Выт лыдъян вакыт

Ангелина Снигирева
By Ангелина Снигирева 30 ноября, 2018 16:45

27-тӥ ноябре Кун Кенешлэн 9-тӥ сессиезлэн нырысетӥ люкетэз ортчиз. Солэн ужаз пыриськиз Удмуртилэн Тӧроез Александр Бречалов.

Удмурт кыл, студентъёс но общественникъёс

Ӵапак та нуналэ Удмурт кыллэсь нуналзэ пусйимы. Таин валче сессиын, кӧня ке пол кутскыса, чузъяськиз анай кылмы. Кенешонэз нуиз Кун Кенешлэн Тӧроезлэн воштӥсез Владимир Невоструев — депутатъёсын удмурт кылын ӟечбуръяськиз. Нош Кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсез Елена Дербилова вазиськиз: ойдолэ туннэ ваньмы ог-огенымы удмурт сямен ӟечбуръяськом. Депутатъёс соглаш кариськизы! Сессие люкаськемъёсты Удмурт кыллэн нуналэныз ӟечкылаз Удмуртилэн Тӧроез Александр Бречалов. Та нуналлы сӥзем яркытэсь открыткаос депутатъёслы кузьмаз Кун Кенешысь национальной политика понна кыл кутӥсь ялан ужась комиссилэн кивалтӥсез Татьяна Ишматова.

Ӟеч мылкыдын кутскем сессия азинтӥськиз ӟеч ужен — элькунысьтымы вылӥ дышетскон учреждениосын тодон-валан люкась егитъёс Кун Кенешлэн премиеныз пусъемын. Шудоос пӧлын — усто дышетскись, общественной уже мыло-кыдо пыриськись, исследовательской ужъёс нуись студентъёс. Соослы быдэн 11 сюрс 500 манетэн сётэмын. Та премия туэ 4-тӥ ползэ люкылэмын ни.

Эшшо та нуналэ депутатъёс Удмуртиысь Общественной палатае 16 кандидатураосты юнматӥзы. Элькунысьтымы закон кылдытъясь ёз нырысьсэ пыриське та уже — туэ сентябре кутэм «Общественной палаталэсь выль составзэ кылдытон сярысь» постановлениея.

  • Табере общественной палатае 16 кандидатураез ӵектэ Кун Кенеш, эшшо 16-сэ — Удмуртилэн Тӧроез, нош бӧрысь ини та 32 кандидатураос эшшо 16-сэ быръёзы интыосысь калык огазеяськонъёс ӵектэмъёс пӧлысь, — валэктӥз Кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсез Елена Дербилова.

Е. Дербилова верамъя, общественной огазеяськонъёс мыло-кыдо пырисько Общественной палаталэсь выль составзэ кылдытонэ. Кун Кенеше соос 55 кандидатура ӵектӥзы — ваньзы туж адӟем карымонэсь. Соин ик пӧлысьтызы 16-сэ бырйыны капчи ӧй вал. Озьы-а, тазьы-а, но Общественной палатае сюризы, кылсярысь, Удмуртиысь Велоспортъя федерациен кивалтӥсь Валерий Богатырёв, элькунысьтымы дышетон удысын ужасьёслэн профсоюзэнызы кивалтӥсь Наталья Гвоздикова, гурт удысын ужасьёслэн профсоюзэнызы кивалтӥсь Георгий Крылов но мукетъёсыз.

Пунэмъёсмы уката синозы

2019-тӥ но матэктӥсь 2020-тӥ, 2021-тӥ аръёслы бюджетлэн проектэз талэсь азьло эскеремын ни парламентысь ялан ужась комиссиосын но фракциосын, сое учкыса потӥз Правительство, проект ортчиз калык кылзонъёс пыр. Эшшо ке туэ нырысьсэ Кун Кенешлэн но Коньдон ужпумъёсъя министерстволэн сайтъёсазы усьтэмын вал калыклэсь мылкыдъёссэ кутон. Бюджетлэн проектэзлы огъя ӟеч дунъет сётэмын, кылсярысь, Кун Кенешлэн Тӧроезлэн воштӥсез В. Невоструев шуиз: со ӟечгес улом шуыса оскон сётэ.

Мар проектэ шедемын — эшшо одӥг пол тодматӥз коньдон ужпумъёсъя министрлэн воштӥсез Вера Сухих. Котьку сямен ик, Россилэн Президентэзлэн май указъёсыз быдэсъяськозы, нацпроектъёс пыӵатӥськозы, пенсиос, пособиос, уждун дыраз тыриськозы.

  • Коньдон люкылӥськоз 30 кун программаосъя, — пусйиз В. Сухих. — Тужгес трос уксё чакламын дышетон, тазалыкез утён удысъёслы, калыклы улон-вылонын юрттонлы. Нимысьтыз саклык висъяськоз гурт, транспорт, нюлэс хозяйство удысъёслы. Таослы кылем арын мында ик, оло, тросгес но уксё вуыны кулэ. Со сяна, куд-ог программаосын вылез но кылдэмын, кылсярысь, дышетон удысэз азинтонэ пыртэмын городын ужаны кутскись егит дышетӥсьёслы юрттэт сётон — 21 миллиард манетлэсь ятыр чакламын нырысетӥ 3 арзэ школаын ужась визьнодасьёслы.

Элькунмы уз вунэты пунэмаськонъёсмес тырон сярысь но. 2019-тӥ арын соосты эшшо 971 миллион манетлы кулэстыны но 46,052 миллиард манетозь уськытыны чакламын. Тодэ вайытон вылысь: 2018-тӥ арын 1-тӥ январьлы Удмуртилэн пунэмъёсыз 47,023 миллиард манет вал.

Куд-ог депутатъёслэн юанъёссы кылдӥзы ик, пунэмъёсты берыктон вылысь укыр шыръяны ум турттӥське-а шуыса. Со сяна, дышетӥсьёслы, эмъясьёслы, культура удысын ужасьёслы уждун тыронлэсь оглюкетсэ Москва улосъёс вылэ погыльтыны выре — талы казнаысьтымы ватсаса ог 1,8 миллиард манет кулэ луоз. Уксё сюроз-а?

  • Казналэсь доход люкетсэ будэтыны турттом на, — вераз коньдон ужпумъёсъя министрлэн воштӥсез.

Но та вие кыл куриз Удмуртилэн Тӧроез А. Бречалов:

  • Уждун тырыны уксё тырмоз. Зэм, со ичигес кылёз ни экономикаез юнматыны. Но со понна ик асьмеос бюджетэ ватсаса коньдон пыртыны пӧртэм амалъёс утчаськомы. Кылсярысь, 3 миллиард манет пала кулэ луоз дышетон, культура учреждениослэсь виясь липетъёссэс, вуж укнооссэс вошъянлы. Талы бюджетын коньдон учкымтэ. Но сое утчалом, та уж борды ужбергатӥсьёс но басьтӥськыны быгатозы. Элькунысьтымы кӧня ке предприятиос вуз поттонзэс 2-3 поллы йылэтыны дась луэмзэс веразы ни. Озьыен, бюджетэ ватсаса уксё пыртозы. Нош кун соослы ужзэс радъяны юрттӥськоз.

А. Бречалов шуэ: кун служащийёслэсь лыдзэс эшшо кулэстомы, муниципал но кун предприятиосты нимаз адямиос кие сётонэз азинтомы.

  • Озьы туэ 2,2 миллиард манет пала шыръяны пӧрмытӥм, — ватсаз вылӥ кивалтӥсь. — Закупкаосъя улос центр кылдытыса гинэ, 770 миллион манет пала экономия луиз. Кун предприятиосты валаса валтӥськод ке, пайдаез соку ик адӟиське. Кылсярысь, «Удмуртиысь аптекаос» предприятиез банкрот карыны дасяськемын ни вал. Нош ужрадъёс кутэм бере со туэ 40 миллиард манет тыр барыш поттӥз, казнае ватсаса 150 миллион манет пыртӥз. Удмуртия туэ нырысьсэ Россиысь Коньдон ужпумъёсъя министерстволэсь вань куронъёссэ быдэстӥз. Табере элькун бюджетамы Москваысь 10 процентлы тросгес дотациос вуыны кулэ.

Кема кенешемзы бере депутатъёс бюджетлэсь проектсэ 1-тӥ лыдӟемен огъя мылкыдын юнматӥзы. Солэн доход люкетэз ог 65 миллиард 379 миллион манет, расход люкетэз ог 64 миллиард 431 миллион манет, профицитэз 948 миллион манет пала луиз. Но 2-тӥ лыдӟемен юнматытозь, та лыдпусъёс йылыны быгатозы. Угось доход люкетаз али Россиысь 11 миллиард 176 миллион манет субсидиос, дотациос чакламын ке, тодмо ни, та лыдпус эшшо 6-7 миллиард манетлы йылыны быгатоз шуыса.

Шуак уз йылэ

Транспортлы налогъёс элькунамы берло 12 ар ӵоже ӧз вошъяськылэ ни. Ваньбур понна выт тыронын но тыро-пыдо радлык ӧвӧл. Депутатъёс таосын герӟаськем законъёсы воштонъёс пыртӥзы.

Кун Кенешысь Бюджетъя, вытъя но коньдон ужпумъёсъя ялан ужась комиссилэн кивалтӥсез Юрий Тюрин верамъя, 2-сэ ик законопроектъёсты Кун Кенеш но Правительство уртче пыр-поч эскерыса потӥзы. Озьы дэмлан кылдӥз: транспортлы выт тыронъя льгота басьтӥсьёс тросгес мед луозы — списоке пыртэмын пенсионеръёс, трос пинал вордӥсьёс но ожысь ветеранъёс. Со сяна, татчыозь льгота сётӥське вал, машиналэн мощностез 100 вал кужымлэсь ӧз ортчылы ке. Табере со лыдпус 150 вал кужымозь вуыны быгатоз. Озьыен, 50 процентъем льгота басьтӥсьёс тросгес луозы.

Нош кин льгота басьтӥсьёс пӧлы уз шедьы, соос табере тросгес тыриськоно луозы — вытъёслэн быдӟалазы будӥз. Шуом, машиналэн мощностез 100 вал кужымлэсь ичигес ке, котькуд вал кужым понна 14 манет тупатэмын. 150 вал кужымозь машинаослы — 29 манет. Тросгес тыроно луозы снегоход, катер, гидроцикл, вертолёт возисьёс но. Али кадь выт кельтэмын автобусъёс понна гинэ.

  • Пичиен-пичиен будэтыны дэмлаське 1 сюрс квадрат метрлэсь ичигес недвижимость возисьёслэсь вытсэс но, — валэктӥз Юрий Тюрин. — 2019-тӥ арын — 0,6 процентлы, 2020-тӥын — 0,9 процентлы, 2023-тӥ арозь кадастръя дунызлэсь 2 процентсэ тыроно луозы.

Зэм, улыны чакламтэ юртъёс, 3 сюрслэсь ичигес улӥсен гуртъёсын юртъёс понна со 2023-тӥ арозь 1,2 но 1 процентлы гинэ йылоз.

Депутатъёс малпамъя, вытъёс шуак уг будо бере, ужбергатӥсьёс талы пумен дась луозы. Талы дурбасьтӥз Удмуртилэн Тӧроез А. Бречалов но, со шуиз: туннэ Ижысь ик одӥгез вуз карон центр казнае 1,5 миллион манет выт тыре, бордысьтыз ик мукетыз — 400 сюрс манет. Озьы луыны кулэ ӧвӧл.

Элина Кумачёва

Фото басьтэмын udmurt.ru сайтысь

Ангелина Снигирева
By Ангелина Снигирева 30 ноября, 2018 16:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<