылдытоно на вылэм.

Александр Майер, Кун Кенешысь Экономикая, политикая, промышленностья но инвестициосъя ялан ужась комиссилэн кивалтӥсез:

А. Майер

— Мар лэсьтыны быгатӥз Удмуртилэн командаез ортчись ар ӵоже — туж пусйымон. 2018-тӥ арез мытӥм вал 64 миллиард манетысен, 2019-тӥ арлы бюджетлэн доход люкетэз 73 миллиард манет чакламын. Ужаны быгатэммес адӟыса ик, Россилэн шаермылы осконэз юнмаз, сыӵе мылкыдзэ медаз ышты шуыса, гижысь-пиньысь тыршоно луом.

Элина Кумачёва

Ангелина Снигирева
By Ангелина Снигирева Декабрь 28, 2018 18:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<